໕໒໘. ມຫາໂພຘິຊາຕກໍ (໓)

໑໒໔. ‘‘ກິໍ ນຸ ທຓ຺ຑໍ ກິມຊິນໍ, ກິໍ ຉຕ຺ຕໍ ກິມຸປາຫນໍ;

ກິມງ຺ກຸສຎ຺ຈ ປຕ຺ຕຎ຺ຈ, ສງ຺ຆາຏິຎ຺ຈາປິ ພ຺ຣາຫ຺ມຓ;

ຕຣມານຣູໂປຫາສິ [ຄຓ຺ຫາສິ (ສີ. ສ຺ຍາ. ປີ.)], ກິໍ ນຸ ປຕ຺ຖຍເສ ທິສໍ’’.

໑໒໕. ‘‘ທ຺ວາທເສຕານິ ວສ຺ສານິ, ວຸສິຕານິ ຕວນ຺ຕິເກ;

ນາຠິຊານາມິ ໂສເຓນ, ປິງ຺ຄເລນາຠິກູຊິຕໍ.

໑໒໖. ‘‘ສ຺ວາຍໍ ທິຕ຺ໂຕວ ນທຕິ, ສຸກ຺ກທາຐໍ ວິທໍສຍໍ;

ຕວ ສຸຕ຺ວາ ສຠຣິຍສ຺ສ, ວີຕສທ຺ຘສ຺ສ ມໍ ປຕິ’’.

໑໒໗. ‘‘ອຫຸ ເອສ ກໂຕ ໂທໂສ, ຍຖາ ຠາສສິ ພ຺ຣາຫ຺ມຓ;

ເອສ ຠິຍ຺ໂຍ ປສີທາມິ, ວສ ພ຺ຣາຫ຺ມຓ ມາຄມາ’’.

໑໒໘. ‘‘ສພ຺ພເສໂຕ ປຸເຣ ອາສິ, ຕໂຕປິ ສພໂລ ອຫຸ;

ສພ຺ພໂລຫິຕໂກ ທານິ, ກາໂລ ປກ຺ກມິຕຸໍ ມມ.

໑໒໙. ‘‘ອພ຺ຠນ຺ຕຣໍ ປຸເຣ ອາສິ, ຕໂຕ ມຊ຺ເຌ ຕໂຕ ພຫິ;

ປຸຣາ ນິທ຺ຘມນາ ໂຫຕິ, ສຍເມວ ວຊາມຫໍ.

໑໓໐. ‘‘ວີຕສທ຺ຘໍ ນ ເສເວຍ຺ຍ, ອຸທປານໍວໂນທກໍ;

ສເຈປິ ນໍ ອນຸຂເຓ, ວາຣິ ກທ຺ທມຄນ຺ຘິກໍ.

໑໓໑. ‘‘ປສນ຺ນເມວ ເສເວຍ຺ຍ, ອປ຺ປສນ຺ນໍ ວິວຊ຺ຊເຍ;

ປສນ຺ນໍ ປຍິຣຸປາເສຍ຺ຍ, ຣຫທໍ ວຸທກຕ຺ຖິໂກ.

໑໓໒. ‘‘ຠເຊ ຠຊນ຺ຕໍ ປຸຣິສໍ, ອຠຊນ຺ຕໍ ນ ຠຊ຺ຊເຍ [ຠາຊເຍ (ປີ.)];

ອສປ຺ປຸຣິສຘມ຺ໂມ ໂສ, ໂຍ ຠຊນ຺ຕໍ ນ ຠຊ຺ຊຕິ [ຠາຊຕິ (ປີ.)].

໑໓໓. ‘‘ໂຍ ຠຊນ຺ຕໍ ນ ຠຊຕິ, ເສວມານໍ ນ ເສວຕິ;

ສ ເວ ມນຸສ຺ສປາປິຏ຺ໂຐ, ມິໂຄ ສາຂສ຺ສິໂຕ ຍຖາ.

໑໓໔. ‘‘ອຈ຺ຈາຠິກ຺ຂຓສໍສຄ຺ຄາ, ອສໂມສຣເຓນ ຈ;

ເອເຕນ ມິຕ຺ຕາ ຊີຣນ຺ຕິ, ອກາເລ ຍາຈນາຍ ຈ.

໑໓໕. ‘‘ຕສ຺ມາ ນາຠິກ຺ຂຓໍ ຄຈ຺ເຉ, ນ ຈ ຄຈ຺ເຉ ຈິຣາຈິຣໍ;

ກາເລນ ຍາຈໍ ຍາເຈຍ຺ຍ, ເອວໍ ມິຕ຺ຕາ ນ ຊີຍເຣ [ຊີຣເຣ (ສ຺ຍາ. ປີ.)].

໑໓໖. ‘‘ອຕິຈິຣໍ ນິວາເສນ, ປິໂຍ ຠວຕິ ອປ຺ປິໂຍ;

ອາມນ຺ຕ ໂຂ ຕໍ ຄຈ຺ຉາມ, ປຸຣາ ເຕ ໂຫມ ອປ຺ປິຍາ’’.

໑໓໗. ‘‘ເອວໍ ເຈ ຍາຈມານານໍ, ອຎ຺ຊລິໍ ນາວພຸຊ຺ຌສິ;

ປຣິຈາຣການໍ ສຕໍ [ປຣິຈາຣິການໍ ສຕ຺ຕານໍ (ສີ. ສ຺ຍາ. ປີ.)], ວຈນໍ ນ ກໂຣສິ ໂນ;

ເອວໍ ຕໍ ອຠິຍາຈາມ, ປຸນ ກຍິຣາສິ ປຣິຍາຍໍ’’.

໑໓໘. ‘‘ເອວໍ ເຈ ໂນ ວິຫຣຕໍ, ອນ຺ຕຣາໂຍ ນ ເຫສ຺ສຕິ;

ຕຸຍ຺ຫໍ ວາປິ [ຕຸມ຺ຫຎ຺ຈາປິ (ສີ.), ຕຸຍ຺ຫຎ຺ຈາປິ (ປີ.)] ມຫາຣາຊ, ມຍ຺ຫໍ ວາ [ອມ຺ຫໍ ວາ (ສີ.), ມຍ຺ຫຎ຺ຈ (ປີ.)] ຣຏ຺ຐວທ຺ຘນ;

ອປ຺ເປວ ນາມ ປສ຺ເສມ, ອໂຫຣຕ຺ຕານມຈ຺ຈເຍ’’.

໑໓໙. ‘‘ອຸທີຣຓາ ເຈ ສໍຄຕ຺ຍາ, ຠາວາຍ ມນຸວຕ຺ຕຕິ;

ອກາມາ ອກຣຓີຍໍ ວາ, ກຣຓີຍໍ ວາປິ ກຸພ຺ພຕິ;

ອາກາມາກຣຓີຍມ຺ຫິ, ກ຺ວິຘ ປາເປນ ລິປ຺ປຕິ [ລິມ຺ປຕິ (ສ຺ຍາ. ກ.)].

໑໔໐. ‘‘ໂສ ເຈ ອຕ຺ໂຖ ຈ ຘມ຺ໂມ ຈ, ກລ຺ຍາໂຓ ນ ຈ ປາປໂກ;

ໂຠໂຕ ເຈ ວຈນໍ ສຈ຺ຈໍ, ສຸຫໂຕ ວານໂຣ ມຍາ.

໑໔໑. ‘‘ອຕ຺ຕໂນ ເຈ ຫິ ວາທສ຺ສ, ອປຣາຘໍ ວິຊານິຍາ [ວິຊານິຍ (ສີ. ສ຺ຍາ. ປີ.)];

ນ ມໍ ຕ຺ວໍ ຄຣເຫຍ຺ຍາສິ, ໂຠໂຕ ວາໂທ ຫິ ຕາທິໂສ’’.

໑໔໒. ‘‘ອິສ຺ສໂຣ ສພ຺ພໂລກສ຺ສ, ສເຈ ກປ຺ເປຕິ ຊີວິຕໍ;

ອິທ຺ຘິໍ [ອິທ຺ຘິ (ປີ. ກ.)] ພ຺ຍສນຠາວຎ຺ຈ, ກມ຺ມໍ ກລ຺ຍາຓປາປກໍ;

ນິທ຺ເທສກາຣີ ປຸຣິໂສ, ອິສ຺ສໂຣ ເຕນ ລິປ຺ປຕິ.

໑໔໓. ‘‘ໂສ ເຈ ອຕ຺ໂຖ ຈ ຘມ຺ໂມ ຈ, ກລ຺ຍາໂຓ ນ ຈ ປາປໂກ;

ໂຠໂຕ ເຈ ວຈນໍ ສຈ຺ຈໍ, ສຸຫໂຕ ວານໂຣ ມຍາ.

໑໔໔. ‘‘ອຕ຺ຕໂນ ເຈ ຫິ ວາທສ຺ສ, ອປຣາຘໍ ວິຊານິຍາ;

ນ ມໍ ຕ຺ວໍ ຄຣເຫຍ຺ຍາສິ, ໂຠໂຕ ວາໂທ ຫິ ຕາທິໂສ’’.

໑໔໕. ‘‘ສເຈ ປຸພ຺ເພກຕເຫຕຸ, ສຸຂທຸກ຺ຂໍ ນິຄຈ຺ຉຕິ;

ໂປຣາຓກໍ ກຕໍ ປາປໍ, ຕເມໂສ ມຸຈ຺ຈເຕ [ມຸຎ຺ຈເຕ (ສີ. ສ຺ຍາ.)] ອິຓໍ;

ໂປຣາຓກອິຓໂມກ຺ໂຂ, ກ຺ວິຘ ປາເປນ ລິປ຺ປຕິ.

໑໔໖. ‘‘ໂສ ເຈ ອຕ຺ໂຖ ຈ ຘມ຺ໂມ ຈ, ກລ຺ຍາໂຓ ນ ຈ ປາປໂກ;

ໂຠໂຕ ເຈ ວຈນໍ ສຈ຺ຈໍ, ສຸຫໂຕ ວານໂຣ ມຍາ.

໑໔໗. ‘‘ອຕ຺ຕໂນ ເຈ ຫິ ວາທສ຺ສ, ອປຣາຘໍ ວິຊານິຍາ;

ນ ມໍ ຕ຺ວໍ ຄຣເຫຍ຺ຍາສິ, ໂຠໂຕ ວາໂທ ຫິ ຕາທິໂສ’’.

໑໔໘. ‘‘ຈຕຸນ຺ນໍເຍວຸປາທາຍ, ຣູປໍ ສມ຺ໂຠຕິ ປາຓິນໍ;

ຍໂຕ ຈ ຣູປໍ ສມ຺ໂຠຕິ, ຕຕ຺ເຖວານຸປຄຈ຺ຉຕິ;

ອິເຘວ ຊີວຕິ ຊີໂວ, ເປຈ຺ຈ ເປຈ຺ຈ ວິນສ຺ສຕິ.

໑໔໙. ອຸຈ຺ຉິຊ຺ຊຕິ ອຍໍ ໂລໂກ, ເຍ ພາລາ ເຍ ຈ ປຓ຺ຑິຕາ;

ອຸຈ຺ຉິຊ຺ຊມາເນ ໂລກສ຺ມິໍ, ກ຺ວິຘ ປາເປນ ລິປ຺ປຕິ.

໑໕໐. ‘‘ໂສ ເຈ ອຕ຺ໂຖ ຈ ຘມ຺ໂມ ຈ, ກລ຺ຍາໂຓ ນ ຈ ປາປໂກ;

ໂຠໂຕ ເຈ ວຈນໍ ສຈ຺ຈໍ, ສຸຫໂຕ ວານໂຣ ມຍາ.

໑໕໑. ‘‘ອຕ຺ຕໂນ ເຈ ຫິ ວາທສ຺ສ, ອປຣາຘໍ ວິຊານິຍາ;

ນ ມໍ ຕ຺ວໍ ຄຣເຫຍ຺ຍາສິ, ໂຠໂຕ ວາໂທ ຫິ ຕາທິໂສ’’.

໑໕໒. ‘‘ອາຫຸ ຂຕ຺ຕວິທາ [ຂຕ຺ຕວິຘາ (ສີ. ສ຺ຍາ. ປີ.)] ໂລເກ, ພາລາ ປຓ຺ຑິຕມານິໂນ.

ມາຕຣໍ ປິຕຣໍ ຫຎ຺ເຎ, ອໂຖ ເຊຏ຺ຐມ຺ປິ ຠາຕຣໍ;

ຫເນຍ຺ຍ ປຸຕ຺ຕ [ປຸຕ຺ເຕ ຈ (ປີ.)] ທາເຣ ຈ, ອຕ຺ໂຖ ເຈ ຕາທິໂສ ສິຍາ.

໑໕໓. ‘‘ຍສ຺ສ ຣຸກ຺ຂສ຺ສ ຉາຍາຍ, ນິສີເທຍ຺ຍ ສເຍຍ຺ຍ ວາ;

ນ ຕສ຺ສ ສາຂໍ ຠຎ຺ເຊຍ຺ຍ, ມິຕ຺ຕທຸພ຺ໂຠ [ມິຕ຺ຕທູຠີ (ປີ.)] ຫິ ປາປໂກ.

໑໕໔. ‘‘ອຖ ອຕ຺ເຖ ສມຸປ຺ປນ຺ເນ, ສມູລມປິ ອພ຺ພເຫ [ອພ຺ຠເຫ (ສ຺ຍາ. ກ.)];

ອຕ຺ໂຖ ເມ ສມ຺ພເລນາປິ, ສຸຫໂຕ ວານໂຣ ມຍາ.

໑໕໕. [ອຍໍ ຄາຖາ ສີຫຬໂປຕ຺ຖເກ ນຕ຺ຖິ] ‘‘ໂສ ເຈ ອຕ຺ໂຖ ຈ ຘມ຺ໂມ ຈ, ກລ຺ຍາໂຓ ນ ຈ ປາປໂກ;

ໂຠໂຕ ເຈ ວຈນໍ ສຈ຺ຈໍ, ສຸຫໂຕ ວານໂຣ ມຍາ [ອຍໍ ຄາຖາ ສີຫຬໂປຕ຺ຖເກ ນຕ຺ຖິ].

໑໕໖. ‘‘ອຕ຺ຕໂນ ເຈ ຫິ ວາທສ຺ສ, ອປຣາຘໍ ວິຊານິຍາ;

ນ ມໍ ຕ຺ວໍ ຄຣເຫຍ຺ຍາສິ, ໂຠໂຕ ວາໂທ ຫິ ຕາທິໂສ.

໑໕໗. ‘‘ອເຫຕຸວາໂທ ປຸຣິໂສ, ໂຍ ຈ ອິສ຺ສຣກຸຕ຺ຕິໂກ;

ປຸພ຺ເພກຕີ ຈ ອຸຈ຺ເຉທີ, ໂຍ ຈ ຂຕ຺ຕວິໂທ ນໂຣ.

໑໕໘. ‘‘ເອເຕ ອສປ຺ປຸຣິສາ ໂລເກ, ພາລາ ປຓ຺ຑິຕມານິໂນ;

ກເຣຍ຺ຍ ຕາທິໂສ ປາປໍ, ອໂຖ ອຎ຺ຎມ຺ປິ ກາຣເຍ;

ອສປ຺ປຸຣິສສໍສຄ຺ໂຄ, ທຸກ຺ຂນ຺ໂຕ [ທຸກ຺ກໂຏ (ສີ.)] ກຏຸກຸທ຺ຣໂຍ.

໑໕໙. ‘‘ອຸຣພ຺ຠຣູເປນ ວກສ຺ສຸ [ພກາສຸ (ສີ. ສ຺ຍາ.), ວກາສຸ (ປີ.)] ປຸພ຺ເພ, ອສໍກິໂຕ ອຊຍູຖໍ ອຸເປຕິ;

ຫນ຺ຕ຺ວາ ອຸຣຓິໍ ອຊິກໍ [ອຊິຍໍ (ສີ. ສ຺ຍາ. ປີ.)] ອຊຎ຺ຈ, ອຸຕ຺ຣາສຍິຕ຺ວາ [ຈິຕ຺ຣາສຍິຕ຺ວາ (ສີ. ປີ.)] ເຍນ ກາມໍ ປເລຕິ.

໑໖໐. ‘‘ຕຖາວິເຘເກ ສມຓພ຺ຣາຫ຺ມຓາເສ, ຉທນໍ ກຕ຺ວາ ວຎ຺ຈຍນ຺ຕິ ມນຸສ຺ເສ;

ອນາສກາ ຖຓ຺ຑິລເສຍ຺ຍກາ ຈ, ຣໂຊຊລ຺ລໍ ອຸກ຺ກຸຏິກປ຺ປຘານໍ;

ປຣິຍາຍຠຕ຺ຕຎ຺ຈ ອປານກຕ຺ຕາ, ປາປາຈາຣາ ອຣຫນ຺ໂຕ ວທານາ.

໑໖໑. ‘‘ເອເຕ ອສປ຺ປຸຣິສາ ໂລເກ, ພາລາ ປຓ຺ຑິຕມານິໂນ;

ກເຣຍ຺ຍ ຕາທິໂສ ປາປໍ, ອໂຖ ອຎ຺ຎມ຺ປິ ກາຣເຍ;

ອສປ຺ປຸຣິສສໍສຄ຺ໂຄ, ທຸກ຺ຂນ຺ໂຕ ກຏຸກຸທ຺ຣໂຍ.

໑໖໒. ‘‘ຍມາຫຸ ນຕ຺ຖິ ວີຣິຍນ຺ຕິ, ອເຫຕຸຎ຺ຈ ປວທນ຺ຕິ [ເຫຕຸຎ຺ຈ ອປວທນ຺ຕິ (ສີ. ສ຺ຍາ. ປີ.)] ເຍ;

ປຣກາຣໍ ອຕ຺ຕກາຣຎ຺ຈ, ເຍ ຕຸຈ຺ຉໍ ສມວຓ຺ຓຍຸໍ.

໑໖໓. ‘‘ເອເຕ ອສປ຺ປຸຣິສາ ໂລເກ, ພາລາ ປຓ຺ຑິຕມານິໂນ;

ກເຣຍ຺ຍ ຕາທິໂສ ປາປໍ, ອໂຖ ອຎ຺ຎມ຺ປິ ກາຣເຍ;

ອສປ຺ປຸຣິສສໍສຄ຺ໂຄ, ທຸກ຺ຂນ຺ໂຕ ກຏຸກຸທ຺ຣໂຍ.

໑໖໔. ‘‘ສເຈ ຫິ ວີຣິຍໍ ນາສ຺ສ, ກມ຺ມໍ ກລ຺ຍາຓປາປກໍ;

ນ ຠເຣ ວຑ຺ຒກິໍ ຣາຊາ, ນປິ ຍນ຺ຕານິ ກາຣເຍ.

໑໖໕. ‘‘ຍສ຺ມາ ຈ ວີຣິຍໍ ອຕ຺ຖິ, ກມ຺ມໍ ກລ຺ຍາຓປາປກໍ;

ຕສ຺ມາ ຍນ຺ຕານິ ກາເຣຕິ, ຣາຊາ ຠຣຕິ ວຑ຺ຒກິໍ.

໑໖໖. ‘‘ຍທິ ວສ຺ສສຕໍ ເທໂວ, ນ ວສ຺ເສ ນ ຫິມໍ ປເຕ;

ອຸຈ຺ຉິຊ຺ເຊຍ຺ຍ ອຍໍ ໂລໂກ, ວິນສ຺ເສຍ຺ຍ ອຍໍ ປຊາ.

໑໖໗. ‘‘ຍສ຺ມາ ຈ ວສ຺ສຕີ ເທໂວ, ຫິມຎ຺ຈານຸຜຸສາຍຕິ;

ຕສ຺ມາ ສສ຺ສານິ ປຈ຺ຈນ຺ຕິ, ຣຏ຺ຐຎ຺ຈ ປາລິເຕ [ປລ຺ລເຕ (ສີ. ປີ.), ໂປລຍເຕ (ສ຺ຍາ.)] ຈິຣໍ.

໑໖໘. ‘‘ຄວໍ ເຈ ຕຣມານານໍ, ຊິມ຺ຫໍ ຄຈ຺ຉຕິ ປຸງ຺ຄໂວ;

ສພ຺ພາ ຕາ ຊິມ຺ຫໍ ຄຈ຺ຉນ຺ຕິ, ເນຕ຺ເຕ ຊິມ຺ຫໍ [ຊິມ຺ຫ (ປີ.)] ຄເຕ ສຕິ.

໑໖໙. ‘‘ເອວເມວ [ເອວເມວໍ (ປີ.)] ມນຸສ຺ເສສຸ, ໂຍ ໂຫຕິ ເສຏ຺ຐສມ຺ມໂຕ;

ໂສ ເຈ ອຘມ຺ມໍ ຈຣຕິ, ປເຄວ ອິຕຣາ ປຊາ;

ສພ຺ພໍ ຣຏ຺ຐໍ ທຸຂໍ ເສຕິ, ຣາຊາ ເຈ ໂຫຕິ ອຘມ຺ມິໂກ.

໑໗໐. ‘‘ຄວໍ ເຈ ຕຣມານານໍ, ອຸຊຸໍ ຄຈ຺ຉຕິ ປຸງ຺ຄໂວ;

ສພ຺ພາ ຄາວີ ອຸຊຸໍ ຍນ຺ຕິ, ເນຕ຺ເຕ ອຸຊຸໍ [ອຸຊູ (ປີ.)] ຄເຕ ສຕິ.

໑໗໑. ‘‘ເອວເມວ ມນຸສ຺ເສສຸ, ໂຍ ໂຫຕິ ເສຏ຺ຐສມ຺ມໂຕ;

ໂສ ສເຈ [ເຈວ (ສີ.), ເຈປິ (ກ.)] ຘມ຺ມໍ ຈຣຕິ, ປເຄວ ອິຕຣາ ປຊາ;

ສພ຺ພໍ ຣຏ຺ຐໍ ສຸຂໍ ເສຕິ, ຣາຊາ ເຈ ໂຫຕິ ຘມ຺ມິໂກ.

໑໗໒. ‘‘ມຫາຣຸກ຺ຂສ຺ສ ຜລິໂນ, ອາມໍ ຉິນ຺ທຕິ ໂຍ ຜລໍ;

ຣສຎ຺ຈສ຺ສ ນ ຊານາຕິ, ພີຊຎ຺ຈສ຺ສ ວິນສ຺ສຕິ.

໑໗໓. ‘‘ມຫາຣຸກ຺ຂູປມໍ ຣຏ຺ຐໍ, ອຘມ຺ເມນ ປສາສຕິ;

ຣສຎ຺ຈສ຺ສ ນ ຊານາຕິ, ຣຏ຺ຐຎ຺ຈສ຺ສ ວິນສ຺ສຕິ.

໑໗໔. ‘‘ມຫາຣຸກ຺ຂສ຺ສ ຜລິໂນ, ປກ຺ກໍ ຉິນ຺ທຕິ ໂຍ ຜລໍ;

ຣສຎ຺ຈສ຺ສ ວິຊານາຕິ, ພີຊຎ຺ຈສ຺ສ ນ ນສ຺ສຕິ.

໑໗໕. ‘‘ມຫາຣຸກ຺ຂູປມໍ ຣຏ຺ຐໍ, ຘມ຺ເມນ ໂຍ ປສາສຕິ;

ຣສຎ຺ຈສ຺ສ ວິຊານາຕິ, ຣຏ຺ຐຎ຺ຈສ຺ສ ນ ນສ຺ສຕິ.

໑໗໖. ‘‘ໂຍ ຈ ຣາຊາ ຊນປທໍ, ອຘມ຺ເມນ ປສາສຕິ;

ສພ຺ໂພສຘີຫິ ໂສ ຣາຊາ, ວິຣຸທ຺ໂຘ ໂຫຕິ ຂຕ຺ຕິໂຍ.

໑໗໗. ‘‘ຕເຖວ ເນຄເມ ຫິໍສໍ, ເຍ ຍຸຕ຺ຕາ ກຍວິກ຺ກເຍ;

ໂອຊທານພລີກາເຣ, ສ ໂກເສນ ວິຣຸຊ຺ຌຕິ.

໑໗໘. ‘‘ປຫາຣວຣເຂຕ຺ຕຎ຺ຎູ, ສງ຺ຄາເມ ກຕນິສ຺ສເມ [ກຕນິຍເມ (ກ.)];

ອຸສ຺ສິເຕ ຫິໍສຍໍ ຣາຊາ, ສ ພເລນ ວິຣຸຊ຺ຌຕິ.

໑໗໙. ‘‘ຕເຖວ ອິສໂຍ ຫິໍສໍ, ສຎ຺ຎເຕ [ສໍຍເມ (ສ຺ຍາ. ກ.)] ພ຺ຣຫ຺ມຈາຣິໂຍ [ພ຺ຣຫ຺ມຈາຣິໂນ (ສີ.)];

ອຘມ຺ມຈາຣີ ຂຕ຺ຕິໂຍ, ໂສ ສຄ຺ເຄນ ວິຣຸຊ຺ຌຕິ.

໑໘໐. ‘‘ໂຍ ຈ ຣາຊາ ອຘມ຺ມຏ຺ໂຐ, ຠຣິຍໍ ຫນ຺ຕິ ອທູສິກໍ;

ລຸທ຺ທໍ ປສວເຕ ຐານໍ [ປາປໍ (ສີ.)], ປຸຕ຺ເຕຫິ ຈ ວິຣຸຊ຺ຌຕິ.

໑໘໑. ‘‘ຘມ຺ມໍ ຈເຣ ຊານປເທ, ເນຄເມສຸ [ນິຄເມສຸ (ສີ.)] ພເລສຸ ຈ;

ອິສໂຍ ຈ ນ ຫິໍເສຍ຺ຍ, ປຸຕ຺ຕທາເຣ ສມໍ ຈເຣ.

໑໘໒. ‘‘ສ ຕາທິໂສ ຠູມິປຕິ, ຣຏ຺ຐປາໂລ ອໂກຘໂນ;

ສປຕ຺ເຕ [ສາມນ຺ເຕ (ສີ. ສ຺ຍາ. ປີ.)] ສມ຺ປກມ຺ເປຕິ, ອິນ຺ໂທວ ອສຸຣາຘິໂປ’’ຕິ.

ມຫາໂພຘິຊາຕກໍ ຕຕິຍໍ.

ປຓ຺ຓາສນິປາຕໍ ນິຏ຺ຐິຕໍ.