໕໒໗. ອຸມ຺ມາທນ຺ຕີຊາຕກໍ (໒)

໕໗. ‘‘ນິເວສນໍ ກສ຺ສ ນຸທໍ ສຸນນ຺ທ, ປາກາເຣນ ປຓ຺ຑຸມເຍນ ຄຸຕ຺ຕໍ;

ກາ ທິສ຺ສຕິ ອຄ຺ຄິສິຂາວ ທູເຣ, ເວຫາຍສໍ [ເວຫາສຍໍ (ສີ. ປີ.)] ປພ຺ພຕຄ຺ເຄວ ອຈ຺ຈິ.

໕໘. ‘‘ຘີຕາ ນ຺ວຍໍ [ນຍໍ (ສີ. ປີ.), ນ຺ວາຍໍ (ສ຺ຍາ.)] ກສ຺ສ ສຸນນ຺ທ ໂຫຕິ, ສຸຓິສາ ນ຺ວຍໍ [ນຍໍ (ສີ. ປີ.), ນ຺ວາຍໍ (ສ຺ຍາ.)] ກສ຺ສ ອໂຖປິ ຠຣິຍາ;

ອກ຺ຂາຫິ ເມ ຂິປ຺ປມິເຘວ ປຸຏ຺ໂຐ, ອວາວຏາ ຍທິ ວາ ອຕ຺ຖິ ຠຕ຺ຕາ’’.

໕໙. ‘‘ອຫຎ຺ຫິ ຊານາມິ ຊນິນ຺ທ ເອຕໍ, ມຕ຺ຍາ ຈ ເປຕ຺ຍາ ຈ ອໂຖປິ ອສ຺ສາ;

ຕເວວ ໂສ ປຸຣິໂສ ຠູມິປາລ, ຣຕ຺ຕິນ຺ທິວໍ ອປ຺ປມຕ຺ໂຕ ຕວຕ຺ເຖ.

໖໐. ‘‘ອິທ຺ໂຘ ຈ ຜີໂຕ ຈ ສຸວຑ຺ຒິໂຕ [ສຸພາຬ຺ຫິໂກ (ປີ.)] ຈ, ອມຈ຺ໂຈ ຈ ເຕ ອຎ຺ຎຕໂຣ ຊນິນ຺ທ;

ຕສ຺ເສສາ ຠຣິຍາຠິປາຣກສ຺ສ [ອຫິປາຣກສ຺ສ (ສີ. ປີ.), ອຠິປາທກສ຺ສ (ກ.)], ອຸມ຺ມາທນ຺ຕີ [ອຸມ຺ມາທນ຺ຕີຕິ (ກ.)] ນາມເຘຍ຺ເຍນ ຣາຊ’’.

໖໑. ‘‘ອມ຺ໂຠ ອມ຺ໂຠ ນາມມິທໍ ອິມິສ຺ສາ, ມຕ຺ຍາ ຈ ເປຕ຺ຍາ ຈ ກຕໍ ສຸສາຘຸ;

ຕທາ [ຕຖາ (ສີ. ສ຺ຍາ. ປີ.)] ຫິ ມຍ຺ຫໍ ອວໂລກຍນ຺ຕີ, ອຸມ຺ມຕ຺ຕກໍ ອຸມ຺ມທນ຺ຕີ ອກາສິ’’.

໖໒. ‘‘ຍາ ປຸຓ຺ຓມາເສ [ປຸຓ຺ຓມາເຍ (ກ.)] ມິຄມນ຺ທໂລຈນາ, ອຸປາວິສິ ປຸຓ຺ຑຣີກຕ຺ຕຈງ຺ຄີ;

ທ຺ເວ ປຸຓ຺ຓມາໂຍ ຕທຫູ ອມຎ຺ຎຫໍ, ທິສ຺ວານ ປາຣາວຕຣຕ຺ຕວາສິນິໍ.

໖໓. ‘‘ອຬາຣປມ຺ເຫຫິ ສຸເຠຫິ ວຄ຺ຄຸຠິ, ປໂລຠຍນ຺ຕີ ມໍ ຍທາ ອຸທິກ຺ຂຕິ;

ວິຊມ຺ຠມານາ ຫຣເຕວ ເມ ມໂນ, ຊາຕາ ວເນ ກິມ຺ປຸຣິສີວ ປພ຺ພເຕ.

໖໔. ‘‘ຕທາ ຫິ ພ຺ຣຫຕີ ສາມາ, ອາມຸຕ຺ຕມຓິກຸຓ຺ຑລາ;

ເອກຈ຺ຈວສນາ ນາຣີ, ມິຄີ ຠນ຺ຕາວຸທິກ຺ຂຕິ.

໖໕. ‘‘ກທາສ຺ສຸ ມໍ ຕມ຺ພນຂາ ສຸໂລມາ, ພາຫາມຸທູ ຈນ຺ທນສາຣລິຕ຺ຕາ;

ວຏ຺ຏງ຺ຄຸລີ ສນ຺ນຕຘີຣກຸຕ຺ຕິຍາ, ນາຣີ ອຸປຎ຺ຎິສ຺ສຕິ ສີສໂຕ ສຸຠາ.

໖໖. ‘‘ກທາສ຺ສຸ ມໍ ກຎ຺ຈນຊາລຸຣຈ຺ຉທາ, ຘີຕາ ຕິຣີຏິສ຺ສ ວິລຄ຺ຄມຊ຺ຌາ;

ມຸທູຫິ ພາຫາຫິ ປລິສ຺ສຊິສ຺ສຕິ, ພ຺ຣຫາວເນ ຊາຕທຸມໍວ ມາລຸວາ.

໖໗. ‘‘ກທາສ຺ສຸ [ກທາສ຺ສຸ ມໍ (ສ຺ຍາ. ກ.)] ລາຂາຣສຣຕ຺ຕສຸຈ຺ຉວີ, ພິນ຺ທຸຕ຺ຖນີ ປຸຓ຺ຑຣີກຕ຺ຕຈງ຺ຄີ;

ມຸຂໍ ມຸເຂນ ອຸປນາມຍິສ຺ສຕິ, ໂສຓ຺ໂຑວ ໂສຓ຺ຑສ຺ສ ສຸຣາຍ ຖາລໍ.

໖໘. ‘‘ຍທາທ຺ທສໍ [ຍຖາທ຺ທສໍ (ປີ.)] ຕໍ ຕິຏ຺ຐນ຺ຕິໍ, ສພ຺ພຠທ຺ທໍ [ສພ຺ພຄຕ຺ຕໍ (ສີ. ສ຺ຍາ. ປີ.)] ມໂນຣມໍ;

ຕໂຕ ສກສ຺ສ ຈິຕ຺ຕສ຺ສ, ນາວໂພຘາມິ ກຎ຺ຈິນໍ [ກິຎ຺ຈິນໍ (ກ.), ກິຎ຺ຈນໍ (ປີ.)].

໖໙. ‘‘ອຸມ຺ມາທນ຺ຕິມຫໍ ທຏ຺ຐາ [ທິຏ຺ຐາ (ສີ. ສ຺ຍາ. ປີ. ກ.)], ອາມຸຕ຺ຕມຓິກຸຓ຺ຑລໍ;

ນ ສຸປາມິ ທິວາຣຕ຺ຕິໍ, ສຫສ຺ສໍວ ປຣາຊິໂຕ.

໗໐. ‘‘ສກ຺ໂກ ເຈ [ຈ (ສີ. ປີ.)] ເມ ວຣໍ ທຊ຺ຊາ, ໂສ ຈ ລພ຺ເຠຖ ເມ ວໂຣ;

ເອກຣຕ຺ຕໍ ທ຺ວິຣຕ຺ຕໍ [ທິຣຕ຺ຕໍ (ປີ.)] ວາ, ຠເວຍ຺ຍໍ ອຠິປາຣໂກ;

ອຸມ຺ມາທນ຺ຕ຺ຍາ ຣມິຕ຺ວານ, ສິວິຣາຊາ ຕໂຕ ສິຍໍ’’ [ສິຍາ (ສ຺ຍາ. ປີ.)].

໗໑. ‘‘ຠູຕານິ ເມ ຠູຕປຕີ ນມສ຺ສໂຕ, ອາຄມ຺ມ ຍກ຺ໂຂ ອິທເມຕທພ຺ຣວິ;

ຣຎ຺ໂຎ ມໂນ ອຸມ຺ມທນ຺ຕ຺ຍາ ນິວິຏ຺ໂຐ, ທທາມິ ເຕ ຕໍ ປຣິຈາຣຍສ຺ສຸ’’.

໗໒. ‘‘ປຸຎ຺ຎາ ວິຘໍເສ ອມໂຣ ນ ຈມ຺ຫິ, ຊໂນ ຈ ເມ ປາປມິທຎ຺ຈ [ປາປມິທນ຺ຕິ (ສີ. ປີ.)] ຊຎ຺ຎາ;

ຠຸໂສ ຈ ຕ຺ຍສ຺ສ ມນໂສ ວິຆາໂຕ, ທຕ຺ວາ ປິຍໍ ອຸມ຺ມທນ຺ຕິໍ ອທຏ຺ຐາ’’.

໗໓. ‘‘ຊນິນ຺ທ ນາຎ຺ຎຕ຺ຣ ຕຍາ ມຍາ ວາ, ສພ຺ພາປິ ກມ຺ມສ຺ສ ກຕສ຺ສ ຊຎ຺ຎາ;

ຍໍ ເຕ ມຍາ ອຸມ຺ມທນ຺ຕີ ປທິນ຺ນາ, ຠຸເສຫິ ຣາຊາ ວນຖໍ ສຊາຫິ’’.

໗໔. ‘‘ໂຍ ປາປກໍ ກມ຺ມ ກຣໍ ມນຸສ຺ໂສ, ໂສ ມຎ຺ຎຕິ ມາຍິທ [ມາຍິຘ (ກ.)] ມຎ຺ຎິໍສຸ ອຎ຺ເຎ;

ປສ຺ສນ຺ຕິ ຠູຕານິ ກໂຣນ຺ຕເມຕໍ, ຍຸຕ຺ຕາ ຈ ເຍ ໂຫນ຺ຕິ ນຣາ ປຖພ຺ຍາ.

໗໕. ‘‘ອຎ຺ໂຎ ນຸ ເຕ ໂກຈິ [ໂກຘ (ປີ.)] ນໂຣ ປຖພ຺ຍາ, ສທ຺ເຘຍ຺ຍ [ສທ຺ທເຫຍ຺ຍ (ສີ.)] ໂລກສ຺ມິ ນ ເມ ປິຍາຕິ;

ຠຸໂສ ຈ ຕ຺ຍສ຺ສ ມນໂສ ວິຆາໂຕ, ທຕ຺ວາ ປິຍໍ ອຸມ຺ມທນ຺ຕິໍ ອທຏ຺ຐາ’’.

໗໖. ‘‘ອທ຺ຘາ ປິຍາ ມຍ຺ຫ ຊນິນ຺ທ ເອສາ, ນ ສາ ມມໍ ອປ຺ປິຍາ ຠູມິປາລ;

ຄຈ຺ເຉວ ຕ຺ວໍ ອຸມ຺ມທນ຺ຕິໍ ຠທນ຺ເຕ, ສີໂຫວ ເສລສ຺ສ ຄຸຫໍ ອຸເປຕິ’’.

໗໗. ‘‘ນ ປີຬິຕາ ອຕ຺ຕທຸເຂນ ຘີຣາ, ສຸຂປ຺ຜລໍ ກມ຺ມ ປຣິຈ຺ຈຊນ຺ຕິ;

ສມ຺ໂມຫິຕາ ວາປິ ສຸເຂນ ມຕ຺ຕາ, ນ ປາປກມ຺ມຎ຺ຈ [ປາປກໍ ກມ຺ມ (ປີ.)] ສມາຈຣນ຺ຕິ’’.

໗໘. ‘‘ຕຸວຎ຺ຫິ ມາຕາ ຈ ປິຕາ ຈ ມຍ຺ຫໍ, ຠຕ຺ຕາ ປຕີ ໂປສໂກ ເທວຕາ ຈ;

ທາໂສ ອຫໍ ຕຸຍ຺ຫ ສປຸຕ຺ຕທາໂຣ, ຍຖາສຸຂໍ ສາມິ [ສິພ຺ພ (ສີ.), ສີວິ (ສ຺ຍາ.)] ກໂຣຫິ ກາມໍ’’.

໗໙. ‘‘ໂຍ ອິສ຺ສໂຣມ຺ຫີຕິ ກໂຣຕິ ປາປໍ, ກຕ຺ວາ ຈ ໂສ ນຸຕ຺ຕສເຕ [ນຸຕ຺ຕປເຕ (ປີ.)] ປເຣສໍ;

ນ ເຕນ ໂສ ຊີວຕິ ທີຆມາຍຸ [ທີຆມາຍຸໍ (ສີ. ສ຺ຍາ.)], ເທວາປິ ປາເປນ ສເມກ຺ຂເຣ ນໍ.

໘໐. ‘‘ອຎ຺ຎາຕກໍ ສາມິເກຫີ ປທິນ຺ນໍ, ຘມ຺ເມ ຐິຕາ ເຍ ປຏິຈ຺ຉນ຺ຕິ ທານໍ;

ປຏິຈ຺ຉກາ ທາຍກາ ຈາປິ ຕຕ຺ຖ, ສຸຂປ຺ຜລຎ຺ເຎວ ກໂຣນ຺ຕິ ກມ຺ມໍ’’.

໘໑. ‘‘ອຎ຺ໂຎ ນຸ ເຕ ໂກຈິ ນໂຣ ປຖພ຺ຍາ, ສທ຺ເຘຍ຺ຍ ໂລກສ຺ມິ ນ ເມ ປິຍາຕິ;

ຠຸໂສ ຈ ຕ຺ຍສ຺ສ ມນໂສ ວິຆາໂຕ, ທຕ຺ວາ ປິຍໍ ອຸມ຺ມທນ຺ຕິໍ ອທຏ຺ຐາ’’.

໘໒. ‘‘ອທ຺ຘາ ປິຍາ ມຍ຺ຫ ຊນິນ຺ທ ເອສາ, ນ ສາ ມມໍ ອປ຺ປິຍາ ຠູມິປາລ;

ຍໍ ເຕ ມຍາ ອຸມ຺ມທນ຺ຕີ ປທິນ຺ນາ, ຠຸເສຫິ ຣາຊາ ວນຖໍ ສຊາຫິ’’.

໘໓. ‘‘ໂຍ ອຕ຺ຕທຸກ຺ເຂນ ປຣສ຺ສ ທຸກ຺ຂໍ, ສຸເຂນ ວາ ອຕ຺ຕສຸຂໍ ທຫາຕິ;

ຍເຖວິທໍ ມຍ຺ຫ ຕຖາ ປເຣສໍ, ໂຍ [ໂສ (ປີ.)] ເອວໍ ຊານາຕິ [ປຊານາຕິ (ກ.)] ສ ເວທິ ຘມ຺ມໍ.

໘໔. ‘‘ອຎ຺ໂຎ ນຸ ເຕ ໂກຈິ ນໂຣ ປຖພ຺ຍາ, ສທ຺ເຘຍ຺ຍ ໂລກສ຺ມິ ນ ເມ ປິຍາຕິ;

ຠຸໂສ ຈ ຕ຺ຍສ຺ສ ມນໂສ ວິຆາໂຕ, ທຕ຺ວາ ປິຍໍ ອຸມ຺ມທນ຺ຕິໍ ອທຏ຺ຐາ’’.

໘໕. ‘‘ຊນິນ຺ທ ຊານາສິ ປິຍາ ມເມສາ, ນ ສາ ມມໍ ອປ຺ປິຍາ ຠູມິປາລ;

ປິເຍນ ເຕ ທມ຺ມິ ປິຍໍ ຊນິນ຺ທ, ປິຍທາຍິໂນ ເທວ ປິຍໍ ລຠນ຺ຕິ’’.

໘໖. ‘‘ໂສ ນູນາຫໍ ວຘິສ຺ສາມິ, ອຕ຺ຕານໍ ກາມເຫຕຸກໍ;

ນ ຫິ ຘມ຺ມໍ ອຘມ຺ເມນ, ອຫໍ ວຘິຕຸມຸສ຺ສເຫ’’.

໘໗. ‘‘ສເຈ ຕຸວໍ ມຍ຺ຫ ສຕິໍ [ສນ຺ຕິ (ກ.)] ຊນິນ຺ທ, ນ ກາມຍາສິ ນຣວີຣ ເສຏ຺ຐ;

ຈຊາມິ ນໍ ສພ຺ພຊນສ຺ສ ສິພ຺ຍາ [ສິພ຺ພ (ສີ. ປີ.), ມຊ຺ເຌ (ສ຺ຍາ.)], ມຍາ ປມຸຕ຺ຕໍ ຕໂຕ ອວ຺ຫເຍສິ [ອວ຺ຫຍາສິ (ກ.)] ນໍ’’.

໘໘. ‘‘ອທູສິຍໍ ເຈ ອຠິປາຣກ ຕ຺ວໍ, ຈຊາສິ ກຕ຺ເຕ ອຫິຕາຍ ຕ຺ຍສ຺ສ;

ມຫາ ຈ ເຕ ອຸປວາໂທປິ ອສ຺ສ, ນ ຈາປິ ຕ຺ຍສ຺ສ ນຄຣມ຺ຫິ ປກ຺ໂຂ’’.

໘໙. ‘‘ອຫໍ ສຫິສ຺ສໍ ອຸປວາທເມຕໍ, ນິນ຺ທໍ ປສໍສໍ ຄຣຫຎ຺ຈ ສພ຺ພໍ;

ມເມຕມາຄຈ຺ຉຕຸ ຠູມິປາລ, ຍຖາສຸຂໍ ສິວິ [ສິພ຺ພ (ສີ. ປີ.)] ກໂຣຫິ ກາມໍ’’.

໙໐. ‘‘ໂຍ ເນວ ນິນ຺ທໍ ນ ປນປ຺ປສໍສໍ, ອາທິຍຕິ ຄຣຫໍ ໂນປິ ປູຊໍ;

ສິຣີ ຈ ລກ຺ຂີ ຈ ອເປຕິ ຕມ຺ຫາ, ອາໂປ ສຸວຸຏ຺ຐີວ ຍຖາ ຖລມ຺ຫາ’’.

໙໑. ‘‘ຍໍ ກິຎ຺ຈິ ທຸກ຺ຂຎ຺ຈ ສຸຂຎ຺ຈ ເອຕ຺ໂຕ, ຘມ຺ມາຕິສາຣຎ຺ຈ ມໂນວິຆາຕໍ;

ອຸຣສາ ອຫໍ ປຈ຺ຈຸຕ຺ຕຣິສ຺ສາມິ [ປຏິຈ຺ຉິສ຺ສາມິ (ສີ. ສ຺ຍາ.), ປຈ຺ຈຸປທິສ຺ສາມິ (ປີ.)] ສພ຺ພໍ, ປຖວີ ຍຖາ ຖາວຣານໍ ຕສານໍ’’.

໙໒. ‘‘ຘມ຺ມາຕິສາຣຎ຺ຈ ມໂນວິຆາຕໍ, ທຸກ຺ຂຎ຺ຈ ນິຈ຺ຉາມິ ອຫໍ ປເຣສໍ;

ເອໂກວິມໍ ຫາຣຍິສ຺ສາມິ ຠາຣໍ, ຘມ຺ເມ ຐິໂຕ ກິຎ຺ຈິ ອຫາປຍນ຺ໂຕ’’.

໙໓. ‘‘ສຄ຺ຄູປຄໍ ປຸຎ຺ຎກມ຺ມໍ ຊນິນ຺ທ, ມາ ເມ ຕຸວໍ ອນ຺ຕຣາຍໍ ອກາສິ;

ທທາມິ ເຕ ອຸມ຺ມທນ຺ຕິໍ ປສນ຺ໂນ, ຣາຊາວ ຍຎ຺ເຎ ຘນໍ ພ຺ຣາຫ຺ມຓານໍ’’.

໙໔. ‘‘ອທ຺ຘາ ຕຸວໍ ກຕ຺ເຕ ຫິເຕສິ ມຍ຺ຫໍ, ສຂາ ມມໍ ອຸມ຺ມທນ຺ຕີ ຕຸວຎ຺ຈ;

ນິນ຺ເທຍ຺ຍຸ ເທວາ ປິຕໂຣ ຈ ສພ຺ເພ, ປາປຎ຺ຈ ປສ຺ສໍ ອຠິສມ຺ປຣາຍໍ’’.

໙໕. ‘‘ນ ເຫຕຘມ຺ມໍ ສິວິຣາຊ ວຊ຺ຊຸໍ, ສເນຄມາ ຊານປທາ ຈ ສພ຺ເພ;

ຍໍ ເຕ ມຍາ ອຸມ຺ມທນ຺ຕີ ປທິນ຺ນາ, ຠຸເສຫິ ຣາຊາ ວນຖໍ ສຊາຫິ’’.

໙໖. ‘‘ອທ຺ຘາ ຕຸວໍ ກຕ຺ເຕ ຫິເຕສິ ມຍ຺ຫໍ, ສຂາ ມມໍ ອຸມ຺ມທນ຺ຕີ ຕຸວຎ຺ຈ;

ສຕຎ຺ຈ ຘມ຺ມານິ ສຸກິຕ຺ຕິຕານິ, ສມຸທ຺ທເວລາວ ທຸຣຈ຺ຈຍານິ’’.

໙໗. ‘‘ອາຫຸເນຍ຺ໂຍ ເມສິ ຫິຕານຸກມ຺ປີ, ຘາຕາ ວິຘາຕາ ຈສິ ກາມປາໂລ;

ຕຍີ ຫຸຕາ ຣາຊ ມຫປ຺ຜລາ ຫິ [ມຫປ຺ຜລາ ຫິ ເມ (ປີ.)], ກາເມນ ເມ ອຸມ຺ມທນ຺ຕິໍ ປຏິຈ຺ຉ’’.

໙໘. ‘‘ອທ຺ຘາ ຫິ ສພ຺ພໍ ອຠິປາຣກ ຕ຺ວໍ, ຘມ຺ມໍ ອຈາຣີ ມມ ກຕ຺ຕຸປຸຕ຺ຕ;

ອຎ຺ໂຎ ນຸ ເຕ ໂກ ອິຘ ໂສຕ຺ຖິກຕ຺ຕາ, ທ຺ວິປໂທ ນໂຣ ອຣຸເຓ ຊີວໂລເກ’’.

໙໙. ‘‘ຕຸວໍ ນຸ ເສຏ຺ໂຐ ຕ຺ວມນຸຕ຺ຕໂຣສິ, ຕ຺ວໍ ຘມ຺ມຄູ [ຘມ຺ມຄຸຕ຺ໂຕ (ສີ.)] ຘມ຺ມວິທູ ສຸເມໂຘ;

ໂສ ຘມ຺ມຄຸຕ຺ໂຕ ຈິຣເມວ ຊີວ, ຘມ຺ມຎ຺ຈ ເມ ເທສຍ ຘມ຺ມປາລ’’.

໑໐໐. ‘‘ຕທິງ຺ຆ ອຠິປາຣກ, ສຸໂຓຫິ ວຈນໍ ມມ;

ຘມ຺ມໍ ເຕ ເທສຍິສ຺ສາມິ, ສຕໍ ອາເສວິຕໍ ອຫໍ.

໑໐໑. ‘‘ສາຘຸ ຘມ຺ມຣຸຈິ ຣາຊາ, ສາຘຸ ປຎ຺ຎາຓວາ ນໂຣ;

ສາຘຸ ມິຕ຺ຕານມທ຺ທຸພ຺ໂຠ, ປາປສ຺ສາກຣຓໍ ສຸຂໍ.

໑໐໒. ‘‘ອກ຺ໂກຘນສ຺ສ ວິຊິເຕ, ຐິຕຘມ຺ມສ຺ສ ຣາຊິໂນ;

ສຸຂໍ ມນຸສ຺ສາ ອາເສຖ, ສີຕຈ຺ຉາຍາຍ ສງ຺ຆເຣ.

໑໐໓. ‘‘ນ ຈາຫເມຕໍ ອຠິໂຣຈຍາມິ, ກມ຺ມໍ ອສເມກ຺ຂກຕໍ ອສາຘຸ;

ເຍ ວາປິ ຎຕ຺ວານ ສຍໍ ກໂຣນ຺ຕິ, ອຸປມາ ອິມາ ມຍ຺ຫໍ ຕຸວໍ ສຸໂຓຫິ.

໑໐໔. ‘‘ຄວໍ ເຈ ຕຣມານານໍ, ຊິມ຺ຫໍ ຄຈ຺ຉຕິ ປຸງ຺ຄໂວ;

ສພ຺ພາ ຕາ ຊິມ຺ຫໍ ຄຈ຺ຉນ຺ຕິ, ເນຕ຺ເຕ ຊິມ຺ຫໍ ຄເຕ ສຕິ.

໑໐໕. ‘‘ເອວເມວ [ເອວເມວໍ (ປີ.)] ມນຸສ຺ເສສຸ, ໂຍ ໂຫຕິ ເສຏ຺ຐສມ຺ມໂຕ;

ໂສ ເຈ ອຘມ຺ມໍ ຈຣຕິ, ປເຄວ ອິຕຣາ ປຊາ;

ສພ຺ພໍ ຣຏ຺ຐໍ ທຸຂໍ ເສຕິ, ຣາຊາ ເຈ ໂຫຕິ ອຘມ຺ມິໂກ.

໑໐໖. ‘‘ຄວໍ ເຈ ຕຣມານານໍ, ອຸຊຸໍ ຄຈ຺ຉຕິ ປຸງ຺ຄໂວ;

ສພ຺ພາ ຄາວີ ອຸຊຸໍ ຍນ຺ຕິ, ເນຕ຺ເຕ ອຸຊຸໍ ຄເຕ ສຕິ.

໑໐໗. ‘‘ເອວເມວ ມນຸສ຺ເສສຸ, ໂຍ ໂຫຕິ ເສຏ຺ຐສມ຺ມໂຕ;

ໂສ ສເຈ ຘມ຺ມໍ ຈຣຕິ, ປເຄວ ອິຕຣາ ປຊາ;

ສພ຺ພໍ ຣຏ຺ຐໍ ສຸຂໍ ເສຕິ, ຣາຊາ ເຈ ໂຫຕິ ຘມ຺ມິໂກ.

໑໐໘. ‘‘ນ ຈາປາຫໍ ອຘມ຺ເມນ, ອມຣຕ຺ຕມຠິປຕ຺ຖເຍ;

ອິມໍ ວາ ປຖວິໍ ສພ຺ພໍ, ວິເຊຕຸໍ ອຠິປາຣກ.

໑໐໙. ‘‘ຍຎ຺ຫິ ກິຎ຺ຈິ ມນຸສ຺ເສສຸ, ຣຕນໍ ອິຘ ວິຊ຺ຊຕິ;

ຄາໂວ ທາໂສ ຫິຣຎ຺ຎຎ຺ຈ, ວຕ຺ຖິຍໍ ຫຣິຈນ຺ທນໍ.

໑໑໐. ‘‘ອສ຺ສິຕ຺ຖິໂຍ [ອສ຺ສິຕ຺ຖິໂຍ ຈ (ສີ.)] ຣຕນໍ ມຓິກຎ຺ຈ, ຍຎ຺ຈາປິ ເມ ຈນ຺ທສູຣິຍາ ອຠິປາລຍນ຺ຕິ;

ນ ຕສ຺ສ ເຫຕຸ ວິສມໍ ຈເຣຍ຺ຍໍ, ມຊ຺ເຌ ສິວີນໍ ອຸສໂຠມ຺ຫິ ຊາໂຕ.

໑໑໑. ‘‘ເນຕາ ຫິຕາ [ເນຕາຠິ ຕາ (ສີ.)] ອຸຄ຺ຄໂຕ ຣຏ຺ຐປາໂລ, ຘມ຺ມໍ ສິວີນໍ ອປຈາຍມາໂນ;

ໂສ ຘມ຺ມເມວານຸວິຈິນ຺ຕຍນ຺ໂຕ, ຕສ຺ມາ ສເກ ຈິຕ຺ຕວເສ ນ ວຕ຺ໂຕ’’.

໑໑໒. ‘‘ອທ຺ຘາ ຕຸວໍ ມຫາຣາຊ, ນິຈ຺ຈໍ ອພ຺ຍສນໍ ສິວໍ;

ກຣິສ຺ສສິ ຈິຣໍ ຣຊ຺ຊໍ, ປຎ຺ຎາ ຫິ ຕວ ຕາທິສີ.

໑໑໓. ‘‘ເອຕໍ ເຕ ອນຸໂມທາມ, ຍໍ ຘມ຺ມໍ ນປ຺ປມຊ຺ຊສິ;

ຘມ຺ມໍ ປມຊ຺ຊ ຂຕ຺ຕິໂຍ, ຣຏ຺ຐາ [ຐານາ (ສີ.)] ຈວຕິ ອິສ຺ສໂຣ.

໑໑໔. ‘‘ຘມ຺ມໍ ຈຣ ມຫາຣາຊ, ມາຕາປິຕູສຸ ຂຕ຺ຕິຍ;

ອິຘ ຘມ຺ມໍ ຈຣິຕ຺ວານ, ຣາຊ ສຄ຺ຄໍ ຄມິສ຺ສສິ.

໑໑໕. ‘‘ຘມ຺ມໍ ຈຣ ມຫາຣາຊ, ປຸຕ຺ຕທາເຣສຸ ຂຕ຺ຕິຍ…ເປ….

໑໑໖. ‘‘ຘມ຺ມໍ ຈຣ ມຫາຣາຊ, ມິຕ຺ຕາມຈ຺ເຈສຸ ຂຕ຺ຕິຍ…ເປ….

໑໑໗. ‘‘ຘມ຺ມໍ ຈຣ ມຫາຣາຊ, ວາຫເນສຸ ພເລສຸ ຈ…ເປ….

໑໑໘. ‘‘ຘມ຺ມໍ ຈຣ ມຫາຣາຊ, ຄາເມສຸ ນິຄເມສຸ ຈ…ເປ….

໑໑໙. ‘‘ຘມ຺ມໍ ຈຣ ມຫາຣາຊ, ຣຏ຺ເຐສຸ ຊນປເທສຸ ຈ…ເປ….

໑໒໐. ‘‘ຘມ຺ມໍ ຈຣ ມຫາຣາຊ, ສມຓພ຺ຣາຫ຺ມເຓສຸ ຈ…ເປ….

໑໒໑. ‘‘ຘມ຺ມໍ ຈຣ ມຫາຣາຊ, ມິຄປກ຺ຂີສຸ ຂຕ຺ຕິຍ…ເປ….

໑໒໒. ‘‘ຘມ຺ມໍ ຈຣ ມຫາຣາຊ, ຘມ຺ໂມ ຈິຓ຺ໂຓ ສຸຂາວໂຫ;

ອິຘ ຘມ຺ມໍ ຈຣິຕ຺ວານ, ຣາຊ ສຄ຺ຄໍ ຄມິສ຺ສສິ.

໑໒໓. ‘‘ຘມ຺ມໍ ຈຣ ມຫາຣາຊ, ສອິນ຺ທາ ເທວາ ສພ຺ຣຫ຺ມກາ;

ສຸຈິຓ຺ເຓນ ທິວໍ ປຕ຺ຕາ, ມາ ຘມ຺ມໍ ຣາຊ ປາມໂທ’’ຕິ.

ອຸມ຺ມາທນ຺ຕີຊາຕກໍ ທຸຕິຍໍ.