໕໒໐. ຄນ຺ຘຕິນ຺ທຸກຊາຕກໍ (໑໐)

໓໓໒. ອປ຺ປມາໂທ ອມຕໍ ປທໍ [ອມຕປທໍ (ສີ. ປີ.)], ປມາໂທ ມຈ຺ຈຸໂນ ປທໍ;

ອປ຺ປມຕ຺ຕາ ນ ມີຍນ຺ຕິ, ເຍ ປມຕ຺ຕາ ຍຖາ ມຕາ.

໓໓໓. ມທາ ປມາໂທ ຊາເຍຖ, ປມາທາ ຊາຍເຕ ຂໂຍ;

ຂຍາ ປໂທສາ [ຂຍາ ຈ ໂທສາ (ສີ.)] ຊາຍນ຺ຕິ, ມາ ປມາໂທ [ມາ ມໂທ (ສີ. ສ຺ຍາ. ປີ.)] ຠຣຕູສຠ [ຠາຣຘູສຠ (ກ.)].

໓໓໔. ພຫູ ຫິ ຂຕ຺ຕິຍາ ຊີນາ, ອຕ຺ຖໍ ຣຏ຺ຐໍ ປມາທິໂນ;

ອໂຖປິ ຄາມິໂນ ຄາມາ, ອນຄາຣາ ອຄາຣິໂນ.

໓໓໕. ຂຕ຺ຕິຍສ຺ສ ປມຕ຺ຕສ຺ສ, ຣຏ຺ຐສ຺ມິໍ ຣຏ຺ຐວຑ຺ຒນ;

ສພ຺ເພ ໂຠຄາ ວິນສ຺ສນ຺ຕິ, ຣຎ຺ໂຎ ຕໍ ວຸຈ຺ຈເຕ ອຆໍ.

໓໓໖. ເນສ ຘມ຺ໂມ ມຫາຣາຊ, ອຕິເວລໍ ປມຊ຺ຊສິ;

ອິທ຺ຘໍ ຜີຕໍ ຊນປທໍ, ໂຈຣາ ວິທ຺ຘໍສຍນ຺ຕິ ນໍ.

໓໓໗. ນ ເຕ ປຸຕ຺ຕາ ຠວິສ຺ສນ຺ຕິ, ນ ຫິຣຎ຺ຎໍ ນ ຘານິຍໍ [ນ ຫິຣຎ຺ຎນິຘານິຍາ (ກ.)];

ຣຏ຺ເຐ ວິລຸປ຺ປມານມ຺ຫິ, ສພ຺ພໂຠເຄຫິ ຊິຍ຺ຍສິ.

໓໓໘. ສພ຺ພໂຠຄາ ປຣິຊິຓ຺ຓໍ, ຣາຊານໍ ວາປິ ຂຕ຺ຕິຍໍ [ຂຕ຺ຕິຍ (ກ.)];

ຎາຕິມິຕ຺ຕາ ສຸຫຊ຺ຊາ ຈ, ນ ຕໍ ມຎ຺ຎນ຺ຕິ ມານິຍໍ [ມນ຺ຕິຍໍ (ສ຺ຍາ.)].

໓໓໙. ຫຕ຺ຖາໂຣຫາ ອນີກຏ຺ຐາ, ຣຖິກາ ປຕ຺ຕິກາຣກາ;

ຕເມວມຸປຊີວນ຺ຕາ, ນ ຕໍ ມຎ຺ຎນ຺ຕິ ມານິຍໍ.

໓໔໐. ອສໍວິຫິຕກມ຺ມນ຺ຕໍ, ພາລໍ ທຸມ຺ມນ຺ຕິມນ຺ຕິນໍ;

ສິຣີ ຊຫຕິ ທຸມ຺ເມຘໍ, ຊິຓ຺ຓໍວ ອຸຣໂຄ ຕຈໍ.

໓໔໑. ສຸສໍວິຫິຕກມ຺ມນ຺ຕໍ, ກາລຸຏ຺ຐາຍິໍ ອຕນ຺ທິຕໍ;

ສພ຺ເພ ໂຠຄາຠິວຑ຺ຒນ຺ຕິ, ຄາໂວ ສອຸສຠາມິວ.

໓໔໒. ອຸປສ຺ສຸຕິໍ ມຫາຣາຊ, ຣຏ຺ເຐ ຊນປເທ ຈຣ;

ຕຕ຺ຖ ທິສ຺ວາ ຈ ສຸຕ຺ວາ ຈ, ຕໂຕ ຕໍ [ຕ຺ວໍ (ກ.)] ປຏິປຊ຺ຊສິ.

໓໔໓. ເອວໍ ເວເທຕຸ ປຎ຺ຈາໂລ, ສງ຺ຄາເມ ສຣມປ຺ປິໂຕ [ສມປ຺ປິໂຕ (ສີ. ປີ.)];

ຍຖາຫມຊ຺ຊ ເວເທມິ, ກຓ຺ຏເກນ ສມປ຺ປິໂຕ.

໓໔໔. ຊິຓ຺ໂຓ ທຸພ຺ພລຈກ຺ຂູສິ, ນ ຣູປໍ ສາຘຸ ປສ຺ສສິ;

ກິໍ ຕຕ຺ຖ ພ຺ຣຫ຺ມທຕ຺ຕສ຺ສ, ຍໍ ຕໍ ມຄ຺ເຄຍ຺ຍ [ມຄ຺ເຆຍ຺ຍ (ປີ.)] ກຓ຺ຏໂກ [ກຓ຺ຑໂກ (ສີ. ສ຺ຍາ. ປີ.)].

໓໔໕. ພຫ຺ເວຕ຺ຖ ພ຺ຣຫ຺ມທຕ຺ຕສ຺ສ, ໂສຫໍ [ໂຍຫໍ (ສີ. ສ຺ຍາ. ປີ.)] ມຄ຺ຄສ຺ມິ [ມຄ຺ໂຄສ຺ມິ (ປີ.)] ພ຺ຣາຫ຺ມຓ;

ອຣກ຺ຂິຕາ ຊານປທາ, ອຘມ຺ມພລິນາ ຫຕາ.

໓໔໖. ຣຕ຺ຕິຎ຺ຫິ [ຣຕ຺ຕິຎ຺ຈ (ສີ.)] ໂຈຣາ ຂາທນ຺ຕິ, ທິວາ ຂາທນ຺ຕິ ຕຸຓ຺ຑິຍາ;

ຣຏ຺ຐສ຺ມິໍ ກູຏຣາຊສ຺ສ, ພຫຸ ອຘມ຺ມິໂກ ຊໂນ.

໓໔໗. ເອຕາທິເສ ຠເຍ ຊາເຕ [ຕາຕ (ສີ. ປີ.)], ຠຍຏ຺ຏາ ຕາຕ [ຕາວ (ສີ. ປີ.)] ມາຓວາ;

ນິລ຺ເລນການິ ກຸພ຺ພນ຺ຕິ, ວເນ ອາຫຕ຺ວ ກຓ຺ຏກໍ.

໓໔໘. ກທາສ຺ສຸ ນາມຍໍ ຣາຊາ, ພ຺ຣຫ຺ມທຕ຺ໂຕ ມຣິສ຺ສຕິ;

ຍສ຺ສ ຣຏ຺ຐມ຺ຫິ ຊິຍ຺ຍນ຺ຕິ, ອປ຺ປຕິກາ ກຸມາຣິກາ.

໓໔໙. ທຸພ຺ຠາສິຕຎ຺ຫິ ເຕ ຊມ຺ມິ, ອນຕ຺ຖປທໂກວິເທ;

ກຸຫິໍ ຣາຊາ ກຸມາຣີນໍ, ຠຕ຺ຕາຣໍ ປຣິເຍສຕິ.

໓໕໐. ນ ເມ ທຸພ຺ຠາສິຕໍ ພ຺ຣຫ຺ເມ, ໂກວິທຕ຺ຖປທາ ອຫໍ;

ອຣກ຺ຂິຕາ ຊານປທາ, ອຘມ຺ມພລິນາ ຫຕາ.

໓໕໑. ຣຕ຺ຕິຎ຺ຫິ ໂຈຣາ ຂາທນ຺ຕິ, ທິວາ ຂາທນ຺ຕິ ຕຸຓ຺ຑິຍາ;

ຣຏ຺ຐສ຺ມິໍ ກູຏຣາຊສ຺ສ, ພຫຸ ອຘມ຺ມິໂກ ຊໂນ;

ທຸຊ຺ຊີເວ ທຸພ຺ຠເຣ ທາເຣ, ກຸໂຕ ຠຕ຺ຕາ ກຸມາຣິໂຍ.

໓໕໒. ເອວໍ ສຍຕຸ ປຎ຺ຈາໂລ, ສງ຺ຄາເມ ສຕ຺ຕິຍາ ຫໂຕ;

ຍຖາຍໍ ກປໂຓ ເສຕິ, ຫໂຕ ຜາເລນ ສາລິໂຍ.

໓໕໓. ອຘມ຺ເມນ ຕຸວໍ ຊມ຺ມ, ພ຺ຣຫ຺ມທຕ຺ຕສ຺ສ ກຸຊ຺ຌສິ;

ໂຍ ຕ຺ວໍ ສປສິ ຣາຊານໍ, ອປຣຊ຺ຌິຕ຺ວານ ອຕ຺ຕໂນ [ອຕ຺ຕນາ (ປີ.)].

໓໕໔. ຘມ຺ເມນ ພ຺ຣຫ຺ມທຕ຺ຕສ຺ສ, ອຫໍ ກຸຊ຺ຌາມິ ພ຺ຣາຫ຺ມຓ;

ອຣກ຺ຂິຕາ ຊານປທາ, ອຘມ຺ມພລິນາ ຫຕາ.

໓໕໕. ຣຕ຺ຕິຎ຺ຫິ ໂຈຣາ ຂາທນ຺ຕິ, ທິວາ ຂາທນ຺ຕິ ຕຸຓ຺ຑິຍາ;

ຣຏ຺ຐສ຺ມິໍ ກູຏຣາຊສ຺ສ, ພຫຸ ອຘມ຺ມິໂກ ຊໂນ.

໓໕໖. ສາ ນູນ ປຸນ ເຣ ປກ຺ກາ, ວິກາເລ ຠຕ຺ຕມາຫຣິ;

ຠຕ຺ຕຫາຣິໍ ອເປກ຺ຂນ຺ໂຕ, ຫໂຕ ຜາເລນ ສາລິໂຍ.

໓໕໗. ເອວໍ ຫຎ຺ຎຕຸ ປຎ຺ຈາໂລ, ສງ຺ຄາເມ ອສິນາ ຫໂຕ [ທຬ຺ຫໍ (ປີ.)];

ຍຖາຫມຊ຺ຊ ປຫໂຕ, ຂີຣຎ຺ຈ ເມ ປວຏ຺ຏິຕໍ.

໓໕໘. ຍໍ ປສຸ ຂີຣໍ ຉຑ຺ເຑຕິ, ປສຸປາລໍ ວິຫິໍສຕິ [ປສຸປາລຎ຺ຈ ຫິໍສຕິ (ສີ.), ປສຸ ຜາລຎ຺ຈ ຫິໍສຕິ (ປີ.)];

ກິໍ ຕຕ຺ຖ ພ຺ຣຫ຺ມທຕ຺ຕສ຺ສ, ຍໍ ໂນ ຄຣຫເຕ [ຄຣຫໂຕ (ປີ.)] ຠວໍ.

໓໕໙. ຄາຣຍ຺ໂຫ ພ຺ຣຫ຺ເມ ປຎ຺ຈາໂລ, ພ຺ຣຫ຺ມທຕ຺ຕສ຺ສ ຣາຊິໂນ;

ອຣກ຺ຂິຕາ ຊານປທາ, ອຘມ຺ມພລິນາ ຫຕາ.

໓໖໐. ຣຕ຺ຕິຎ຺ຫິ ໂຈຣາ ຂາທນ຺ຕິ, ທິວາ ຂາທນ຺ຕິ ຕຸຓ຺ຑິຍາ;

ຣຏ຺ຐສ຺ມິໍ ກູຏຣາຊສ຺ສ, ພຫຸ ອຘມ຺ມິໂກ ຊໂນ.

໓໖໑. ຈຓ຺ຑາ ອຏນກາ [ອຏນກ (ປີ.), ອກຏນາ (ກ.)] ຄາວີ, ຍໍ ປຸເຣ ນ ທຸຫາມເສ;

ຕໍ ທານິ ອຊ຺ຊ ໂທຫາມ, ຂີຣກາເມຫຸປທ຺ທຸຕາ.

໓໖໒. ເອວໍ ກນ຺ທຕຸ ປຎ຺ຈາໂລ, ວິປຸຕ຺ໂຕ ວິປ຺ປສຸກ຺ຂຕຸ;

ຍຖາຍໍ ກປຓາ ຄາວີ, ວິປຸຕ຺ຕາ ປຣິຘາວຕິ.

໓໖໓. ຍໍ ປສຸ ປສຸປາລສ຺ສ, ສມ຺ຠເມຍ຺ຍ [ປພ຺ຠເມຍ຺ຍ (ສີ. ປີ.)] ຣເວຍ຺ຍ ວາ;

ໂກ ນີຘ ອປຣາຘຕ຺ຖິ, ພ຺ຣຫ຺ມທຕ຺ຕສ຺ສ ຣາຊິໂນ.

໓໖໔. ອປຣາໂຘ ມຫາພ຺ຣຫ຺ເມ, ພ຺ຣຫ຺ມທຕ຺ຕສ຺ສ ຣາຊິໂນ;

ອຣກ຺ຂິຕາ ຊານປທາ, ອຘມ຺ມພລິນາ ຫຕາ.

໓໖໕. ຣຕ຺ຕິຎ຺ຫິ ໂຈຣາ ຂາທນ຺ຕິ, ທິວາ ຂາທນ຺ຕິ ຕຸຓ຺ຑິຍາ;

ຣຏ຺ຐສ຺ມິໍ ກູຏຣາຊສ຺ສ, ພຫຸ ອຘມ຺ມິໂກ ຊໂນ;

ກຖໍ ໂນ ອສິໂກສຕ຺ຖາ, ຂີຣປາ ຫຎ຺ຎເຕ ປຊາ.

໓໖໖. ເອວໍ ຂຊ຺ຊຕຸ ປຎ຺ຈາໂລ, ຫໂຕ ຍຸທ຺ເຘ ສປຸຕ຺ຕໂກ;

ຍຖາຫມຊ຺ຊ ຂຊ຺ຊາມິ, ຄາມິເກຫິ [ຄາມເກຫິ (ສີ. ປີ.)] ອຣຎ຺ຎໂຊ.

໓໖໗. ນ ສພ຺ພຠູເຕສຸ ວິເຘນ຺ຕິ [ວິຘນ຺ຕິ (ກ.)] ຣກ຺ຂໍ, ຣາຊາໂນ ມຓ຺ຑູກ ມນຸສ຺ສໂລເກ;

ເນຕ຺ຕາວຕາ ຣາຊາ ອຘມ຺ມຈາຣີ, ຍໍ ຕາທິສໍ ຊີວມເທຍ຺ຍຸ ຘງ຺ກາ.

໓໖໘. ອຘມ຺ມຣູໂປ ວຕ ພ຺ຣຫ຺ມຈາຣີ, ອນຸປ຺ປິຍໍ ຠາສສິ ຂຕ຺ຕິຍສ຺ສ;

ວິລຸປ຺ປມານາຍ ປຸຖຸປ຺ປຊາຍ, ປູເຊສິ ຣາຊໍ ປຣມປ຺ປມາທໍ [ຣາຊໍ ປຣມປ຺ປວາທໍ (ສີ.), ຣາຊາ ປຣມປ຺ປວາທິໍ (ສ຺ຍາ.)].

໓໖໙. ສເຈ ອິມໍ ພ຺ຣຫ຺ເມ ສຸຣຊ຺ຊກໍ ສິຍາ, ຜີຕໍ ຣຏ຺ຐໍ ມຸທິຕໍ [ປູຣິຕໍ (ກ.)] ວິປ຺ປສນ຺ນໍ;

ຠຸຕ຺ວາ ພລິໍ ອຄ຺ຄປິຓ຺ຑຎ຺ຈ ກາກາ, ນ ມາທິສໍ ຊີວມເທຍ຺ຍຸ ຘງ຺ກາຕິ.

ຄນ຺ຘຕິນ຺ທຸກຊາຕກໍ ທສມໍ.

ຕສ຺ສຸທ຺ທານໍ –

ກິໍຉນ຺ທ ກຸມ຺ຠ ຊຍທ຺ທິສ ຉທ຺ທນ຺ຕ, ອຖ ປຓ຺ຑິຕສມ຺ຠວ ສິຣກປິ;

ທກຣກ຺ຂສ ປຓ຺ຑຣນາຄວໂຣ, ອຖ ສມ຺ພຸລ ຕິນ຺ທຸກເທວສຸໂຕຕິ.

ຕິໍສນິປາຕໍ ນິຏ຺ຐິຕໍ.