໕໒໕. ຈູຬສຸຕໂສມຊາຕກໍ (໕)

໑໙໕. ‘‘ອາມນ຺ຕຍາມິ ນິຄມໍ, ມິຕ຺ຕາມຈ຺ເຈ ປຣິສ຺ສເຊ [ປາຣິສຊ຺ເຊ (ສີ. ສ຺ຍາ.)];

ສິຣສ຺ມິໍ ປລິຕໍ ຊາຕໍ, ປພ຺ພຊ຺ຊໍ ທານິ ໂຣຈຫໍ’’.

໑໙໖. ‘‘ອຠຸມ຺ເມ ກຖໍ ນຸ ຠຓສິ, ສລ຺ລໍ ເມ ເທວ ອຸຣສິ ກປ຺ເປສິ [ກມ຺ເປສິ (ປີ.)];

ສຕ຺ຕສຕາ ເຕ ຠຣິຍາ, ກຖໍ ນຸ ເຕ ຕາ ຠວິສ຺ສນ຺ຕິ’’.

໑໙໗. ‘‘ປຎ຺ຎາຍິຫິນ຺ຕິ ເອຕາ, ທຫຣາ ອຎ຺ຎມ຺ປິ ຕາ ຄມິສ຺ສນ຺ຕິ;

ສຄ຺ຄຎ຺ຈສ຺ສ ປຕ຺ຖຍາໂນ, ເຕນ ອຫໍ ປພ຺ພຊິສ຺ສາມິ’’.

໑໙໘. ‘‘ທຸລ຺ລທ຺ຘໍ ເມ ອາສິ ສຸຕໂສມ, ຍສ຺ສ ເຕ ໂຫມຫໍ ມາຕາ;

ຍໍ ເມ ວິລປນ຺ຕິຍາ, ອນເປກ຺ໂຂ ປພ຺ພຊສິ ເທວ.

໑໙໙. ‘‘ທຸລ຺ລທ຺ຘໍ ເມ ອາສິ ສຸຕໂສມ, ຍໍ ຕໍ ອຫໍ ວິຊາຍິສ຺ສໍ;

ຍໍ ເມ ວິລປນ຺ຕິຍາ, ອນເປກ຺ໂຂ ປພ຺ພຊສິ ເທວ’’.

໒໐໐. ‘‘ໂກ ນາເມໂສ ຘມ຺ໂມ, ສຸຕໂສມ ກາ ຈ ນາມ ປພ຺ພຊ຺ຊາ;

ຍໍ ໂນ ອມ຺ເຫ ຊິຓ຺ເຓ, ອນເປກ຺ໂຂ ປພ຺ພຊສິ ເທວ.

໒໐໑. ‘‘ປຸຕ຺ຕາປິ ຕຸຍ຺ຫໍ ພຫໂວ, ທຫຣາ ອປ຺ປຕ຺ຕໂຍພ຺ພນາ;

ມຎ຺ຊູ ເຕປິ [ເຕ (ສີ. ປີ.)] ຕໍ ອປສ຺ສນ຺ຕາ, ມຎ຺ເຎ ທຸກ຺ຂໍ ນິຄຈ຺ຉນ຺ຕິ’’.

໒໐໒. ‘‘ປຸຕ຺ເຕຫິ ຈ ເມ ເອເຕຫິ, ທຫເຣຫິ ອປ຺ປຕ຺ຕໂຍພ຺ພເນຫິ;

ມຎ຺ຊູຫິ ສພ຺ເພຫິປິ ຕຸມ຺ເຫຫິ, ຈິຣມ຺ປິ ຐຕ຺ວາ ວິນາສຠາໂວ’’ [ວິນາຠາໂວ (ສີ. ສ຺ຍາ. ປີ.)].

໒໐໓. ‘‘ຉິນ຺ນໍ ນຸ ຕຸຍ຺ຫໍ ຫທຍໍ, ອທຸ ເຕ [ອາທຸ (ສີ. ປີ.), ອາທູ (ສ຺ຍາ.)] ກຣຸຓາ ຈ ນຕ຺ຖິ ອມ຺ເຫສຸ;

ຍໍ ໂນ ວິກນ຺ທນ຺ຕິໂຍ [ວິກ຺ກນ຺ທນ຺ຕິໂຍ (ສີ.)], ອນເປກ຺ໂຂ ປພ຺ພຊສິ ເທວ’’.

໒໐໔. ‘‘ນ ຈ ມຍ຺ຫໍ ຉິນ຺ນໍ ຫທຍໍ, ອຕ຺ຖິ ກຣຸຓາປິ ມຍ຺ຫໍ ຕຸມ຺ເຫສຸ;

ສຄ຺ຄຎ຺ຈ ປຕ຺ຖຍາໂນ, ເຕນ ອຫໍ [ເຕນາຫໍ (ສີ. ສ຺ຍາ.), ເຕນມຫໍ (ປີ.)] ປພ຺ພຊິສ຺ສາມິ’’.

໒໐໕. ‘‘ທຸລ຺ລທ຺ຘໍ ເມ ອາສິ, ສຸຕໂສມ ຍສ຺ສ ເຕ ອຫໍ ຠຣິຍາ;

ຍໍ ເມ ວິລປນ຺ຕິຍາ, ອນເປກ຺ໂຂ ປພ຺ພຊສິ ເທວ.

໒໐໖. ‘‘ທຸລ຺ລທ຺ຘໍ ເມ ອາສິ, ສຸຕໂສມ ຍສ຺ສ ເຕ ອຫໍ ຠຣິຍາ;

ຍໍ ເມ ກຸຈ຺ຉິປຏິສນ຺ຘິໍ [ມໍ ກຸຈ຺ຉິມຕິໍ ສນ຺ຕິໍ (ປີ.)], ອນເປກ຺ໂຂ ປພ຺ພຊສິ ເທວ.

໒໐໗. ‘‘ປຣິປກ຺ໂກ ເມ ຄພ຺ໂຠ, ກຸຈ຺ຉິຄໂຕ ຍາວ ນໍ ວິຊາຍາມິ;

ມາຫໍ ເອກາ ວິຘວາ, ປຈ຺ຉາ ທຸກ຺ຂານິ ອທ຺ທກ຺ຂິໍ’’.

໒໐໘. ‘‘ປຣິປກ຺ໂກ ເຕ ຄພ຺ໂຠ, ກຸຈ຺ຉິຄໂຕ ອິງ຺ຆ ຕ຺ວໍ [ຕ຺ວ (ສີ.), ນໍ (ປີ.)] ວິຊາຍສ຺ສຸ;

ປຸຕ຺ຕໍ ອໂນມວຓ຺ຓໍ, ຕໍ ຫິຕ຺ວາ ປພ຺ພຊິສ຺ສາມິ’’.

໒໐໙. ‘‘ມາ ຕ຺ວໍ ຈນ຺ເທ ຣຸທິ, ມາ ໂສຈິ ວນຕິມິຣມຕ຺ຕກ຺ຂິ;

ອາໂຣຫ ວຣປາສາທໍ [ຈ ປາສາທໍ (ປີ.)], ອນເປກ຺ໂຂ ອຫໍ ຄມິສ຺ສາມິ’’.

໒໑໐. ‘‘ໂກ ຕໍ ອມ຺ມ ໂກເປສິ, ກິໍ ໂຣທສິ ເປກ຺ຂສິ ຈ ມໍ ພາຬ຺ຫໍ;

ກໍ ອວຊ຺ຌໍ ຆາເຕມິ [ຆາເຕມິ ກໍ ອວຊ຺ຌໍ (ປີ.), ຕໍ ອວຊ຺ຌໍ ຆາເຕມິ (ກ.)], ຎາຕີນໍ ອຸທິກ຺ຂມານານໍ’’.

໒໑໑. ‘‘ນ ຫິ ໂສ ສກ຺ກາ ຫນ຺ຕຸໍ, ວິຊິຕາວີ [ຊີວິຕາວີ (ປີ.)] ໂຍ ມໍ ຕາຕ ໂກເປສິ;

ປິຕາ ເຕ ມໍ ຕາຕ ອວຈ, ອນເປກ຺ໂຂ ອຫໍ ຄມິສ຺ສາມິ’’.

໒໑໒. ‘‘ໂຍຫໍ ປຸພ຺ເພ ນິຍ຺ຍາມິ, ອຸຍ຺ຍານໍ ມຕ຺ຕກຸຎ຺ຊເຣ ຈ ໂຍເຘມິ;

ສຸຕໂສເມ ປພ຺ພຊິເຕ, ກຖໍ ນຸ ທານິ ກຣິສ຺ສາມິ’’.

໒໑໓. ‘‘ມາຕຸຈ຺ຈ [ມາຕຸ ຈ (ສີ. ສ຺ຍາ.)] ເມ ຣຸທນ຺ຕ຺ຍາ [ຣຸທຕ຺ຍາ (ປີ.)], ເຊຏ຺ຐສ຺ສ ຈ ຠາຕຸໂນ ອກາມສ຺ສ;

ຫຕ຺ເຖປິ ເຕ ຄເຫສ຺ສໍ, ນ ຫິ ຄຈ຺ຉສິ [ຄຎ຺ຉິສິ (ປີ.)] ໂນ ອກາມານໍ’’.

໒໑໔. ‘‘ອຸຏ຺ເຐຫິ ຕ຺ວໍ ຘາຕິ, ອິມໍ ກຸມາຣໍ ຣເມຫິ ອຎ຺ຎຕ຺ຖ;

ມາ ເມ ປຣິປນ຺ຖມກາສິ [ມກາ (ສີ. ປີ.)], ສຄ຺ຄໍ ມມ ປຕ຺ຖຍານສ຺ສ’’.

໒໑໕. ‘‘ຍໍ ນູນິມໍ ທເທຍ຺ຍໍ [ຊເຫຍ຺ຍໍ (ປີ.)] ປຠງ຺ກຣໍ, ໂກ ນຸ ເມ ອິມິນາຕ຺ໂຖ [ໂກ ນຸ ເມ ອິມິນາ ອຕ຺ໂຖ (ສີ. ສ຺ຍາ.), ໂກ ນຸ ເມ ນຕ຺ໂຖ (ປີ.)];

ສຸຕໂສເມ ປພ຺ພຊິເຕ, ກິໍ ນຸ ເມນໍ ກຣິສ຺ສາມິ’’.

໒໑໖. ‘‘ໂກໂສ ຈ ຕຸຍ຺ຫໍ ວິປຸໂລ, ໂກຏ຺ຐາຄາຣຎ຺ຈ ຕຸຍ຺ຫໍ ປຣິປູຣໍ;

ປຖວີ ຈ ຕຸຍ຺ຫໍ ວິຊິຕາ, ຣມສ຺ສຸ ມາ ປພ຺ພຊິ [ປພ຺ພຊສ຺ສຸ (ສີ.), ປພ຺ພຊ (ປີ.)] ເທວ’’.

໒໑໗. ‘‘ໂກໂສ ຈ ມຍ຺ຫໍ ວິປຸໂລ, ໂກຏ຺ຐາຄາຣຎ຺ຈ ມຍ຺ຫໍ ປຣິປູຣໍ;

ປຖວີ ຈ ມຍ຺ຫໍ ວິຊິຕາ, ຕໍ ຫິຕ຺ວາ ປພ຺ພຊິສ຺ສາມິ’’.

໒໑໘. ‘‘ມຍ຺ຫມ຺ປິ ຘນໍ ປຫູຕໍ, ສງ຺ຂາຕຸໍ [ສງ຺ຂ຺ຍາຕຸໍ (ສີ.)] ໂນປິ ເທວ ສກ຺ໂກມິ;

ຕໍ ເຕ ທທາມິ ສພ຺ພມ຺ປິ [ຕໍ ເທວ ເຕ ທທາມິ ສພ຺ພມ຺ປິ (ສີ.), ຕໍ ເຕ ທທາມິ ສພ຺ພໍ (ປີ.)], ຣມສ຺ສຸ ມາ ປພ຺ພຊິ ເທວ’’.

໒໑໙. ‘‘ຊານາມິ [ຊານາມິ ເຕ (ສີ. ສ຺ຍາ.)] ຘນໍ ປຫູຕໍ, ກຸລວທ຺ຘນ ປູຊິໂຕ ຕຍາ ຈສ຺ມິ;

ສຄ຺ຄຎ຺ຈ ປຕ຺ຖຍາໂນ, ເຕນ ອຫໍ ປພ຺ພຊິສ຺ສາມິ’’.

໒໒໐. ‘‘ອຸກ຺ກຓ຺ຐິໂຕສ຺ມິ ພາຬ຺ຫໍ, ອຣຕິ ມໍ ໂສມທຕ຺ຕ ອາວິສຕິ [ອາວີສຕິ (ກ.)];

ພຫຸກາປິ [ພຫຸກາ ຫິ (ສີ. ສ຺ຍາ.)] ເມ ອນ຺ຕຣາຍາ, ອຊ຺ເຊວາຫໍ ປພ຺ພຊິສ຺ສາມິ’’.

໒໒໑. ‘‘ອິທຎ຺ຈ ຕຸຍ຺ຫໍ ຣຸຈິຕໍ, ສຸຕໂສມ ອຊ຺ເຊວ ທານິ ຕ຺ວໍ ປພ຺ພຊ;

ອຫມ຺ປິ ປພ຺ພຊິສ຺ສາມິ, ນ ອຸສ຺ສເຫ ຕຍາ ວິນາ ອຫໍ ຐາຕຸໍ’’.

໒໒໒. ‘‘ນ ຫິ ສກ຺ກາ ປພ຺ພຊິຕຸໍ, ນຄເຣ ນ ຫິ ປຈ຺ຈຕິ ຊນປເທ ຈ’’;

‘‘ສຸຕໂສເມ ປພ຺ພຊິເຕ, ກຖໍ ນຸ ທານິ ກຣິສ຺ສາມ’’.

໒໒໓. ‘‘ອຸປນີຍຕິທໍ ມຎ຺ເຎ, ປຣິຕ຺ຕໍ ອຸທກໍວ ຈງ຺ກວາຣມ຺ຫິ;

ເອວໍ ສຸປຣິຕ຺ຕເກ ຊີວິເຕ, ນ ຈ ປມຊ຺ຊິຕຸໍ ກາໂລ.

໒໒໔. ‘‘ອຸປນີຍຕິທໍ ມຎ຺ເຎ, ປຣິຕ຺ຕໍ ອຸທກໍວ ຈງ຺ກວາຣມ຺ຫິ;

ເອວໍ ສຸປຣິຕ຺ຕເກ ຊີວິເຕ, ອນ຺ຘພາລາ [ອຖ ພາລາ (ສີ. ສ຺ຍາ. ປີ.)] ປມຊ຺ຊນ຺ຕິ.

໒໒໕. ‘‘ເຕ ວຑ຺ຒຍນ຺ຕິ ນິຣຍໍ, ຕິຣຈ຺ຉານໂຍນິຎ຺ຈ ເປຕ຺ຕິວິສຍຎ຺ຈ;

ຕຓ຺ຫາຍ ພນ຺ຘນພທ຺ຘາ, ວຑ຺ເຒນ຺ຕິ ອສຸຣກາຍໍ’’.

໒໒໖. ‘‘ອູຫຎ຺ຎເຕ ຣຊຄ຺ຄໍ, ອວິທູເຣ ປຸພ຺ພກມ຺ຫິ ຈ [ປຸປ຺ຜກມ຺ຫິ ຈ (ສີ. ປີ.)] ປາສາເທ;

ມຎ຺ເຎ ໂນ ເກສາ ຉິນ຺ນາ, ຍສສ຺ສິໂນ ຘມ຺ມຣາຊສ຺ສ’’.

໒໒໗. ‘‘ອຍມສ຺ສ ປາສາໂທ, ໂສວຓ຺ຓ [ໂສວຓ຺ໂຓ (ປີ.)] ປຸປ຺ຜມາລ຺ຍວີຕິກິຓ຺ໂຓ;

ຍຫິ [ຍມ຺ຫິ (ປີ.)] ມນຸວິຈຣິ ຣາຊາ, ປຣິກິຓ຺ໂຓ ອິຕ຺ຖາຄາເຣຫິ.

໒໒໘. ‘‘ອຍມສ຺ສ ປາສາໂທ, ໂສວຓ຺ຓປຸປ຺ຜມາລ຺ຍວີຕິກິຓ຺ໂຓ;