໑໘. ປຓ຺ຓາສນິປາໂຕ

໕໒໖. ນິຬິນິກາຊາຕກໍ (໑)

໑. ‘‘ອຸທ຺ທຍ຺ຫເຕ [ອຸຑ຺ຑຍ຺ຫເຕ (ສີ. ປີ.)] ຊນປໂທ, ຣຏ຺ຐຎ຺ຈາປິ ວິນສ຺ສຕິ;

ເອຫິ ນິຬິນິເກ [ນິຬິເກ (ສີ. ສ຺ຍາ. ປີ.), ເອວມຸປຣິປິ] ຄຈ຺ຉ, ຕໍ ເມ ພ຺ຣາຫ຺ມຓມານຍ’’.

໒. ‘‘ນາຫໍ ທຸກ຺ຂກ຺ຂມາ ຣາຊ, ນາຫໍ ອທ຺ຘານໂກວິທາ;

ກຖໍ ອຫໍ ຄມິສ຺ສາມິ, ວນໍ ກຸຎ຺ຊຣເສວິຕໍ’’.

໓. ‘‘ຜີຕໍ ຊນປທໍ ຄນ຺ຕ຺ວາ, ຫຕ຺ຖິນາ ຈ ຣເຖນ ຈ;

ທາຣຸສງ຺ຆາຏຍາເນນ, ເອວໍ ຄຈ຺ຉ ນິຬິນິເກ.

໔. ‘‘ຫຕ຺ຖິອສ຺ສຣເຖ ປຕ຺ຕີ, ຄຈ຺ເຉວາທາຍ ຂຕ຺ຕິເຍ;

ຕເວວ ວຓ຺ຓຣູເປນ, ວສໍ ຕມານຍິສ຺ສສິ’’.

໕. ‘‘ກທລີຘຊປຎ຺ຎາໂຓ, ອາຠຸຊີປຣິວາຣິໂຕ;

ເອໂສ ປທິສ຺ສຕິ ຣມ຺ໂມ, ອິສິສິງ຺ຄສ຺ສ ອສ຺ສໂມ.

໖. ‘‘ເອໂສ ອຄ຺ຄິສ຺ສ ສງ຺ຂາໂຕ, ເອໂສ ຘູໂມ ປທິສ຺ສຕິ;

ມຎ຺ເຎ ໂນ ອຄ຺ຄິໍ ຫາເປຕິ, ອິສິສິງ຺ໂຄ ມຫິທ຺ຘິໂກ’’.

໗. ‘‘ຕຎ຺ຈ ທິສ຺ວານ ອາຍນ຺ຕິໍ, ອາມຸຕ຺ຕມຓິກຸຓ຺ຑລໍ;

ອິສິສິງ຺ໂຄ ປາວິສິ ຠີໂຕ, ອສ຺ສມໍ ປຓ຺ຓຉາທນໍ.

໘. ‘‘ອສ຺ສມສ຺ສ ຈ ສາ ທ຺ວາເຣ, ເຄຓ຺ຑຸເກນສ຺ສ [ເຠຓ຺ຑຸເກນສ຺ສ (ສີ. ປີ.)] ກີຬຕິ;

ວິທໍສຍນ຺ຕີ ອງ຺ຄານິ, ຄຸຍ຺ຫໍ ປກາສິຕານິ ຈ.

໙. ‘‘ຕຎ຺ຈ ທິສ຺ວານ ກີຬນ຺ຕິໍ, ປຓ຺ຓສາລຄໂຕ ຊຏີ;

ອສ຺ສມາ ນິກ຺ຂມິຕ຺ວານ, ອິທໍ ວຈນມພ຺ຣວິ.

໑໐. ‘‘ອມ຺ໂຠ ໂກ ນາມ ໂສ ຣຸກ຺ໂຂ, ຍສ຺ສ ເຕວໍຄຕໍ ຜລໍ;

ທູເຣປິ ຂິຕ຺ຕໍ ປຈ຺ເຈຕິ, ນ ຕໍ ໂອຫາຍ ຄຈ຺ຉຕິ’’.

໑໑. ‘‘ອສ຺ສມສ຺ສ ມມ [ມໍ (ສີ.)] ພ຺ຣຫ຺ເມ, ສມີເປ ຄນ຺ຘມາທເນ;

ພຫໂວ [ປພ຺ພເຕ (ສີ.)] ຕາທິສາ ຣຸກ຺ຂາ, ຍສ຺ສ ເຕວໍຄຕໍ ຜລໍ;

ທູເຣປິ ຂິຕ຺ຕໍ ປຈ຺ເຈຕິ, ນ ມໍ ໂອຫາຍ ຄຈ຺ຉຕິ’’.

໑໒. ‘‘ເອຕູ [ເອຕຸ (ສີ. ສ຺ຍາ. ກ.)] ຠວໍ ອສ຺ສມິມໍ ອເທຕຸ, ປຊ຺ຊຎ຺ຈ ຠກ຺ຂຎ຺ຈ ປຏິຈ຺ຉ ທມ຺ມິ;

ອິທມາສນໍ ອຕ຺ຣ ຠວໍ ນິສີທຕຸ, ອິໂຕ ຠວໍ ມູລຜລານິ ຠຸຎ຺ຊຕຸ’’ [ຂາທຕຸ (ສີ.)].

໑໓. ‘‘ກິໍ ເຕ ອິທໍ ອູຣູນມນ຺ຕຣສ຺ມິໍ, ສຸປິຈ຺ຉິຕໍ ກຓ຺ຫຣິວປ຺ປກາສຕິ;

ອກ຺ຂາຫິ ເມ ປຸຈ຺ຉິໂຕ ເອຕມຕ຺ຖໍ, ໂກເສ ນຸ ເຕ ອຸຕ຺ຕມງ຺ຄໍ ປວິຏ຺ຐໍ’’.

໑໔. ‘‘ອຫໍ ວເນ ມູລຜເລສນໍ ຈຣໍ, ອາສາທຍິໍ [ອສ຺ສາທຍິໍ (ກ.)] ອຈ຺ຉໍ ສຸໂຆຣຣູປໍ;

ໂສ ມໍ ປຕິຕ຺ວາ ສຫສາຊ຺ຌປຕ຺ໂຕ, ປນຸຊ຺ຊ ມໍ ອພ຺ພຫິ [ອພ຺ພຸຫິ (ສ຺ຍາ. ກ.)] ອຸຕ຺ຕມງ຺ຄໍ.

໑໕. ‘‘ສ຺ວາຍໍ ວໂຓ ຂຊ຺ຊຕິ ກຓ຺ຑຸວາຍຕິ, ສພ຺ພຎ຺ຈ ກາລໍ ນ ລຠາມິ ສາຕໍ;

ປໂຫ ຠວໍ ກຓ຺ຑຸມິມໍ ວິເນຕຸໍ, ກຸຣຸຕໍ ຠວໍ ຍາຈິໂຕ ພ຺ຣາຫ຺ມຓຕ຺ຖໍ’’.

໑໖. ‘‘ຄມ຺ຠີຣຣູໂປ ເຕ ວໂຓ ສໂລຫິໂຕ, ອປູຕິໂກ ວຓຄນ຺ໂຘ [ປກ຺ກຄນ຺ໂຘ (ສີ.), ປນ຺ນຄນ຺ໂຘ (ສ຺ຍາ. ປີ.)] ມຫາ ຈ;

ກໂຣມິ ເຕ ກິຎ຺ຈິ ກສາຍໂຍຄໍ, ຍຖາ ຠວໍ ປຣມສຸຂີ ຠເວຍ຺ຍ’’.

໑໗. ‘‘ນ ມນ຺ຕໂຍຄາ ນ ກສາຍໂຍຄາ, ນ ໂອສຘາ ພ຺ຣຫ຺ມຈາຣິ [ພ຺ຣຫ຺ມຈາຣີ (ສີ. ສ຺ຍາ. ປີ.)] ກມນ຺ຕິ;

ຆຏ຺ເຏ ມຸທຸເກນ [ຍໍ ເຕ ມຸທຸ ເຕນ (ສີ.), ຍໍ ເຕ ມຸທູ ເຕນ (ປີ.)] ວິເນຫິ ກຓ຺ຑຸໍ [ກຓ຺ຑຸກໍ (ປີ.)], ຍຖາ ອຫໍ ປຣມສຸຂີ ຠເວຍ຺ຍໍ’’.

໑໘. ‘‘ອິໂຕ ນຸ ໂຠໂຕ ກຕເມນ ອສ຺ສໂມ, ກຈ຺ຈິ ຠວໍ ອຠິຣມສິ [ອຠິຣມສີ (ປີ.)] ອຣຎ຺ເຎ;

ກຈ຺ຈິ ນຸ ເຕ [ກຈ຺ຈິ ເຕ (ປີ.)] ມູລຜລໍ ປຫູຕໍ, ກຈ຺ຈິ ຠວນ຺ຕໍ ນ ວິຫິໍສນ຺ຕິ ວາຬາ’’.

໑໙. ‘‘ອິໂຕ ອຸຊຸໍ ອຸຕ຺ຕຣາຍໍ ທິສາຍໍ, ເຂມານທີ ຫິມວຕາ ປຠາວີ [ປຠາຕິ (ສີ. ປີ.)];

ຕສ຺ສາ ຕີເຣ ອສ຺ສໂມ ມຍ຺ຫ ຣມ຺ໂມ, ອໂຫ ຠວໍ ອສ຺ສມໍ ມຍ຺ຫໍ ປສ຺ເສ.

໒໐. ‘‘ອມ຺ພາ ຈ ສາລາ ຕິລກາ ຈ ຊມ຺ພຸໂຍ, ອຸທ຺ທາລກາ ປາຏລິໂຍ ຈ ຜຸລ຺ລາ;

ສມນ຺ຕໂຕ ກິມ຺ປຸຣິສາຠິຄີຕໍ, ອໂຫ ຠວໍ ອສ຺ສມໍ ມຍ຺ຫໍ ປສ຺ເສ.

໒໑. ‘‘ຕາລາ ຈ ມູລາ ຈ ຜລາ ຈ ເມຕ຺ຖ, ວຓ຺ເຓນ ຄນ຺ເຘນ ອຸເປຕຣູປໍ;

ຕໍ ຠູມິຠາເຄຫິ ອຸເປຕຣູປໍ, ອໂຫ ຠວໍ ອສ຺ສມໍ ມຍ຺ຫໍ ປສ຺ເສ.

໒໑. ‘‘ຜລາ ຈ ມູລາ ຈ ປຫູຕເມຕ຺ຖ, ວຓ຺ເຓນ ຄນ຺ເຘນ ຣເສນຸເປຕາ;

ອາຍນ຺ຕິ ຈ ລຸທ຺ທກາ ຕໍ ປເທສໍ, ມາ ເມ ຕໂຕ ມູລຜລໍ ອຫາສຸໍ’’.

໒໓. ‘‘ປິຕາ ມມໍ ມູລຜເລສນໍ ຄໂຕ, ອິທານິ ອາຄຈ຺ຉຕິ ສາຍກາເລ;

ອຸໂຠວ ຄຈ຺ຉາມເສ ອສ຺ສມໍ ຕໍ, ຍາວ ປິຕາ ມູລຜລໂຕ ເອຕຸ’’.

໒໔. ‘‘ອຎ຺ເຎ ພຫູ ອິສໂຍ ສາຘຸຣູປາ, ຣາຊີສໂຍ ອນຸມຄ຺ເຄ ວສນ຺ຕິ;

ເຕ ເຍວ ປຸຈ຺ເຉສິ ມມສ຺ສມໍ ຕໍ, ເຕ ຕໍ ນຍິສ຺ສນ຺ຕິ ມມໍ ສກາເສ’’.

໒໕. ‘‘ນ ເຕ ກຏ຺ຐານິ ຠິນ຺ນານິ, ນ ເຕ ອຸທກມາຠຕໍ;

ອຄ຺ຄີປິ ເຕ ນ ຫາປິໂຕ [ຫາສິໂຕ (ສີ. ສ຺ຍາ.)], ກິໍ ນຸ ມນ຺ໂທວ ຌາຍສິ.

໒໖. ‘‘ຠິນ຺ນານິ ກຏ຺ຐານິ ຫຸໂຕ ຈ ອຄ຺ຄິ, ຕປນີປິ ເຕ ສມິຕາ ພ຺ຣຫ຺ມຈາຣີ [ພ຺ຣຫ຺ມຈາຣິ (?)];

ປີຐຎ຺ຈ ມຍ຺ຫໍ ອຸທກຎ຺ຈ ໂຫຕິ, ຣມສິ ຕຸວໍ [ຕ຺ວໍ (ສີ.)] ພ຺ຣຫ຺ມຠູໂຕ ປຸຣຕ຺ຖາ.

໒໗. ‘‘ອຠິນ຺ນກຏ຺ໂຐສິ ອນາຠໂຕທໂກ, ອຫາປິຕຄ຺ຄີສິ [ອຫາປິຕຄ຺ຄີປິ (ກ.)] ອສິທ຺ຘໂຠຊໂນ [ອສິຏ຺ຐໂຠຊໂນ (ກ.)];

ນ ເມ ຕຸວໍ ອາລປສີ ມມຊ຺ຊ, ນຏ຺ຐໍ ນຸ ກິໍ ເຈຕສິກຎ຺ຈ ທຸກ຺ຂໍ’’.

໒໘. ‘‘ອິຘາຄມາ ຊຏິໂລ ພ຺ຣຫ຺ມຈາຣີ, ສຸທສ຺ສເນຍ຺ໂຍ ສຸຕນູ ວິເນຕິ;

ເນວາຕິທີໂຆ ນ ປນາຕິຣສ຺ໂສ, ສຸກຓ຺ຫກຓ຺ຫຈ຺ຉທເນຫິ ໂຠໂຕ.

໒໙. ‘‘ອມສ຺ສຸຊາໂຕ ອປຸຣາຓວຓ຺ຓີ, ອາຘາຣຣູປຎ຺ຈ ປນສ຺ສ ກຓ຺ເຐ;

ທ຺ເວ ຍມາ [ທ຺ເວ ປສ຺ສ (ສີ.), ທ຺ວາສ຺ສ (ປີ.)] ຄຓ຺ຑາ ອຸເຣສຸ ຊາຕາ, ສຸວຓ຺ຓຕິນ຺ທຸກນິຠາ [ສຸວຓ຺ຓປິນ຺ທູປນິຠາ (ສີ.), ສຸວຓ຺ຓຕິຓ຺ຑຸສນ຺ນິຠາ (ສ຺ຍາ.), ໂສວນ຺ນປິຓ຺ຑູປນິຠາ (ປີ.)] ປຠສ຺ສຣາ.

໓໐. ‘‘ມຸຂຎ຺ຈ ຕສ຺ສ ຠຸສທສ຺ສເນຍ຺ຍໍ, ກຓ຺ເຓສຸ ລມ຺ພນ຺ຕິ ຈ ກຸຎ຺ຈິຕຄ຺ຄາ;

ເຕ ໂຊຕເຣ ຈຣໂຕ ມາຓວສ຺ສ, ສຸຕ຺ຕຎ຺ຈ ຍໍ ສໍຍມນໍ ຊຏານໍ.

໓໑. ‘‘ອຎ຺ຎາ ຈ ຕສ຺ສ ສໍຍມານິ [ສໍຍມນີ (ສີ. ປີ.)] ຈຕສ຺ໂສ, ນີລາ ປີຕາ [ນີລາປິ ຕາ (ປີ.)] ໂລຫິຕິກາ [ໂລຫິຕກາ (ສ຺ຍາ. ປີ. ກ.)] ຈ ເສຕາ;

ຕາ ປິໍສເຣ [ສໍສເຣ (ສີ. ສ຺ຍາ.)] ຈຣໂຕ ມາຓວສ຺ສ, ຕິຣິຏິ [ຈິຣີຏິ (ສີ. ປີ.)] ສງ຺ຆາຣິວ ປາວຸສມ຺ຫິ.

໓໒. ‘‘ນ ມິຂລໍ ມຸຎ຺ຊມຍໍ ຘາເຣຕິ, ນ ສນ຺ຖເຣ [ສນ຺ຕເຈ (ສີ.), ສນ຺ຕຈໍ (ປີ.), ສນ຺ຕເຣ (ກ.)] ໂນ ປນ ປພ຺ພຊສ຺ສ;

ຕາ ໂຊຕເຣ ຊຆນນ຺ຕເຣ [ຊຆນວເຣ (ສີ. ປີ.)] ວິລຄ຺ຄາ, ສເຕຣຕາ ວິຊ຺ຊຸຣິວນ຺ຕລິກ຺ເຂ.

໓໓. ‘‘ອຂີລການິ ຈ ອວຓ຺ຏການິ, ເຫຏ຺ຐາ ນຠ຺ຍາ ກຏິສໂມຫິຕານິ;

ອຆຏ຺ຏິຕາ ນິຈ຺ຈກີຬໍ ກໂຣນ຺ຕິ, ຫໍ ຕາຕ ກິໍຣຸກ຺ຂຜລານິ ຕານິ.

໓໔. ‘‘ຊຏາ ຈ ຕສ຺ສ ຠຸສທສ຺ສເນຍ຺ຍາ, ປໂຣສຕໍ ເວລ຺ລິຕຄ຺ຄາ ສຸຄນ຺ຘາ;

ທ຺ເວຘາ ສິໂຣ ສາຘຸ ວິຠຕ຺ຕຣູໂປ, ອໂຫ ນຸ ໂຂ ມຍ຺ຫ ຕຖາ ຊຏາສ຺ສຸ.

໓໕. ‘‘ຍທາ ຈ ໂສ ປກິຣຕິ ຕາ ຊຏາໂຍ, ວຓ຺ເຓນ ຄນ຺ເຘນ ອຸເປຕຣູປາ;

ນີລຸປ຺ປລໍ ວາຕສເມຣິຕໍວ, ຕເຖວ ສໍວາຕິ ປນສ຺ສໂມ ອຍໍ.

໓໖. ‘‘ປງ຺ໂກ ຈ ຕສ຺ສ ຠຸສທສ຺ສເນຍ຺ໂຍ, ເນຕາທິໂສ ຍາທິໂສ ມຍ຺ຫໍ ກາເຍ [ກາໂຍ (ສີ. ສ຺ຍາ. ປີ.)];

ໂສ ວາຍຕີ ເອຣິໂຕ ມາລຸເຕນ, ວນໍ ຍຖາ ອຄ຺ຄຄິມ຺ເຫ ສຸຜຸລ຺ລໍ.

໓໗. ‘‘ນິຫນ຺ຕິ ໂສ ຣຸກ຺ຂຜລໍ ປຖພ຺ຍາ, ສຸຈິຕ຺ຕຣູປໍ ຣຸຈິຣໍ ທສ຺ສເນຍ຺ຍໍ;

ຂິຕ຺ຕຎ຺ຈ ຕສ຺ສ ປຸນເຣຕິ ຫຕ຺ຖໍ, ຫໍ ຕາຕ ກິໍຣຸກ຺ຂຜລໍ ນຸ ໂຂ ຕໍ.

໓໘. ‘‘ທນ຺ຕາ ຈ ຕສ຺ສ ຠຸສທສ຺ສເນຍ຺ຍາ, ສຸທ຺ຘາ ສມາ ສງ຺ຂວຣູປປນ຺ນາ;

ມໂນ ປສາເທນ຺ຕິ ວິວຣິຍມານາ, ນ ຫິ [ນ ຫ (ສີ. ປີ.)] ນູນ ໂສ ສາກມຂາທິ ເຕຫິ.

໓໙. ‘‘ອກກ຺ກສໍ ອຄ຺ຄຬິຕໍ ມຸຫຸໍ ມຸທຸໍ, ອຸຊຸໍ ອນຸທ຺ຘຕໍ ອຈປລມສ຺ສ ຠາສິຕໍ;

ຣຸທໍ ມນຸຎ຺ຎໍ ກຣວີກສຸສ຺ສຣໍ, ຫທຍງ຺ຄມໍ ຣຎ຺ຊຍເຕວ ເມ ມໂນ.

໔໐. ‘‘ພິນ຺ທຸສ຺ສໂຣ ນາຕິວິສຏ຺ຐວາກ຺ໂຍ [ນາຕິວິສ຺ສຏ຺ຐວາກ຺ໂຍ (ສີ. ສ຺ຍາ. ປີ.)], ນ ນູນ ສຊ຺ຌາຍມຕິປ຺ປຍຸຕ຺ໂຕ;

ອິຈ຺ຉາມິ ໂຠ [ໂຂ (ສີ. ສ຺ຍາ. ປີ.)] ຕໍ ປຸນເທວ ທຏ຺ຐຸໍ, ມິຕ຺ໂຕ ຫິ [ມິຕ຺ຕໍ ຫິ (ສີ. ສ຺ຍາ. ປີ.)] ເມ ມາຓໂວຫຸ [ມາຓວາຫຸ (ສີ. ສ຺ຍາ.), ມາຓວາຫູ (ປີ.)] ປຸຣຕ຺ຖາ.

໔໑. ‘‘ສຸສນ຺ຘິ ສພ຺ພຕ຺ຖ ວິມຏ຺ຐິມໍ ວຓໍ, ປຸຖູ [ປຸຖຸໍ (ປີ.), ປຸຖຸ (ກ.)] ສຸຊາຕໍ ຂຣປຕ຺ຕສນ຺ນິຠໍ;

ເຕເນວ ມໍ ອຸຕ຺ຕຣິຍານ ມາຓໂວ, ວິວຣິຕໍ ອູຣຸໍ ຊຆເນນ ປີຬຍິ.

໔໒. ‘‘ຕປນ຺ຕິ ອາຠນ຺ຕິ ວິໂຣຈເຣ ຈ, ສເຕຣຕາ ວິຊ຺ຊຸຣິວນ຺ຕລິກ຺ເຂ;

ພາຫາ ມຸທູ ອຎ຺ຊນໂລມສາທິສາ, ວິຈິຕ຺ຣວຏ຺ຏງ຺ຄຸລິກາສ຺ສ ໂສຠເຣ.

໔໓. ‘‘ອກກ຺ກສງ຺ໂຄ ນ ຈ ທີຆໂລໂມ, ນຂາສ຺ສ ທີຆາ ອປິ ໂລຫິຕຄ຺ຄາ;

ມຸທູຫິ ພາຫາຫິ ປລິສ຺ສຊນ຺ໂຕ, ກລ຺ຍາຓຣູໂປ ຣມຍໍ [ຣມຍ຺ຫໍ (ກ.)] ອຸປຏ຺ຐຫິ.

໔໔. ‘‘ທຸມສ຺ສ ຕູລູປນິຠາ ປຠສ຺ສຣາ, ສຸວຓ຺ຓກມ຺ພຸຕລວຏ຺ຏສຸຈ຺ຉວີ;

ຫຕ຺ຖາ ມຸທູ ເຕຫິ ມໍ ສໍຜຸສິຕ຺ວາ, ອິໂຕ ຄໂຕ ເຕນ ມໍ ທຫນ຺ຕິ ຕາຕ.

໔໕. ‘‘ນ ນູນ [ນ ຫ ນູນ (ສີ. ປີ.)] ໂສ ຂາຣິວິຘໍ ອຫາສິ, ນ ນູນ ໂສ ກຏ຺ຐານິ ສຍໍ ອຠຎ຺ຊິ;

ນ ນູນ ໂສ ຫນ຺ຕິ ທຸເມ ກຸຐາຣິຍາ [ກຸຘາຣິຍາ (ກ.)], ນ ຫິສ຺ສ [ນ ປິສ຺ສ (ສີ. ສ຺ຍາ. ປີ.)] ຫຕ຺ເຖສຸ ຂິລານິ ອຕ຺ຖິ.

໔໖. ‘‘ອຈ຺ໂຉ ຈ ໂຂ ຕສ຺ສ ວຓໍ ອກາສິ, ໂສ ມໍພ຺ຣວິ ສຸຂິຕໍ ມໍ ກໂຣຫິ;

ຕາຫໍ ກຣິໍ ເຕນ ມມາສິ ໂສຂ຺ຍໍ, ໂສ ຈພ຺ຣວິ ສຸຂິໂຕສ຺ມີຕິ ພ຺ຣຫ຺ເມ.

໔໗. ‘‘ອຍຎ຺ຈ ເຕ ມາລຸວປຓ຺ຓສນ຺ຖຕາ, ວິກິຓ຺ຓຣູປາວ ມຍາ ຈ ເຕນ ຈ;

ກິລນ຺ຕຣູປາ ອຸທເກ ຣມິຕ຺ວາ, ປຸນປ຺ປຸນໍ ປຓ຺ຓກຸຏິໍ ວຊາມ.

໔໘. ‘‘ນ ມຊ຺ຊ ມນ຺ຕາ ປຏິຠນ຺ຕິ ຕາຕ, ນ ອຄ຺ຄິຫຸຕ຺ຕໍ ນປິ ຍຎ຺ຎຕນ຺ຕໍ [ຍຎ຺ຎຕນ຺ຕ຺ຣໍ (ສີ.), ຍຎ຺ຎໍ ຕຕ຺ຣ (ປີ. ກ.), ຍຎ຺ຎຕຕ຺ຣ (ສ຺ຍາ.)];

ນ ຈາປິ ເຕ ມູລຜລານິ ຠຸຎ຺ເຊ, ຍາວ ນ ປສ຺ສາມິ ຕໍ ພ຺ຣຫ຺ມຈາຣິໍ.

໔໙. ‘‘ອທ຺ຘາ ປຊານາສິ ຕຸວມ຺ປິ ຕາຕ, ຍສ຺ສໍ ທິສໍ [ທິສາຍໍ (ສ຺ຍາ. ປີ. ກ.)] ວສເຕ ພ຺ຣຫ຺ມຈາຣີ;

ຕໍ ມໍ ທິສໍ ປາປຍ ຕາຕ ຂິປ຺ປໍ, ມາ ເຕ ອຫໍ ອມຣິມສ຺ສມມ຺ຫິ.

໕໐. ‘‘ວິຈິຕ຺ຣຜຸລ຺ລໍ [ວິຈິຕ຺ຣປຸປ຺ຜໍ (ສີ. ປີ.)] ຫິ ວນໍ ສຸຕໍ ມຍາ, ທິຊາຠິຆຸຏ຺ຐໍ ທິຊສງ຺ຆເສວິຕໍ;

ຕໍ ມໍ ວນໍ ປາປຍ ຕາຕ ຂິປ຺ປໍ, ປຸຣາ ເຕ ປາຓໍ ວິຊຫາມິ ອສ຺ສເມ’’.

໕໑. ‘‘ອິມສ຺ມາຫໍ ໂຊຕິຣເສ ວນມ຺ຫິ, ຄນ຺ຘພ຺ພເທວຈ຺ຉຣສງ຺ຆເສວິເຕ;

ອິສີນມາວາເສ ສນນ຺ຕນມ຺ຫິ, ເນຕາທິສໍ ອຣຕິໍ ປາປຸເຓຖ.

໕໒. ‘‘ຠວນ຺ຕິ ມິຕ຺ຕານິ ອໂຖ ນ ໂຫນ຺ຕິ, ຎາຕີສຸ ມິຕ຺ເຕສຸ ກໂຣນ຺ຕິ ເປມໍ;

ອຍຎ຺ຈ ຊມ຺ໂມ ກິສ຺ສ ວາ ນິວິຏ຺ໂຐ, ໂຍ ເນວ ຊານາຕິ ກຸໂຕມ຺ຫິ ອາຄໂຕ.

໕໓. ‘‘ສໍວາເສນ ຫິ ມິຕ຺ຕານິ, ສນ຺ຘິຍນ຺ຕິ [ສນ຺ຘີຍນ຺ຕິ (ສີ. ປີ.)] ປຸນປ຺ປຸນໍ;

ສ຺ເວວ ມິຕ຺ໂຕ [ສາ ຈ ເມຕ຺ຕິ (ປີ.)] ອສໍຄນ຺ຕຸ, ອສໍວາເສນ ຊີຣຕິ.

໕໔. ‘‘ສເຈ ຕຸວໍ ທກ຺ຂສິ ພ຺ຣຫ຺ມຈາຣິໍ, ສເຈ ຕຸວໍ ສລ຺ລເປ [ສລ຺ລປິ (ສີ.)] ພ຺ຣຫ຺ມຈາຣິນາ;

ສມ຺ປນ຺ນສສ຺ສໍວ ມໂຫທເກນ, ຕໂປຄຸຓໍ ຂິປ຺ປມິມໍ ປຫິສ຺ສສິ [ປຫສ຺ສສິ (ສີ. ສ຺ຍາ. ປີ.)].

໕໕. ‘‘ປຸນປິ [ປຸນປ຺ປິ (ປີ.)] ເຈ ທກ຺ຂສິ ພ຺ຣຫ຺ມຈາຣິໍ, ປຸນປິ [ປຸນປ຺ປິ (ປີ.)] ເຈ ສລ຺ລເປ ພ຺ຣຫ຺ມຈາຣິນາ;

ສມ຺ປນ຺ນສສ຺ສໍວ ມໂຫທເກນ, ອຸສ຺ມາຄຕໍ ຂິປ຺ປມິມໍ ປຫິສ຺ສສິ.

໕໖. ‘‘ຠູຕານິ ເຫຕານິ [ເອຕານິ (ປີ.)] ຈຣນ຺ຕິ ຕາຕ, ວິຣູປຣູເປນ ມນຸສ຺ສໂລເກ;

ນ ຕານິ ເສເວຖ ນໂຣ ສປຎ຺ໂຎ, ອາສຊ຺ຊ ນໍ ນສ຺ສຕິ ພ຺ຣຫ຺ມຈາຣີ’’ຕິ.

ນິຬິນິກາຊາຕກໍ [ນຬິນີຊາຕກໍ (ສີ.), ນຬິນິຊາຕກໍ (ປີ.)] ປຐມໍ.

໕໒໗. ອຸມ຺ມາທນ຺ຕີຊາຕກໍ (໒)

໕໗. ‘‘ນິເວສນໍ ກສ຺ສ ນຸທໍ ສຸນນ຺ທ, ປາກາເຣນ ປຓ຺ຑຸມເຍນ ຄຸຕ຺ຕໍ;

ກາ ທິສ຺ສຕິ ອຄ຺ຄິສິຂາວ ທູເຣ, ເວຫາຍສໍ [ເວຫາສຍໍ (ສີ. ປີ.)] ປພ຺ພຕຄ຺ເຄວ ອຈ຺ຈິ.

໕໘. ‘‘ຘີຕາ ນ຺ວຍໍ [ນຍໍ (ສີ. ປີ.), ນ຺ວາຍໍ (ສ຺ຍາ.)] ກສ຺ສ ສຸນນ຺ທ ໂຫຕິ, ສຸຓິສາ ນ຺ວຍໍ [ນຍໍ (ສີ. ປີ.), ນ຺ວາຍໍ (ສ຺ຍາ.)] ກສ຺ສ ອໂຖປິ ຠຣິຍາ;

ອກ຺ຂາຫິ ເມ ຂິປ຺ປມິເຘວ ປຸຏ຺ໂຐ, ອວາວຏາ ຍທິ ວາ ອຕ຺ຖິ ຠຕ຺ຕາ’’.

໕໙. ‘‘ອຫຎ຺ຫິ ຊານາມິ ຊນິນ຺ທ ເອຕໍ, ມຕ຺ຍາ ຈ ເປຕ຺ຍາ ຈ ອໂຖປິ ອສ຺ສາ;

ຕເວວ ໂສ ປຸຣິໂສ ຠູມິປາລ, ຣຕ຺ຕິນ຺ທິວໍ ອປ຺ປມຕ຺ໂຕ ຕວຕ຺ເຖ.

໖໐. ‘‘ອິທ຺ໂຘ ຈ ຜີໂຕ ຈ ສຸວຑ຺ຒິໂຕ [ສຸພາຬ຺ຫິໂກ (ປີ.)] ຈ, ອມຈ຺ໂຈ ຈ ເຕ ອຎ຺ຎຕໂຣ ຊນິນ຺ທ;

ຕສ຺ເສສາ ຠຣິຍາຠິປາຣກສ຺ສ [ອຫິປາຣກສ຺ສ (ສີ. ປີ.), ອຠິປາທກສ຺ສ (ກ.)], ອຸມ຺ມາທນ຺ຕີ [ອຸມ຺ມາທນ຺ຕີຕິ (ກ.)] ນາມເຘຍ຺ເຍນ ຣາຊ’’.

໖໑. ‘‘ອມ຺ໂຠ ອມ຺ໂຠ ນາມມິທໍ ອິມິສ຺ສາ, ມຕ຺ຍາ ຈ ເປຕ຺ຍາ ຈ ກຕໍ ສຸສາຘຸ;

ຕທາ [ຕຖາ (ສີ. ສ຺ຍາ. ປີ.)] ຫິ ມຍ຺ຫໍ ອວໂລກຍນ຺ຕີ, ອຸມ຺ມຕ຺ຕກໍ ອຸມ຺ມທນ຺ຕີ ອກາສິ’’.

໖໒. ‘‘ຍາ ປຸຓ຺ຓມາເສ [ປຸຓ຺ຓມາເຍ (ກ.)] ມິຄມນ຺ທໂລຈນາ, ອຸປາວິສິ ປຸຓ຺ຑຣີກຕ຺ຕຈງ຺ຄີ;

ທ຺ເວ ປຸຓ຺ຓມາໂຍ ຕທຫູ ອມຎ຺ຎຫໍ, ທິສ຺ວານ ປາຣາວຕຣຕ຺ຕວາສິນິໍ.

໖໓. ‘‘ອຬາຣປມ຺ເຫຫິ ສຸເຠຫິ ວຄ຺ຄຸຠິ, ປໂລຠຍນ຺ຕີ ມໍ ຍທາ ອຸທິກ຺ຂຕິ;

ວິຊມ຺ຠມານາ ຫຣເຕວ ເມ ມໂນ, ຊາຕາ ວເນ ກິມ຺ປຸຣິສີວ ປພ຺ພເຕ.

໖໔. ‘‘ຕທາ ຫິ ພ຺ຣຫຕີ ສາມາ, ອາມຸຕ຺ຕມຓິກຸຓ຺ຑລາ;

ເອກຈ຺ຈວສນາ ນາຣີ, ມິຄີ ຠນ຺ຕາວຸທິກ຺ຂຕິ.

໖໕. ‘‘ກທາສ຺ສຸ ມໍ ຕມ຺ພນຂາ ສຸໂລມາ, ພາຫາມຸທູ ຈນ຺ທນສາຣລິຕ຺ຕາ;

ວຏ຺ຏງ຺ຄຸລີ ສນ຺ນຕຘີຣກຸຕ຺ຕິຍາ, ນາຣີ ອຸປຎ຺ຎິສ຺ສຕິ ສີສໂຕ ສຸຠາ.

໖໖. ‘‘ກທາສ຺ສຸ ມໍ ກຎ຺ຈນຊາລຸຣຈ຺ຉທາ, ຘີຕາ ຕິຣີຏິສ຺ສ ວິລຄ຺ຄມຊ຺ຌາ;

ມຸທູຫິ ພາຫາຫິ ປລິສ຺ສຊິສ຺ສຕິ, ພ຺ຣຫາວເນ ຊາຕທຸມໍວ ມາລຸວາ.

໖໗. ‘‘ກທາສ຺ສຸ [ກທາສ຺ສຸ ມໍ (ສ຺ຍາ. ກ.)] ລາຂາຣສຣຕ຺ຕສຸຈ຺ຉວີ, ພິນ຺ທຸຕ຺ຖນີ ປຸຓ຺ຑຣີກຕ຺ຕຈງ຺ຄີ;

ມຸຂໍ ມຸເຂນ ອຸປນາມຍິສ຺ສຕິ, ໂສຓ຺ໂຑວ ໂສຓ຺ຑສ຺ສ ສຸຣາຍ ຖາລໍ.

໖໘. ‘‘ຍທາທ຺ທສໍ [ຍຖາທ຺ທສໍ (ປີ.)] ຕໍ ຕິຏ຺ຐນ຺ຕິໍ, ສພ຺ພຠທ຺ທໍ [ສພ຺ພຄຕ຺ຕໍ (ສີ. ສ຺ຍາ. ປີ.)] ມໂນຣມໍ;

ຕໂຕ ສກສ຺ສ ຈິຕ຺ຕສ຺ສ, ນາວໂພຘາມິ ກຎ຺ຈິນໍ [ກິຎ຺ຈິນໍ (ກ.), ກິຎ຺ຈນໍ (ປີ.)].

໖໙. ‘‘ອຸມ຺ມາທນ຺ຕິມຫໍ ທຏ຺ຐາ [ທິຏ຺ຐາ (ສີ. ສ຺ຍາ. ປີ. ກ.)], ອາມຸຕ຺ຕມຓິກຸຓ຺ຑລໍ;

ນ ສຸປາມິ ທິວາຣຕ຺ຕິໍ, ສຫສ຺ສໍວ ປຣາຊິໂຕ.

໗໐. ‘‘ສກ຺ໂກ ເຈ [ຈ (ສີ. ປີ.)] ເມ ວຣໍ ທຊ຺ຊາ, ໂສ ຈ ລພ຺ເຠຖ ເມ ວໂຣ;

ເອກຣຕ຺ຕໍ ທ຺ວິຣຕ຺ຕໍ [ທິຣຕ຺ຕໍ (ປີ.)] ວາ, ຠເວຍ຺ຍໍ ອຠິປາຣໂກ;

ອຸມ຺ມາທນ຺ຕ຺ຍາ ຣມິຕ຺ວານ, ສິວິຣາຊາ ຕໂຕ ສິຍໍ’’ [ສິຍາ (ສ຺ຍາ. ປີ.)].

໗໑. ‘‘ຠູຕານິ ເມ ຠູຕປຕີ ນມສ຺ສໂຕ, ອາຄມ຺ມ ຍກ຺ໂຂ ອິທເມຕທພ຺ຣວິ;

ຣຎ຺ໂຎ ມໂນ ອຸມ຺ມທນ຺ຕ຺ຍາ ນິວິຏ຺ໂຐ, ທທາມິ ເຕ ຕໍ ປຣິຈາຣຍສ຺ສຸ’’.

໗໒. ‘‘ປຸຎ຺ຎາ ວິຘໍເສ ອມໂຣ ນ ຈມ຺ຫິ, ຊໂນ ຈ ເມ ປາປມິທຎ຺ຈ [ປາປມິທນ຺ຕິ (ສີ. ປີ.)] ຊຎ຺ຎາ;

ຠຸໂສ ຈ ຕ຺ຍສ຺ສ ມນໂສ ວິຆາໂຕ, ທຕ຺ວາ ປິຍໍ ອຸມ຺ມທນ຺ຕິໍ ອທຏ຺ຐາ’’.