໒. ທຸກນິປາໂຕ

໑. ທຬ຺ຫວຄ຺ໂຄ

໑໕໑. ຣາໂຊວາທຊາຕກໍ (໒-໑-໑)

໑. ທຬ຺ຫໍ ທຬ຺ຫສ຺ສ ຂິປຕິ, ພລ຺ລິໂກ [ມລ຺ລິໂກ (ສີ. ປີ.)] ມຸທຸນາ ມຸທຸໍ;

ສາຘຸມ຺ປິ ສາຘຸນາ ເຊຕິ, ອສາຘຸມ຺ປິ ອສາຘຸນາ;

ເອຕາທິໂສ ອຍໍ ຣາຊາ, ມຄ຺ຄາ ອຸຍ຺ຍາຫິ ສາຣຖິ.

໒. ອກ຺ໂກເຘນ ຊິເນ ໂກຘໍ, ອສາຘຸໍ ສາຘຸນາ ຊິເນ;

ຊິເນ ກທຣິຍໍ ທາເນນ, ສຈ຺ເຈນາລິກວາທິນໍ;

ເອຕາທິໂສ ອຍໍ ຣາຊາ, ມຄ຺ຄາ ອຸຍ຺ຍາຫິ ສາຣຖີຕິ.

ຣາໂຊວາທຊາຕກໍ ປຐມໍ.

໑໕໒. ອສເມກ຺ຂິຕກມ຺ມນ຺ຕໍ, ຕຸຣິຕາຠິນິປາຕິນໍ.

ສານິ ກມ຺ມານິ ຕປ຺ເປນ຺ຕິ, ອຸຓ຺ຫໍວຊ຺ໂຌຫິຕໍ ມຸເຂ.

໔. ສີໂຫ ຈ ສີຫນາເທນ, ທທ຺ທຣໍ ອຠິນາທຍິ;

ສຸຕ຺ວາ ສີຫສ຺ສ ນິຄ຺ໂຆສໍ, ສິງ຺ຄາໂລ [ສິຄາໂລ (ສີ. ສ຺ຍາ. ປີ.)] ທທ຺ທເຣ ວສໍ;

ຠີໂຕ ສນ຺ຕາສມາປາທິ, ຫທຍຎ຺ຈສ຺ສ ອປ຺ຜລີຕິ.

ສິງ຺ຄາລຊາຕກໍ [ສິຄາລຊາຕກໍ (ສີ. ສ຺ຍາ. ປີ.)] ທຸຕິຍໍ.

໑໕໓. ສູກຣຊາຕກໍ (໒-໑-໓)

໕. ຈຕຸປ຺ປໂທ ອຫໍ ສມ຺ມ, ຕ຺ວມ຺ປິ ສມ຺ມ ຈຕຸປ຺ປໂທ;

ເອຫິ ສມ຺ມ [ສີຫ (ສີ. ປີ.)] ນິວຕ຺ຕສ຺ສຸ, ກິໍ ນຸ ຠີໂຕ ປລາຍສິ.

໖. ອສຸຈິ ປູຕິໂລໂມສິ, ທຸຄ຺ຄນ຺ໂຘ ວາສິ ສູກຣ;

ສເຈ ຍຸຊ຺ຌິຕຸກາໂມສິ, ຊຍໍ ສມ຺ມ ທທາມິ ເຕຕິ.

ສູກຣຊາຕກໍ ຕຕິຍໍ.

໑໕໔. ອຸຣຄຊາຕກ (໒-໑-໔)

໗. ອິຘູຣຄານໍ ປວໂຣ ປວິຏ຺ໂຐ, ເສລສ຺ສ ວຓ຺ເຓນ ປໂມກ຺ຂມິຈ຺ຉໍ;

ພ຺ຣຫ຺ມຎ຺ຈ ວຓ຺ຓໍ [ວກ຺ກໍ (ກ.)] ອປຈາຍມາໂນ, ພຸຠຸກ຺ຂິໂຕ ໂນ ວິຕຣາມິ [ວິສຫາມິ (ກ. ສິ. ສ຺ຍາ. ປີ.)] ໂຠຕ຺ຕຸໍ.

໘. ໂສ ພ຺ຣຫ຺ມຄຸຕ຺ໂຕ ຈິຣເມວ ຊີວ, ທິພ຺ຍາ ຈ ເຕ ປາຕຸຠວນ຺ຕຸ ຠກ຺ຂາ;

ໂຍ ພ຺ຣຫ຺ມວຓ຺ຓໍ ອປຈາຍມາໂນ, ພຸຠຸກ຺ຂິໂຕ ໂນ ວິຕຣາສິ [ສພ຺ພຕ຺ຖປິ ສມານໍ] ໂຠຕ຺ຕຸນ຺ຕິ.

ອຸຣຄຊາຕກໍ ຈຕຸຕ຺ຖໍ.

໑໕໕. ຠຄ຺ຄຊາຕກໍ (໒-໑-໕)

໙. ຊີວ ວສ຺ສສຕໍ ຠຄ຺ຄ [ຄຄ຺ຄ (ສີ. ປີ.)], ອປຣານິ ຈ ວີສຕິໍ [ວີສຕິ (ສ຺ຍາ. ກ.)];

ມາ ມໍ ປິສາຈາ ຂາທນ຺ຕຸ, ຊີວ ຕ຺ວໍ ສຣໂທ ສຕໍ.

໑໐. ຕ຺ວມ຺ປິ ວສ຺ສສຕໍ ຊີວ, ອປຣານິ ຈ ວີສຕິໍ;

ວິສໍ ປິສາຈາ ຂາທນ຺ຕຸ, ຊີວ ຕ຺ວໍ ສຣໂທ ສຕນ຺ຕິ.

ຠຄ຺ຄຊາຕກໍ ປຎ຺ຈມໍ.

໑໕໖. ອລີນຈິຕ຺ຕຊາຕກໍ (໒-໑-໖)

໑໑. ອລີນຈິຕ຺ຕໍ ນິສ຺ສາຍ, ປຫຏ຺ຐາ ມຫຕີ ຈມູ;

ໂກສລໍ ເສນາສນ຺ຕຸຏ຺ຐໍ, ຊີວຄ຺ຄາຫໍ ອຄາຫຍິ.

໑໒. ເອວໍ ນິສ຺ສຍສມ຺ປນ຺ໂນ, ຠິກ຺ຂຸ ອາຣທ຺ຘວີຣິໂຍ;

ຠາວຍໍ ກຸສລໍ ຘມ຺ມໍ, ໂຍຄກ຺ເຂມສ຺ສ ປຕ຺ຕິຍາ;

ປາປຸເຓ ອນຸປຸພ຺ເພນ, ສພ຺ພສໍໂຍຊນກ຺ຂຍນ຺ຕິ.

ອລີນຈິຕ຺ຕຊາຕກໍ ຉຏ຺ຐໍ.

໑໕໗. ຄຸຓຊາຕກໍ (໒-໑-໗)

໑໓. ເຍນ ກາມໍ ປຓາເມຕິ, ຘມ຺ໂມ ພລວຕໍ ມິຄີ;

ອຸນ຺ນທນ຺ຕີ ວິຊານາຫິ, ຊາຕໍ ສຣຓໂຕ ຠຍໍ.

໑໔. ອປິ ເຈປິ ທຸພ຺ພໂລ ມິຕ຺ໂຕ, ມິຕ຺ຕຘມ຺ເມສຸ ຕິຏ຺ຐຕິ;

ໂສ ຎາຕໂກ ຈ ພນ຺ຘຸ ຈ, ໂສ ມິຕ຺ໂຕ ໂສ ຈ ເມ ສຂາ;

ທາຐິນິ ມາຕິມຎ຺ຎິຕ຺ໂຖ [ມຎ຺ຎິໂວ (ສ຺ຍາ.), ມຎ຺ຎວ຺ໂຫ (ກ.)], ສິງ຺ຄາໂລ ມມ ປາຓໂທຕິ.

ຄຸຓຊາຕກໍ ສຕ຺ຕມໍ.

໑໕໘. ສຸຫນຸຊາຕກໍ (໒-໑-໘)

໑໕. ນຍິທໍ ວິສມສີເລນ, ໂສເຓນ ສຸຫນູ ສຫ;

ສຸຫນູປິ ຕາທິໂສເຍວ, ໂຍ ໂສຓສ຺ສ ສໂຄຈໂຣ.

໑໖. ປກ຺ຂນ຺ທິນາ ປຄພ຺ເຠນ, ນິຈ຺ຈໍ ສນ຺ທານຂາທິນາ;

ສເມຕິ ປາປໍ ປາເປນ, ສເມຕິ ອສຕາ ອສນ຺ຕິ.

ສຸຫນຸຊາຕກໍ ອຏ຺ຐມໍ.

໑໕໙. ໂມຣຊາຕກໍ (໒-໑-໙)

໑໗. ອຸເທຕຍໍ ຈກ຺ຂຸມາ ເອກຣາຊາ, ຫຣິສ຺ສວຓ຺ໂຓ ປຖວິປ຺ປຠາໂສ [ປຐວິປ຺ປຠາໂສ (ສີ. ສ຺ຍາ. ປີ.)];

ຕໍ ຕໍ ນມສ຺ສາມິ ຫຣິສ຺ສວຓ຺ຓໍ ປຖວິປ຺ປຠາສໍ, ຕຍາຊ຺ຊ ຄຸຕ຺ຕາ ວິຫເຣມຸ ທິວສໍ.

ເຍ ພ຺ຣາຫ຺ມຓາ ເວທຄູ ສພ຺ພຘມ຺ເມ, ເຕ ເມ ນໂມ ເຕ ຈ ມໍ ປາລຍນ຺ຕຸ;

ນມຕ຺ຖຸ ພຸທ຺ຘານໍ [ພຸທ຺ຘານ (?)] ນມຕ຺ຖຸ ໂພຘິຍາ, ນໂມ ວິມຸຕ຺ຕານໍ [ວິມຸຕ຺ຕານ (?)] ນໂມ ວິມຸຕ຺ຕິຍາ;

ອິມໍ ໂສ ປຣິຕ຺ຕໍ ກຕ຺ວາ, ໂມໂຣ ຈຣຕິ ເອສນາ.

໑໘. ອເປຕຍໍ ຈກ຺ຂຸມາ ເອກຣາຊາ, ຫຣິສ຺ສວຓ຺ໂຓ ປຖວິປ຺ປຠາໂສ;

ຕໍ ຕໍ ນມ຺ມສ຺ສາມິ ຫຣິສ຺ສວຓ຺ຓໍ ປຖວິປ຺ປຠາສໍ, ຕຍາຊ຺ຊ ຄຸຕ຺ຕາ ວິຫເຣມຸ ຣຕ຺ຕິໍ.

ເຍ ພ຺ຣາຫ຺ມຓາ ເວທຄູ ສພ຺ພຘມ຺ເມ, ເຕ ເມ ນໂມ ເຕ ຈ ມໍ ປາລຍນ຺ຕຸ;

ນມຕ຺ຖຸ ພຸທ຺ຘານໍ ນມຕ຺ຖຸ ໂພຘິຍາ, ນໂມ ວິມຸຕ຺ຕານໍ ນໂມ ວິມຸຕ຺ຕິຍາ;

ອິມໍ ໂສ ປຣິຕ຺ຕໍ ກຕ຺ວາ, ໂມໂຣ ວາສມກປ຺ປຍີຕິ.

ໂມຣຊາຕກໍ ນວມໍ.

໑໖໐. ວິນີລຊາຕກໍ (໒-໑-໑໐)

໑໙. ເອວເມວ ນູນ [ນຸ (ກ.)] ຣາຊານໍ, ເວເທຫໍ ມິຖິລຄ຺ຄຫໍ;

ອສ຺ສາ ວຫນ຺ຕິ ອາຊຎ຺ຎາ, ຍຖາ ຫໍສາ ວິນີລກໍ.

໒໐. ວິນີລ ທຸຄ຺ຄໍ ຠຊສິ, ອຠູມິໍ ຕາຕ ເສວສິ;

ຄາມນ຺ຕການິ [ຄາມນ຺ຕິການິ (ສີ.), ຄາມນ຺ຕຣານິ (ກ.)] ເສວສ຺ສຸ, ເອຕໍ ມາຕາລຍໍ ຕວາຕິ.

ວິນີລຊາຕກໍ ທສມໍ.

ທຬ຺ຫວຄ຺ໂຄ ປຐໂມ.

ຕສ຺ສຸທ຺ທານໍ –

ວຣພລ຺ລິກ ທທ຺ທຣ ສູກຣໂກ, ອຸຣຄູຕ຺ຕມ ປຎ຺ຈມຠຄ຺ຄວໂຣ;

ມຫຕີຈມຸ ຍາວ ສິງ຺ຄາລວໂຣ, ສຸຫນຸຕ຺ຕມ ໂມຣ ວິນີລໍ ທສາຕິ.

໒. ສນ຺ຖວວຄ຺ໂຄ

໑໖໑. ອິນ຺ທສມານໂຄຕ຺ຕຊາຕກໍ (໒-໒-໑)

໒໑. ນ ສນ຺ຖວໍ [ສນ຺ຘວໍ (ກ.)] ກາປຸຣິເສນ ກຍິຣາ, ອຣິໂຍ ອນຣິເຍນ ປຊານມຕ຺ຖໍ;

ຈິຣານຸວຸຕ຺ໂຖປິ ກໂຣຕິ ປາປໍ, ຄໂຊ ຍຖາ ອິນ຺ທສມານໂຄຕ຺ຕໍ.

໒໒. ຍໍ ຕ຺ເວວ ຊຎ຺ຎາ ສທິໂສ ມມນ຺ຕິ, ສີເລນ ປຎ຺ຎາຍ ສຸເຕນ ຈາປິ;

ເຕເນວ ເມຕ຺ຕິໍ ກຍິຣາຖ ສທ຺ຘິໍ, ສຸໂຂ ຫເວ ສປ຺ປຸຣິເສນ ສງ຺ຄໂມຕິ.

ອິນ຺ທສມານໂຄຕ຺ຕຊາຕກໍ ປຐມໍ.

໑໖໒. ສນ຺ຖວຊາຕກໍ (໒-໒-໒)

໒໓. ນ ສນ຺ຖວສ຺ມາ ປຣມຕ຺ຖິ ປາປິໂຍ, ໂຍ ສນ຺ຖໂວ [ສນ຺ຘໂວ (ກ.)] ກາປຸຣິເສນ ໂຫຕິ;

ສນ຺ຕປ຺ປິໂຕ ສປ຺ປິນາ ປາຍເສນ [ປາຍາເສນ (ກ.)], ກິຈ຺ຉາກຕໍ ປຓ຺ຓກຸຏິໍ ອທຍ຺ຫິ [ອທຑ຺ຒຫິ (ສີ. ສ຺ຍາ.), ອທຏ຺ຐຫິ (ປີ.), ອທທ຺ທຫິ (?)].

໒໔. ນ ສນ຺ຖວສ຺ມາ ປຣມຕ຺ຖິ ເສຍ຺ໂຍ, ໂຍ ສນ຺ຖໂວ ສປ຺ປຸຣິເສນ ໂຫຕິ;

ສີຫສ຺ສ ພ຺ຍຄ຺ຆສ຺ສ ຈ ທີປິໂນ ຈ, ສາມາ ມຸຂໍ ເລຫຕິ ສນ຺ຖເວນາຕິ.

ສນ຺ຖວຊາຕກໍ ທຸຕິຍໍ.

໑໖໓. ສຸສີມຊາຕກໍ (໒-໒-໓)

໒໕. ກາຬາ ມິຄາ ເສຕທນ຺ຕາ ຕວີເມ [ຕວ ອິເມ (ສີ. ສ຺ຍາ. ປີ.)], ປໂຣສຕໍ ເຫມຊາລາຠິຉນ຺ນາ [ເຫມຊາລາຠິສຎ຺ຉນ຺ນາ (ສີ.)];

ເຕ ເຕ ທທາມີຕິ ສຸສີມ ພ຺ຣູສິ, ອນຸສ຺ສຣໍ ເປຕ຺ຕິປິຕາມຫານໍ.

໒໖. ກາຬາ ມິຄາ ເສຕທນ຺ຕາ ມມີເມ [ມມ ອິເມ (ສີ. ປີ.)], ປໂຣສຕໍ ເຫມຊາລາຠິຈ຺ຉນ຺ນາ;

ເຕ ເຕ ທທາມີຕິ ວທາມິ ມາຓວ, ອນຸສ຺ສຣໍ ເປຕ຺ຕິປິຕາມຫານນ຺ຕິ.

ສຸສີມຊາຕກໍ ຕຕິຍໍ.

໑໖໔. ຄິຊ຺ຌຊາຕກໍ (໒-໒-໔)

໒໗. ຍໍ ນຸ ຄິຊ຺ໂຌ ໂຍຊນສຕໍ, ກຸຓປານິ ອເວກ຺ຂຕິ;

ກສ຺ມາ ຊາລຎ຺ຈ ປາສຎ຺ຈ, ອາສຊ຺ຊາປິ ນ ພຸຊ຺ຌສິ.

໒໘. ຍທາ ປຣາຠໂວ ໂຫຕິ, ໂປໂສ ຊີວິຕສງ຺ຂເຍ;

ອຖ ຊາລຎ຺ຈ ປາສຎ຺ຈ, ອາສຊ຺ຊາປິ ນ ພຸຊ຺ຌຕີຕິ.

ຄິຊ຺ຌຊາຕກໍ ຈຕຸຕ຺ຖໍ.

໑໖໕. ນກຸລຊາຕກໍ (໒-໒-໕)

໒໙. ສນ຺ຘິໍ ກຕ຺ວາ ອມິຕ຺ເຕນ, ອຓ຺ຑເຊນ ຊລາພຸຊ;

ວິວຣິຍ ທາຐໍ ເສສິ [ສຍສິ (ສີ. ສ຺ຍາ. ປີ.)], ກຸໂຕ ເຕ ຠຍມາຄຕໍ.

໓໐. ສງ຺ເກເຖວ [ສງ຺ກເຕວ (ກ.)] ອມິຕ຺ຕສ຺ມິໍ, ມິຕ຺ຕສ຺ມິມ຺ປິ ນ ວິສ຺ສເສ;

ອຠຍາ ຠຍມຸປ຺ປນ຺ນໍ, ອປິ ມູລານິ ກນ຺ຕຕີຕິ [ມູລໍ ນິກນ຺ຕຕີຕິ (ສີ.)].

ນກຸລຊາຕກໍ ປຎ຺ຈມໍ.

໑໖໖. ອຸປສາຬກຊາຕກໍ (໒-໒-໖)

໓໑. ອຸປສາຬກນາມານິ [ອຸປສາຬ຺ຫກນາມານໍ (ສີ. ສ຺ຍາ. ປີ.)], ສຫສ຺ສານິ ຈຕຸທ຺ທສ;

ອສ຺ມິໍ ປເທເສ ທຑ຺ຒານິ, ນຕ຺ຖິ ໂລເກ ອນາມຕໍ.

໓໒. ຍມ຺ຫິ ສຈ຺ຈຎ຺ຈ ຘມ຺ໂມ ຈ, ອຫິໍສາ ສໍຍໂມ ທໂມ;

ເອຕໍ ອຣິຍາ ເສວນ຺ຕິ, ເອຕໍ ໂລເກ ອນາມຕນ຺ຕິ.

ອຸປສາຬກຊາຕກໍ ຉຏ຺ຐໍ.

໑໖໗. ສມິທ຺ຘິຊາຕກໍ (໒-໒-໗)

໓໓. ອຠຸຕ຺ວາ ຠິກ຺ຂສິ ຠິກ຺ຂຸ, ນ ຫິ ຠຸຕ຺ວານ ຠິກ຺ຂສິ;

ຠຸຕ຺ວານ ຠິກ຺ຂຸ ຠິກ຺ຂສ຺ສຸ, ມາ ຕໍ ກາໂລ ອຸປຈ຺ຈຄາ.

໓໔. ກາລໍ ໂວຫໍ ນ ຊານາມິ, ຉນ຺ໂນ ກາໂລ ນ ທິສ຺ສຕິ;

ຕສ຺ມາ ອຠຸຕ຺ວາ ຠິກ຺ຂາມິ, ມາ ມໍ ກາໂລ ອຸປຈ຺ຈຄາຕິ.

ສມິທ຺ຘິຊາຕກໍ ສຕ຺ຕມໍ.

໑໖໘. ສກຸຓຄ຺ຆິຊາຕກໍ (໒-໒-໘)

໓໕. ເສໂນ ພລສາ ປຕມາໂນ, ລາປໍ ໂຄຈຣຐາຍິນໍ;

ສຫສາ ອຊ຺ຌປ຺ປຕ຺ໂຕວ, ມຣຓໍ ເຕນຸປາຄມິ.

໓໖. ໂສຫໍ ນເຍນ ສມ຺ປນ຺ໂນ, ເປຕ຺ຕິເກ ໂຄຈເຣ ຣໂຕ;

ອເປຕສຕ຺ຕຸ ໂມທາມິ, ສມ຺ປສ຺ສໍ ອຕ຺ຖມຕ຺ຕໂນຕິ.

ສກຸຓຄ຺ຆິຊາຕກໍ ອຏ຺ຐມໍ.

໑໖໙. ອຣກຊາຕກໍ (໒-໒-໙)

໓໗. ໂຍ ເວ ເມຕ຺ເຕນ ຈິຕ຺ເຕນ, ສພ຺ພໂລການຸກມ຺ປຕິ;

ອຸທ຺ຘໍ ອໂຘ ຈ ຕິຣິຍໍ, ອປ຺ປມາເຓນ ສພ຺ພໂສ.

໓໘. ອປ຺ປມາຓໍ ຫິຕໍ ຈິຕ຺ຕໍ, ປຣິປຸຓ຺ຓໍ ສຸຠາວິຕໍ;

ຍໍ ປມາຓກຕໍ ກມ຺ມໍ, ນ ຕໍ ຕຕ຺ຣາວສິສ຺ສຕີຕິ.

ອຣກຊາຕກໍ ນວມໍ.

໑໗໐. ກກຓ຺ຏກຊາຕກໍ (໒-໒-໑໐)

໓໙. ນາຍໍ ປຸເຣ ອຸຓ຺ຓມຕິ [ອຸນ຺ນມຕິ (ສ຺ຍາ.)], ໂຕຣຓຄ຺ເຄ ກກຓ຺ຏໂກ;

ມໂຫສຘ ວິຊານາຫິ, ເກນ ຖທ຺ໂຘ ກກຓ຺ຏໂກ.

໔໐. ອລທ຺ຘປຸພ຺ພໍ ລທ຺ຘານ, ອຑ຺ຒມາສໍ ກກຓ຺ຏໂກ;

ອຕິມຎ຺ຎຕິ ຣາຊານໍ, ເວເທຫໍ ມິຖິລຄ຺ຄຫນ຺ຕິ.

ກກຓ຺ຏກຊາຕກໍ ທສມໍ.

ສນ຺ຖວວຄ຺ໂຄ ທຸຕິໂຍ.

ຕສ຺ສຸທ຺ທານໍ –

ອຖ ອິນ຺ທສມານ ສປຓ຺ຓກຸຏິ, ສຸສິມຸຕ຺ຕມ ຄິຊ຺ຌ ຊລາພຸຊໂກ;

ອຸປສາຬກ ຠິກ຺ຂຸ ສລາປວໂຣ, ອຖ ເມຕ຺ຕວໂຣ ທສປຸຓ຺ຓມຕີຕິ.

໓. ກລ຺ຍາຓວຄ຺ໂຄ

໑໗໑. ກລ຺ຍາຓຘມ຺ມຊາຕກໍ (໒-໓-໑)

໔໑. ກລ຺ຍາຓຘມ຺ໂມຕິ ຍທາ ຊນິນ຺ທ, ໂລເກ ສມຎ຺ຎໍ ອນຸປາປຸຓາຕິ;

ຕສ຺ມາ ນ ຫິຍ຺ເຍຖ [ຫີເຍຖ (ສີ.)] ນໂຣ ສປຎ຺ໂຎ, ຫິຣິຍາປິ ສນ຺ໂຕ ຘຸຣມາທິຍນ຺ຕິ.

໔໒. ສາຍໍ ສມຎ຺ຎາ ອິຘ ມຊ຺ຊ ປຕ຺ຕາ, ກລ຺ຍາຓຘມ຺ໂມຕິ ຊນິນ຺ທ ໂລເກ;

ຕາຫໍ ສເມກ຺ຂໍ ອິຘ ປພ຺ພຊິສ຺ສໍ, ນ ຫິ ມຕ຺ຖິ ຉນ຺ໂທ ອິຘ ກາມໂຠເຄຕິ.

ກລ຺ຍາຓຘມ຺ມຊາຕກໍ ປຐມໍ.

໑໗໒. ທທ຺ທຣຊາຕກໍ (໒-໓-໒)

໔໓. ໂກ ນຸ ສທ຺ເທນ ມຫຕາ, ອຠິນາເທຕິ ທທ຺ທຣໍ;