໕໒໓. ອລມ຺ພຸສາຊາຕກໍ (໓)

໙໕. ‘‘ອຖ ພ຺ຣວິ ພ຺ຣຫາ ອິນ຺ໂທ, ວຕ຺ຣຠູ ຊຍຕໍ ປິຕາ;

ເທວກຎ຺ຎໍ ປຣາເຠຕ຺ວາ, ສຸຘມ຺ມາຍໍ ອລມ຺ພຸສໍ.

໙໖. ‘‘ມິສ຺ເສ ເທວາ ຕໍ ຍາຈນ຺ຕິ, ຕາວຕິໍສາ ສອິນ຺ທກາ;

ອິສິປ຺ປໂລຠເນ [ອິສິປໂລຠິເກ (ສີ. ສ຺ຍາ.), ອິສິໍ ປໂລຠິເກ (ປີ.)] ຄຈ຺ຉ, ອິສິສິງ຺ຄໍ ອລມ຺ພຸເສ.

໙໗. ‘‘ປຸຣາຍໍ ອມ຺ເຫ ອຈ຺ເຈຕິ [ນາຈ຺ເຈຕິ (ສ຺ຍາ. ກ.)], ວຕ຺ຕວາ [ວຕວາ (ສີ. ສ຺ຍາ. ປີ.)] ພ຺ຣຫ຺ມຈຣິຍວາ;

ນິພ຺ພານາຠິຣໂຕ ວຸທ຺ໂຘ [ວທ຺ໂຘ (ປີ.), ພຸທ຺ໂຘ (ສ຺ຍາ. ກ.)], ຕສ຺ສ ມຄ຺ຄານິ ອາວຣ’’.

໙໘. ‘‘ເທວຣາຊ ກິເມວ ຕ຺ວໍ, ມເມວ ຕຸວໍ ສິກ຺ຂສິ;

ອິສິປ຺ປໂລຠເນ [ອິສິປໂລຠິເກ (ສີ. ສ຺ຍາ.), ອິສິໍ ປໂລຠິເກ (ປີ.)] ຄຈ຺ຉ, ສນ຺ຕິ ອຎ຺ຎາປິ ອຈ຺ຉຣາ.

໙໙. ‘‘ມາທິສິໂຍ ປວຣາ ເຈວ, ອໂສເກ ນນ຺ທເນ ວເນ;

ຕາສມ຺ປິ ໂຫຕຸ ປຣິຍາໂຍ, ຕາປິ ຍນ຺ຕຸ ປໂລຠນາ’’ [ປໂລຠິກາ (ສ຺ຍາ. ປີ.)].

໑໐໐. ‘‘ອທ຺ຘາ ຫິ ສຈ຺ຈໍ ຠຓສິ, ສນ຺ຕິ ອຎ຺ຎາປິ ອຈ຺ຉຣາ;

ຕາທິສິໂຍ ປວຣາ ເຈວ, ອໂສເກ ນນ຺ທເນ ວເນ.

໑໐໑. ‘‘ນ ຕາ ເອວໍ ປຊານນ຺ຕິ, ປາຣິຈຣິຍໍ ປຸມໍ ຄຕາ;

ຍາທິສໍ ຕ຺ວໍ ປຊານາສິ, ນາຣິ ສພ຺ພງ຺ຄໂສຠເນ.

໑໐໒. ‘‘ຕ຺ວເມວ ຄຈ຺ຉ ກລ຺ຍາຓິ, ອິຕ຺ຖີນໍ ປວຣາ ຈສິ;

ຕເວວ ວຓ຺ຓຣູເປນ, ສວສມານຍິສ຺ສສິ’’ [ວສມານາປຍິສ຺ສສິ (ສ຺ຍາ.), ວສມານາມຍິສ຺ສສິ (ປີ.), ຕໍ ວສມານຍິສ຺ສສິ (ກ.)].

໑໐໓. ‘‘ນ ວາຫໍ ນ ຄມິສ຺ສາມິ, ເທວຣາເຊນ ເປສິຕາ;

ວິເຠມິ ເຈຕໍ ອາສາທຸໍ, ອຸຄ຺ຄເຕໂຊ ຫິ ພ຺ຣາຫ຺ມໂຓ.

໑໐໔. ‘‘ອເນເກ ນິຣຍໍ ປຕ຺ຕາ, ອິສິມາສາທິຍາ ຊນາ;

ອາປນ຺ນາ ໂມຫສໍສາຣໍ, ຕສ຺ມາ ໂລມານິ ຫໍສເຍ’’.

໑໐໕. ‘‘ອິທໍ ວຕ຺ວານ ປກ຺ກາມິ, ອຈ຺ຉຣາ ກາມວຓ຺ຓິນີ;

ມິສ຺ສາ ມິສ຺ສິຕຸ [ມິສ຺ເສຕຸ (ສີ. ສ຺ຍາ. ປີ.)] ມິຈ຺ຉນ຺ຕີ, ອິສິສິງ຺ຄໍ ອລມ຺ພຸສາ.

໑໐໖. ‘‘ສາ ຈ ຕໍ ວນໂມຄຍ຺ຫ, ອິສິສິງ຺ເຄນ ຣກ຺ຂິຕໍ;

ພິມ຺ພຊາລກສຎ຺ຉນ຺ນໍ, ສມນ຺ຕາ ອຑ຺ຒໂຍຊນໍ.

໑໐໗. ‘‘ປາໂຕວ ປາຕຣາສມ຺ຫິ, ອຸທຓ຺ຫສມຍໍ [ອຸທຍສມຍໍ (ສ຺ຍາ.), ອຸທນ຺ຕສມຍໍ (ກ.)] ປຕິ;

ອຄ຺ຄິຏ຺ຐໍ ປຣິມຊ຺ຊນ຺ຕໍ, ອິສິສິງ຺ຄໍ ອຸປາຄມິ’’.

໑໐໘. ‘‘ກາ ນຸ ວິຊ຺ຊຸຣິວາຠາສິ, ໂອສຘີ ວິຍ ຕາຣກາ;

ວິຈິຕ຺ຕຫຕ຺ຖາຠຣຓາ [ວິຈິຕ຺ຕວຕ຺ຖາຠຣຓາ (ສີ.)], ອາມຸຕ຺ຕມຓິກຸຓ຺ຑລາ [ອາມຸກ຺ກມຓິກຸຓ຺ຑລາ (?)].

໑໐໙. ‘‘ອາທິຈ຺ຈວຓ຺ຓສງ຺ກາສາ, ເຫມຈນ຺ທນຄນ຺ຘິນີ;

ສຎ຺ຎຕູຣູ ມຫາມາຍາ, ກຸມາຣີ ຈາຣຸທສ຺ສນາ.

໑໑໐. ‘‘ວິລຄ຺ຄາ [ວິລາກາ (ສີ. ສ຺ຍາ. ປີ.)] ມຸທຸກາ ສຸທ຺ຘາ, ປາທາ ເຕ ສຸປ຺ປຕິຏ຺ຐິຕາ;

ຄມນາ ກາມນີຍາ [ກມນາ ກມນີຍາ (ສີ. ປີ.)] ເຕ, ຫຣນ຺ຕິເຍວ ເມ ມໂນ.

໑໑໑. ‘‘ອນຸປຸພ຺ພາວ ເຕ ອູຣູ, ນາຄນາສສມູປມາ;

ວິມຏ຺ຐາ ຕຸຍ຺ຫໍ ສຸສ຺ໂສຓີ, ອກ຺ຂສ຺ສ ຜລກໍ ຍຖາ.

໑໑໒. ‘‘ອຸປ຺ປລສ຺ເສວ ກິຎ຺ຊກ຺ຂາ, ນາຠິ ເຕ ສາຘຸ ສຓ຺ຐິຕາ;

ປູຣາ ກຓ຺ຫຎ຺ຊນສ຺ເສວ, ທູຣໂຕ ປຏິທິສ຺ສຕິ.

໑໑໓. ‘‘ທຸວິຘາ ຊາຕາ ອຸຣຊາ, ອວຓ຺ຏາ ສາຘຸ ປຈ຺ຈຸທາ;

ປໂຍຘຣາ ອປຕິຕາ [ອປ຺ປຕີຕາ (ສີ. ສ຺ຍາ. ປີ.)], ອຑ຺ຒລາພຸສມາ ຖນາ.

໑໑໔. ‘‘ທີຆາ ກມ຺ພຸຕລາຠາສາ, ຄີວາ ເອເຓຍ຺ຍກາ ຍຖາ;

ປຓ຺ຑຣາວຣຓາ ວຄ຺ຄຸ, ຈຕຸຕ຺ຖມນສນ຺ນິຠາ.

໑໑໕. ‘‘ອຸທ຺ຘຄ຺ຄາ ຈ ອຘຄ຺ຄາ ຈ, ທຸມຄ຺ຄປຣິມຊ຺ຊິຕາ;

ທຸວິຊາ ເນລສມ຺ຠູຕາ, ທນ຺ຕາ ຕວ ສຸທສ຺ສນາ.

໑໑໖. ‘‘ອປຓ຺ຑຣາ ໂລຫິຕນ຺ຕາ, ຊິຎ຺ຊູກ [ຊິຎ຺ຊຸກ (ສີ. ສ຺ຍາ. ປີ.)] ຜລສນ຺ນິຠາ;

ອາຍຕາ ຈ ວິສາລາ ຈ, ເນຕ຺ຕາ ຕວ ສຸທສ຺ສນາ.

໑໑໗. ‘‘ນາຕິທີຆາ ສຸສມ຺ມຏ຺ຐາ, ກນກພ຺ຍາ [ກນກຄ຺ຄາ (ປີ.)] ສໂມຈິຕາ;

ອຸຕ຺ຕມງ຺ຄຣຸຫາ ຕຸຍ຺ຫໍ, ເກສາ ຈນ຺ທນຄນ຺ຘິກາ.

໑໑໘. ‘‘ຍາວຕາ ກສິໂຄຣກ຺ຂາ, ວາຓິຊານໍ [ວຓິຊານໍ (ປີ.)] ຈ ຍາ ຄຕິ;

ອິສີນຎ຺ຈ ປຣກ຺ກນ຺ຕໍ, ສຎ຺ຎຕານໍ ຕປສ຺ສິນໍ.

໑໑໙. ‘‘ນ ເຕ ສມສມໍ ປສ຺ເສ, ອສ຺ມິໍ ປຖວິ [ປຸຖຸວິ (ປີ.)] ມຓ຺ຑເລ;

ໂກ ວາ ຕ຺ວໍ ກສ຺ສ ວາ ປຸຕ຺ໂຕ, ກຖໍ ຊາເນມຸ ຕໍ ມຍໍ’’.

໑໒໐. ‘‘ນ ປຎ຺ຫກາໂລ ຠທ຺ທນ຺ເຕ, ກສ຺ສເປວໍ ຄເຕ ສຕິ;

ເອຫິ ສມ຺ມ ຣມິສ຺ສາມ, ອຸໂຠ ອສ຺ມາກມສ຺ສເມ;

ເອຫິ ຕໍ ອຸປຄູຫິສ຺ສໍ [ອຸປຄຸຍ຺ຫິສ຺ສໍ (ສ຺ຍາ.)], ຣຕີນໍ ກຸສໂລ ຠວ’’.

໑໒໑. ‘‘ອິທໍ ວຕ຺ວານ ປກ຺ກາມິ, ອຈ຺ຉຣາ ກາມວຓ຺ຓິນີ;

ມິສ຺ສາ ມິສ຺ສິຕຸມິຈ຺ຉນ຺ຕີ, ອິສິສິງ຺ຄໍ ອລມ຺ພຸສາ’’.

໑໒໒. ‘‘ໂສ ຈ ເວເຄນ ນິກ຺ຂມ຺ມ, ເຉຕ຺ວາ ທນ຺ຘປຣກ຺ກມໍ [ທນ຺ຘປທກ຺ກມໍ (ກ.)];

ຕມຸຕ຺ຕມາສຸ ເວຓີສຸ, ອຊ຺ຌປ຺ປຕ຺ໂຕ [ອຊ຺ຌາປຕ຺ໂຕ (ປີ.)] ປຣາມສິ;

໑໒໓. ‘‘ຕມຸທາວຕ຺ຕ ກລ຺ຍາຓີ, ປລິສ຺ສຊິ ສຸໂສຠນາ [ສຸໂສຠຓີ (ສ຺ຍາ. ກ.)];

ຈວິຕມ຺ຫິ [ຈວິ ຕມ຺ຫາ (ສ຺ຍາ. ກ.)] ພ຺ຣຫ຺ມຈຣິຍາ, ຍຖາ ຕໍ ອຖ ໂຕສິຕາ.

໑໒໔. ‘‘ມນສາ ອຄມາ ອິນ຺ທໍ, ວສນ຺ຕໍ ນນ຺ທເນ ວເນ;

ຕສ຺ສາ ສງ຺ກປ຺ປມຎ຺ຎາຍ, ມຆວາ ເທວກຸຎ຺ຊໂຣ.

໑໒໕. ‘‘ປລ຺ລງ຺ກໍ ປຫິຓີ ຂິປ຺ປໍ, ໂສວຓ຺ຓໍ ໂສປວາຫນໍ;

ສອຸຕ຺ຕຣຈ຺ຉທປຎ຺ຎາສໍ, ສຫສ຺ສປຏິຍຕ຺ຖຕໍ [ປຏິກຕ຺ຖຕໍ (ສີ.)].

໑໒໖. ‘‘ຕເມນໍ ຕຕ຺ຖ ຘາເຣສິ, ອຸເຣ ກຕ຺ວານ ໂສຠນາ;

ຍຖາ ເອກມຸຫຸຕ຺ຕໍວ, ຕີຓິ ວສ຺ສານິ ຘາຣຍິ.

໑໒໗. ‘‘ວິມໂທ ຕີຫິ ວສ຺ເສຫິ, ປພຸຊ຺ຌິຕ຺ວານ ພ຺ຣາຫ຺ມໂຓ;

ອທ຺ທສາສິ ຫຣິຕ [ຫຣີ (ປີ.)] ຣຸກ຺ເຂ, ສມນ຺ຕາ ອຄ຺ຄິຍາຍນໍ.

໑໒໘. ‘‘ນວປຕ຺ຕວນໍ ຜຸລ຺ລໍ, ໂກກິລຄ຺ຄຓໂຆສິຕໍ;

ສມນ຺ຕາ ປວິໂລເກຕ຺ວາ, ຣຸທໍ ອສ຺ສູນິ ວຕ຺ຕຍິ.

໑໒໙. ‘‘ນ ຊຸເຫ ນ ຊເປ [ຊປ຺ເປ (ກ.)] ມນ຺ເຕ, ອຄ຺ຄິຫຸຕ຺ຕໍ ປຫາປິຕໍ;

ໂກ ນຸ ເມ ປາຣິຈຣິຍາຍ, ປຸພ຺ເພ ຈິຕ຺ຕໍ ປໂລຠຍິ.

໑໓໐. ‘‘ອຣຎ຺ເຎ ເມ ວິຫຣໂຕ, ໂຍ ເມ ເຕຊາ ຫ ສມ຺ຠຸຕໍ [ສມ຺ຠຕໍ (ປີ.)];

ນານາຣຕ຺ນປຣິປູຣໍ, ນາວໍວ ຄຓ຺ຫິ ອຓ຺ຓເວ’’.

໑໓໑. ‘‘ອຫໍ ເຕ ປາຣິຈຣິຍາຍ, ເທວຣາເຊນ ເປສິຕາ;

ອວຘິໍ [ອວຘີ (ສ຺ຍາ. ປີ. ກ.)] ຈິຕ຺ຕໍ ຈິຕ຺ເຕນ, ປມາໂທ [ປມາທາ (ສ຺ຍາ. ປີ.)] ຕ຺ວໍ ນ ພຸຊ຺ຌສິ’’.

໑໓໒. ‘‘ອິມານິ ກິຣ ມໍ ຕາໂຕ, ກສ຺ສໂປ ອນຸສາສຕິ;

ກມລາສທິສິຕ຺ຖິໂຍ [ສຣິສິຕ຺ຖິໂຍ (ສ຺ຍາ. ປີ.)], ຕາໂຍ ພຸຊ຺ເຌສິ ມາຓວ.

໑໓໓. ‘‘ອຸເຣ ຄຓ຺ຑາໂຍ ພຸຊ຺ເຌສິ, ຕາໂຍ ພຸຊ຺ເຌສິ ມາຓວ;

ອິຈ຺ຈານຸສາສິ ມໍ ຕາໂຕ, ຍຖາ ມໍ ອນຸກມ຺ປໂກ.

໑໓໔. ‘‘ຕສ຺ສາຫໍ ວຈນໍ ນາກໍ, ປິຕຸ ວຸທ຺ຘສ຺ສ ສາສນໍ;

ອຣຎ຺ເຎ ນິມ຺ມນຸສ຺ສມ຺ຫິ, ສ຺ວຊ຺ຊ ຌາຍາມິ [ສ຺ວາຊ຺ຊຊ຺ຌາຍາມິ (ສີ. ປີ.)] ເອກໂກ.

໑໓໕. ‘‘ໂສຫໍ ຕຖາ ກຣິສ຺ສາມິ, ຘິຣຕ຺ຖຸ ຊີວິເຕນ ເມ;

ປຸນ ວາ ຕາທິໂສ ເຫສ຺ສໍ, ມຣຓໍ ເມ ຠວິສ຺ສຕິ’’.

໑໓໖. ‘‘ຕສ຺ສ ເຕຊໍ [ເຕຊຎ຺ຈ (ສີ. ປີ.)] ວີຣິຍຎ຺ຈ, ຘິຕິໍ [ຘິຕິຎ຺ຈ (ປີ.)] ຎຕ຺ວາ ອວຏ຺ຐິຕໍ [ສຸວຑ຺ຒິຕໍ (ສີ.)];

ສິຣສາ ອຄ຺ຄຫີ ປາເທ, ອິສິສິງ຺ຄໍ ອລມ຺ພຸສາ.

໑໓໗. ‘‘ມາ ເມ ກຸຊ຺ຌ [ກຸຊ຺ຌິ (ປີ.)] ມຫາວີຣ, ມາ ເມ ກຸຊ຺ຌ [ກຸຊ຺ຌິ (ປີ.)] ມຫາອິເສ;

ມຫາ ອຕ຺ໂຖ ມຍາ ຈິຓ຺ໂຓ, ຕິທສານໍ ຍສສ຺ສິນໍ;

ຕຍາ ສໍກມ຺ປິຕໍ ອາສິ, ສພ຺ພໍ ເທວປຸຣໍ ຕທາ’’.

໑໓໘. ‘‘ຕາວຕິໍສາ ຈ ເຍ ເທວາ, ຕິທສານຎ຺ຈ ວາສໂວ;

ຕ຺ວຎ຺ຈ ຠທ຺ເທ ສຸຂີ ໂຫຫິ, ຄຈ຺ຉ ກຎ຺ເຎ ຍຖາສຸຂໍ’’.

໑໓໙. ‘‘ຕສ຺ສ ປາເທ ຄເຫຕ຺ວານ, ກຕ຺ວາ ຈ ນໍ ປທກ຺ຂິຓໍ;

ອຎ຺ຊລິໍ ປຄ຺ຄເຫຕ຺ວານ, ຕມ຺ຫາ ຐານາ ອປກ຺ກມິ.

໑໔໐. ‘‘ໂຍ ຈ ຕສ຺ສາສິ ປລ຺ລງ຺ໂກ, ໂສວຓ຺ໂຓ ໂສປວາຫໂນ;

ສອຸຕ຺ຕຣຈ຺ຉທປຎ຺ຎາໂສ, ສຫສ຺ສປຏິຍຕ຺ຖໂຕ;

ຕເມວ ປລ຺ລງ຺ກມາຣຸຍ຺ຫ, ອຄາ ເທວານ ສນ຺ຕິເກ.

໑໔໑. ‘‘ຕໂມກ຺ກມິວ ອາຍນ຺ຕິໍ, ຊລນ຺ຕິໍ ວິຊ຺ຊຸຕໍ ຍຖາ;

ປຕີໂຕ ສຸມໂນ ວິຕ຺ໂຕ, ເທວິນ຺ໂທ ອທທາ ວຣໍ’’.

໑໔໒. ‘‘ວຣຎ຺ເຈ ເມ ອໂທ ສກ຺ກ, ສພ຺ພຠູຕານມິສ຺ສຣ;

ນິສິປ຺ປໂລຠິກາ [ນ ອິສິປໂລຠິກາ (ສ຺ຍາ.), ນ ອິສິປໂລຠິຍໍ (ປີ.)] ຄຈ຺ເຉ, ເອຕໍ ສກ຺ກ ວຣໍ ວເຣ’’ຕິ.

ອລມ຺ພຸສາຊາຕກໍ ຕຕິຍໍ.