໘. ກາສາວວຄ຺ໂຄ

໒໒໑. ກາສາວຊາຕກໍ (໒-໘-໑)

໑໔໑. ອນິກ຺ກສາໂວ ກາສາວໍ, ໂຍ ວຕ຺ຖໍ ປຣິທຫິສ຺ສຕິ [ປຣິທເຫສ຺ສຕິ (ສີ. ປີ.)];

ອເປໂຕ ທມສຈ຺ເຈນ, ນ ໂສ ກາສາວມຣຫຕິ.

໑໔໒. ໂຍ ຈ ວນ຺ຕກສາວສ຺ສ, ສີເລສຸ ສຸສມາຫິໂຕ;

ອຸເປໂຕ ທມສຈ຺ເຈນ, ສ ເວ ກາສາວມຣຫຕີຕິ.

ກາສາວຊາຕກໍ ປຐມໍ.

໒໒໒. ຈູຬນນ຺ທິຍຊາຕກໍ (໒-໘-໒)

໑໔໓. ອິທໍ ຕທາຈຣິຍວໂຈ, ປາຣາສຣິໂຍ ຍທພ຺ຣວິ [ໂປຣາຓາຈຣິໂຍພ຺ຣວິ (ກ.)];

ມາສຸ ຕ຺ວໍ ອກຣິ [ອກຣາ (ສີ. ປີ.)] ປາປໍ, ຍໍ ຕ຺ວໍ ປຈ຺ຉາ ກຕໍ ຕເປ.

໑໔໔. ຍານິ ກໂຣຕິ ປຸຣິໂສ, ຕານິ ອຕ຺ຕນິ ປສ຺ສຕິ;

ກລ຺ຍາຓກາຣີ ກລ຺ຍາຓໍ, ປາປກາຣີ ຈ ປາປກໍ;

ຍາທິສໍ ວປເຕ ພີຊໍ, ຕາທິສໍ ຫຣເຕ ຜລນ຺ຕິ.

ຈູຬນນ຺ທິຍຊາຕກໍ ທຸຕິຍໍ.

໒໒໓. ປຸຏຠຕ຺ຕຊາຕກໍ (໒-໘-໓)

໑໔໕. ນເມ ນມນ຺ຕສ຺ສ ຠເຊ ຠຊນ຺ຕໍ, ກິຈ຺ຈານຸກຸພ຺ພສ຺ສ ກເຣຍ຺ຍ ກິຈ຺ຈໍ;

ນານຕ຺ຖກາມສ຺ສ ກເຣຍ຺ຍ ອຕ຺ຖໍ, ອສມ຺ຠຊນ຺ຕມ຺ປິ ນ ສມ຺ຠເຊຍ຺ຍ.

໑໔໖. ຈເຊ ຈຊນ຺ຕໍ ວນຖໍ ນ ກຍິຣາ, ອເປຕຈິຕ຺ເຕນ ນ ສມ຺ຠເຊຍ຺ຍ;

ທິໂຊ ທຸມໍ ຂີຓຜລນ຺ຕິ ຎຕ຺ວາ, ອຎ຺ຎໍ ສເມກ຺ເຂຍ຺ຍ ມຫາ ຫິ ໂລໂກຕິ.

ປຸຏຠຕ຺ຕຊາຕກໍ ຕຕິຍໍ.

໒໒໔. ກຸມ຺ຠິລຊາຕກໍ (໒-໘-໔)

໑໔໗. ຍສ຺ເສເຕ ຈຕຸໂຣ ຘມ຺ມາ, ວານຣິນ຺ທ ຍຖາ ຕວ;

ສຈ຺ຈໍ ຘມ຺ໂມ ຘິຕິ ຈາໂຄ, ທິຏ຺ຐໍ ໂສ ອຕິວຕ຺ຕຕິ.

໑໔໘. ຍສ຺ສ ເຈເຕ ນ ວິຊ຺ຊນ຺ຕິ, ຄຸຓາ ປຣມຠທ຺ທກາ;

ສຈ຺ຈໍ ຘມ຺ໂມ ຘິຕິ ຈາໂຄ, ທິຏ຺ຐໍ ໂສ ນາຕິວຕ຺ຕຕີຕິ.

ກຸມ຺ຠິລຊາຕກໍ ຈຕຸຕ຺ຖໍ.

໒໒໕. ຂນ຺ຕິວຓ຺ຓຊາຕກໍ (໒-໘-໕)

໑໔໙. ອຕ຺ຖິ ເມ ປຸຣິໂສ ເທວ, ສພ຺ພກິຈ຺ເຈສຸ ພ຺ຍາວໂຏ [ວາວໂຏ (ກ.)];

ຕສ຺ສ ເຈໂກປຣາຘຕ຺ຖິ, ຕຕ຺ຖ ຕ຺ວໍ ກິນ຺ຕິ ມຎ຺ຎສິ.

໑໕໐. ອມ຺ຫາກມ຺ປຕ຺ຖິ ປຸຣິໂສ, ເອທິໂສ ອິຘ ວິຊ຺ຊຕິ;

ທຸລ຺ລໂຠ ອງ຺ຄສມ຺ປນ຺ໂນ, ຂນ຺ຕິຣສ຺ມາກ ຣຸຈ຺ຈຕີຕິ.

ຂນ຺ຕິວຓ຺ຓຊາຕກໍ ປຎ຺ຈມໍ.

໒໒໖. ໂກສິຍຊາຕກໍ (໒-໘-໖)

໑໕໑. ກາເລ ນິກ຺ຂມນາ ສາຘຸ, ນາກາເລ ສາຘຸ ນິກ຺ຂໂມ;

ອກາເລນ ຫິ ນິກ຺ຂມ຺ມ, ເອກກມ຺ປິ ພຫຸຊ຺ຊໂນ;

ນ ກິຎ຺ຈິ ອຕ຺ຖໍ ໂຊເຕຕິ, ຘງ຺ກເສນາວ ໂກສິຍໍ.

໑໕໒. ຘີໂຣ ຈ ວິຘິວິຘານຎ຺ຎູ, ປເຣສໍ ວິວຣານຸຄູ;

ສພ຺ພາມິຕ຺ເຕ ວສີກຕ຺ວາ, ໂກສິໂຍວ ສຸຂີ ສິຍາຕິ.

ໂກສິຍຊາຕກໍ ຉຏ຺ຐໍ.

໒໒໗. ຄູຖປາຓຊາຕກໍ (໒-໘-໗)

໑໕໓. ສູໂຣ ສູເຣນ ສງ຺ຄມ຺ມ, ວິກ຺ກນ຺ເຕນ ປຫາຣິນາ;

ເອຫິ ນາຄ ນິວຕ຺ຕສ຺ສຸ, ກິໍ ນຸ ຠີໂຕ ປລາຍສິ;

ປສ຺ສນ຺ຕຸ ອງ຺ຄມຄຘາ, ມມ ຕຸຍ຺ຫຎ຺ຈ ວິກ຺ກມໍ.

໑໕໔. ນ ຕໍ ປາທາ ວຘິສ຺ສາມິ, ນ ທນ຺ເຕຫິ ນ ໂສຓ຺ຑິຍາ;

ມີຬ຺ເຫນ ຕໍ ວຘິສ຺ສາມິ, ປູຕິ ຫຎ຺ຎຕຸ ປູຕິນາຕິ.

ຄູຖປາຓຊາຕກໍ ສຕ຺ຕມໍ.

໒໒໘. ກາມນີຕຊາຕກໍ (໒-໘-໘)

໑໕໕. ຕໂຍ ຄິຣິໍ ອນ຺ຕຣໍ ກາມຍາມິ, ປຎ຺ຈາລາ ກຸຣຸໂຍ ເກກເກ ຈ [ກຸຣໂຍ ເກກເຍ ຈ (ສີ.)];

ຕຕຸຕ຺ຕຣິໍ [ຕທຸຕ຺ຕຣິໍ (ກ.)] ພ຺ຣາຫ຺ມຓ ກາມຍາມິ, ຕິກິຈ຺ຉ ມໍ ພ຺ຣາຫ຺ມຓ ກາມນີຕໍ.

໑໕໖. ກຓ຺ຫາຫິທຏ຺ຐສ຺ສ ກໂຣນ຺ຕິ ເຫເກ, ອມນຸສ຺ສປວິຏ຺ຐສ຺ສ [ອມນຸສ຺ສວທ຺ຘສ຺ສ (ສີ. ປີ.), ອມນຸສ຺ສວິຏ຺ຐສ຺ສ (ສ຺ຍາ.)] ກໂຣນ຺ຕິ ປຓ຺ຑິຕາ;

ນ ກາມນີຕສ຺ສ ກໂຣຕິ ໂກຈິ, ໂອກ຺ກນ຺ຕສຸກ຺ກສ຺ສ ຫິ ກາ ຕິກິຈ຺ຉາຕິ.

ກາມນີຕຊາຕກໍ ອຏ຺ຐມໍ.

໒໒໙. ປລາຍິຕຊາຕກໍ (໒-໘-໙)

໑໕໗. ຄຊຄ຺ຄເມເຆຫິ ຫຍຄ຺ຄມາລິຠິ, ຣຖູມິຊາເຕຫິ ສຣາຠິວສ຺ເສຠິ [ສຣາຠິວສ຺ສຠິ (ສ຺ຍາ. ສີ. ອຏ຺ຐ.), ສຣາຠິວສ຺ສິຠິ (?)];

ຖຣຸຄ຺ຄຫາວຏ຺ຏ [ຘນຸຄ຺ຄຫາວຏ຺ຏ (ກ.)] ທຬ຺ຫປ຺ປຫາຣິຠິ, ປຣິວາຣິຕາ ຕກ຺ກສິລາ ສມນ຺ຕໂຕ.

໑໕໘. [ອຠິຘາວຖາ ຈ ປຕຖາ ຈ, ວິວິຘວິນທິຕາ ຈ ທນ຺ຕິຠິ; ວຕ຺ຕຕຊ຺ຊ ຕຸມຸໂລ ໂຆໂສ, ຍຖາ ວິຊ຺ຊຸຕາ ຊລຘຣສ຺ສ ຄຊ຺ຊໂຕຕິ; (ສີ. ປີ. ກ.)] ອຠິຘາວຖ ຈູປຘາວຖ ຈ [ອຠິຘາວຖາ ຈຸປ຺ປຕຖາ ຈ (ສ຺ຍາ.)], ວິວິຘາ ວິນາທິຕາ [ວິນາທິຕຕ຺ຖ (ກ.)] ວທນ຺ຕິຠິ;

ວຕ຺ຕຕຊ຺ຊ ຕຸມຸໂລ ໂຆໂສ ຍຖາ, ວິຊ຺ຊຸລຕາ ຊລຘຣສ຺ສ ຄຊ຺ຊໂຕຕິ [ອຠິຘາວຖາ ຈ ປຕຖາ ຈ, ວິວິຘວິນທິຕາ ຈ ທນ຺ຕິຠິ; ວຕ຺ຕຕຊ຺ຊ ຕຸມຸໂລ ໂຆໂສ, ຍຖາ ວິຊ຺ຊຸຕາ ຊລຘຣສ຺ສ ຄຊ຺ຊໂຕຕິ; (ສີ. ປີ. ກ.)].

ປລາຍິຕຊາຕກໍ ນວມໍ.

໒໓໐. ທຸຕິຍປລາຍິຕຊາຕກໍ (໒-໘-໑໐)

໑໕໙. ຘຊມປຣິມິຕໍ ອນນ຺ຕປາຣໍ, ທຸປ຺ປສຫໍຘງ຺ເກຫິ ສາຄຣໍວ [ສາຄຣມິວ (ສີ. ສ຺ຍາ. ປີ.)];

ຄິຣິມິວອນິເລນ ທຸປ຺ປສຍ຺ໂຫ [ທຸປ຺ປສໂຫ (ສີ. ປີ. ກ.)], ທຸປ຺ປສໂຫ ອຫມຊ຺ຊຕາທິເສນ.

໑໖໐. ມາ ພາລິຍໍ ວິລປິ [ວິປ຺ປລປິ (ພຫູສຸ)] ນ ຫິສ຺ສ ຕາທິສໍ, ວິຑຍ຺ຫເສ [ວິຬຍ຺ຫເສ (ສີ. ປີ.)] ນ ຫິ ລຠເສ ນິເສຘກໍ;

ອາສຊ຺ຊສິ ຄຊມິວ ເອກຈາຣິນໍ, ໂຍ ຕໍ ປທາ ນຬມິວ ໂປຖຍິສ຺ສຕີຕິ.

ທຸຕິຍປລາຍິຕຊາຕກໍ ທສມໍ.

ກາສາວວຄ຺ໂຄ ອຏ຺ຐໂມ.

ຕສ຺ສຸທ຺ທານໍ –

ວຣວຕ຺ຖວໂຈ ທຸມຂີຓຜລໍ, ຈຕຸໂຣຘມ຺ມວຣໍ ປຸຣິສຸຕ຺ຕມ;

ຘງ຺ກມຄຘາ ຈ ຕໂຍຄິຣິນາມ, ຄຊຄ຺ຄວໂຣ ຘຊວເຣນ ທສາຕິ.