໗. ພີຣຓຖມ຺ຠວຄ຺ໂຄ

໒໑໑. ໂສມທຕ຺ຕຊາຕກໍ (໒-໗-໑)

໑໒໑. ອກາສິ ໂຍຄ຺ຄໍ ຘຸວມປ຺ປມຕ຺ໂຕ, ສໍວຈ຺ຉຣໍ ພີຣຓຖມ຺ຠກສ຺ມິໍ;

ພ຺ຍາກາສິ ສຎ຺ຎໍ ປຣິສໍ ວິຄຍ຺ຫ, ນ ນິຍ຺ຍໂມ ຕາຍຕິ ອປ຺ປປຎ຺ຎໍ.

໑໒໒. ທ຺ວຍໍ ຍາຈນໂກ ຕາຕ, ໂສມທຕ຺ຕ ນິຄຈ຺ຉຕິ;

ອລາຠໍ ຘນລາຠໍ ວາ, ເອວໍ ຘມ຺ມາ ຫິ ຍາຈນາຕິ.

ໂສມທຕ຺ຕຊາຕກໍ ປຐມໍ.

໒໑໒. ອຸຈ຺ຉິຏ຺ຐຠຕ຺ຕຊາຕກໍ (໒-໗-໒)

໑໒໓. ອຎ຺ໂຎ ອຸປຣິໂມ ວຓ຺ໂຓ, ອຎ຺ໂຎ ວຓ຺ໂຓ ຈ ເຫຏ຺ຐິໂມ;

ພ຺ຣາຫ຺ມຓີ ຕ຺ເວວ ປຸຈ຺ຉາມິ, ກິໍ ເຫຏ຺ຐາ ກິຎ຺ຈ ອຸປ຺ປຣິ.

໑໒໔. ອຫໍ ນໂຏສ຺ມິ ຠທ຺ທນ຺ເຕ, ຠິກ຺ຂໂກສ຺ມິ ອິຘາຄໂຕ;

ອຍຎ຺ຫິ ໂກຏ຺ຐໂມຕິຓ຺ໂຓ, ອຍໍ ໂສ ຍໍ [ຕ຺ວໍ (ກ.)] ຄເວສສີຕິ.

ອຸຈ຺ຉິຏ຺ຐຠຕ຺ຕຊາຕກໍ ທຸຕິຍໍ.

໒໑໓. ຠຣຸຊາຕກໍ (໒-໗-໓)

໑໒໕. ອິສີນມນ຺ຕຣໍ ກຕ຺ວາ, ຠຣຸຣາຊາຕິ [ກຸຣຸຣາຊາຕິ (ກ.)] ເມ ສຸຕໍ;

ອຸຈ຺ຉິນ຺ໂນ ສຫ ຣຏ຺ເຐຫິ [ຣຏ຺ເຐນ (ສີ. ປີ.)], ສຣາຊາ ວິຠວງ຺ຄໂຕ.

໑໒໖. ຕສ຺ມາ ຫິ ຉນ຺ທາຄມນໍ, ນປ຺ປສໍສນ຺ຕິ ປຓ຺ຑິຕາ;

ອທຸຏ຺ຐຈິຕ຺ໂຕ ຠາເສຍ຺ຍ, ຄິຣໍ ສຈ຺ຈຸປສໍຫິຕນ຺ຕິ.

ຠຣຸຊາຕກໍ [ກຸຣຸຣາຕກໍ (ກ.)] ຕຕິຍໍ.

໒໑໔. ປຸຓ຺ຓນທີຊາຕກໍ (໒-໗-໔)

໑໒໗. ປຸຓ຺ຓໍ ນທິໍ ເຍນ ຈ ເປຍ຺ຍມາຫຸ, ຊາຕໍ ຍວໍ ເຍນ ຈ ຄຸຍ຺ຫມາຫຸ;

ທູຣໍ ຄຕໍ ເຍນ ຈ ອວ຺ຫຍນ຺ຕິ, ໂສ ຕ຺ຍາຄໂຕ [ຕ຺ຍາຠໂຕ (ສ຺ຍາ. ກ.) ປເຫຬິຄາຖາຠາໂວ ມນສິ ກາຕພ຺ໂພ] ຫນ຺ທ ຈ ຠຸຎ຺ຊ ພ຺ຣາຫ຺ມຓ.

໑໒໘. ຍໂຕ ມໍ ສຣຕີ ຣາຊາ, ວາຍສມ຺ປິ ປເຫຕເວ;

ຫໍສາ ໂກຎ຺ຈາ ມຍູຣາ ຈ [ຫໍສໂກຎ຺ຈມຍູຣານໍ (ກ. ອຏ຺ຐ. ປາຐນ຺ຕຣໍ)], ອສຕີເຍວ ປາປິຍາຕິ.

ປຸຓ຺ຓນທີຊາຕກໍ ຈຕຸຕ຺ຖໍ.

໒໑໕. ກຈ຺ຉປຊາຕກໍ (໒-໗-໕)

໑໒໙. ອວຘີ ວຕ ອຕ຺ຕານໍ, ກຈ຺ຉໂປ ພ຺ຍາຫຣໍ ຄິຣໍ [ກຈ຺ຉໂປວ ປພ຺ຍາຫຣໍ (ສ຺ຍາ.), ກຈ຺ຉໂປ ໂສ ປພ຺ຍາຫຣໍ (ກ.)];

ສຸຄ຺ຄຫີຕສ຺ມິໍ ກຏ຺ຐສ຺ມິໍ, ວາຈາຍ ສກິຍາວຘິ.

໑໓໐. ເອຕມ຺ປິ ທິສ຺ວາ ນຣວີຣິຍເສຏ຺ຐ, ວາຈໍ ປມຸຎ຺ເຈ ກຸສລໍ ນາຕິເວລໍ;

ປສ຺ສສິ ພຫຸຠາເຓນ, ກຈ຺ຉປໍ ພ຺ຍສນໍ ຄຕນ຺ຕິ.

ກຈ຺ຉປຊາຕກໍ ປຎ຺ຈມໍ.

໒໑໖. ມຈ຺ຉຊາຕກໍ (໒-໗-໖)

໑໓໑. ນ ມາຍມຄ຺ຄິ ຕປຕິ, ນ ສູໂລ ສາຘຸຕຈ຺ຉິໂຕ;

ຍຎ຺ຈ ມໍ ມຎ຺ຎເຕ ມຈ຺ຉີ, ອຎ຺ຎໍ ໂສ ຣຕິຍາ ຄໂຕ.

໑໓໒. ໂສ ມໍ ທຫຕິ ຣາຄຄ຺ຄິ, ຈິຕ຺ຕໍ ຈູປຕເປຕິ ມໍ;

ຊາລິໂນ ມຸຎ຺ຈຖາຍິຣາ ມໍ, ນ ກາເມ ຫຎ຺ຎເຕ ກ຺ວຈີຕິ.

ມຈ຺ຉຊາຕກໍ ຉຏ຺ຐໍ.

໒໑໗. ເສຄ຺ຄຸຊາຕກໍ (໒-໗-໗)

໑໓໓. ສພ຺ໂພ ໂລໂກ ອຕ຺ຕມໂນ ອໂຫສິ, ອໂກວິທາ ຄາມຘມ຺ມສ຺ສ ເສຄ຺ຄຸ;

ໂກມາຣິ ໂກ ນາມ [ໂກມາຣິກາ ນາມ (ກ.), ໂກມາຣິໂກ ນາມ (ສ຺ຍາ. ປີ.)] ຕວຊ຺ຊ ຘມ຺ໂມ, ຍໍ ຕ຺ວໍ ຄຫິຕາ ປວເນ ປໂຣທສິ.

໑໓໔. ໂຍ ທຸກ຺ຂຜຸຏ຺ຐາຍ ຠເວຍ຺ຍ ຕາຓໍ, ໂສ ເມ ປິຕາ ທຸພ຺ຠິ ວເນ ກໂຣຕິ;

ສາ ກສ຺ສ ກນ຺ທາມິ ວນສ຺ສ ມຊ຺ເຌ, ໂຍ ຕາຍິຕາ ໂສ ສຫສໍ ກໂຣຕີຕິ.

ເສຄ຺ຄຸຊາຕກໍ ສຕ຺ຕມໍ.

໒໑໘. ກູຏວາຓິຊຊາຕກໍ (໒-໗-໘)

໑໓໕. ສຐສ຺ສ ສາເຐຍ຺ຍມິທໍ ສຸຈິນ຺ຕິຕໍ, ປຈ຺ໂຈຑ຺ຑິຕໍ ປຏິກູຏສ຺ສ ກູຏໍ;

ຜາລຎ຺ເຈ ຂາເທຍ຺ຍຸໍ [ອເທຍ຺ຍຸໍ (ສີ. ປີ.)] ມູສິກາ, ກສ຺ມາ ກຸມາຣໍ ກຸລລາ ນ [ໂນ (ສີ. ສ຺ຍາ. ປີ.)] ຫເຣຍ຺ຍຸໍ.

໑໓໖. ກູຏສ຺ສ ຫິ ສນ຺ຕິ [ສນ຺ຕີຘ (ກ.)] ກູຏກູຏາ, ຠວຕິ [ຠວນ຺ຕິ (ກ.)] ຈາປິ ນິກຕິໂນ ນິກຕ຺ຍາ;

ເທຫິ ປຸຕ຺ຕນຏ຺ຐ ຜາລນຏ຺ຐສ຺ສ ຜາລໍ, ມາ ເຕ ປຸຕ຺ຕມຫາສິ ຜາລນຏ຺ໂຐຕິ.

ກູຏວາຓິຊຊາຕກໍ ອຏ຺ຐມໍ.

໒໑໙. ຄຣຫິຕຊາຕກໍ (໒-໗-໙)

໑໓໗. ຫິຣຎ຺ຎໍ ເມ ສຸວຓ຺ຓໍ ເມ, ເອສາ ຣຕ຺ຕິໍ ທິວາ ກຖາ;

ທຸມ຺ເມຘານໍ ມນຸສ຺ສານໍ, ອຣິຍຘມ຺ມໍ ອປສ຺ສຕໍ.

໑໓໘. ທ຺ເວ ທ຺ເວ ຄຫປຕໂຍ ເຄເຫ, ເອໂກ ຕຕ຺ຖ ອມສ຺ສຸໂກ;

ລມ຺ພຕ຺ຖໂນ ເວຓິກໂຕ, ອໂຖ ອງ຺ກິຕກຓ຺ຓໂກ;

ກີໂຕ ຘເນນ ພຫຸນາ, ໂສ ຕໍ ວິຕຸທເຕ ຊນນ຺ຕິ.

ຄຣຫິຕຊາຕກໍ ນວມໍ.

໒໒໐. ຘມ຺ມຘຊຊາຕກໍ (໒-໗-໑໐)

໑໓໙. ສຸຂໍ ຊີວິຕຣູໂປສິ, ຣຏ຺ຐາ ວິວນມາຄໂຕ;

ໂສ ເອກໂກ ຣຸກ຺ຂມູເລ [ອຣຎ຺ຎສ຺ມິໍ (ສີ. ສ຺ຍາ. ປີ.)], ກປໂຓ ວິຍ ຌາຍສິ.

໑໔໐. ສຸຂໍ ຊີວິຕຣູໂປສ຺ມິ, ຣຏ຺ຐາ ວິວນມາຄໂຕ;

ໂສ ເອກໂກ ຣຸກ຺ຂມູເລ, ກປໂຓ ວິຍ ຌາຍາມິ;

ສຕໍ ຘມ຺ມໍ ອນຸສ຺ສຣໍຕິ.

ຘມ຺ມຘຊຊາຕກໍ ທສມໍ.

ພີຣຓຖມ຺ຠວຄ຺ໂຄ ສຕ຺ຕໂມ.

ຕສ຺ສຸທ຺ທານໍ –

ອຖ ພີຣຓຖມ຺ຠວໂຣ ຈ ນໂຏ, ຠຣຸຣາຊວຣຸຕ຺ຕມປຸຓ຺ຓນທີ;

ພຫຸຠາຓິ ອຄ຺ຄິປວເນ ມູສິກາ, ສຫລມ຺ພຕ຺ຖໂນ ກປເຓນ ທສາຕິ.