໕໑໘. ປຓ຺ຑຣນາຄຣາຊຊາຕກໍ (໘)

໒໕໘. ວິກິຓ຺ຓວາຈໍ ອນິຄຸຍ຺ຫ [ອນິຄູຬ຺ຫ (ປີ.)] ມນ຺ຕໍ, ອສຎ຺ຎຕໍ ອປຣິຈກ຺ຂິຕາຣໍ [ອປຣິຣກ຺ຂິຕາຣໍ (ກ.)];

ຠຍໍ ຕມນ຺ເວຕິ ສຍໍ ອໂພຘໍ, ນາຄໍ ຍຖາ ປຓ຺ຑຣກໍ ສຸປຓ຺ໂຓ [ສຸວຓ຺ໂຓ (ກ.)].

໒໕໙. ໂຍ ຄຸຍ຺ຫມນ຺ຕໍ ປຣິຣກ຺ຂເນຍ຺ຍໍ, ໂມຫາ ນໂຣ ສໍສຕິ ຫາສມາໂນ [ຠາສມາໂນ (ປີ.)];

ຕໍ ຠິນ຺ນມນ຺ຕໍ ຠຍມນ຺ເວຕິ ຂິປ຺ປໍ, ນາຄໍ ຍຖາ ປຓ຺ຑຣກໍ ສຸປຓ຺ໂຓ.

໒໖໐. ນານຸມິຕ຺ໂຕ ຄຣຸໍ ອຕ຺ຖໍ, ຄຸຍ຺ຫໍ ເວທິຕຸມຣຫຕິ;

ສຸມິຕ຺ໂຕ ຈ ອສມ຺ພຸທ຺ຘໍ, ສມ຺ພຸທ຺ຘໍ ວາ ອນຕ຺ຖ ວາ.

໒໖໑. ວິສ຺ສາສມາປຊ຺ຊິມຫໍ ອເຈລໍ [ອເຈໂລ (ສີ. ປີ.)], ສມໂຓ ອຍໍ ສມ຺ມໂຕ ຠາວິຕຕ຺ໂຕ;

ຕສ຺ສາຫມກ຺ຂິໍ ວິວຣິໍ [ວິວຣໍ (ສີ.)] ຄຸຍ຺ຫມຕ຺ຖໍ, ອຕີຕມຕ຺ໂຖ ກປຓໍ [ກປໂຓ (ປີ.)] ຣຸທາມິ.

໒໖໒. ຕສ຺ສາຫໍ ປຣມໍ [ປຸຣິມໍ (ສີ.)] ພ຺ຣຫ຺ເມ ຄຸຍ຺ຫໍ, ວາຈຎ຺ຫິ ມໍ ນາສກ຺ຂິໍ [ນາສກ຺ຂິ (ປີ.)] ສໍຍເມຕຸໍ;

ຕປ຺ປກ຺ຂໂຕ ຫິ ຠຍມາຄຕໍ ມມໍ, ອຕີຕມຕ຺ໂຖ ກປຓໍ ຣຸທາມິ.

໒໖໓. ໂຍ ເວ ນໂຣ ສຸຫທໍ ມຎ຺ຎມາໂນ, ຄຸຍ຺ຫມຕ຺ຖໍ ສໍສຕິ ທຸກ຺ກຸລີເນ;

ໂທສາ ຠຍາ ອຖວາ ຣາຄຣຕ຺ຕາ [ຣາຄຣຕ຺ໂຕ (ສີ. ສ຺ຍາ. ປີ.)], ປລ຺ລຕ຺ຖິໂຕ [ປລ຺ລິຕ຺ໂຖ (ປີ.), ປລ຺ລຕ຺ຕິໂຕ (ກ.)] ພາໂລ ອສໍສຍໍ ໂສ.

໒໖໔. ຕິໂຣກ຺ຂວາໂຈ ອສຕໍ ປວິຏ຺ໂຐ, ໂຍ ສງ຺ຄຕີສຸ ມຸທີເຣຕິ ວາກ຺ຍໍ;

ອາສີວິໂສ ທຸມ຺ມຸໂຂຕ຺ຍາຫຸ ຕໍ ນຣໍ, ອາຣາ ອາຣາ [ອາຣາ ອຣາ (ປີ.)] ສໍຍເມ ຕາທິສມ຺ຫາ.

໒໖໕. ອນ຺ນໍ ປານໍ ກາສິກ [ກາສິກໍ (ປີ.)] ຈນ຺ທນຎ຺ຈ, ມນາປິຕ຺ຖິໂຍ ມາລມຸຈ຺ຉາທນຎ຺ຈ;

ໂອຫາຍ ຄຈ຺ຉາມເສ ສພ຺ພກາເມ, ສຸປຓ຺ຓ ປາຓູປຄຕາວ ຕ຺ຍມ຺ຫາ.

໒໖໖. ໂກ ນີຘ ຕິຓ຺ຓໍ ຄຣຫໍ ອຸເປຕິ, ອສ຺ມິໍຘ ໂລເກ ປາຓຠູ ນາຄຣາຊ;

ສມໂຓ ສຸປຓ຺ໂຓ ອຖ ວາ ຕ຺ວເມວ, ກິໍ ກາຣຓາ ປຓ຺ຑຣກຄ຺ຄຫີໂຕ.

໒໖໗. ສມໂຓຕິ ເມ ສມ຺ມຕຕ຺ໂຕ ອໂຫສິ, ປິໂຍ ຈ ເມ ມນສາ ຠາວິຕຕ຺ໂຕ;

ຕສ຺ສາຫມກ຺ຂິໍ ວິວຣິໍ ຄຸຍ຺ຫມຕ຺ຖໍ, ອຕີຕມຕ຺ໂຖ ກປຓໍ ຣຸທາມິ.

໒໖໘. ນ ຈຕ຺ຖິ ສຕ຺ໂຕ ອມໂຣ ປຖພ຺ຍາ, ປຎ຺ຎາວິຘາ ນຕ຺ຖິ ນ ນິນ຺ທິຕພ຺ພາ;

ສຈ຺ເຈນ ຘມ຺ເມນ ຘິຕິຍາ [ຘິຍາ (ສີ. ປີ.)] ທເມນ, ອລພ຺ຠມພ຺ຍາຫຣຕີ ນໂຣ ອິຘ.

໒໖໙. ມາຕາປິຕາ ປຣມາ ພນ຺ຘວານໍ, ນາສ຺ສ ຕຕິໂຍ ອນຸກມ຺ປກຕ຺ຖິ;

ເຕສມ຺ປິ ຄຸຍ຺ຫໍ ປຣມໍ ນ ສໍເສ, ມນ຺ຕສ຺ສ ເຠທໍ ປຣິສງ຺ກມາໂນ.

໒໗໐. ມາຕາປິຕາ ຠຄິນີ ຠາຕໂຣ ຈ, ສຫາຍາ ວາ ຍສ຺ສ ໂຫນ຺ຕິ ສປກ຺ຂາ;

ເຕສມ຺ປິ ຄຸຍ຺ຫໍ ປຣມໍ ນ ສໍເສ, ມນ຺ຕສ຺ສ ເຠທໍ ປຣິສງ຺ກມາໂນ.

໒໗໑. ຠຣິຍາ ເຈ ປຸຣິສໍ ວຊ຺ຊາ, ໂກມາຣີ ປິຍຠາຓິນີ;

ປຸຕ຺ຕຣູປຍສູເປຕາ, ຎາຕິສງ຺ຆປຸຣກ຺ຂຕາ, ຕສ຺ສາປິ ຄຸຍ຺ຫໍ ປຣມໍ ນ ສໍເສ;

ມນ຺ຕສ຺ສ ເຠທໍ ປຣິສງ຺ກມາໂນ.

໒໗໒. ນ ຄຸຍ຺ຫມຕ຺ຖໍ [ຄຸຍ຺ຫຕ຺ຖໍ (ກ.)] ວິວເຣຍ຺ຍ, ຣກ຺ເຂຍ຺ຍ ນໍ ຍຖາ ນິຘິໍ;

ນ ຫິ ປາຕຸກໂຕ ສາຘຸ, ຄຸຍ຺ໂຫ ອຕ຺ໂຖ ປຊານຕາ.

໒໗໓. ຖິຍາ ຄຸຍ຺ຫໍ ນ ສໍເສຍ຺ຍ, ອມິຕ຺ຕສ຺ສ ຈ ປຓ຺ຑິໂຕ;

ໂຍ ຈາມິເສນ ສໍຫີໂຣ, ຫທຍຕ຺ເຖໂນ ຈ ໂຍ ນໂຣ.

໒໗໔. ຄຸຍ຺ຫມຕ຺ຖໍ ອສມ຺ພຸທ຺ຘໍ, ສມ຺ໂພຘຍຕິ ໂຍ ນໂຣ;

ມນ຺ຕເຠທຠຍາ ຕສ຺ສ, ທາສຠູໂຕ ຕິຕິກ຺ຂຕິ.

໒໗໕. ຍາວນ຺ໂຕ ປຸຣິສສ຺ສຕ຺ຖໍ, ຄຸຍ຺ຫໍ ຊານນ຺ຕິ ມນ຺ຕິນໍ;

ຕາວນ຺ໂຕ ຕສ຺ສ ອຸພ຺ເພຄາ, ຕສ຺ມາ ຄຸຍ຺ຫໍ ນ ວິສ຺ສເຊ.

໒໗໖. ວິວິຈ຺ຈ ຠາເສຍ຺ຍ ທິວາ ຣຫສ຺ສໍ, ຣຕ຺ຕິໍ ຄິຣໍ ນາຕິເວລໍ ປມຸຎ຺ເຈ;

ອຸປສ຺ສຸຕິກາ ຫິ ສຸຓນ຺ຕິ ມນ຺ຕໍ, ຕສ຺ມາ ມນ຺ໂຕ ຂິປ຺ປມຸເປຕິ ເຠທໍ.

໒໗໗. ຍຖາປິ ອສ຺ສ [ອໂຍ (ສ຺ຍາ.), ອຍ (ກ.)] ນຄຣໍ ມຫນ຺ຕໍ, ອທ຺ວາຣກໍ [ອາຬາຣກໍ (ປີ.)] ອາຍສໍ ຠທ຺ທສາລໍ;

ສມນ຺ຕຂາຕາປຣິຂາອຸເປຕໍ, ເອວມ຺ປິ ເມ ເຕ ອິຘ ຄຸຍ຺ຫມນ຺ຕາ.

໒໗໘. ເຍ ຄຸຍ຺ຫມນ຺ຕາ ອວິກິຓ຺ຓວາຈາ, ທຬ຺ຫາ ສທຕ຺ເຖສຸ ນຣາ ທຸຊິວ຺ຫ [ທຸຊິວ຺ຫາ (ສ຺ຍາ. ປີ.)];

ອາຣາ ອມິຕ຺ຕາ ພ຺ຍວຊນ຺ຕິ ເຕຫິ, ອາສີວິສາ ວາ ຣິວ ສຕ຺ຕຸສງ຺ຆາ [ສຕ຺ຕສງ຺ຆາ (ສີ. ສ຺ຍາ.)].

໒໗໙. ຫິຕ຺ວາ ຆຣໍ ປພ຺ພຊິໂຕ ອເຈໂລ, ນຄ຺ໂຄ ມຸຓ຺ໂຑ ຈຣຕິ ຆາສເຫຕຸ;

ຕມ຺ຫິ [ຕມ຺ຫີ (ປີ.)] ນຸ ໂຂ ວິວຣິໍ ຄຸຍ຺ຫມຕ຺ຖໍ, ອຕ຺ຖາ ຈ ຘມ຺ມາ ຈ ອປຄ຺ຄຕມ຺ຫາ [ອປາຄຕມ຺ຫາ (ສີ.), ອປຄຕມ຺ຫາ (ສ຺ຍາ.), ອວາຄຕມ຺ຫາ (ປີ.)].

໒໘໐. ກຖໍກໂຣ ໂຫຕິ ສຸປຓ຺ຓຣາຊ, ກິໍສີໂລ ເກນ ວເຕນ ວຕ຺ຕໍ;

ສມໂຓ ຈຣໍ ຫິຕ຺ວາ ມມາຍິຕານິ, ກຖໍກໂຣ ສຄ຺ຄມຸເປຕິ ຐານໍ.

໒໘໑. ຫິຣິຍາ ຕິຕິກ຺ຂາຍ ທເມນຸເປໂຕ [ທເມນ ຂນ຺ຕິຍາ (ສີ. ສ຺ຍາ. ປີ.)], ອກ຺ໂກຘໂນ ເປສຸຓິຍໍ ປຫາຍ;

ສມໂຓ ຈຣໍ ຫິຕ຺ວາ ມມາຍິຕານິ, ເອວໍກໂຣ ສຄ຺ຄມຸເປຕິ ຐານໍ.

໒໘໒. ມາຕາວ ປຸຕ຺ຕໍ ຕຣຸຓໍ ຕນຸຊ຺ຊໍ [ຕນູຊໍ (ສີ.)], ສມ຺ຜສ຺ສຕາ [ສມ຺ປສ຺ສ ຕໍ (ສີ. ປີ.)] ສພ຺ພຄຕ຺ຕໍ ຜເຣຕິ;

ເອວມ຺ປິ ເມ ຕ຺ວໍ ປາຕຸຣຫຸ ທິຊິນ຺ທ, ມາຕາວ ປຸຕ຺ຕໍ ອນຸກມ຺ປມາໂນ.

໒໘໓. ຫນ຺ທຊ຺ຊ ຕ຺ວໍ ມຸຎ຺ຈ [ມຸຈ຺ຈ (ສີ.)] ວຘາ ທຸຊິວ຺ຫ, ຕໂຍ ຫິ ປຸຕ຺ຕາ ນ ຫິ ອຎ຺ໂຎ ອຕ຺ຖິ;

ອນ຺ເຕວາສີ ທິນ຺ນໂກ ອຕ຺ຣໂຊ ຈ, ຣຊ຺ຊສ຺ສຸ [ຣຊສ຺ສຸ (ສີ. ສ຺ຍາ. ປີ.)] ປຸຕ຺ຕຎ຺ຎຕໂຣ ເມ ອໂຫສິ.

໒໘໔. ອິຈ຺ເຈວ ວາກ຺ຍໍ ວິສຊ຺ຊີ ສຸປຓ຺ໂຓ, ຠຸມ຺ຍໍ ປຕິຏ຺ຐາຍ ທິໂຊ ທຸຊິວ຺ຫໍ;

ມຸຕ຺ຕຊ຺ຊ ຕ຺ວໍ ສພ຺ພຠຍາຕິວຕ຺ໂຕ, ຖລູທເກ ໂຫຫິ ມຍາຠິຄຸຕ຺ໂຕ.

໒໘໕. ອາຕງ຺ກິນໍ ຍຖາ ກຸສໂລ ຠິສກ຺ໂກ, ປິປາສິຕານໍ ຣຫໂທວ ສີໂຕ;

ເວສ຺ມໍ ຍຖາ ຫິມສີຕຏ຺ຏິຕານໍ [ຫິມສິສິຣຏ຺ຏິຕານໍ (ປີ.)], ເອວມ຺ປິ ເຕ ສຣຓມຫໍ ຠວາມິ.

໒໘໖. ສນ຺ຘິໍ ກຕ຺ວາ ອມິຕ຺ເຕນ, ອຓ຺ຑເຊນ ຊລາພຸຊ;

ວິວຣິຍ ທາຐໍ ເສສິ, ກຸໂຕ ຕໍ ຠຍມາຄຕໍ.

໒໘໗. ສງ຺ເກເຖວ ອມິຕ຺ຕສ຺ມິໍ, ມິຕ຺ຕສ຺ມິມ຺ປິ ນ ວິສ຺ສເສ;

ອຠຍາ ຠຍມຸປ຺ປນ຺ນໍ, ອປິ ມູລານິ ກນ຺ຕຕິ.

໒໘໘. ກຖໍ ນຸ ວິສ຺ສເສ ຕ຺ຍມ຺ຫິ, ເຍນາສິ ກລໂຫ ກໂຕ;

ນິຈ຺ຈຍຕ຺ເຕນ ຐາຕພ຺ພໍ, ໂສ ທິສພ຺ຠິ [ໂສ ທິສມ຺ຫິ (ປີ.)] ນ ຣຊ຺ຊຕິ.

໒໘໙. ວິສ຺ສາສເຍ ນ ຈ ຕໍ [ນໍ (ສີ. ສ຺ຍາ. ປີ.)] ວິສ຺ສເຍຍ຺ຍ, ອສງ຺ກິໂຕ ສງ຺ກິໂຕ ຈ [ອສງ຺ກິໂຕ ຈ ສງ຺ກິໂຕ (ສີ. ປີ.)] ຠເວຍ຺ຍ;

ຕຖາ ຕຖາ ວິຎ຺ຎູ ປຣກ຺ກເມຍ຺ຍ, ຍຖາ ຍຖາ ຠາວໍ ປໂຣ ນ ຊຎ຺ຎາ.

໒໙໐. ເຕ ເທວວຓ຺ຓາ [ເທວວຓ຺ຓີ (ປີ.)] ສຸຂຸມາລຣູປາ, ອຸໂຠ ສມາ ສຸຊຍາ [ສຸຊໂຍ (ສີ. ສ຺ຍາ. ປີ.)] ປຸຎ຺ຎຂນ຺ຘາ [ປຸຎ຺ຎຄນ຺ຘາ (ປີ.)];

ອຸປາຄມຸໍ ກຣມ຺ປິຍໍ [ກາທມ຺ພິຍໍ (ສີ.), ກາຣມ຺ພິຍໍ (ປີ.)] ອເຈລໍ, ມິສ຺ສີຠູຕາ ອສ຺ສວາຫາວ ນາຄາ.

໒໙໑. ຕໂຕ ຫເວ ປຓ຺ຑຣໂກ ອເຈລໍ, ສຍເມວຸປາຄມ຺ມ ອິທໍ ອໂວຈ;

ມຸຕ຺ຕຊ຺ຊຫໍ ສພ຺ພຠຍາຕິວຕ຺ໂຕ, ນ ຫິ [ຫ (ປີ.)] ນູນ ຕຸຍ຺ຫໍ ມນໂສ ປິຍມ຺ຫາ.

໒໙໒. ປິໂຍ ຫິ ເມ ອາສິ ສຸປຓ຺ຓຣາຊາ, ອສໍສຍໍ ປຓ຺ຑຣເກນ ສຈ຺ຈໍ;

ໂສ ຣາຄຣຕ຺ໂຕວ ອກາສິເມຕໍ, ປາປກມ຺ມໍ [ປາປໍ ກມ຺ມໍ (ສີ. ປີ.)] ສມ຺ປຊາໂນ ນ ໂມຫາ.

໒໙໓. ນ ເມ ປິຍໍ ອປ຺ປິຍໍ ວາປິ ໂຫຕິ, ສມ຺ປສ຺ສໂຕ ໂລກມິມໍ ປຣຎ຺ຈ;

ສຸສຎ຺ຎຕານຎ຺ຫິ ວິຍຎ຺ຊເນນ, ອສຎ຺ຎໂຕ ໂລກມິມໍ ຈຣາສິ.

໒໙໔. ອຣິຍາວກາໂສສິ ອນຣິໂຍວາສິ [ອນຣິໂຍ ຈາສິ (ສີ. ປີ.)], ອສຎ຺ຎໂຕ ສຎ຺ຎຕສນ຺ນິກາໂສ;

ກຓ຺ຫາຠິຊາຕິໂກສິ ອນຣິຍຣູໂປ, ປາປໍ ພຫຸໍ ທຸຈ຺ຈຣິຕໍ ອຈາຣິ.

໒໙໕. ອທຸຏ຺ຐສ຺ສ ຕຸວໍ ທຸພ຺ຠິ, ທຸພ຺ຠີ [ທູຠິ, ທູຠີ (ປີ.)] ຈ ປິສຸໂຓ ຈສິ;

ເອເຕນ ສຈ຺ຈວຊ຺ເຊນ, ມຸທ຺ຘາ ເຕ ຜລຕຸ ສຕ຺ຕຘາ.

໒໙໖. ຕສ຺ມາ ຫິ ມິຕ຺ຕານໍ ນ ທຸພ຺ຠິຕພ຺ພໍ, ມິຕ຺ຕທຸພ຺ຠາ [ມິຕ຺ຕທຸພ຺ຠາ ຫິ (ສ຺ຍາ.)] ປາປິໂຍ ນຕ຺ຖິ ອຎ຺ໂຎ;

ອາສິຕ຺ຕສຕ຺ໂຕ ນິຫໂຕ ປຖພ຺ຍາ, ອິນ຺ທສ຺ສ ວາກ຺ເຍນ ຫິ ສໍວໂຣ ຫໂຕຕິ.

ປຓ຺ຑຣນາຄຣາຊຊາຕກໍ [ປຓ຺ຑຣກຊາຕກໍ (ສີ. ສ຺ຍາ. ປີ.)] ອຏ຺ຐມໍ.