໕໑໖. ມຫາກປິຊາຕກໍ (໖)

໑໗໘. ພາຣາຓສ຺ຍໍ [ພາຣາຓສ຺ສໍ (ສີ. ປີ.)] ອຫູ ຣາຊາ, ກາສີນໍ ຣຏ຺ຐວຑ຺ຒໂນ;

ມິຕ຺ຕາມຈ຺ຈປຣິພ຺ຍູຬ຺ໂຫ, ອຄມາສິ ມິຄາຊິນໍ [ມິຄາຊິຣໍ (ສີ.), ມິຄາຈິຣໍ (ປີ.)].

໑໗໙. ຕຕ຺ຖ ພ຺ຣາຫ຺ມຓມທ຺ທກ຺ຂິ, ເສຕໍ ຈິຕ຺ຣໍ ກິລາສິນໍ;

ວິທ຺ຘສ຺ຕໍ ໂກວິຬາຣໍວ, ກິສໍ ຘມນິສນ຺ຖຕໍ.

໑໘໐. ປຣມກາຣຸຎ຺ຎຕໍ ປຕ຺ຕໍ, ທິສ຺ວາ ກິຈ຺ຉຄຕໍ ນຣໍ;

ອວຈ ພ຺ຍມ຺ຫິໂຕ ຣາຊາ, ‘‘ຍກ຺ຂານໍ ກຕໂມ ນຸສິ.

໑໘໑. ‘‘ຫຕ຺ຖປາທາ ຈ ເຕ ເສຕາ, ຕໂຕ ເສຕຕຣໍ [ເສຕຕໂຣ (ປີ.)] ສິໂຣ;

ຄຕ຺ຕໍ ກມ຺ມາສວຓ຺ຓໍ ເຕ, ກິລາສພຫຸໂລ ຈສິ.

໑໘໒. ‘‘ວຏ຺ຏນາວຬິ [ວຏ຺ຐນາວລິ (ປີ.)] ສງ຺ກາສາ, ປິຏ຺ຐິ ເຕ ນິນ຺ນຕຸນ຺ນຕາ;

ກາຬປພ຺ພາວ [ກາຬປພ຺ພາ ຈ (ສ຺ຍາ.), ກາຬາ ປພ຺ພາ ຈ (ປີ.)] ເຕ ອງ຺ຄາ, ນາຎ຺ຎໍ ປສ຺ສາມິ ເອທິສໍ.

໑໘໓. ‘‘ອຸຄ຺ຆຏ຺ຏປາໂທ ຕສິໂຕ, ກິໂສ ຘມນິສນ຺ຖໂຕ;

ຉາໂຕ ອາຕຕ຺ຕຣູໂປສິ [ອາທິຕ຺ຕຣູໂປສິ (ກ.), ອຕິຕ຺ຕຣູໂປສິ (ສ຺ຍາ. ກ. ອຏ຺ຐ.)], ກຸໂຕສິ ກຕ຺ຖ ຄຈ຺ຉສິ.

໑໘໔. ‘‘ທຸທ຺ທສີ ອປ຺ປກາໂຣສິ, ທຸພ຺ພຓ຺ໂຓ ຠີມທສ຺ສໂນ;

ຊເນຕ຺ຕິ ຍາປິ ເຕ ມາຕາ, ນ ຕໍ ອິຈ຺ເຉຍ຺ຍ ປສ຺ສິຕຸໍ.

໑໘໕. ‘‘ກິໍ ກມ຺ມມກຣໍ [ກມ຺ມມກຣາ (ສີ. ສ຺ຍາ. ປີ.)] ປຸພ຺ເພ, ກໍ ອວຊ຺ຌໍ ອຆາຕຍິ;

ກິພ຺ພິສໍ ຍໍ ກຣິຕ຺ວານ, ອິທໍ ທຸກ຺ຂໍ ອຸປາຄມິ’’.

໑໘໖. ຕຄ຺ຆ ເຕ ອຫມກ຺ຂິສ຺ສໍ, ຍຖາປິ ກຸສໂລ ຕຖາ;

ສຈ຺ຈວາທິຎ຺ຫິ ໂລກສ຺ມິໍ, ປສໍສນ຺ຕີຘ ປຓ຺ຑິຕາ.

໑໘໗. ເອໂກ ຈຣໍ ໂຄຄເວໂສ, ມູຬ຺ໂຫ ອຈ຺ຈສຣິໍ ວເນ;

ອຣຎ຺ເຎ ອິຣີເຓ [ອີຣິເຓ (ສີ. ສ຺ຍາ. ປີ.)] ວິວເນ, ນານາກຸຎ຺ຊຣເສວິເຕ.

໑໘໘. ວາຬມິຄານຸຈຣິເຕ, ວິປ຺ປນຏ຺ໂຐສ຺ມິ ການເນ;

ອຈຣິໍ ຕຕ຺ຖ ສຕ຺ຕາຫໍ, ຂຸປ຺ປິປາສ [ຂຸປ຺ປິປາສາ (ສີ. ປີ.)] ສມປ຺ປິໂຕ.

໑໘໙. ຕຕ຺ຖ ຕິນ຺ທຸກມທ຺ທກ຺ຂິໍ, ວິສມຏ຺ຐໍ ພຸຠຸກ຺ຂິໂຕ;

ປປາຕມຠິລມ຺ພນ຺ຕໍ, ສມ຺ປນ຺ນຜລຘາຣິນໍ.

໑໙໐. ວາຕສ຺ສິຕານິ ຠກ຺ເຂສິໍ, ຕານິ ຣຸຈ຺ຈິໍສຸ ເມ ຠຸສໍ;

ອຕິຕ຺ໂຕ ຣຸກ຺ຂມາຣູຫິໍ [ມາຣຸຍ຺ຫ (ສີ. ສ຺ຍາ.)], ຕຕ຺ຖ ເຫສ຺ສາມິ ອາສິໂຕ.

໑໙໑. ເອກໍ ເມ ຠກ຺ຂິຕໍ ອາສິ, ທຸຕິຍໍ ອຠິປຕ຺ຖິຕໍ;

ຕໂຕ ສາ ຠຎ຺ຊຖ ສາຂາ, ຉິນ຺ນາ ຜຣສຸນາ ວິຍ.

໑໙໒. ໂສຫໍ ສຫາວ ສາຂາຫິ, ອຸທ຺ຘໍປາໂທ ອວໍສິໂຣ;

ອປ຺ປຕິຏ຺ເຐ ອນາລມ຺ເພ, ຄິຣິທຸຄ຺ຄສ຺ມິ ປາປຕໍ.

໑໙໓. ຍສ຺ມາ ຈ ວາຣິ ຄມ຺ຠີຣໍ, ຕສ຺ມາ ນ ສມປຊ຺ຊິສໍ [ສມປຊ຺ຊສິໍ (ສີ.), ສມຠຊ຺ຊິສໍ (ປີ.)];

ຕຕ຺ຖ ເສສິໍ ນິຣານນ຺ໂທ, ອນູນາ [ອນາໂຖ (ສີ.)] ທສ ຣຕ຺ຕິໂຍ.

໑໙໔. ອເຖຕ຺ຖ ກປິ ມາຄຎ຺ຉິ [ມາຄຈ຺ຉິ (ສ຺ຍາ. ກ.)], ໂຄນງ຺ຄຸໂລ ທຣີຈໂຣ;

ສາຂາຫິ ສາຂໍ ວິຈຣນ຺ໂຕ, ຂາທມາໂນ ທຸມປ຺ຜລໍ.

໑໙໕. ໂສ ມໍ ທິສ຺ວາ ກິສໍ ປຓ຺ຑຸໍ, ກາຣຸຎ຺ຎມກຣໍ ມຍິ;

ອມ຺ໂຠ ໂກ ນາມ ໂສ ເອຕ຺ຖ, ເອວໍ ທຸກ຺ເຂນ ອຏ຺ຏິໂຕ.

໑໙໖. ມນຸສ຺ໂສ ອມນຸສ຺ໂສ ວາ, ອຕ຺ຕານໍ ເມ ປເວທຍ;

ຕສ຺ສຎ຺ຊລິໍ ປຓາເມຕ຺ວາ, ອິທໍ ວຈນມພ຺ຣວິໍ.

໑໙໗. ມນຸສ຺ໂສຫໍ ພ຺ຍສມ຺ປຕ຺ໂຕ [ວສມ຺ປຕ຺ໂຕ (ສ຺ຍາ. ກ.)], ສາ ເມ ນຕ຺ຖິ ອິໂຕ ຄຕິ;

ຕໍ ໂວ ວທາມິ ຠທ຺ທໍ ໂວ, ຕ຺ວຎ຺ຈ ເມ ສຣຓໍ ຠວ.

໑໙໘. ຄຣຸໍ [ຄຣຸ (ສີ. ປີ.)] ສິລໍ ຄເຫຕ຺ວານ, ວິຈຣີ [ວິຈຣິ (ປີ.)] ປພ຺ພເຕ ກປິ;

ສິລາຍ ໂຍຄ຺ຄໍ ກຕ຺ວານ, ນິສໂຠ ເອຕທພ຺ຣວິ.

໑໙໙. ເອຫິ ເມ ປິຏ຺ຐິມາຣຸຍ຺ຫ, ຄີວໍ ຄຓ຺ຫາຫິ ພາຫຸຠິ;

ອຫໍ ຕໍ ອຸທ຺ຘຣິສ຺ສາມິ, ຄິຣິທຸຄ຺ຄຕ ເວຄສາ.

໒໐໐. ຕສ຺ສ ຕໍ ວຈນໍ ສຸຕ຺ວາ, ວານຣິນ຺ທສ຺ສ ສິຣີມໂຕ;

ປິຏ຺ຐິມາຣຸຍ຺ຫ ຘີຣສ຺ສ, ຄີວໍ ພາຫາຫິ ອຄ຺ຄຫິໍ.

໒໐໑. ໂສ ມໍ ຕໂຕ ສມຸຏ຺ຐາສິ, ເຕຊສ຺ສີ [ເຕຊສີ (ສ຺ຍາ. ປີ. ກ.)] ພລວາ ກປິ;

ວິຫຎ຺ຎມາໂນ ກິຈ຺ເຉນ, ຄິຣິທຸຄ຺ຄຕ ເວຄສາ.

໒໐໒. ອຸທ຺ຘຣິຕ຺ວານ ມໍ ສນ຺ໂຕ, ນິສໂຠ ເອຕທພ຺ຣວິ;

ອິງ຺ຆ ມໍ ສມ຺ມ ຣກ຺ຂສ຺ສຸ, ປສ຺ສຸປິສ຺ສໍ ມຸຫຸຕ຺ຕກໍ.

໒໐໓. ສີຫາ ພ຺ຍຄ຺ຆາ ຈ ທີປີ ຈ, ອຈ຺ຉໂກກຕຣຈ຺ຉໂຍ;

ເຕ ມໍ ປມຕ຺ຕໍ ຫິໍເສຍ຺ຍຸໍ, ເຕ ຕ຺ວໍ ທິສ຺ວາ ນິວາຣຍ [ທິສ຺ວານ ວາຣຍ (ປີ.)].

໒໐໔. ເອວໍ ເມ ປຣິຕ຺ຕາຕູນ [ປຣິຕ຺ຕາຕຸນ (ກ.)], ປສ຺ສຸປິ ໂສ ມຸຫຸຕ຺ຕກໍ;

ຕທາຫໍ ປາປິກໍ ທິຏ຺ຐິໍ, ປຏິລຈ຺ຉິໍ ອໂຍນິໂສ.

໒໐໕. ຠກ຺ໂຂ ອຍໍ ມນຸສ຺ສານໍ, ຍຖາ ຈຎ຺ເຎ ວເນ ມິຄາ;

ຍໍ ນູນິມໍ ວຘິຕ຺ວານ, ຉາໂຕ ຂາເທຍ຺ຍ ວານຣໍ.

໒໐໖. ອສິໂຕ [ອາສິໂກ (ປີ.)] ຈ ຄມິສ຺ສາມິ, ມໍສມາທາຍ ສມ຺ພລໍ;

ກນ຺ຕາຣໍ ນິຕ຺ຖຣິສ຺ສາມິ, ປາເຖຍ຺ຍໍ ເມ ຠວິສ຺ສຕິ.

໒໐໗. ຕໂຕ ສິລໍ ຄເຫຕ຺ວານ, ມຕ຺ຖກໍ ສນ຺ນິຕາຬຍິໍ;

ມມ ຄຕ຺ຕ [ຠຕ຺ຕ (ສີ. ສ຺ຍາ.), ຫຕ຺ຖ (ປີ.)] ກິລນ຺ຕສ຺ສ, ປຫາໂຣ ທຸພ຺ພໂລ ອຫຸ.

໒໐໘. ໂສ ຈ ເວເຄນຸທປ຺ປຕ຺ໂຕ, ກປິ ຣຸຫິຣ [ຣຸຘິຣ (ສີ.)] ມກ຺ຂິໂຕ;

ອສ຺ສຸປຸຓ຺ເຓຫິ ເນຕ຺ເຕຫິ, ໂຣທນ຺ໂຕ ມໍ ອຸທິກ຺ຂຕິ.

໒໐໙. ມາຍ຺ໂຍມໍ ກຣິ ຠທ຺ທນ຺ເຕ, ຕ຺ວຎ຺ຈ ນາເມທິສໍ ກຣິ;

ຕ຺ວຎ຺ຈ ໂຂ ນາມ ທີຆາວຸ [ທີຆາຍຸ (ປີ.)], ອຎ຺ເຎ [ອຎ຺ຎໍ (ປີ.)] ວາເຣຕຸມຣຫສິ.

໒໑໐. ອໂຫ ວຕ ເຣ ປຸຣິສ, ຕາວ ທຸກ຺ກຣກາຣກ;

ເອທິສາ ວິສມາ ທຸຄ຺ຄາ, ປປາຕາ ອຸທ຺ຘໂຕ [ອຸທ຺ຘໂຏ (ປີ.)] ມຍາ.

໒໑໑. ອານີໂຕ ປຣໂລກາວ, ທຸພ຺ເຠຍ຺ຍໍ ມໍ ອມຎ຺ຎຖ;

ຕໍ ເຕນ ປາປຘມ຺ເມນ, ປາປໍ ປາເປນ ຈິນ຺ຕິຕໍ.

໒໑໒. ມາ ເຫວ ຕ຺ວໍ ອຘມ຺ມຏ຺ຐ, ເວທນໍ ກຏຸກໍ ຜຸສິ;

ມາ ເຫວ ປາປກມ຺ມໍ ຕໍ, ຜລໍ ເວຬຸໍວ ຕໍ ວຘິ.

໒໑໓. ຕຍິເມ ນຕ຺ຖິ ວິສ຺ສາໂສ, ປາປຘມ຺ມ ອສຎ຺ຎຕ [ປາປຘມ຺ມໍ ອມຎ຺ຎຖ (ປີ.)];

ເອຫິ ເມ ປິຏ຺ຐິໂຕ ຄຈ຺ຉ, ທິສ຺ສມາໂນວ ສນ຺ຕິເກ.

໒໑໔. ມຸຕ຺ໂຕສິ ຫຕ຺ຖາ ວາຬານໍ, ປຕ຺ໂຕສິ ມານຸສິໍ ປທໍ;

ເອສ ມຄ຺ໂຄ ອຘມ຺ມຏ຺ຐ, ເຕນ ຄຈ຺ຉ ຍຖາສຸຂໍ.

໒໑໕. ອິທໍ ວຕ຺ວາ ຄິຣິຈໂຣ, ຣຫເທ [ຣຸຫິຣໍ (ສ຺ຍາ. ກ.)] ປກ຺ຂລ຺ຍ ມຕ຺ຖກໍ;

ອສ຺ສູນິ ສມ຺ປມຊ຺ຊິຕ຺ວາ, ຕໂຕ ປພ຺ພຕມາຣຸຫິ.

໒໑໖. ໂສຫໍ ເຕນາຠິສຕ຺ໂຕສ຺ມິ, ປຣິຬາເຫນ ອຏ຺ຏິໂຕ;

ຑຍ຺ຫມາເນນ ຄຕ຺ເຕນ, ວາຣິໍ ປາຕຸໍ ອຸປາຄມິໍ.

໒໑໗. ອຄ຺ຄິນາ ວິຍ ສນ຺ຕຕ຺ໂຕ, ຣຫໂທ ຣຸຫິຣມກ຺ຂິໂຕ;

ປຸພ຺ພໂລຫິຕສງ຺ກາໂສ, ສພ຺ໂພ ເມ ສມປຊ຺ຊຖ.

໒໑໘. ຍາວນ຺ໂຕ ອຸທພິນ຺ທູນິ, ກາຍສ຺ມິໍ ນິປຕິໍສຸ ເມ;

ຕາວນ຺ໂຕ ຄຓ຺ຑ [ຄຓ຺ຑູ (ສີ. ປີ.), ຄຓ຺ຑຸ (ສ຺ຍາ.)] ຊາເຍຖ, ອທ຺ຘເພລຸວສາທິສາ.

໒໑໙. ປຠິນ຺ນາ ປຄ຺ຆຣິໍສຸ ເມ, ກຸຓປາ ປຸພ຺ພໂລຫິຕາ;

ເຍນ ເຍເນວ ຄຈ຺ຉາມິ, ຄາເມສຸ ນິຄເມສຸ ຈ.

໒໒໐. ທຓ຺ຑຫຕ຺ຖາ ນິວາເຣນ຺ຕິ, ອິຕ຺ຖິໂຍ ປຸຣິສາ ຈ ມໍ;

ໂອກ຺ກິຕາ [ໂອກິຓ຺ຓາ (ສີ.)] ປູຕິຄນ຺ເຘນ, ມາສ຺ສຸ ໂອເຣນ ອາຄມາ [ມາຄມາ (ສີ. ປີ.)].

໒໒໑. ເອຕາທິສໍ ອິທໍ ທຸກ຺ຂໍ, ສຕ຺ຕ ວສ຺ສານິ ທານິ ເມ;

ອນຸໂຠມິ ສກໍ ກມ຺ມໍ, ປຸພ຺ເພ ທຸກ຺ກຏມຕ຺ຕໂນ.

໒໒໒. ຕໍ ໂວ ວທາມິ ຠທ຺ທນ຺ເຕ [ຠທ຺ທໍ ໂວ (ສີ. ປີ.)], ຍາວນ຺ເຕຕ຺ຖ ສມາຄຕາ;

ມາສ຺ສຸ ມິຕ຺ຕານ [ມິຕ຺ຕານໍ (ສີ. ປີ.)] ທຸພ຺ຠິຕ຺ໂຖ, ມິຕ຺ຕທຸພ຺ໂຠ ຫິ ປາປໂກ.

໒໒໓. ກຸຏ຺ຐີ ກິລາສີ ຠວຕິ, ໂຍ ມິຕ຺ຕານິຘ ທຸພ຺ຠຕິ [ໂຍ ມິຕ຺ຕານໍ ອິຘທ຺ທຸຠິ (ສີ. ອຏ຺ຐ.), ໂຍ ມິຕ຺ຕານໍ ອິຘ ທຸພ຺ຠຕິ (ປີ.)];

ກາຍສ຺ສ ເຠທາ ມິຕ຺ຕທ຺ທຸ [ມິຕ຺ຕທຸພ຺ຠີ (ສ຺ຍາ. ກ.)], ນິຣຍໍ ໂສປປຊ຺ຊຕີຕິ [ໂສ ອຸປປຊ຺ຊຕີຕິ (ສີ. ສ຺ຍາ. ປີ.)].

ມຫາກປິຊາຕກໍ ຉຏ຺ຐໍ.