໕໒໔. ສງ຺ຂປາລຊາຕກໍ (໔)

໑໔໓. ‘‘ອຣິຍາວກາໂສສິ ປສນ຺ນເນຕ຺ໂຕ, ມຎ຺ເຎ ຠວໍ ປພ຺ພຊິໂຕ ກຸລມ຺ຫາ;

ກຖໍ ນຸ ວິຕ຺ຕານິ ປຫາຍ ໂຠເຄ, ປພ຺ພຊິ ນິກ຺ຂມ຺ມ ຆຣາ ສປຎ຺ຎ’’ [ສປຎ຺ໂຎ (ສ຺ຍາ.), ສປຎ຺ຎາ (ປີ.)].

໑໔໔. ‘‘ສຍໍ ວິມານໍ ນຣເທວ ທິສ຺ວາ, ມຫານຸຠາວສ຺ສ ມໂຫຣຄສ຺ສ;

ທິສ຺ວານ ປຸຎ຺ຎານ ມຫາວິປາກໍ, ສທ຺ຘາຍຫໍ ປພ຺ພຊິໂຕມ຺ຫິ ຣາຊ’’.

໑໔໕. ‘‘ນ ກາມກາມາ ນ ຠຍາ ນ ໂທສາ, ວາຈໍ ມຸສາ ປພ຺ພຊິຕາ ຠຓນ຺ຕິ;

ອກ຺ຂາຫິ ເມ ປຸຈ຺ຉິໂຕ ເອຕມຕ຺ຖໍ, ສຸຕ຺ວານ ເມ ຊາຍິຫິຕິປ຺ປສາໂທ’’.

໑໔໖. ‘‘ວາຓິຊ຺ຊ [ວຓິຊ຺ຊ (ປີ.)] ຣຏ຺ຐາຘິປ ຄຈ຺ຉມາໂນ, ປເຖ ອທ຺ທສາສິມ຺ຫິ ໂຠຊປຸຕ຺ເຕ [ມິລາຈປຸຕ຺ເຕ (ສີ. ປີ.)];

ປວທ຺ຘກາຍໍ ອຸຣຄໍ ມຫນ຺ຕໍ, ອາທາຍ ຄຈ຺ຉນ຺ເຕ ປໂມທມາເນ’’.

໑໔໗. ‘‘ໂສຫໍ ສມາຄມ຺ມ ຊນິນ຺ທ ເຕຫິ, ປຫຏ຺ຐໂລໂມ ອວຈມ຺ຫິ ຠີໂຕ;

ກຸຫິໍ ອຍໍ ນີຍຕິ [ນິຍ຺ຍຕິ (ກ.)] ຠີມກາໂຍ, ນາເຄນ ກິໍ ກາຫຖ ໂຠຊປຸຕ຺ຕາ.

໑໔໘. ‘‘ນາໂຄ ອຍໍ ນີຍຕິ ໂຠຊນຕ຺ຖາ [ໂຠຊນຕ຺ຖໍ (ສີ. ສ຺ຍາ. ປີ.)], ປວທ຺ຘກາໂຍ ອຸຣໂຄ ມຫນ຺ໂຕ;

ສາທຸຎ຺ຈ ຖູລຎ຺ຈ ມຸທຸຎ຺ຈ ມໍສໍ, ນ ຕ຺ວໍ ຣສຎ຺ຎາສິ ວິເທຫປຸຕ຺ຕ.

໑໔໙. ‘‘ອິໂຕ ມຍໍ ຄນ຺ຕ຺ວາ ສກໍ ນິເກຕໍ [ນິເກຕນໍ (ປີ.)], ອາທາຍ ສຕ຺ຖານິ ວິໂກປຍິຕ຺ວາ;

ມໍສານິ ໂຠກ຺ຂາມ [ຠກ຺ຂາມ (ສ຺ຍາ.)] ປໂມທມານາ, ມຍຎ຺ຫິ ເວ ສຕ຺ຕໂວ ປນ຺ນຄານໍ.

໑໕໐. ‘‘ສເຈ ອຍໍ ນີຍຕິ ໂຠຊນຕ຺ຖາ, ປວທ຺ຘກາໂຍ ອຸຣໂຄ ມຫນ຺ໂຕ;

ທທາມິ ໂວ ພລິພທ຺ທານິ [ພລິວທ຺ທານິ (ປີ.)] ໂສຬສ, ນາຄໍ ອິມໍ ມຸຎ຺ຈຖ ພນ຺ຘນສ຺ມາ.

໑໕໑. ‘‘ອທ຺ຘາ ຫິ ໂນ ຠກ຺ໂຂ ອຍໍ ມນາໂປ, ພຫູ ຈ ໂນ ອຸຣຄາ ຠຸຕ຺ຕປຸພ຺ພາ [ພຫຸໍ ຈ ໂນ ອຸຣໂຄ ຠຸຕ຺ຕປຸພ຺ໂພ (ກ.)];

ກໂຣມ ເຕ ຕໍ ວຈນໍ ອຬາຣ [ອາຬາຣ (ກ.) ເອວມຸປຣິປິ], ມິຕ຺ຕຎ຺ຈ ໂນ ໂຫຫິ ວິເທຫປຸຕ຺ຕ.

໑໕໒. ‘‘ຕທສ຺ສຸ ເຕ ພນ຺ຘນາ ໂມຈຍິໍສຸ, ຍໍ ນຕ຺ຖຸໂຕ ປຏິໂມກ຺ກສ຺ສ ປາເສ;

ມຸຕ຺ໂຕ ຈ ໂສ ພນ຺ຘນາ ນາຄຣາຊາ, ປກ຺ກາມິ ປາຈີນມຸໂຂ ມຸຫຸຕ຺ຕໍ.

໑໕໓. ‘‘ຄນ຺ຕ຺ວານ ປາຈີນມຸໂຂ ມຸຫຸຕ຺ຕໍ, ປຸຓ຺ເຓຫິ ເນຕ຺ເຕຫິ ປໂລກຍີ ມໍ;

ຕທາສ຺ສຫໍ ປິຏ຺ຐິໂຕ ອນ຺ວຄຈ຺ຉິໍ, ທສງ຺ຄຸລິໍ ອຎ຺ຊລິໍ ປຄ຺ຄເຫຕ຺ວາ.

໑໕໔. ‘‘ຄຈ຺ເຉວ ໂຂ ຕ຺ວໍ ຕຣມານຣູໂປ, ມາ ຕໍ ອມິຕ຺ຕາ ປຸນຣຄ຺ຄເຫສຸໍ;

ທຸກ຺ໂຂ ຫິ ລຸທ຺ເທຫິ ປຸນາ ສມາຄໂມ, ອທສ຺ສນໍ ໂຠຊປຸຕ຺ຕານ ຄຈ຺ຉ.

໑໕໕. ‘‘ອຄມາສິ ໂສ ຣຫທໍ ວິປ຺ປສນ຺ນໍ, ນີໂລຠາສໍ ຣມຓີຍໍ ສຸຕິຕ຺ຖໍ;

ສໂມຕຕໍ [ສໂມນຕໍ (ສ຺ຍາ. ກ.)] ຊມ຺ພຸຫິ ເວຕສາຫິ, ປາເວກ຺ຂິ ນິຕ຺ຕິຓ຺ຓຠໂຍ ປຕີໂຕ.

໑໕໖. ‘‘ໂສ ຕໍ ປວິສ຺ສ ນ ຈິຣສ຺ສ ນາໂຄ, ທິພ຺ເພນ ເມ ປາຕຸຣຫຸໍ ຊນິນ຺ທ;

ອຸປຏ຺ຐຫີ ມໍ ປິຕຣໍວ ປຸຕ຺ໂຕ, ຫທຍງ຺ຄມໍ ກຓ຺ຓສຸຂໍ ຠຓນ຺ໂຕ.

໑໕໗. ‘‘ຕ຺ວໍ ເມສິ ມາຕາ ຈ ປິຕາ [ປິຕາ ຈ (ປີ.)] ອຬາຣ, ອພ຺ຠນ຺ຕໂຣ ປາຓທໂທ ສຫາໂຍ;

ສກຎ຺ຈ ອິທ຺ຘິໍ ປຏິລາຠໂກສ຺ມິ [ປຏິລາຠິໂຕສ຺ມິ (ປີ.)], ອຬາຣ ປສ຺ສ ເມ ນິເວສນານິ;

ປຫູຕຠກ຺ຂໍ ພຫຸອນ຺ນປານໍ, ມສກ຺ກສາຣໍ ວິຍ ວາສວສ຺ສ’’.

໑໕໘. ‘‘ຕໍ ຠູມິຠາເຄຫິ ອຸເປຕຣູປໍ, ອສກ຺ຂຣາ ເຈວ ມຸທູ ສຸຠາ ຈ;

ນີຈຕ຺ຕິຓາ [ນີຈາ ຕິຓາ (ສ຺ຍາ. ປີ.)] ອປ຺ປຣຊາ ຈ ຠູມິ, ປາສາທິກາ ຍຕ຺ຖ ຊຫນ຺ຕິ ໂສກໍ.

໑໕໙. ‘‘ອນາວກຸລາ ເວຬຸຣິຍູປນີລາ, ຈຕຸທ຺ທິສໍ ອມ຺ພວນໍ ສຸຣມ຺ມໍ;

ປກ຺ກາ ຈ ເປສີ ຈ ຜລາ ສຸຜຸລ຺ລາ, ນິຈ຺ໂຈຕຸກາ ຘາຣຍນ຺ຕີ ຜລານິ.

໑໖໐. ‘‘ເຕສໍ ວນານໍ ນຣເທວ ມຊ຺ເຌ, ນິເວສນໍ ຠສ຺ສຣສນ຺ນິກາສໍ;

ຣຊຕຄ຺ຄຬໍ ໂສວຓ຺ຓມຍໍ ອຸຬາຣໍ, ໂອຠາສຕີ ວິຊ຺ຊຸຣິວນ຺ຕລິກ຺ເຂ.

໑໖໑. ‘‘ມຓີມຍາ ໂສຓ຺ຓມຍາ [ໂສວຓ຺ຓມຍາ (ສີ. ສ຺ຍາ. ປີ.)] ອຸຬາຣາ, ອເນກຈິຕ຺ຕາ ສຕຕໍ ສຸນິມ຺ມິຕາ;

ປຣິປູຣາ ກຎ຺ຎາຫິ ອລງ຺ກຕາຠິ, ສຸວຓ຺ຓກາຍູຣຘຣາຫິ ຣາຊ.

໑໖໒. ‘‘ໂສ ສງ຺ຂປາໂລ ຕຣມານຣູໂປ, ປາສາທມາຣຸຍ຺ຫ ອໂນມວຓ຺ໂຓ;

ສຫສ຺ສຖມ຺ຠໍ ອຕຸລານຸຠາວໍ, ຍຕ຺ຖສ຺ສ ຠຣິຍາ ມເຫສີ ອໂຫສິ.

໑໖໓. ‘‘ເອກາ ຈ ນາຣີ ຕຣມານຣູປາ, ອາທາຍ ເວຬຸຣິຍມຍໍ ມຫຄ຺ຆໍ;

ສຸຠໍ ມຓິໍ ຊາຕິມນ຺ຕູປປນ຺ນໍ, ອໂຈທິຕາ ອາສນມພ຺ຠິຫາສິ.

໑໖໔. ‘‘ຕໂຕ ມໍ ອຸຣໂຄ ຫຕ຺ເຖ ຄເຫຕ຺ວາ, ນິສີທຍີ ປາມຸຂອາສນສ຺ມິໍ;

ອິທມາສນໍ ອຕ຺ຣ ຠວໍ ນິສີທຕຸ, ຠວຎ຺ຫິ ເມ ອຎ຺ຎຕໂຣ ຄຣູນໍ.

໑໖໕. ‘‘ອຎ຺ຎາ ຈ ນາຣີ ຕຣມານຣູປາ, ອາທາຍ ວາຣິໍ ອຸປສງ຺ກມິຕ຺ວາ;

ປາທານິ ປກ຺ຂາລຍີ ເມ ຊນິນ຺ທ, ຠຣິຍາວ [ຠຣິຍາ ຈ (ປີ.)] ຠຕ຺ຕູ ປຕິໂນ ປິຍສ຺ສ.

໑໖໖. ‘‘ອປຣາ ຈ ນາຣີ ຕຣມານຣູປາ, ປຄ຺ຄຍ຺ຫ ໂສວຓ຺ຓມຍາຍ [ໂສວຓ຺ຓມຍາ (ປີ.)] ປາຕິຍາ;

ອເນກສູປໍ ວິວິຘໍ ວິຍຎ຺ຊນໍ, ອຸປນາມຍີ ຠຕ຺ຕ ມນຸຎ຺ຎຣູປໍ.

໑໖໗. ‘‘ຕຸຣິເຍຫິ [ຕູຣິເຍຫິ (ກ.)] ມໍ ຠາຣຕ ຠຸຕ຺ຕວນ຺ຕໍ, ອຸປຏ຺ຐຫຸໍ ຠຕ຺ຕຸ ມໂນ ວິທິຕ຺ວາ;

ຕຕຸຕ຺ຕຣິໍ [ຕທຸຕ຺ຕຣິໍ (ກ.)] ມໍ ນິປຕີ ມຫນ຺ຕໍ, ທິພ຺ເພຫິ ກາເມຫິ ອນປ຺ປເກຫິ.

໑໖໘. ‘‘ຠຣິຍາ ມເມຕາ ຕິສຕາ ອຬາຣ, ສພ຺ພຕ຺ຕມຊ຺ຌາ ປທຸມຸຕ຺ຕຣາຠາ;

ອຬາຣ ເອຕາສ຺ສຸ ເຕ ກາມກາຣາ, ທທາມິ ເຕ ຕາ ປຣິຈາຣຍສ຺ສຸ.

໑໖໙. ‘‘ສໍວຈ຺ຉຣໍ ທິພ຺ພຣສານຸຠຸຕ຺ວາ, ຕທາສ຺ສຸຫໍ [ຕທສ຺ສຫໍ (ປີ.)] ອຸຕ຺ຕຣິມຊ຺ຌຠາສິໍ [ອຸຕ຺ຕຣິ ປຈ຺ຈຠາສິໍ (ສີ. ສ຺ຍາ.), ອຸຕ຺ຕຣິໍ ປຈ຺ຈຠາສິໍ (ປີ.)];

ນາຄສ຺ສິທໍ ກິນ຺ຕິ ກຖຎ຺ຈ ລທ຺ຘໍ, ກຖຊ຺ຌຄມາສິ ວິມານເສຏ຺ຐໍ’’.

໑໗໐. ‘‘ອຘິຈ຺ຈ ລທ຺ຘໍ ປຣິຓາມຊໍ ເຕ, ສຍໍກຕໍ ອຸທາຫຸ ເທເວຫິ ທິນ຺ນໍ;

ປຸຈ຺ຉາມິ ຕໍ [ເຕ (ປີ.)] ນາຄຣາເຊຕມຕ຺ຖໍ, ກຖຊ຺ຌຄມາສິ ວິມານເສຏ຺ຐໍ’’.

໑໗໑. ‘‘ນາຘິຈ຺ຈ ລທ຺ຘໍ ນ ປຣິຓາມຊໍ ເມ, ນ ສຍໍກຕໍ ນາປິ ເທເວຫິ ທິນ຺ນໍ;

ສເກຫິ ກມ຺ເມຫິ ອປາປເກຫິ, ປຸຎ຺ເຎຫິ ເມ ລທ຺ຘມິທໍ ວິມານໍ’’.

໑໗໒. ‘‘ກິໍ ເຕ ວຕໍ ກິໍ ປນ ພ຺ຣຫ຺ມຈຣິຍໍ, ກິສ຺ສ ສຸຈິຓ຺ຓສ຺ສ ອຍໍ ວິປາໂກ;

ອກ຺ຂາຫິ ເມ ນາຄຣາເຊຕມຕ຺ຖໍ, ກຖໍ ນຸ ເຕ ລທ຺ຘມິທໍ ວິມານໍ’’.

໑໗໓. ‘‘ຣາຊາ ອໂຫສິໍ ມຄຘານມິສ຺ສໂຣ, ທຸຍ຺ໂຍຘໂນ ນາມ ມຫານຸຠາໂວ;

ໂສ ອິຕ຺ຕຣໍ ຊີວິຕໍ ສໍວິທິຕ຺ວາ, ອສສ຺ສຕໍ ວິປຣິຓາມຘມ຺ມໍ.

໑໗໔. ‘‘ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ [ອທາສິ (ປີ.)];

ໂອປານຠູຕໍ ເມ ຆຣໍ ຕທາສິ, ສນ຺ຕປ຺ປິຕາ ສມຓພ຺ຣາຫ຺ມຓາ ຈ.

໑໗໕. [ອຍໍ ຄາຖາ ປີ. ໂປຕ຺ຖເກ ນຕ຺ຖິ] ‘‘ມາລຎ຺ຈ ຄນ຺ຘຎ຺ຈ ວິເລປນຎ຺ຈ, ປທີປິຍໍ [ປທີປຍໍ (ສ຺ຍາ. ກ.)] ຍານມຸປສ຺ສຍຎ຺ຈ;

ອຈ຺ຉາທນໍ ເສຍ຺ຍມຖນ຺ນປານໍ, ສກ຺ກຈ຺ຈ ທານານິ ອທມ຺ຫ ຕຕ຺ຖ [ອຍໍ ຄາຖາ ປີ. ໂປຕ຺ຖເກ ນຕ຺ຖິ].

໑໗໖. ‘‘ຕໍ ເມ ວຕໍ ຕໍ ປນ ພ຺ຣຫ຺ມຈຣິຍໍ, ຕສ຺ສ ສຸຈິຓ຺ຓສ຺ສ ອຍໍ ວິປາໂກ;

ເຕເນວ ເມ ລທ຺ຘມິທໍ ວິມານໍ, ປຫູຕຠກ຺ຂໍ ພຫຸອນ຺ນປານໍ’’;

‘‘ນຈ຺ເຈຫິ ຄີເຕຫິ ຈຸເປຕຣູປໍ, ຈິຣຏ຺ຐິຕິກໍ ນ ຈ ສສ຺ສຕາຍໍ.

໑໗໗. ‘‘ອປ຺ປານຸຠາວາ ຕໍ ມຫານຸຠາວໍ, ເຕຊສ຺ສິນໍ ຫນ຺ຕິ ອເຕຊວນ຺ໂຕ;

ກິເມວ ທາຐາວຸຘ ກິໍ ປຏິຈ຺ຈ, ຫຕ຺ຖຕ຺ຕ [ຫຕ຺ຖຕ຺ຖ (ສີ. ສ຺ຍາ. ປີ.)] ມາຄຈ຺ຉິ ວນິພ຺ພການໍ [ວຓິພ຺ພການໍ (ສີ.)].

໑໗໘. ‘‘ຠຍໍ ນຸ ເຕ ອນ຺ວຄຕໍ ມຫນ຺ຕໍ, ເຕໂຊ ນຸ ເຕ ນານ຺ວຄໍ ທນ຺ຕມູລໍ;

ກິເມວ ທາຐາວຸຘ ກິໍ ປຏິຈ຺ຈ, ກິເລສມາປຊ຺ຊິ ວນິພ຺ພການໍ’’.

໑໗໙. ‘‘ນ ເມ ຠຍໍ ອນ຺ວຄຕໍ ມຫນ຺ຕໍ, ເຕໂຊ ນ ສກ຺ກາ ມມ ເຕຫິ ຫນ຺ຕຸໍ [ເຕຠິຫນ຺ຕຸໍ (ສ຺ຍາ. ກ.)];

ສຕຎ຺ຈ ຘມ຺ມານິ ສຸກິຕ຺ຕິຕານິ, ສມຸທ຺ທເວລາວ ທຸຣຈ຺ຈຍານິ.

໑໘໐. ‘‘ຈາຕຸທ຺ທສິໍ ປຎ຺ຈທສິໍ ອຬາຣ, ອຸໂປສຖໍ ນິຈ຺ຈມຸປາວສາມິ;

ອຖາຄມຸໍ ໂສຬສ ໂຠຊປຸຕ຺ຕາ, ຣຊ຺ຊຸໍ ຄເຫຕ຺ວານ ທຬ຺ຫຎ຺ຈ ປາສໍ.

໑໘໑. ‘‘ເຠຕ຺ວານ ນາສໍ ອຕິກສ຺ສ [ອນ຺ຕກສ຺ສ (ກ.)] ຣຊ຺ຊຸໍ, ນຍິໍສຸ ມໍ ສມ຺ປຣິຄຍ຺ຫ ລຸທ຺ທາ;

ເອຕາທິສໍ ທຸກ຺ຂມຫໍ ຕິຕິກ຺ຂໍ [ຕິຕິກ຺ຂິໍ (ປີ.)], ອຸໂປສຖໍ ອປ຺ປຏິໂກປຍນ຺ໂຕ’’.

໑໘໒. ‘‘ເອກາຍເນ ຕໍ ປເຖ ອທ຺ທສໍສຸ, ພເລນ ວຓ຺ເຓນ ຈຸເປຕຣູປໍ;

ສິຣິຍາ ປຎ຺ຎາຍ ຈ ຠາວິໂຕສິ, ກິໍ ປຕ຺ຖຍໍ [ກິມຕ຺ຖິຍໍ (ສີ. ສ຺ຍາ. ປີ.)] ນາຄ ຕໂປ ກໂຣສິ.

໑໘໓. ‘‘ນ ປຸຕ຺ຕເຫຕູ ນ ຘນສ຺ສ ເຫຕຸ, ນ ອາຍຸໂນ ຈາປິ ອຬາຣ ເຫຕຸ;

ມນຸສ຺ສໂຍນິໍ ອຠິປຕ຺ຖຍາໂນ, ຕສ຺ມາ ປຣກ຺ກມ຺ມ ຕໂປ ກໂຣມິ’’.

໑໘໔. ‘‘ຕ຺ວໍ ໂລຫິຕກ຺ໂຂ ວິຫຕນ຺ຕຣໍໂສ, ອລງ຺ກໂຕ ກປ຺ປິຕເກສມສ຺ສຸ;

ສຸໂຣສິໂຕ ໂລຫິຕຈນ຺ທເນນ, ຄນ຺ຘພ຺ພຣາຊາວ ທິສາ ປຠາສສິ [ປຠາສິ (ກ.)].

໑໘໕. ‘‘ເທວິທ຺ຘິປຕ຺ໂຕສິ ມຫານຸຠາໂວ, ສພ຺ເພຫິ ກາເມຫິ ສມງ຺ຄິຠູໂຕ;

ປຸຈ຺ຉາມິ ຕໍ ນາຄຣາເຊຕມຕ຺ຖໍ, ເສຍ຺ໂຍ ອິໂຕ ເກນ ມນຸສ຺ສໂລໂກ’’.

໑໘໖. ‘‘ອຬາຣ ນາຎ຺ຎຕ຺ຣ ມນຸສ຺ສໂລກາ, ສຸທ຺ຘີ ວ ສໍວິຊ຺ຊຕິ ສໍຍໂມ ວາ;

ອຫຎ຺ຈ ລທ຺ຘານ ມນຸສ຺ສໂຍນິໍ, ກາຫາມິ ຊາຕິມຣຓສ຺ສ ອນ຺ຕໍ’’.

໑໘໗. ‘‘ສໍວຈ຺ຉໂຣ ເມ ວສໂຕ [ວຸສິໂຕ (ປີ.)] ຕວນ຺ຕິເກ, ອນ຺ເນນ ປາເນນ ອຸປຏ຺ຐິໂຕສ຺ມິ;

ອາມນ຺ຕຍິຕ຺ວານ ປເລມິ ນາຄ, ຈິຣປ຺ປວຸຏ຺ໂຐສ຺ມິ [ຈິຣປ຺ປວຸຕ຺ໂຖ ອສ຺ມິ (ປີ.)] ອຫໍ ຊນິນ຺ທ’’.

໑໘໘. ‘‘ປຸຕ຺ຕາ ຈ ທາຣາ ອນຸຊີວິໂນ ຈ [ຈ’ນຸຊີວິໂນ (ສ຺ຍາ. ປີ.)], ນິຈ຺ຈານຸສິຏ຺ຐາ ອຸປຕິຏ຺ຐເຕ ຕໍ;

ກຈ຺ຈິນ຺ນຸ ຕໍ ນາຠິສປິຕ຺ຖ [ນາຠິສໍສິຕ຺ຖ (ສ຺ຍາ. ປີ.)] ໂກຈິ, ປິຍຎ຺ຫິ ເມ ທສ຺ສນໍ ຕຸຍ຺ຫໍ [ຕຸຍ຺ຫ (ປີ.)] ອຬາຣ’’.

໑໘໙. ‘‘ຍຖາປິ ມາຕູ ຈ ປິຕູ ອຄາເຣ, ປຸຕ຺ໂຕ ປິໂຍ ປຏິວິຫິໂຕ ວເສຍ຺ຍ [ເສຍ຺ໂຍ (ປີ.)];

ຕໂຕປິ ມຍ຺ຫໍ ອິຘເມວ ເສຍ຺ໂຍ, ຈິຕ຺ຕຎ຺ຫິ ເຕ ນາຄ ມຍີ ປສນ຺ນໍ’’.

໑໙໐. ‘‘ມຓີ ມມໍ ວິຊ຺ຊຕິ ໂລຫິຕງ຺ໂກ [ໂລຫິຕງ຺ໂຄ (ກ.)], ຘນາຫໂຣ ມຓິຣຕນໍ ອຸຬາຣໍ;

ອາທາຍ ຕ຺ວໍ [ຕໍ (ປີ.)] ຄຈ຺ຉ ສກໍ ນິເກຕໍ, ລທ຺ຘາ ຘນໍ ຕໍ ມຓິໂມສ຺ສຊສ຺ສຸ’’.

໑໙໑. ‘‘ທິຏ຺ຐາ ມຍາ ມານຸສກາປິ ກາມາ, ອສສ຺ສຕາ ວິປຣິຓາມຘມ຺ມາ;

ອາທີນວໍ ກາມຄຸເຓສຸ ທິສ຺ວາ, ສທ຺ຘາຍຫໍ ປພ຺ພຊິໂຕມ຺ຫິ ຣາຊ.

໑໙໒. ‘‘ທຸມປ຺ຜລານີວ ປຕນ຺ຕິ ມາຓວາ, ທຫຣາ ຈ ວຸທ຺ຘາ ຈ ສຣີຣເຠທາ;

ເອຕມ຺ປິ ທິສ຺ວາ ປພ຺ພຊິໂຕມ຺ຫິ ຣາຊ, ອປຓ຺ຓກໍ ສາມຎ຺ຎເມວ ເສຍ຺ໂຍ’’.

໑໙໓. ‘‘ອທ຺ຘາ ຫເວ ເສວິຕພ຺ພາ ສປຎ຺ຎາ, ພຫຸສ຺ສຸຕາ ເຍ ພຫຸຐານຈິນ຺ຕິໂນ;

ນາຄຎ຺ຈ ສຸຕ຺ວານ ຕວຎ຺ຈຬາຣ, ກາຫາມິ ປຸຎ຺ຎານິ ອນປ຺ປການິ’’.

໑໙໔. ‘‘ອທ຺ຘາ ຫເວ ເສວິຕພ຺ພາ ສປຎ຺ຎາ, ພຫຸສ຺ສຸຕາ ເຍ ພຫຸຐານຈິນ຺ຕິໂນ;

ນາຄຎ຺ຈ ສຸຕ຺ວານ ມມຎ຺ຈ ຣາຊ, ກໂຣຫິ ປຸຎ຺ຎານິ ອນປ຺ປການີ’’ຕິ.

ສງ຺ຂປາລຊາຕກໍ ຈຕຸຕ຺ຖໍ.