໑໗. ຈຕ຺ຕາລີສນິປາໂຕ

໕໒໑. ເຕສກຸຓຊາຕກໍ (໑)

໑. ‘‘ເວສ຺ສນ຺ຕຣໍ ຕໍ ປຸຈ຺ຉາມິ, ສກຸຓ ຠທ຺ທມຕ຺ຖຸ ເຕ;

ຣຊ຺ຊໍ ກາເຣຕຸກາເມນ, ກິໍ ສຸ ກິຈ຺ຈໍ ກຕໍ ວຣໍ’’.

໒. ‘‘ຈິຣສ຺ສໍ ວຕ ມໍ ຕາໂຕ, ກໍໂສ ພາຣາຓສິຄ຺ຄໂຫ;

ປມຕ຺ໂຕ ອປ຺ປມຕ຺ຕໍ ມໍ, ປິຕາ ປຸຕ຺ຕໍ ອໂຈທຍິ.

໓. ‘‘ປຐເມເນວ ວິຕຖໍ, ໂກຘໍ ຫາສໍ ນິວາຣເຍ;

ຕໂຕ ກິຈ຺ຈານິ ກາເຣຍ຺ຍ, ຕໍ ວຕໍ ອາຫຸ ຂຕ຺ຕິຍ.

໔. ‘‘ຍໍ ຕ຺ວໍ ຕາຕ ຕໂປກມ຺ມໍ [ຕເປ ກມ຺ມໍ (ສີ. ສ຺ຍາ. ປີ.)], ປຸພ຺ເພ ກຕມສໍສຍໍ;

ຣຕ຺ໂຕ ທຸຏ຺ໂຐ ຈ ຍໍ ກຍິຣາ, ນ ຕໍ ກຍິຣາ ຕໂຕ ປຸນ [ປຸນໍ (ປີ.)].

໕. ‘‘ຂຕ຺ຕິຍສ຺ສ ປມຕ຺ຕສ຺ສ, ຣຏ຺ຐສ຺ມິໍ ຣຏ຺ຐວຑ຺ຒນ;

ສພ຺ເພ ໂຠຄາ ວິນສ຺ສນ຺ຕິ, ຣຎ຺ໂຎ ຕໍ ວຸຈ຺ຈເຕ ອຆໍ.

໖. ‘‘ສິຣີ ຕາຕ ອລກ຺ຂີ ຈ [ສິຣີ ຈ ຕາຕ ລກ຺ຂີ ຈ (ສ຺ຍາ. ປີ.)], ປຸຈ຺ຉິຕາ ເອຕທພ຺ຣວຸໍ;

ອຸຏ຺ຐານ [ອຸຏ຺ຐາເນ (ສ຺ຍາ.)] ວີຣິເຍ ໂປເສ, ຣມາຫໍ ອນຸສູຍເກ.

໗. ‘‘ອຸສູຍເກ ທຸຫທເຍ, ປຸຣິເສ ກມ຺ມທຸສ຺ສເກ;

ກາລກຓ຺ຓີ ມຫາຣາຊ, ຣມຕິ [ຣມາຕິ (ກ.)] ຈກ຺ກຠຎ຺ຊນີ.

໘. ‘‘ໂສ ຕ຺ວໍ ສພ຺ເພສຸ ສຸຫທໂຍ [ໂສ ຕ຺ວໍ ສພ຺ເພສໍ ສຸຫທໂຍ (ສ຺ຍາ. ປີ.), ໂສ ຕ຺ວໍ ສພ຺ເພ ສຸຫທໂຍ (ກ.)], ສພ຺ເພສໍ ຣກ຺ຂິໂຕ ຠວ;

ອລກ຺ຂິໍ ນຸທ ມຫາຣາຊ, ລກ຺ຂ຺ຍາ ຠວ ນິເວສນໍ.

໙. ‘‘ສ ລກ຺ຂີຘິຕິສມ຺ປນ຺ໂນ, ປຸຣິໂສ ຫິ ມຫຄ຺ຄໂຕ;

ອມິຕ຺ຕານໍ ກາສິປຕິ, ມູລໍ ອຄ຺ຄຎ຺ຈ ຉິນ຺ທຕິ.

໑໐. ‘‘ສກ຺ໂກປິ ຫິ ຠູຕປຕິ, ອຸຏ຺ຐາເນ ນປ຺ປມຊ຺ຊຕິ;

ສ ກລ຺ຍາເຓ ຘິຕິໍ ກຕ຺ວາ, ອຸຏ຺ຐາເນ ກຸຣຸເຕ ມໂນ.

໑໑. ‘‘ຄນ຺ຘພ຺ພາ ປິຕໂຣ ເທວາ, ສາຊີວາ [ສຎ຺ຊີວາ (ປີ.)] ໂຫນ຺ຕິ ຕາທິໂນ;

ອຸຏ຺ຐາຫໂຕ [ອຸຏ຺ຐຫໂຕ (ສ຺ຍາ. ປີ.)] ອປ຺ປມຊ຺ຊໂຕ [ມປ຺ປມຊ຺ຊໂຕ (ກ.)], ອນຸຕິຏ຺ຐນ຺ຕິ ເທວຕາ.

໑໒. ‘‘ໂສ ອປ຺ປມຕ຺ໂຕ ອກ຺ກຸທ຺ໂຘ [ອກ຺ກຸຏ຺ໂຐ (ປີ.)], ຕາຕ ກິຈ຺ຈານິ ກາຣຍ;

ວາຍມສ຺ສຸ ຈ ກິຈ຺ເຈສຸ, ນາລໂສ ວິນ຺ທເຕ ສຸຂໍ.

໑໓. ‘‘ຕຕ຺ເຖວ ເຕ ວຕ຺ຕປທາ, ເອສາວ [ເອສາ ຈ (ປີ.)] ອນຸສາສນີ;

ອລໍ ມິຕ຺ເຕ ສຸຂາເປຕຸໍ, ອມິຕ຺ຕານໍ ທຸຂາຍ [ທຸກ຺ຂາຍ (ປີ.)] ຈ’’.

໑໔. ‘‘ສກ຺ຂິສິ ຕ຺ວໍ [ສກ຺ຂີ ຕຸວໍ (ສີ. ສ຺ຍາ. ປີ.)] ກຸຓ຺ຑລິນິ, ມຎ຺ຎສິ ຂຕ຺ຕພນ຺ຘຸນິ [ຂຕ຺ຕິຍພນ຺ຘຸນີ (ປີ.)];

ຣຊ຺ຊໍ ກາເຣຕຸກາເມນ, ກິໍ ສຸ ກິຈ຺ຈໍ ກຕໍ ວຣໍ’’.

໑໕. ‘‘ທ຺ເວວ ຕາຕ ປທການິ, ຍຕ຺ຖ [ເຍສຸ (ປີ.)] ສພ຺ພໍ ປຕິຏ຺ຐິຕໍ;

ອລທ຺ຘສ຺ສ ຈ ໂຍ ລາໂຠ, ລທ຺ຘສ຺ສ ຈານຸຣກ຺ຂຓາ.

໑໖. ‘‘ອມຈ຺ເຈ ຕາຕ ຊານາຫິ, ຘີເຣ ອຕ຺ຖສ຺ສ ໂກວິເທ;

ອນກ຺ຂາ ກິຕເວ ຕາຕ, ອໂສຓ຺ເຑ ອວິນາສເກ.

໑໗. ‘‘ໂຍ ຈ ຕໍ ຕາຕ ຣກ຺ເຂຍ຺ຍ, ຘນໍ ຍຎ຺ເຈວ ເຕ ສິຍາ;

ສູໂຕວ ຣຖໍ ສງ຺ຄຓ຺ເຫ, ໂສ ເຕ ກິຈ຺ຈານິ ກາຣເຍ.

໑໘. ‘‘ສຸສງ຺ຄຫິຕນ຺ຕຊໂນ, ສຍໍ ວິຕ຺ຕໍ ອເວກ຺ຂິຍ;

ນິຘິຎ຺ຈ ອິຓທານຎ຺ຈ, ນ ກເຣ ປຣປຕ຺ຕິຍາ.

໑໙. ‘‘ສຍໍ ອາຍໍ ວຍໍ [ອາຍວຍໍ (ປີ.)] ຊຎ຺ຎາ, ສຍໍ ຊຎ຺ຎາ ກຕາກຕໍ;

ນິຄ຺ຄຓ຺ເຫ ນິຄ຺ຄຫາຣຫໍ, ປຄ຺ຄຓ຺ເຫ ປຄ຺ຄຫາຣຫໍ.

໒໐. ‘‘ສຍໍ ຊານປທໍ ອຕ຺ຖໍ, ອນຸສາສ ຣເຖສຠ;

ມາ ເຕ ອຘມ຺ມິກາ ຍຸຕ຺ຕາ, ຘນໍ ຣຏ຺ຐຎ຺ຈ ນາສຍຸໍ.

໒໑. ‘‘ມາ ຈ ເວເຄນ ກິຈ຺ຈານິ, ກໂຣສິ [ກາເຣສິ (ສີ. ສ຺ຍາ. ປີ.)] ກາຣເຍສິ ວາ;

ເວຄສາ ຫິ ກຕໍ ກມ຺ມໍ, ມນ຺ໂທ ປຈ຺ຉານຸຕປ຺ປຕິ.

໒໒. ‘‘ມາ ເຕ ອຘິສເຣ ມຸຎ຺ຈ, ສຸພາຬ຺ຫມຘິໂກຘິຕໍ [ໂກປິຕໍ (ສີ. ສ຺ຍາ.)];

ໂກຘສາ ຫິ ພຫູ ຜີຕາ, ກຸລາ ອກຸລຕໍ ຄຕາ.

໒໓. ‘‘ມາ ຕາຕ ອິສ຺ສໂຣມ຺ຫີຕິ, ອນຕ຺ຖາຍ ປຕາຣຍິ;

ອິຕ຺ຖີນໍ ປຸຣິສານຎ຺ຈ, ມາ ເຕ ອາສິ ທຸຂຸທ຺ຣໂຍ.

໒໔. ‘‘ອເປຕໂລມຫໍສສ຺ສ, ຣຎ຺ໂຎ ກາມານຸສາຣິໂນ;

ສພ຺ເພ ໂຠຄາ ວິນສ຺ສນ຺ຕິ, ຣຎ຺ໂຎ ຕໍ ວຸຈ຺ຈເຕ ອຆໍ.

໒໕. ‘‘ຕຕ຺ເຖວ ເຕ ວຕ຺ຕປທາ, ເອສາວ ອນຸສາສນີ;

ທກ຺ຂສ຺ສຸທານິ ປຸຎ຺ຎກໂຣ, ອໂສຓ຺ໂຑ ອວິນາສໂກ;

ສີລວາສ຺ສຸ [ສີລວາສ຺ສ (ຏີກາ)] ມຫາຣາຊ, ທຸສ຺ສີໂລ ວິນິປາຕິໂກ’’ [ວິນິປາຕໂກ (ປີ.)].

໒໖. ‘‘ອປຸຈ຺ຉິມ຺ຫ ໂກສິຍໂຄຕ຺ຕໍ [ອປຸຈ຺ຉິມ຺ຫາ ໂກສິຍໂຄຕ຺ຕໍ (ສ຺ຍາ.), ອປຸຈ຺ຉມ຺ຫາປິ ໂກສິກໍ (ປີ.)], ກຸຓ຺ຑລິນິໍ ຕເຖວ ຈ;

ຕ຺ວໍ ທານິ ວເທຫິ ຊມ຺ພຸກ [ຊມ຺ພຸກ ຕ຺ວໍ ທານິ ວເທຫິ (ສ຺ຍາ. ປີ.)], ພລານໍ ພລມຸຕ຺ຕມໍ’’.

໒໗. ‘‘ພລໍ ປຎ຺ຈວິຘໍ ໂລເກ, ປຸຣິສສ຺ມິໍ ມຫຄ຺ຄເຕ;

ຕຕ຺ຖ ພາຫຸພລໍ ນາມ, ຈຣິມໍ ວຸຈ຺ຈເຕ ພລໍ.

໒໘. ‘‘ໂຠຄພລຎ຺ຈ ທີຆາວຸ, ທຸຕິຍໍ ວຸຈ຺ຈເຕ ພລໍ;

ອມຈ຺ຈພລຎ຺ຈ ທີຆາວຸ, ຕຕິຍໍ ວຸຈ຺ຈເຕ ພລໍ.

໒໙. ‘‘ອຠິຊຈ຺ຈພລໍ ເຈວ, ຕໍ ຈຕຸຕ຺ຖໍ ອສໍສຍໍ;

ຍານິ ເຈຕານິ ສພ຺ພານິ, ອຘິຄຓ຺ຫາຕິ ປຓ຺ຑິໂຕ.

໓໐. ‘‘ຕໍ ພລານໍ ພລໍ ເສຏ຺ຐໍ, ອຄ຺ຄໍ ປຎ຺ຎາພໍ ພລໍ [ວຣໍ (ສີ.)];

ປຎ຺ຎາພເລນຸປຕ຺ຖທ຺ໂຘ, ອຕ຺ຖໍ ວິນ຺ທຕິ ປຓ຺ຑິໂຕ.

໓໑. ‘‘ອປິ ເຈ ລຠຕິ ມນ຺ໂທ, ຜີຕໍ ຘຣຓິມຸຕ຺ຕມໍ;

ອກາມສ຺ສ ປສຍ຺ຫໍ ວາ, ອຎ຺ໂຎ ຕໍ ປຏິປຊ຺ຊຕິ.

໓໒. ‘‘ອຠິຊາໂຕປິ ເຈ ໂຫຕິ, ຣຊ຺ຊໍ ລທ຺ຘານ ຂຕ຺ຕິໂຍ;

ທຸປ຺ປຎ຺ໂຎ ຫິ ກາສິປຕິ, ສພ຺ເພນປິ ນ ຊີວຕິ.

໓໓. ‘‘ປຎ຺ຎາວ ສຸຕໍ ວິນິຈ຺ຉິນີ [ປຎ຺ຎາ ສຸຕວິນິຈ຺ຉິນີ (ສ຺ຍາ. ປີ.)], ປຎ຺ຎາ ກິຕ຺ຕິ ສິໂລກວຑ຺ຒນີ [ວທ຺ຘນີ (ປີ.)];

ປຎ຺ຎາສຫິໂຕ ນໂຣ ອິຘ, ອປິ ທຸກ຺ເຂ ສຸຂານິ ວິນ຺ທຕິ.

໓໔. ‘‘ປຎ຺ຎຎ຺ຈ ໂຂ ອສຸສ຺ສູສໍ, ນ ໂກຈິ ອຘິຄຈ຺ຉຕິ;

ພຫຸສ຺ສຸຕໍ ອນາຄມ຺ມ, ຘມ຺ມຏ຺ຐໍ ອວິນິພ຺ຠຸຊໍ.

໓໕. ‘‘ໂຍ ຈ ຘມ຺ມວິຠງ຺ຄຎ຺ຎູ [ໂຍ ຘມ຺ມຎ຺ຈ ວິຠາຄຎ຺ຎູ (ປີ.)], ກາລຸຏ຺ຐາຍີ ມຕນ຺ທິໂຕ;

ອນຸຏ຺ຐຫຕິ ກາເລນ, ກມ຺ມຜລໍ ຕສ຺ສ ອິຊ຺ຌຕິ [ກມ຺ມຜລໍ ຕສ຺ສິຊ຺ຌຕິ, ຜລໍ ຕສ຺ສ ສມິຊ຺ຌຕິ (ກ.)].

໓໖. ‘‘ອນາຍຕນ [ນາ’ນາຍຕນ (ປີ.)] ສີລສ຺ສ, ອນາຍຕນ [ນາ’ນາຍຕນ (ປີ.)] ເສວິໂນ;

ນ ນິພ຺ພິນ຺ທິຍກາຣິສ຺ສ, ສມ຺ມທຕ຺ໂຖ ວິປຈ຺ຈຕິ.

໓໗. ‘‘ອຊ຺ຌຕ຺ຕຎ຺ຈ ປຍຸຕ຺ຕສ຺ສ, ຕຖາຍຕນເສວິໂນ;

ອນິພ຺ພິນ຺ທິຍກາຣິສ຺ສ, ສມ຺ມທຕ຺ໂຖ ວິປຈ຺ຈຕິ.

໓໘. ‘‘ໂຍຄປ຺ປໂຍຄສງ຺ຂາຕໍ, ສມ຺ຠຕສ຺ສານຸຣກ຺ຂຓໍ;

ຕານິ ຕ຺ວໍ ຕາຕ ເສວສ຺ສຸ, ມາ ອກມ຺ມາຍ ຣນ຺ຘຍິ;

ອກມ຺ມຸນາ ຫິ ທຸມ຺ເມໂຘ, ນຬາຄາຣໍວ ສີທຕິ’’.

໓໙. ‘‘ຘມ຺ມໍ ຈຣ ມຫາຣາຊ, ມາຕາປິຕູສຸ ຂຕ຺ຕິຍ;