໕໒໒. ສຣຠງ຺ຄຊາຕກໍ (໒)

໕໐. ‘‘ອລງ຺ກຕາ ກຸຓ຺ຑລິໂນ ສຸວຕ຺ຖາ, ເວຬຸຣິຍມຸຕ຺ຕາຖຣຸຂຄ຺ຄພນ຺ຘາ [ພທ຺ຘາ (ປີ.)];

ຣເຖສຠາ ຕິຏ຺ຐຖ ເກ ນຸ ຕຸມ຺ເຫ, ກຖໍ ໂວ ຊານນ຺ຕິ ມນຸສ຺ສໂລເກ’’.

໕໑. ‘‘ອຫມຏ຺ຐໂກ ຠີມຣໂຖ ປນາຍໍ, ກາລິງ຺ຄຣາຊາ ປນ ອຸຄ຺ຄໂຕຍໍ [ອຸຄ຺ຄໂຕ ອຍໍ (ປີ.), ອຸຄ຺ຄຕາຍໍ (ກ.)];

ສຸສຎ຺ຎຕານໍ ອິສີນໍ [ສຸສຎ຺ຎຕານິສິນໍ (ປີ.)] ທສ຺ສນາຍ, ອິຘາຄຕາ ປຸຈ຺ຉິຕາເຍມ຺ຫ ປຎ຺ເຫ’’.

໕໒. ‘‘ເວຫາຍສໍ ຕິຏ຺ຐສິ [ຕິຏ຺ຐຕິ (ປີ.)] ອນ຺ຕລິກ຺ເຂ, ປຖທ຺ຘຸໂນ ປນ຺ນຣເສວ ຈນ຺ໂທ;

ປຸຈ຺ຉາມິ ຕໍ ຍກ຺ຂ ມຫານຸຠາວ, ກຖໍ ຕໍ ຊານນ຺ຕິ ມນຸສ຺ສໂລເກ’’.

໕໓. ‘‘ຍມາຫຸ ເທເວສຸ ສຸຊມ຺ປຕີຕິ, ມຆວາຕິ ຕໍ ອາຫຸ ມນຸສ຺ສໂລເກ;

ສ ເທວຣາຊາ ອິທມຊ຺ຊ ປຕ຺ໂຕ, ສຸສຎ຺ຎຕານໍ ອິສີນໍ ທສ຺ສນາຍ’’.

໕໔. ‘‘ທູເຣ ສຸຕາ ໂນ ອິສໂຍ ສມາຄຕາ, ມຫິທ຺ຘິກາ ອິທ຺ຘິຄຸຓູປປນ຺ນາ;

ວນ຺ທາມິ ເຕ ອຍິເຣ ປສນ຺ນຈິຕ຺ໂຕ, ເຍ ຊີວໂລເກຕ຺ຖ ມນຸສ຺ສເສຏ຺ຐາ’’.

໕໕. ຄນ຺ໂຘ ອິສີນໍ ຈິຣທິກ຺ຂິຕານໍ [ທກ຺ຂິຕານໍ (ສ຺ຍາ. ປີ.)], ກາຍາ ຈຸໂຕ ຄຈ຺ຉຕິ ມາລຸເຕນ;

ອິໂຕ ປຏິກ຺ກມ຺ມ ສຫສ຺ສເນຕ຺ຕ, ຄນ຺ໂຘ ອິສີນໍ ອສຸຈິ ເທວຣາຊ’’.

໕໖. ‘‘ຄນ຺ໂຘ ອິສີນໍ ຈິຣທິກ຺ຂິຕານໍ, ກາຍາ ຈຸໂຕ ຄຈ຺ຉຕຸ ມາລຸເຕນ;

ວິຈິຕ຺ຣປຸປ຺ຜໍ ສຸຣຠິໍວ ມາລໍ, ຄນ຺ຘຎ຺ຈ ເອຕໍ ປາຏິກງ຺ຂາມ ຠນ຺ເຕ;

ນ ເຫຕ຺ຖ ເທວາ ປຏິກ຺ກູລສຎ຺ຎິໂນ’’.

໕໗. ‘‘ປຸຣິນ຺ທໂທ ຠູຕປຕີ ຍສສ຺ສີ, ເທວານມິນ຺ໂທ ສກ຺ໂກ [ອິທໍ ປທໍ ນຕ຺ຖິ (ສີ. ສ຺ຍາ. ປີ. ໂປຕ຺ຖເກສຸ)] ມຆວາ ສຸຊມ຺ປຕິ;

ສ ເທວຣາຊາ ອສຸຣຄຓປ຺ປມທ຺ທໂນ, ໂອກາສມາກງ຺ຂຕິ ປຎ຺ຫ ປຸຈ຺ຉິຕຸໍ.

໕໘. ‘‘ໂກ ເນວິເມສໍ ອິຘ ປຓ຺ຑິຕານໍ, ປຎ຺ເຫ ປຸຏ຺ໂຐ ນິປຸເຓ ພ຺ຍາກຣິສ຺ສຕິ;

ຕິຓ຺ຓຎ຺ຈ ຣຎ຺ຎໍ ມນຸຊາຘິປານໍ, ເທວານມິນ຺ທສ຺ສ ຈ ວາສວສ຺ສ’’.

໕໙. ‘‘ອຍໍ ອິສິ [ອິສີ (ສີ. ປີ.)] ສຣຠງ຺ໂຄ ຕປສ຺ສີ [ຍສສ຺ສີ (ສີ.)], ຍໂຕ ຊາໂຕ ວິຣໂຕ ເມຖຸນສ຺ມາ;

ອາເຈຣປຸຕ຺ໂຕ [ອາຈຣິຍປຸຕ຺ໂຕ (ປີ. ກ.)] ສຸວິນີຕຣູໂປ, ໂສ ເນສໍ ປຎ຺ຫານິ ວິຍາກຣິສ຺ສຕິ’’.

໖໐. ‘‘ໂກຓ຺ຑຎ຺ຎ ປຎ຺ຫານິ ວິຍາກໂຣຫິ, ຍາຈນ຺ຕິ ຕໍ ອິສໂຍ ສາຘຸຣູປາ;

ໂກຓ຺ຑຎ຺ຎ ເອໂສ ມນຸເຊສຸ ຘມ຺ໂມ, ຍໍ ວຸທ຺ຘ [ວທ຺ຘ (ປີ.), ພຸທ຺ຘ (ກ.)] ມາຄຈ຺ຉຕິ ເອສ ຠາໂຣ’’.

໖໑. ‘‘ກຕາວກາສາ ປຸຈ຺ຉນ຺ຕຸ ໂຠນ຺ໂຕ, ຍໍ ກິຎ຺ຈິ ປຎ຺ຫໍ ມນສາຠິປຕ຺ຖິຕໍ;

ອຫຎ຺ຫິ ຕໍ ຕໍ ໂວ ວິຍາກຣິສ຺ສໍ, ຎຕ຺ວາ ສຍໍ ໂລກມິມໍ ປຣຎ຺ຈ’’.

໖໒. ‘‘ຕໂຕ ຈ ມຆວາ ສກ຺ໂກ, ອຕ຺ຖທສ຺ສີ ປຸຣິນ຺ທໂທ;

ອປຸຈ຺ຉິ ປຐມໍ ປຎ຺ຫໍ, ຍຎ຺ຈາສິ ອຠິປຕ຺ຖິຕໍ’’.

໖໓. ‘‘ກິໍ ສູ ວຘິຕ຺ວາ ນ ກທາຈິ ໂສຈຕິ, ກິສ຺ສປ຺ປຫານໍ ອິສໂຍ ວຓ຺ຓຍນ຺ຕິ;

ກສ຺ສີຘ ວຸຕ຺ຕໍ ຜຣຸສໍ ຂເມຖ, ອກ຺ຂາຫິ ເມ ໂກຓ຺ຑຎ຺ຎ ເອຕມຕ຺ຖໍ’’.

໖໔. ‘‘ໂກຘໍ ວຘິຕ຺ວາ ນ ກທາຈິ ໂສຈຕິ, ມກ຺ຂປ຺ປຫານໍ ອິສໂຍ ວຓ຺ຓຍນ຺ຕິ;

ສພ຺ເພສໍ ວຸຕ຺ຕໍ ຜຣຸສໍ ຂເມຖ, ເອຕໍ ຂນ຺ຕິໍ ອຸຕ຺ຕມມາຫຸ ສນ຺ໂຕ’’.

໖໕. ‘‘ສກ຺ກາ ອຸຠິນ຺ນໍ [ຫິ ທ຺ວິນ຺ນໍ (ປີ.)] ວຈນໍ ຕິຕິກ຺ຂິຕຸໍ, ສທິສສ຺ສ ວາ ເສຏ຺ຐຕຣສ຺ສ [ເສຏ຺ຐນຣສ຺ສ (ປີ.)] ວາປິ;

ກຖໍ ນຸ ຫີນສ຺ສ ວໂຈ ຂເມຖ, ອກ຺ຂາຫິ ເມ ໂກຓ຺ຑຎ຺ຎ ເອຕມຕ຺ຖໍ’’.

໖໖. ‘‘ຠຍາ ຫິ ເສຏ຺ຐສ຺ສ ວໂຈ ຂເມຖ, ສາຣມ຺ຠເຫຕູ ປນ ສາທິສສ຺ສ;

ໂຍ ຈີຘ ຫີນສ຺ສ ວໂຈ ຂເມຖ, ເອຕໍ ຂນ຺ຕິໍ ອຸຕ຺ຕມມາຫຸ ສນ຺ໂຕ’’.

໖໗. ‘‘ກຖໍ ວິຊຎ຺ຎາ ຈຕຸປຕ຺ຖຣູປໍ [ຈຕຸມຏ຺ຐຣູປໍ (ສ຺ຍາ. ປີ.)], ເສຏ຺ຐໍ ສຣິກ຺ຂໍ ອຖວາປິ ຫີນໍ;

ວິຣູປຣູເປນ ຈຣນ຺ຕິ ສນ຺ໂຕ, ຕສ຺ມາ ຫິ ສພ຺ເພສໍ ວໂຈ ຂເມຖ’’.

໖໘. ‘‘ນ ເຫຕມຕ຺ຖໍ ມຫຕີປິ ເສນາ, ສຣາຊິກາ ຍຸຊ຺ຌມານາ ລເຠຖ;

ຍໍ ຂນ຺ຕິມາ ສປ຺ປຸຣິໂສ ລເຠຖ, ຂນ຺ຕີ ພລສ຺ສູປສມນ຺ຕິ ເວຣາ’’.

໖໙. ‘‘ສຸຠາສິຕໍ ເຕ ອນຸໂມທິຍານ, ອຎ຺ຎໍ ຕໍ ປຸຈ຺ຉາມິ ຕທິງ຺ຆ ພ຺ຣູຫິ;

ຍຖາ ອຫຸໍ [ອຫູ (ສີ. ສ຺ຍາ. ປີ.)] ທຓ຺ຑກີ ນາຬິເກໂຣ [ນາຬິກີໂຣ (ສີ. ສ຺ຍາ. ປີ.)], ອຖຊ຺ຊຸໂນ ກລາພຸ ຈາປິ ຣາຊາ;

ເຕສໍ ຄຕິໍ ພ຺ຣູຫິ ສຸປາປກມ຺ມິນໍ, ກຕ຺ຖູປປນ຺ນາ ອິສິນໍ ວິເຫຐກາ’’.

໗໐. ‘‘ກິສຎ຺ຫິ [ກິສໍປິ (ປີ.)] ວຈ຺ຉໍ ອວກິຣິຍ ທຓ຺ຑກີ, ອຸຈ຺ຉິນ຺ນມູໂລ ສຊໂນ ສຣຏ຺ໂຐ;

ກຸກ຺ກຸຬນາເມ ນິຣຍມ຺ຫິ ປຈ຺ຈຕິ, ຕສ຺ສ ຜຸລິງ຺ຄານິ ປຕນ຺ຕິ ກາເຍ.

໗໑. ‘‘ໂຍ ສຎ຺ຎເຕ ປພ຺ພຊິເຕ ອເຫຐຍິ [ອວຎ຺ຈສິ (ປີ.)], ຘມ຺ມໍ ຠຓນ຺ເຕ ສມເຓ ອທູສເກ;

ຕໍ ນາຬິເກຣໍ ສຸນຂາ ປຣຕ຺ຖ, ສງ຺ຄມ຺ມ ຂາທນ຺ຕິ ວິຜນ຺ທມານໍ.

໗໒. ‘‘ອຖຊ຺ຊຸໂນ ນິຣເຍ ສຕ຺ຕິສູເລ, ອວໍສິໂຣ ປຕິໂຕ ອຸທ຺ຘໍປາໂທ [ອຸທ຺ຘປາໂທ (ສ຺ຍາ.), ອທ຺ຘປາໂທ (ປີ.)];

ອງ຺ຄີຣສໍ ໂຄຕມໍ ເຫຐຍິຕ຺ວາ, ຂນ຺ຕິໍ ຕປສ຺ສິໍ ຈິຣພ຺ຣຫ຺ມຈາຣິໍ.

໗໓. ‘‘ໂຍ ຂຓ຺ຑໂສ ປພ຺ພຊິຕໍ ອເຉທຍິ, ຂນ຺ຕິໍ ວທນ຺ຕໍ ສມຓໍ ອທູສກໍ;

ກລາພຸວີຈິໍ ອຸປປຊ຺ຊ ປຈ຺ຈຕິ, ມຫາປຕາປໍ [ມຫາຠິຕາປໍ (ປີ.)] ກຏຸກໍ ຠຍານກໍ.

໗໔. ‘‘ເອຕານິ ສຸຕ຺ວາ ນິຣຍານິ ປຓ຺ຑິໂຕ, ອຎ຺ຎານິ ປາປິຏ຺ຐຕຣານິ ເຈຕ຺ຖ;

ຘມ຺ມໍ ຈເຣ ສມຓພ຺ຣາຫ຺ມເຓສຸ, ເອວງ຺ກໂຣ ສຄ຺ຄມຸເປຕິ ຐານໍ’’.

໗໕. ‘‘ສຸຠາສິຕໍ ເຕ ອນຸໂມທິຍານ, ອຎ຺ຎໍ ຕໍ ປຸຈ຺ຉາມິ ຕທິງ຺ຆ ພ຺ຣູຫິ;

ກຖໍວິຘໍ ສີລວນ຺ຕໍ ວທນ຺ຕິ, ກຖໍວິຘໍ ປຎ຺ຎວນ຺ຕໍ ວທນ຺ຕິ;

ກຖໍວິຘໍ ສປ຺ປຸຣິສໍ ວທນ຺ຕິ, ກຖໍວິຘໍ ໂນ ສິຣິ ໂນ ຊຫາຕິ’’.

໗໖. ‘‘ກາເຍນ ວາຈາຍ ຈ ໂຍ’ຘ [ໂຍ ຈ (ປີ.)] ສຎ຺ຎໂຕ, ມນສາ ຈ ກິຎ຺ຈິ ນ ກໂຣຕິ ປາປໍ;

ນ ອຕ຺ຕເຫຕູ ອລິກໍ ຠເຓຕິ [ຠຓາຕິ (ສີ. ສ຺ຍາ. ປີ.)], ຕຖາວິຘໍ ສີລວນ຺ຕໍ ວທນ຺ຕິ.

໗໗. ‘‘ຄມ຺ຠີຣປຎ຺ຫໍ ມນສາຠິຈິນ຺ຕຍໍ [ມນສາ ວິຈິນ຺ຕຍໍ (ສີ.)], ນາຈ຺ຈາຫິຕໍ ກມ຺ມ ກໂຣຕິ ລຸທ຺ທໍ;

ກາລາຄຕໍ [ກາລາຠຕໍ (ປີ.)] ອຕ຺ຖປທໍ ນ ຣິຎ຺ຈຕິ, ຕຖາວິຘໍ ປຎ຺ຎວນ຺ຕໍ ວທນ຺ຕິ.

໗໘. ‘‘ໂຍ ເວ ກຕຎ຺ຎູ ກຕເວທິ ຘີໂຣ, ກລ຺ຍາຓມິຕ຺ໂຕ ທຬ຺ຫຠຕ຺ຕິ ຈ ໂຫຕິ;

ທຸຂິຕສ຺ສ ສກ຺ກຈ຺ຈ ກໂຣຕິ ກິຈ຺ຈໍ, ຕຖາວິຘໍ ສປ຺ປຸຣິສໍ ວທນ຺ຕິ.

໗໙. ‘‘ເອເຕຫິ ສພ຺ເພຫິ ຄຸເຓຫຸເປໂຕ, ສທ຺ໂຘ ມຸທູ ສໍວິຠາຄີ ວທຎ຺ຎູ;

ສງ຺ຄາຫກໍ ສຂິລໍ ສຓ຺ຫວາຈໍ, ຕຖາວິຘໍ ໂນ ສິຣິ ໂນ ຊຫາຕິ’’.

໘໐. ‘‘ສຸຠາສິຕໍ ເຕ ອນຸໂມທິຍານ, ອຎ຺ຎໍ ຕໍ ປຸຈ຺ຉາມິ ຕທິງ຺ຆ ພ຺ຣູຫິ;

ສີລໍ ສິຣິຎ຺ຈາປິ ສຕຎ຺ຈ ຘມ຺ມໍ, ປຎ຺ຎຎ຺ຈ ກໍ ເສຏ຺ຐຕຣໍ ວທນ຺ຕິ’’.

໘໑. ‘‘ປຎ຺ຎາ ຫິ ເສຏ຺ຐາ ກຸສລາ ວທນ຺ຕິ, ນກ຺ຂຕ຺ຕຣາຊາຣິວ ຕາຣການໍ;

ສີລໍ ສີຣີ ຈາປິ ສຕຎ຺ຈ ຘມ຺ໂມ [ຘມ຺ມາ (ປີ.)], ອນ຺ວາຍິກາ ປຎ຺ຎວໂຕ ຠວນ຺ຕິ’’.

໘໒. ‘‘ສຸຠາສິຕໍ ເຕ ອນຸໂມທິຍານ, ອຎ຺ຎໍ ຕໍ ປຸຈ຺ຉາມິ ຕທິງ຺ຆ ພ຺ຣູຫິ;

ກຖໍກໂຣ ກິນ຺ຕິກໂຣ ກິມາຈຣໍ, ກິໍ ເສວມາໂນ ລຠຕີຘ ປຎ຺ຎໍ;

ປຎ຺ຎາຍ ທານິປ຺ປຏິປໍ [ທານິ ປຏິປທໍ (ສີ. ສ຺ຍາ. ປີ.)] ວເທຫິ, ກຖໍກໂຣ ປຎ຺ຎວາ ໂຫຕິ ມຈ຺ໂຈ’’.

໘໓. ‘‘ເສເວຖ ວຸທ຺ເຘ ນິປຸເຓ ພຫຸສ຺ສຸເຕ, ອຸຄ຺ຄາຫໂກ ຈ ປຣິປຸຈ຺ຉໂກ ສິຍາ;

ສຸເຓຍ຺ຍ ສກ຺ກຈ຺ຈ ສຸຠາສິຕານິ, ເອວໍກໂຣ ປຎ຺ຎວາ ໂຫຕິ ມຈ຺ໂຈ.

໘໔. ‘‘ ປຎ຺ຎວາ ກາມຄຸເຓ ອເວກ຺ຂຕິ, ອນິຈ຺ຈໂຕ ທຸກ຺ຂໂຕ ໂຣຄໂຕ ຈ;

ເອວໍ ວິປສ຺ສີ ປຊຫາຕິ ຉນ຺ທໍ, ທຸກ຺ເຂສຸ ກາເມສຸ ມຫພ຺ຠເຍສຸ.

໘໕. ‘‘ສ ວີຕຣາໂຄ ປວິເນຍ຺ຍ ໂທສໍ, ເມຕ຺ຕໍ [ເມຕ຺ຕ (ສ຺ຍາ. ກ.)] ຈິຕ຺ຕໍ ຠາວເຍ [ຠາເວຍ຺ຍ (ສີ. ສ຺ຍາ. ກ.)] ອປ຺ປມາຓໍ;

ສພ຺ເພສຸ ຠູເຕສຸ ນິຘາຍ ທຓ຺ຑໍ, ອນິນ຺ທິໂຕ ພ຺ຣຫ຺ມມຸເປຕິ ຐານໍ’’.

໘໖. ‘‘ມຫຕ຺ຖິຍໍ [ມຫິທ຺ຘິຍໍ (ສີ. ສ຺ຍາ. ປີ.)] ອາຄມນໍ ອໂຫສິ, ຕວມຏ຺ຐກາ [ມຏ຺ຐກ (ສີ. ສ຺ຍາ. ກ.)] ຠີມຣຖສ຺ສ ຈາປິ;

ກາລິງ຺ຄຣາຊສ຺ສ ຈ ອຸຄ຺ຄຕສ຺ສ, ສພ຺ເພສ ໂວ ກາມຣາໂຄ ປຫີໂນ’’.

໘໗. ‘‘ເອວເມຕໍ ປຣຈິຕ຺ຕເວທິ, ສພ຺ເພສ ໂນ ກາມຣາໂຄ ປຫີໂນ;

ກໂຣຫິ ໂອກາສມນຸຄ຺ຄຫາຍ, ຍຖາ ຄຕິໍ ເຕ ອຠິສມ຺ຠເວມ’’.

໘໘. ‘‘ກໂຣມິ ໂອກາສມນຸຄ຺ຄຫາຍ, ຕຖາ ຫິ ໂວ ກາມຣາໂຄ ປຫີໂນ;

ຜຣາຖ ກາຍໍ ວິປຸລາຍ ປີຕິຍາ, ຍຖາ ຄຕິໍ ເມ ອຠິສມ຺ຠເວຖ’’.

໘໙. ‘‘ສພ຺ພໍ ກຣິສ຺ສາມ ຕວານຸສາສນິໍ, ຍໍ ຍໍ ຕຸວໍ ວກ຺ຂສິ ຠູຣິປຎ຺ຎ;

ຜຣາມ ກາຍໍ ວິປຸລາຍ ປີຕິຍາ, ຍຖາ ຄຕິໍ ເຕ ອຠິສມ຺ຠເວມ’’.

໙໐. ‘‘ກຕາຍ [ກຕາຍໍ (ສີ. ປີ.)] ວຈ຺ຉສ຺ສ ກິສສ຺ສ ປູຊາ, ຄຈ຺ຉນ຺ຕຸ ໂຠນ຺ໂຕ ອິສໂຍ ສາຘຸຣູປາ;

ຌາເນ ຣຕາ ໂຫຖ ສທາ ສມາຫິຕາ, ເອສາ ຣຕີ ປພ຺ພຊິຕສ຺ສ ເສຏ຺ຐາ’’.

໙໑. ‘‘ສຸຕ຺ວານ ຄາຖາ ປຣມຕ຺ຖສໍຫິຕາ, ສຸຠາສິຕາ ອິສິນາ ປຓ຺ຑິເຕນ;

ເຕ ເວທຊາຕາ ອນຸໂມທມານາ, ປກ຺ກາມຸ [ປກ຺ກມຸ (ກ.)] ເທວາ ເທວປຸຣໍ ຍສສ຺ສິໂນ.

໙໒. ‘‘ຄາຖາ ອິມາ ອຕ຺ຖວຕີ ສຸພ຺ຍຎ຺ຊນາ, ສຸຠາສິຕາ ອິສິນາ ປຓ຺ຑິເຕນ;

ໂຍ ໂກຈິມາ ອຏ຺ຐິກຕ຺ວາ [ອຏ຺ຐິໍ ກຕ຺ວາ (ກ.)] ສຸເຓຍ຺ຍ, ລເຠຖ ປຸພ຺ພາປຣິຍໍ ວິເສສໍ;

ລທ຺ຘານ ປຸພ຺ພາປຣິຍໍ ວິເສສໍ, ອທສ຺ສນໍ ມຈ຺ຈຸຣາຊສ຺ສ ຄຈ຺ເຉ’’.

໙໓. ‘‘ສາລິສ຺ສໂຣ ສາຣິປຸຕ຺ໂຕ, ເມຓ຺ຑິສ຺ສໂຣ ຈ ກສ຺ສໂປ;

ປພ຺ພໂຕ ອນຸຣຸທ຺ໂຘ ຈ, ກຈ຺ຈາຍໂນ ຈ ເທວໂລ [ເທວິໂລ (ສ຺ຍາ. ກ.)].

໙໔. ‘‘ອນຸສິສ຺ໂສ ຈ ອານນ຺ໂທ, ກິສວຈ຺ໂຉ ຈ ໂກລິໂຕ;

ນາຣໂທ ອຸທາຍີ ເຖໂຣ [ນາຣໂທ ປຸຓ຺ໂຓ ມນ຺ຕານີປຸຕ຺ໂຕ (ສີ.)], ປຣິສາ ພຸທ຺ຘປຣິສາ;

ສຣຠງ຺ໂຄ ໂລກນາໂຖ, ເອວໍ ຘາເຣຖ ຊາຕກ’’ນ຺ຕິ.

ສຣຠງ຺ຄຊາຕກໍ ທຸຕິຍໍ.