໑໖. ຕິໍສນິປາໂຕ

໕໑໑. ກິໍຉນ຺ທຊາຕກໍ (໑)

໑. ກິໍຉນ຺ໂທ ກິມຘິປ຺ປາໂຍ, ເອໂກ ສມ຺ມສິ ຆມ຺ມນິ;

ກິໍ ປຕ຺ຖຍາໂນ ກິໍ ເອສໍ, ເກນ ອຕ຺ເຖນ ພ຺ຣາຫ຺ມຓ.

໒. ຍຖາ ມຫາ ວາຣິຘໂຣ, ກຸມ຺ໂຠ ສຸປຣິຓາຫວາ [ສຸປຣິຓາມວາ (ກ.)];

ຕຖູປມໍ ອມ຺ພປກ຺ກໍ, ວຓ຺ຓຄນ຺ຘຣສຸຕ຺ຕມໍ.

໓. ຕໍ ວຸຍ຺ຫມານໍ ໂສເຕນ, ທິສ຺ວານາມລມຊ຺ຌິເມ;

ປາຓີຫິ ນໍ ຄເຫຕ຺ວານ, ອຄ຺ຍາຍຕນມາຫຣິໍ.

໔. ຕໂຕ ກທລິປຕ຺ເຕສຸ, ນິກ຺ຂິປິຕ຺ວາ ສຍໍ ອຫໍ;

ສຕ຺ເຖນ ນໍ ວິກປ຺ເປຕ຺ວາ, ຂຸປ຺ປິປາສໍ ອຫາສິ ເມ.

໕. ໂສຫໍ ອເປຕທຣໂຖ, ພ຺ຍນ຺ຕີຠູໂຕ [ພ຺ຍນ຺ຕິຠູໂຕ (ສີ. ປີ. ກ.)] ທຸຂກ຺ຂໂມ;

ອສ຺ສາທໍ ນາຘິຄຈ຺ຉາມິ, ຜເລສ຺ວຎ຺ເຎສຸ ເກສຸຈິ [ເກສຸປິ (ກ. ສີ.)].

໖. ໂສເສຕ຺ວາ ນູນ ມຣຓໍ, ຕໍ ມມໍ ອາວຫິສ຺ສຕິ;

ອມ຺ພໍ ຍສ຺ສ ຜລໍ ສາທຸ, ມຘຸຣຄ຺ຄໍ ມໂນຣມໍ;

ຍມຸທ຺ຘຣິໍ ວຸຍ຺ຫມານໍ, ອຸທຘິສ຺ມາ ມຫຓ຺ຓເວ.

໗. ອກ຺ຂາຕໍ ເຕ ມຍາ ສພ຺ພໍ, ຍສ຺ມາ ອຸປວສາມຫໍ;

ຣມ຺ມໍ ປຕິ ນິສິນ຺ໂນສ຺ມິ, ປຸຖຸໂລມາຍຸຕາ ປຸຖຸ.

໘. ຕ຺ວຎ຺ຈ ໂຂ ເມວ [ເມ (ສີ.), ມມ (?)] ອກ຺ຂາຫິ, ອຕ຺ຕານມປລາຍິນິ;

ກາ ວາ ຕ຺ວມສິ ກລ຺ຍາຓິ, ກິສ຺ສ ວາ ຕ຺ວໍ ສຸມຊ຺ຌິເມ.

໙. ຣຸປ຺ປປຏ຺ຏປລິມຏ຺ຐີວ [ຣຸປ຺ປປຏ຺ຏປ຺ລມຏ຺ຐີວ (ສ຺ຍາ.), ຣູປປຏ຺ຏປມຏ຺ຐີວ (ກ.)], ພ຺ຍຄ຺ຆີວ ຄິຣິສານຸຊາ;

ຍາ ສນ຺ຕິ ນາຣິໂຍ ເທເວສຸ, ເທວານໍ ປຣິຈາຣິກາ.

໑໐. ຍາ ຈ ມນຸສ຺ສໂລກສ຺ມິໍ, ຣູເປນານ຺ວາຄຕິຕ຺ຖິໂຍ;

ຣູເປນ ເຕ ສທິສີ ນຕ຺ຖິ, ເທເວສຸ ຄນ຺ຘພ຺ພມນຸສ຺ສໂລເກ [ເທວຄນ຺ຘພ຺ພມານຸເສ (ສ຺ຍາ.)];

ປຸຏ຺ຐາສິ ເມ ຈາຣຸປຸພ຺ພງ຺ຄິ, ພ຺ຣູຫິ ນາມຎ຺ຈ ພນ຺ຘເວ.

໑໑. ຍໍ ຕ຺ວໍ ປຕິ ນິສິນ຺ໂນສິ, ຣມ຺ມໍ ພ຺ຣາຫ຺ມຓ ໂກສິກິໍ;

ສາຫໍ ຠຸສາລຍາ ວຸຕ຺ຖາ, ວຣວາຣິວໂຫຆສາ.

໑໒. ນານາທຸມຄຓາກິຓ຺ຓາ, ພຫຸກາ ຄິຣິກນ຺ທຣາ;

ມເມວ ປມຸຂາ ໂຫນ຺ຕິ, ອຠິສນ຺ທນ຺ຕິ ປາວຸເສ.

໑໓. ອໂຖ ພຫູ ວນໂຕທາ, ນີລວາຣິວຫິນ຺ຘຣາ;

ພຫຸກາ ນາຄວິຕ຺ໂຕທາ, ອຠິສນ຺ທນ຺ຕິ ວາຣິນາ.

໑໔. ຕາ ອມ຺ພຊມ຺ພຸລພຸຊາ, ນີປາ ຕາລາ ຈຸທຸມ຺ພຣາ [ຕາລມຸທຸມ຺ພຣາ (ສ຺ຍາ. ກ.)];

ພຫູນິ ຜລຊາຕານິ, ອາວຫນ຺ຕິ ອຠິຓ຺ຫໂສ.

໑໕. ຍໍ ກິຎ຺ຈິ ອຸຠໂຕ ຕີເຣ, ຜລໍ ປຕຕິ ອມ຺ພຸນິ;

ອສໍສຍໍ ຕໍ ໂສຕສ຺ສ, ຜລໍ ໂຫຕິ ວສານຸຄໍ.

໑໖. ເອຕທຎ຺ຎາຍ ເມຘາວິ, ປຸຖຸປຎ຺ຎ ສຸໂຓຫິ ເມ;

ມາ ໂຣຈຍ ມຠິສງ຺ຄໍ, ປຏິເສຘ ຊນາຘິປ.

໑໗. ນ ວາຫໍ ວຑ຺ຒວໍ [ວທ຺ຘວໍ (ສີ. ປີ.)] ມຎ຺ເຎ, ຍໍ ຕ຺ວໍ ຣຏ຺ຐາຠິວຑ຺ຒນ;

ອາເຈຍ຺ຍມາໂນ ຣາຊິສິ, ມຣຓໍ ອຠິກງ຺ຂສິ.

໑໘. ຕສ຺ສ ຊານນ຺ຕິ ປິຕໂຣ, ຄນ຺ຘພ຺ພາ ຈ ສເທວກາ;

ເຍ ຈາປິ ອິສໂຍ ໂລເກ, ສຎ຺ຎຕຕ຺ຕາ ຕປສ຺ສິໂນ;

ອສໍສຍໍ ເຕປິ [ເຕ (ສີ. ປີ.)] ຊານນ຺ຕິ, ປຏ຺ຐຠູຕາ [ວທ຺ຘຠູຕາ (ສີ. ປີ.)] ຍສສ຺ສິໂນ.

໑໙. ເອວໍ ວິທິຕ຺ວາ ວິທູ ສພ຺ພຘມ຺ມໍ, ວິທ຺ຘໍສນໍ ຈວນໍ ຊີວິຕສ຺ສ;

ນ ຈີຍຕີ ຕສ຺ສ ນຣສ຺ສ ປາປໍ, ສເຈ ນ ເຈເຕຕິ ວຘາຍ ຕສ຺ສ.

໒໐. ອິສິປູຄສມຎ຺ຎາເຕ, ເອວໍ ໂລກ຺ຍາ ວິທິຕາ ສຕິ [ປຕິ (ກ. ສ຺ຍາ. ກ.)];

ອນຣິຍປຣິສມ຺ຠາເສ, ປາປກມ຺ມໍ ຊິຄີສສິ [ຊິຄິໍສສິ (ສີ. ສ຺ຍາ. ປີ.)].

໒໑. ສເຈ ອຫໍ ມຣິສ຺ສາມິ, ຕີເຣ ເຕ ປຸຖຸສຸສ຺ໂສຓິ;

ອສໍສຍໍ ຕໍ ອສິໂລໂກ, ມຍິ ເປເຕ ອາຄມິສ຺ສຕິ.

໒໒. ຕສ຺ມາ ຫິ ປາປກໍ ກມ຺ມໍ, ຣກ຺ຂສ຺ເສວ [ຣກ຺ຂສ຺ສຸ ຈ (ສ຺ຍາ.)] ສຸມຊ຺ຌິເມ;

ມາ ຕໍ ສພ຺ໂພ ຊໂນ ປຈ຺ຉາ, ປກຸຏ຺ຐາຍິ [ປກຕ຺ຖາສິ (ສີ. ປີ.), ປຕ຺ວກ຺ຂາສິ (ສ຺ຍາ.)] ມຍິ ມເຕ.

໒໓. ອຎ຺ຎາຕເມຕໍ ອວິສຍ຺ຫສາຫິ, ອຕ຺ຕານມມ຺ພຎ຺ຈ ທທາມິ ເຕ ຕໍ;

ໂສ ທຸຈ຺ຈເຊ ກາມຄຸເຓ ປຫາຍ, ສນ຺ຕິຎ຺ຈ ຘມ຺ມຎ຺ຈ ອຘິຏ຺ຐິໂຕສິ.

໒໔. ໂຍ ຫິຕ຺ວາ ປຸພ຺ພສຎ຺ໂຎຄໍ, ປຈ຺ຉາ ສໍໂຍຊເນ ຐິໂຕ;

ອຘມ຺ມຎ຺ເຈວ ຈຣຕິ, ປາປຎ຺ຈສ຺ສ ປວຑ຺ຒຕິ.

໒໕. ເອຫິ ຕໍ ປາປຍິສ຺ສາມິ, ກາມໍ ອປ຺ໂປສ຺ສຸໂກ ຠວ;

ອຸປານຍາມິ ສີຕສ຺ມິໍ, ວິຫຣາຫິ ອນຸສ຺ສຸໂກ.

໒໖. ຕໍ ປຸປ຺ຜຣສມຕ຺ເຕຠິ, ວກ຺ກງ຺ເຄຫິ ອຣິນ຺ທມ;

ໂກຎ຺ຈາ ມຍູຣາ ທິວິຍາ, ໂກລຏ຺ຐິມຘຸສາຬິກາ;

ກູຊິຕາ ຫໍສປູເຄຫິ, ໂກກິເລຕ຺ຖ ປໂພຘເຣ.

໒໗. ອມ຺ເພຕ຺ຖ ວິປ຺ປສາຂຄ຺ຄາ [ວິປ຺ປສູນຄ຺ຄາ (ສີ. ສ຺ຍາ. ປີ.), ວິປ຺ປໂອນຄ຺ຄາ (ກ.)], ປລາລຂລສນ຺ນິຠາ;

ໂກສມ຺ພສຬລາ [ໂກສຸມ຺ຠສລລາ (ສີ. ສ຺ຍາ. ປີ.)] ນີປາ, ປກ຺ກຕາລວິລມ຺ພິໂນ.

໒໘. ມາລີ ຕິຣິຏີ ກາຍູຣີ, ອງ຺ຄທີ ຈນ຺ທນຸສ຺ສໂທ [ຈນ຺ທນສ຺ສໂທ (ສີ.)];

ຣຕ຺ຕິໍ ຕ຺ວໍ ປຣິຈາເຣສິ, ທິວາ ເວເທສິ ເວທນໍ.

໒໙. ໂສຬສິຕ຺ຖິສຫສ຺ສານິ, ຍາ ເຕມາ ປຣິຈາຣິກາ;

ເອວໍ ມຫານຸຠາໂວສິ, ອພ຺ຠຸໂຕ ໂລມຫໍສໂນ.

໓໐. ກິໍ ກມ຺ມມກຣີ ປຸພ຺ເພ, ປາປໍ ອຕ຺ຕທຸຂາວຫໍ;

ຍໍ ກຣິຕ຺ວາ ມນຸສ຺ເສສຸ, ປິຏ຺ຐິມໍສານິ ຂາທສິ.

໓໑. ອຊ຺ເຌນານິ ປຏິຄ຺ຄຍ຺ຫ, ກາເມສຸ ຄຘິໂຕ [ຄຖິໂຕ (ສີ. ປີ.), ຄິທ຺ຘິໂຕ (ສ຺ຍາ. ກ.), ຄິທ຺ຘິໂກ (ກ. ອຏ຺ຐ.)] ອຫໍ;

ອຈຣິໍ ທີຆມທ຺ຘານໍ, ປເຣສໍ ອຫິຕາຍຫໍ.

໓໒. ໂຍ ປິຏ຺ຐິມໍສິໂກ ໂຫຕິ, ເອວໍ ອຸກ຺ກຈ຺ຈ ຂາທຕິ;

ຍຖາຫໍ ອຊ຺ຊ ຂາທາມິ, ປິຏ຺ຐິມໍສານິ ອຕ຺ຕໂນຕິ.

ກິໍຉນ຺ທຊາຕກໍ ປຐມໍ.

໕໑໒. ກຸມ຺ຠຊາຕກໍ (໒)

໓໓. ໂກ ປາຕຸຣາສີ ຕິທິວາ ນຠມ຺ຫິ, ໂອຠາສຍໍ ສໍວຣິໍ ຈນ຺ທິມາວ;

ຄຕ຺ເຕຫິ ເຕ ຣສ຺ມິໂຍ ນິຈ຺ຉຣນ຺ຕິ, ສເຕຣຕາ [ສເຕຣິຕາ (ສີ. ສ຺ຍາ. ກ.)] ວິຊ຺ຊຸຣິວນ຺ຕລິກ຺ເຂ.

໓໔. ໂສ ຉິນ຺ນວາຕໍ ກມສີ ອຆມ຺ຫິ, ເວຫາຍສໍ ຄຈ຺ຉສິ ຕິຏ຺ຐສີ ຈ;

ອິທ຺ຘີ ນຸ ເຕ ວຕ຺ຖຸກຕາ ສຸຠາວິຕາ, ອນທ຺ຘຄູນໍ ອປິ ເທວຕານໍ.

໓໕. ເວຫາຍສໍ ຄມ຺ມມາຄມ຺ມ [ກມມາຄມ຺ມ (ສີ. ສ຺ຍາ.)] ຕິຏ຺ຐສິ, ກຸມ຺ຠໍ ກິຓາຖາຕິ ຍເມຕມຕ຺ຖໍ;

ໂກ ວາ ຕຸວໍ ກິສ຺ສ ວາ ຕາຍ ກຸມ຺ໂຠ, ອກ຺ຂາຫິ ເມ ພ຺ຣາຫ຺ມຓ ເອຕມຕ຺ຖໍ.

໓໖. ນ ສປ຺ປິກຸມ຺ໂຠ ນປິ ເຕລກຸມ຺ໂຠ, ນ ຜາຓິຕສ຺ສ ນ ມຘຸສ຺ສ ກຸມ຺ໂຠ;

ກຸມ຺ຠສ຺ສ ວຊ຺ຊານິ ອນປ຺ປການິ, ໂທເສ ພຫູ ກຸມ຺ຠຄເຕ ສຸຓາຖ.

໓໗. ຄເຬຍ຺ຍ ຍໍ ປິຕ຺ວາ [ປີຕ຺ວາ (ສີ. ປີ.)] ປເຕ ປປາຕໍ, ໂສພ຺ຠໍ ຄຸຫໍ ຈນ຺ທນິໂຍຬິຄລ຺ລໍ;

ພຫຸມ຺ປິ ຠຸຎ຺ເຊຍ຺ຍ ອໂຠຊເນຍ຺ຍໍ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໓໘. ຍໍ ປິຕ຺ວາ [ຍໍ ເວ ປີຕ຺ວາ (ສີ.)] ຈິຕ຺ຕສ຺ມິມເນສມາໂນ, ອາຫິຓ຺ຑຕີ ໂຄຣິວ ຠກ຺ຂສາຣີ [ຠກ຺ຂສາທີ (ສີ. ສ຺ຍາ. ອຏ຺ຐ.)];

ອນາຖມາໂນ ອຸປຄາຍຕິ ນຈ຺ຈຕິ ຈ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໓໙. ຍໍ ເວ ປິວິຕ຺ວາ ອເຈໂລວ ນຄ຺ໂຄ, ຈເຣຍ຺ຍ ຄາເມ ວິສິຂນ຺ຕຣານິ;

ສມ຺ມູຬ຺ຫຈິຕ຺ໂຕ ອຕິເວລສາຍີ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໔໐. ຍໍ ປິຕ຺ວາ ອຸຏ຺ຐາຍ ປເວຘມາໂນ, ສີສຎ຺ຈ ພາຫຸຎ຺ຈ [ພາຫຎ຺ຈ (ປີ.)] ປຈາລຍນ຺ໂຕ;

ໂສ ນຈ຺ຈຕີ ທາຣຸກຏລ຺ລໂກວ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໔໑. ຍໍ ເວ ປິວິຕ຺ວາ ອຄ຺ຄິທຑ຺ຒາ ສຍນ຺ຕິ, ອໂຖ ສິຄາເລຫິປິ ຂາທິຕາເສ;

ພນ຺ຘໍ ວຘໍ ໂຠຄຊານິຎ຺ຈຸເປນ຺ຕິ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໔໒. ຍໍ ປິຕ຺ວາ ຠາເສຍ຺ຍ ອາຠາສເນຍ຺ຍໍ, ສຠາຍມາສີໂນ ອເປຕວຕ຺ໂຖ;

ສມ຺ມກ຺ຂິໂຕ [ສມກ຺ຂິໂຕ (ສີ.)] ວນ຺ຕຄໂຕ ພ຺ຍສນ຺ໂນ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໔໓. ຍໍ ເວ ປິວິຕ຺ວາ ອຸກ຺ກຏ຺ໂຐ ອາວິລກ຺ໂຂ, ມເມວ ສພ຺ພາ ປຖວີຕິ ມຎ຺ເຎ [ມຎ຺ຎຕິ (ສີ.)];

ນ ເມ ສໂມ ຈາຕຸຣນ຺ໂຕປິ ຣາຊາ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໔໔. ມານາຕິມານາ ກລຫານິ ເປສຸຓີ, ທຸພ຺ພຓ຺ຓິນີ ນຄ຺ຄຍິນີ ປລາຍິນີ;

ໂຈຣານ ຘຸຕ຺ຕານ ຄຕີ ນິເກໂຕ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໔໕. ອິທ຺ຘານິ ຜີຕານິ ກຸລານິ ອສ຺ສຸ, ອເນກສາຫສ຺ສຘນານິ ໂລເກ;

ອຸຈ຺ຉິນ຺ນທາຍຊ຺ຊກຕານິມາຍ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໔໖. ຘຎ຺ຎໍ ຘນໍ ຣຊຕໍ ຊາຕຣູປໍ, ເຂຕ຺ຕໍ ຄວໍ ຍຕ຺ຖ ວິນາສຍນ຺ຕິ;

ອຸຈ຺ເຉທນີ ວິຕ຺ຕວຕໍ [ອຸຈ຺ເຉທນີ ວິຕ຺ຕຄຕໍ (ສ຺ຍາ.), ອຸຈ຺ເຉທນິວິຕ຺ຕຄຕໍ (ກ.)] ກຸລານໍ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໔໗. ຍໍ ເວ ປິຕ຺ວາ ທິຕ຺ຕຣູໂປວ [ທຸຏ຺ຐຣູໂປວ (ສີ.)] ໂປໂສ, ອກ຺ໂກສຕິ ມາຕຣໍ ປິຕຣຎ຺ຈ;

ສສ຺ສຸມ຺ປິ ຄຓ຺ເຫຍ຺ຍ ອໂຖປິ ສຸຓ຺ຫໍ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໔໘. ຍໍ ເວ ປິຕ຺ວາ ທິຕ຺ຕຣູປາວ ນາຣີ, ອກ຺ໂກສຕິ ສສຸຣໍ ສາມິກຎ຺ຈ;

ທາສມ຺ປິ ຄຓ຺ເຫ ປຣິຈາຣກມ຺ປິ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໔໙. ຍໍ ເວ ປິວິຕ຺ວານ [ຍຎ຺ເຈ ປີຕ຺ວານ (ປີ.)] ຫເນຍ຺ຍ ໂປໂສ, ຘມ຺ເມ ຐິຕໍ ສມຓໍ ພ຺ຣາຫ຺ມຓໍ ວາ;

ຄຈ຺ເຉ ອປາຍມ຺ປິ ຕໂຕນິທານໍ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໕໐. ຍໍ ເວ ປິວິຕ຺ວາ ທຸຈ຺ຈຣິຕໍ ຈຣນ຺ຕິ, ກາເຍນ ວາຈາຍ ຈ ເຈຕສາ ຈ;

ນິຣຍໍ ວຊນ຺ຕິ ທຸຈ຺ຈຣິຕໍ ຈຣິຕ຺ວາ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໕໑. ຍໍ ຍາຈມານາ ນ ລຠນ຺ຕິ ປຸພ຺ເພ, ພຫຸໍ ຫິຣຎ຺ຎມ຺ປິ ປຣິຈ຺ຈຊນ຺ຕາ;

ໂສ ຕໍ ປິວິຕ຺ວາ ອລິກໍ ຠຓາຕິ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໕໒. ຍໍ ເວ ປິຕ຺ວາ ເປສເນ ເປສິຍນ຺ໂຕ, ອຈ຺ຈາຍິເກ ກຣຓີຍມ຺ຫິ ຊາເຕ;

ອຕ຺ຖມ຺ປິ ໂສ ນປ຺ປຊານາຕິ ວຸຕ຺ໂຕ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໕໓. ຫິຣີມນາປິ ອຫິຣີກຠາວໍ, ປາຕຸໍ ກໂຣນ຺ຕິ ມທນາຍ [ມທິຣາຍ (ປີ.)] ມຕ຺ຕາ;

ຘີຣາປິ ສນ຺ຕາ ພຫຸກໍ ຠຓນ຺ຕິ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໕໔. ຍໍ ເວ ປິຕ຺ວາ ເອກຖູປາ ສຍນ຺ຕິ, ອນາສກາ ຖຓ຺ຑິລທຸກ຺ຂເສຍ຺ຍໍ;

ທຸພ຺ພຓ຺ຓິຍໍ ອາຍສກ຺ຍຎ຺ຈຸເປນ຺ຕິ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໕໕. ຍໍ ເວ ປິຕ຺ວາ ປຕ຺ຕຂນ຺ຘາ ສຍນ຺ຕິ, ຄາໂວ ກຸຏຫຕາວ ນ ຫິ ວາຣຸຓິຍາ;

[ຍໍ ເວ ປິຕ຺ວາ ປຕ຺ຕກ຺ຂນ຺ຘາ, ສຍນ຺ຕິ ຄາໂວ ກູຏຫຕາຣິວ; ນ ຫິ ວາຣຸຓິຍາ ເວໂຄ, ນເຣນ ສຸສ຺ສໂຫຣິວ; (ສີ.)] ເວໂຄ ນເຣນ ສຸສໂຫຣິວ [ຍໍ ເວ ປິຕ຺ວາ ປຕ຺ຕກ຺ຂນ຺ຘາ, ສຍນ຺ຕິ ຄາໂວ ກູຏຫຕາຣິວ; ນ ຫິ ວາຣຸຓິຍາ ເວໂຄ, ນເຣນ ສຸສ຺ສໂຫຣິວ; (ສີ.)], ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໕໖. ຍໍ ມນຸສ຺ສາ ວິວຊ຺ເຊນ຺ຕິ, ສປ຺ປໍ ໂຆຣວິສໍ ມິວ [ວິສມິວ (ສ຺ຍາ.), ວິສໍ ອິວ (ກ.), ວິສາມິວ (?)];

ຕໍ ໂລເກ ວິສສມານໍ, ໂກ ນໂຣ ປາຕຸມຣຫຕິ.

໕໗. ຍໍ ເວ ປິຕ຺ວາ ອນ຺ຘກເວຓ຺ຑປຸຕ຺ຕາ, ສມຸທ຺ທຕີເຣ ປຣິຈາຣຍນ຺ຕາ [ອນ຺ຘກເວຓ຺ຫຸປຸຕ຺ຕາ (ສີ. ປີ.), ອຓ຺ຑກເວຓ຺ຑປຸຕ຺ຕາ (ກ.)];

ອຸປກ຺ກມຸໍ ມຸສເລຫຎ຺ຎມຎ຺ຎໍ, ຕສ຺ສາ ປຸຓ຺ຓໍ ກຸມ຺ຠມິມໍ ກິຓາຖ.

໕໘. ຍໍ ເວ ປິຕ຺ວາ ປຸພ຺ພເທວາ ປມຕ຺ຕາ, ຕິທິວາ ຈຸຕາ ສສ຺ສຕິຍາ ສມາຍ;

ຕໍ ຕາທິສໍ ມຊ຺ຊມິມໍ ນິຣຕ຺ຖກໍ, ຊານໍ ມຫາຣາຊ ກຖໍ ປິເວຍ຺ຍ.

໕໙. ນຍິມສ຺ມິໍ ກຸມ຺ຠສ຺ມິໍ ທຘິ ວາ ມຘຸ ວາ, ເອວໍ ອຠິຎ຺ຎາຍ ກິຓາຫິ ຣາຊ;

ເອວຎ຺ຫິມໍ ກຸມ຺ຠຄຕາ ມຍາ ເຕ, ອກ຺ຂາຕຣູປໍ ຕວ ສພ຺ພມິຕ຺ຕ.

໖໐. ນ ເມ ປິຕາ ວາ ອຖວາປິ ມາຕາ, ເອຕາທິສາ ຍາທິສໂກ ຕຸວໍສິ;

ຫິຕານຸກມ຺ປີ ປຣມຕ຺ຖກາໂມ, ໂສຫໍ ກຣິສ຺ສໍ ວຈນໍ ຕວຊ຺ຊ.

໖໑. ທທາມິ ເຕ ຄາມວຣານິ ປຎ຺ຈ, ທາສີສຕໍ ສຕ຺ຕ ຄວໍ ສຕານິ;

ອາຊຎ຺ຎຍຸຕ຺ເຕ ຈ ຣເຖ ທສ ອິເມ, ອາຈຣິໂຍ ໂຫສິ ມມຕ຺ຖກາໂມ.

໖໒. ຕເວວ ທາສີສຕມຕ຺ຖຸ ຣາຊ, ຄາມາ ຈ ຄາໂວ ຈ ຕເວວ ໂຫນ຺ຕຸ;

ອາຊຎ຺ຎຍຸຕ຺ຕາ ຈ ຣຖາ ຕເວວ, ສກ຺ໂກຫມສ຺ມີ ຕິທສານມິນ຺ໂທ.

໖໓. ມໍໂສທນໍ ສປ຺ປິປາຍາສໍ [ສປ຺ປິປາຍຎ຺ຈ (ສີ.)] ຠຸຎ຺ຊ, ຂາທສ຺ສຸ ຈ ຕ຺ວໍ ມຘຸມາສປູເວ;

ເອວໍ ຕຸວໍ ຘມ຺ມຣໂຕ ຊນິນ຺ທ, ອນິນ຺ທິໂຕ ສຄ຺ຄມຸເປຫິ ຐານນ຺ຕິ.

ກຸມ຺ຠຊາຕກໍ ທຸຕິຍໍ.

໕໑໓. ຊຍທ຺ທິສຊາຕກໍ (໓)

໖໔. ຈິຣສ຺ສໍ ວຕ ເມ ອຸທປາທິ ອຊ຺ຊ, ຠກ຺ໂຂ ມຫາ ສຕ຺ຕມິຠຕ຺ຕກາເລ;

ກຸໂຕສິ ໂກ ວາສິ ຕທິງ຺ຆ ພ຺ຣູຫິ, ອາຈິກ຺ຂ ຊາຕິໍ ວິທິໂຕ ຍຖາສິ.

໖໕. ປຎ຺ຈາລຣາຊາ ມິຄວໍ ປວິຏ຺ໂຐ, ຊຍທ຺ທິໂສ ນາມ ຍທິສ຺ສຸໂຕ ເຕ;

ຈຣາມິ ກຈ຺ຉານິ ວນານິ ຈາຫໍ, ປສທໍ ອິມໍ ຂາທ ມມຊ຺ຊ ມຸຎ຺ຈ.

໖໖. ເສເນວ ຕ຺ວໍ ປຓສິ ສສ຺ສມາໂນ [ສຍ຺ຫມາໂນ (ສ຺ຍາ. ກ.)], ມເມສ ຠກ຺ໂຂ ປສໂທ ຍໍ ວເທສິ;

ຕໍ ຂາທິຍານ ປສທໍ ຊິຆຎ຺ຎໍ [ຊິຆຈ຺ຉໍ (?)], ຂາທິສ຺ສໍ ປຈ຺ຉາ ນ ວິລາປກາໂລ.

໖໗. ນ ຈຕ຺ຖິ ໂມກ຺ໂຂ ມມ ນິກ຺ກເຍນ [ວິກ຺ກເຍນ (ສີ.)], ຄນ຺ຕ຺ວານ ປຈ຺ຈາຄມນາຍ ປຓ຺ເຫ;

ຕໍ ສງ຺ກຣໍ [ສງ຺ຄຣໍ (ສີ. ສ຺ຍາ. ປີ.)] ພ຺ຣາຫ຺ມຓສ຺ສປ຺ປທາຍ, ສຈ຺ຈານຸຣກ຺ຂີ ປຸນຣາວຊິສ຺ສໍ.

໖໘. ກິໍ ກມ຺ມຊາຕໍ ອນຸຕປ຺ປເຕ ຕ຺ວໍ [ອນຸຕປ຺ປຕີ ຕໍ (ສີ. ປີ.)], ປຕ຺ຕໍ ສມີປໍ ມຣຓສ຺ສ ຣາຊ;

ອາຈິກ຺ຂ ເມ ຕໍ ອປິ ສກ຺ກຸເຓມຸ, ອນຸຊານິຕຸໍ ອາຄມນາຍ ປຓ຺ເຫ.

໖໙. ກຕາ ມຍາ ພ຺ຣາຫ຺ມຓສ຺ສ ຘນາສາ, ຕໍ ສງ຺ກຣໍ ປຏິມຸກ຺ກໍ ນ ມຸຕ຺ຕໍ;

ຕໍ ສງ຺ກຣໍ ພ຺ຣາຫ຺ມຓສ຺ສປ຺ປທາຍ, ສຈ຺ຈານຸຣກ຺ຂີ ປຸນຣາວຊິສ຺ສໍ.

໗໐. ຍາ ເຕ ກຕາ ພ຺ຣາຫ຺ມຓສ຺ສ ຘນາສາ, ຕໍ ສງ຺ກຣໍ ປຏິມຸກ຺ກໍ ນ ມຸຕ຺ຕໍ;

ຕໍ ສງ຺ກຣໍ ພ຺ຣາຫ຺ມຓສ຺ສປ຺ປທາຍ, ສຈ຺ຈານຸຣກ຺ຂີ ປຸນຣາວຊສ຺ສຸ.