໕໑໗. ທກຣກ຺ຂສຊາຕກໍ (໗)

໒໒໔. ສເຈ ໂວ ວຸຍ຺ຫມານານໍ, ສຕ຺ຕນ຺ນໍ ອຸທກຓ຺ຓເວ;

ມນຸສ຺ສພລິເມສາໂນ, ນາວໍ ຄຓ຺ເຫຍ຺ຍ ຣກ຺ຂໂສ;

ອນຸປຸພ຺ພໍ ກຖໍ ທຕ຺ວາ, ມຸຎ຺ເຈສິ ທກຣກ຺ຂສາ [ທກຣກ຺ຂໂຕ (ປີ.)].

໒໒໕. ມາຕຣໍ ປຐມໍ ທຊ຺ຊໍ, ຠຣິຍໍ ທຕ຺ວານ ຠາຕຣໍ;

ຕໂຕ ສຫາຍໍ ທຕ຺ວານ, ປຎ຺ຈມໍ ທຊ຺ຊໍ [ທຊ຺ຊ (ສ຺ຍາ.)] ພ຺ຣາຫ຺ມຓໍ;

ຉຏ຺ຐາຫໍ ທຊ຺ຊມຕ຺ຕານໍ, ເນວ ທຊ຺ຊໍ ມໂຫສຘໍ.

໒໒໖. ໂປເສຕາ ເຕ ຊເນຕ຺ຕີ ຈ, ທີຆຣຕ຺ຕານຸກມ຺ປິກາ;

ຉພ຺ຠີ ຕຍິ ປທຸສ຺ສຕິ [ປທຸຏ຺ຐສ຺ມິໍ (ສີ. ສ຺ຍາ.)], ປຓ຺ຑິຕາ ອຕ຺ຖທສ຺ສິນີ;

ອຎ຺ຎໍ ອຸປນິສໍ ກຕ຺ວາ, ວຘາ ຕໍ ປຣິໂມຈຍິ.

໒໒໗. ຕໍ ຕາທິສິໍ [ຕາທິສໍ (ກ.)] ປາຓທທິໍ, ໂອຣສໍ ຄພ຺ຠຘາຣິນິໍ [ຄພ຺ຠຘາຣິຓິໍ (ສີ. ສ຺ຍາ.)];

ມາຕຣໍ ເກນ ໂທເສນ, ທຊ຺ຊາສິ ທກຣກ຺ຂິໂນ [ທກຣກ຺ຂໂຕ (ປີ.)].

໒໒໘. ທຫຣາ ວິຍລງ຺ກາຣໍ, ຘາເຣຕິ ອປິຬນ຺ຘນໍ;

ໂທວາຣິເກ ອນີກຏ຺ເຐ, ອຕິເວລໍ ປຊຄ຺ຆຕິ [ສຎ຺ຊຄ຺ຆຕິ (ກ.)].

໒໒໙. ອໂຖປິ ປຏິຣາຊູນໍ, ສຍໍ ທູຕານິ ສາສຕິ;

ມາຕຣໍ ເຕນ ໂທເສນ, ທຊ຺ຊາຫໍ ທກຣກ຺ຂິໂນ.

໒໓໐. ອິຕ຺ຖິຄຸມ຺ພສ຺ສ ປວຣາ, ອຈ຺ຈນ຺ຕໍ ປິຍຠາຓິນີ [ອຈ຺ຈນ຺ຕປິຍວາທິນີ (ສີ. ປີ.)];

ອນຸຄ຺ຄຕາ [ອນຸພ຺ພຕາ (ສ຺ຍາ.), ອນຸປຸພ຺ພຕາ (ກ.)] ສີລວຕີ, ຉາຍາວ ອນປາຍິນີ.

໒໓໑. ອກ຺ໂກຘນາ ປຸຎ຺ຎວຕີ [ປຎ຺ຎວຕີ (ສີ. ປີ.)], ປຓ຺ຑິຕາ ອຕ຺ຖທສ຺ສິນີ;

ອຸພ຺ພຣິໍ [ອຸປ຺ປຣິໍ (ສີ.)] ເກນ ໂທເສນ, ທຊ຺ຊາສິ ທກຣກ຺ຂິໂນ.

໒໓໒. ຂິຑ຺ຑາຣຕິສມາປນ຺ນໍ, ອນຕ຺ຖວສມາຄຕໍ;

ສາ ມໍ ສການ ປຸຕ຺ຕານໍ, ອຍາຈໍ ຍາຈເຕ ຘນໍ.

໒໓໓. ໂສຫໍ ທທາມິ ສາຣຕ຺ໂຕ [ສາຣໂຕ (ສ຺ຍາ.)], ພຫຸໍ ອຸຈ຺ຈາວຈໍ ຘນໍ;

ສຸທຸຈ຺ຈຊໍ ຈຊິຕ຺ວານ, ປຈ຺ຉາ ໂສຈາມິ ທຸມ຺ມໂນ;

ອຸພ຺ພຣິໍ ເຕນ ໂທເສນ, ທຊ຺ຊາຫໍ ທກຣກ຺ຂິໂນ.

໒໓໔. ເຍໂນຈິຕາ ຊນປທາ [ຊານປທາ (ສີ. ສ຺ຍາ. ປີ.)], ອານີຕາ ຈ ປຏິຄ຺ຄຫໍ;

ອາຠຕໍ ປຣຣຊ຺ເຊຠິ, ອຠິຏ຺ຐາຍ ພຫຸໍ ຘນໍ.

໒໓໕. ຘນຸຄ຺ຄຫານໍ ປວຣໍ, ສູຣໍ ຕິຂິຓມນ຺ຕິນໍ;

ຠາຕຣໍ ເກນ ໂທເສນ, ທຊ຺ຊາສິ ທກຣກ຺ຂິໂນ.

໒໓໖. ເຍໂນຈິຕາ [ມໂຍຈິຕາ (ສີ.), ມຍາຈິຕາ (ປີ.)] ຊນປທາ, ອານີຕາ ຈ ປຏິຄ຺ຄຫໍ;

ອາຠຕໍ ປຣຣຊ຺ເຊຠິ, ອຠິຏ຺ຐາຍ ພຫຸໍ ຘນໍ.

໒໓໗. ຘນຸຄ຺ຄຫານໍ ປວໂຣ, ສູໂຣ ຕິຂິຓມນ຺ຕິ ຈ [ຕິຂິຓມນ຺ຕິໂນ (ກ.)];

ມຍາຍໍ [ມຍາ ໂສ (ສີ. ປີ.)] ສຸຂິໂຕ ຣາຊາ, ອຕິມຎ຺ຎຕິ ທາຣໂກ.

໒໓໘. ອຸປຏ຺ຐານມ຺ປິ ເມ ອຍ຺ເຍ, ນ ໂສ ເອຕິ ຍຖາ ປຸເຣ;

ຠາຕຣໍ ເຕນ ໂທເສນ, ທຊ຺ຊາຫໍ ທກຣກ຺ຂິໂນ.

໒໓໙. ເອກຣຕ຺ເຕນ ອຸຠໂຍ, ຕ຺ວຎ຺ເຈວ ຘນຸເສຂ ຈ [ຘນຸເສຂວາ (ສີ. ສ຺ຍາ. ປີ.)];

ອຸໂຠ ຊາເຕຕ຺ຖ ປຎ຺ຈາລາ, ສຫາຍາ ສຸສມາວຍາ.

໒໔໐. ຈຣິຍາ ຕໍ ອນຸພນ຺ຘິຕ຺ໂຖ [ອນຸພນ຺ໂຘ (ກ.)], ເອກທຸກ຺ຂສຸໂຂ ຕວ;

ອຸສ຺ສຸກ຺ໂກ ເຕ ທິວາຣຕ຺ຕິໍ, ສພ຺ພກິຈ຺ເຈສຸ ພ຺ຍາວໂຏ;

ສຫາຍໍ ເກນ ໂທເສນ, ທຊ຺ຊາສິ ທກຣກ຺ຂິໂນ.

໒໔໑. ຈຣິຍາ ມໍ ອຍໍ [ຈຣິຍາຍ ອຍໍ (ສີ. ປີ.)] ອຍ຺ເຍ, ປຊຄ຺ຆິຕ຺ໂຖ [ສຎ຺ຊຄ຺ຆິຕ຺ໂຖ (ສ຺ຍາ.)] ມຍາ ສຫ;

ອຊ຺ຊາປິ ເຕນ ວຓ຺ເຓນ, ອຕິເວລໍ ປຊຄ຺ຆຕິ.

໒໔໒. ອຸພ຺ພຣິຍາປິຫໍ ອຍ຺ເຍ, ມນ຺ຕຍາມິ ຣໂຫຄໂຕ;

ອນາມນ຺ໂຕ [ອນາມນ຺ຕາ (ສີ.)] ປວິສຕິ, ປຸພ຺ເພ ອປ຺ປຏິເວທິໂຕ.

໒໔໓. ລທ຺ຘທ຺ວາໂຣ [ລທ຺ຘວາໂຣ (ສີ. ປີ.)] ກໂຕກາໂສ, ອຫິຣິກໍ ອນາທຣໍ;

ສຫາຍໍ ເຕນ ໂທເສນ, ທຊ຺ຊາຫໍ ທກຣກ຺ຂິໂນ.

໒໔໔. ກຸສໂລ ສພ຺ພນິມິຕ຺ຕານໍ, ຣຸຕຎ຺ຎູ [ຣຸທຎ຺ຎູ (ສີ. ສ຺ຍາ. ປີ.)] ອາຄຕາຄໂມ;

ອຸປ຺ປາເຕ ສຸປິເນ ຍຸຕ຺ໂຕ, ນິຍ຺ຍາເນ ຈ ປເວສເນ.

໒໔໕. ປຏ຺ໂຐ [ປທ຺ໂຘ (ສີ. ປີ.)] ຠູມນ຺ຕລິກ຺ຂສ຺ມິໍ, ນກ຺ຂຕ຺ຕປທໂກວິໂທ;

ພ຺ຣາຫ຺ມຓໍ ເກນ ໂທເສນ, ທຊ຺ຊາສິ ທກຣກ຺ຂິໂນ.

໒໔໖. ປຣິສາຍມ຺ປິ ເມ ອຍ຺ເຍ, ອຸມ຺ມີລິຕ຺ວາ ອຸທິກ຺ຂຕິ;

ຕສ຺ມາ ອຈ຺ຈຠມຸໍ ລຸທ຺ທໍ, ທຊ຺ຊາຫໍ ທກຣກ຺ຂິໂນ.

໒໔໗. ສສມຸທ຺ທປຣິຍາຍໍ, ມຫິໍ ສາຄຣກຸຓ຺ຑລໍ;

ວສຸນ຺ຘຣໍ ອາວສສິ, ອມຈ຺ຈປຣິວາຣິໂຕ.

໒໔໘. ຈາຕຸຣນ຺ໂຕ ມຫາຣຏ຺ໂຐ, ວິຊິຕາວີ ມຫພ຺ພໂລ;

ປຖພ຺ຍາ ເອກຣາຊາສິ, ຍໂສ ເຕ ວິປຸລໍ ຄໂຕ.

໒໔໙. ໂສຬສິຕ຺ຖິສຫສ຺ສານິ, ອາມຸຕ຺ຕມຓິກຸຓ຺ຑລາ;

ນານາຊນປທາ ນາຣີ, ເທວກຎ຺ຎູປມາ ສຸຠາ.

໒໕໐. ເອວໍ ສພ຺ພງ຺ຄສມ຺ປນ຺ນໍ, ສພ຺ພກາມສມິທ຺ຘິນໍ;

ສຸຂິຕານໍ ປິຍໍ ທີຆໍ, ຊີວິຕໍ ອາຫຸ ຂຕ຺ຕິຍ.

໒໕໑. ອຖ ຕ຺ວໍ ເກນ ວຓ຺ເຓນ, ເກນ ວາ ປນ ເຫຕຸນາ;

ປຓ຺ຑິຕໍ ອນຸຣກ຺ຂນ຺ໂຕ, ປາຓໍ ຈຊສິ ທຸຈ຺ຈຊໍ.

໒໕໒. ຍໂຕປິ ອາຄໂຕ ອຍ຺ເຍ, ມມ ຫຕ຺ຖໍ ມໂຫສໂຘ;

ນາຠິຊານາມິ ຘີຣສ຺ສ, ອນຸມຕ຺ຕມ຺ປິ ທຸກ຺ກຏໍ.

໒໕໓. ສເຈ ຈ ກິສ຺ມິຈິ ກາເລ, ມຣຓໍ ເມ ປຸເຣ ສິຍາ;

ໂສ ເມ ປຸຕ຺ເຕ [ປຸຕ຺ເຕ ຈ ເມ (ສີ. ສ຺ຍາ. ປີ.] ປປຸຕ຺ເຕ ຈ, ສຸຂາເປຍ຺ຍ ມໂຫສໂຘ.

໒໕໔. ອນາຄຕໍ ປຈ຺ຈຸປ຺ປນ຺ນໍ, ສພ຺ພມຕ຺ຖມ຺ປິ ປສ຺ສຕິ [ສພ຺ພມຕ຺ຖໍ ວິປສ຺ສຕິ (ສີ. ສ຺ຍາ. ປີ.)];

ອນາປຣາຘກມ຺ມນ຺ຕໍ, ນ ທຊ຺ຊໍ ທກຣກ຺ຂິໂນ.

໒໕໕. ອິທໍ ສຸຓາຖ ປຎ຺ຈາລາ, ຈູຬເນຍ຺ຍສ຺ສ [ຈູຬນີຍສ຺ສ (ສີ.)] ຠາສິຕໍ;

ປຓ຺ຑິຕໍ ອນຸຣກ຺ຂນ຺ໂຕ, ປາຓໍ ຈຊຕິ ທຸຈ຺ຈຊໍ.

໒໕໖. ມາຕຸ ຠຣິຍາຍ ຠາຕຸຈ຺ຈ, ສຂິໂນ ພ຺ຣາຫ຺ມຓສ຺ສ ຈ;

ອຕ຺ຕໂນ ຈາປິ ປຎ຺ຈາໂລ, ຉນ຺ນໍ ຈຊຕິ ຊີວິຕໍ.

໒໕໗. ເອວໍ ມຫຕ຺ຖິກາ [ຂຫິທ຺ຘິຍາ (ສ຺ຍາ.), ມຫິທ຺ຘິກາ (ກ.)] ປຎ຺ຎາ, ນິປຸຓາ ສາຘຸຈິນ຺ຕິນີ;

ທິຏ຺ຐຘມ຺ມຫິຕຕ຺ຖາຍ, ສມ຺ປຣາຍສຸຂາຍ ຈາຕິ.

ທກຣກ຺ຂສຊາຕກໍ ສຕ຺ຕມໍ.