໕໑໕. ສມ຺ຠວຊາຕກໍ (໕)

໑໓໘. ຣຊ຺ຊຎ຺ຈ ປຏິປນ຺ນາສ຺ມ, ອາຘິປຈ຺ຈໍ ສຸຈີຣຕ;

ມຫຕ຺ຕໍ ປຕ຺ຕຸມິຈ຺ຉາມິ, ວິເຊຕຸໍ ປຖວິໍ ອິມໍ.

໑໓໙. ຘມ຺ເມນ ໂນ ອຘມ຺ເມນ, ອຘມ຺ໂມ ເມ ນ ຣຸຈ຺ຈຕິ;

ກິຈ຺ໂຈວ ຘມ຺ໂມ ຈຣິໂຕ, ຣຎ຺ໂຎ ໂຫຕິ ສຸຈີຣຕ.

໑໔໐. ອິຘ ເຈວານິນ຺ທິຕາ ເຍນ, ເປຈ຺ຈ ເຍນ ອນິນ຺ທິຕາ;

ຍສໍ ເທວມນຸສ຺ເສສຸ, ເຍນ ປປ຺ໂປມຸ [ປປ຺ເປມຸ (ສີ. ອຏ຺ຐ.)] ພ຺ຣາຫ຺ມຓ.

໑໔໑. ໂຍຫໍ ອຕ຺ຖຎ຺ຈ ຘມ຺ມຎ຺ຈ, ກຕ຺ຕຸມິຈ຺ຉາມິ ພ຺ຣາຫ຺ມຓ;

ຕໍ ຕ຺ວໍ ອຕ຺ຖຎ຺ຈ ຘມ຺ມຎ຺ຈ, ພ຺ຣາຫ຺ມຓກ຺ຂາຫິ ປຸຈ຺ຉິໂຕ.

໑໔໒. ນາຎ຺ຎຕ຺ຣ ວິຘຸຣາ ຣາຊ, ເອຕທກ຺ຂາຕຸມຣຫຕິ;

ຍໍ ຕ຺ວໍ ອຕ຺ຖຎ຺ຈ ຘມ຺ມຎ຺ຈ, ກຕ຺ຕຸມິຈ຺ຉສິ ຂຕ຺ຕິຍ.

໑໔໓. ເອຫິ ໂຂ ປຫິໂຕ ຄຈ຺ຉ, ວິຘຸຣສ຺ສ ອຸປນ຺ຕິກໍ;

ນິກ຺ຂຎ຺ຈິມໍ [ນິກ຺ຂໍ ຣຕ຺ຕ (ສີ.), ນິກ຺ຂມິມໍ (ປີ.)] ສຸວຓ຺ຓສ຺ສ, ຫຣໍ ຄຈ຺ຉ ສຸຈີຣຕ;

ອຠິຫາຣໍ ອິມໍ ທຊ຺ຊາ, ອຕ຺ຖຘມ຺ມານຸສິຏ຺ຐິຍາ.

໑໔໔. ສ຺ວາຘິປ຺ປາຄາ ຠາຣທ຺ວາໂຊ, ວິຘຸຣສ຺ສ ອຸປນ຺ຕິກໍ;

ຕມທ຺ທສ ມຫາພ຺ຣຫ຺ມາ, ອສມານໍ ສເກ ຆເຣ.

໑໔໕. ຣຎ຺ໂຎຫໍ ປຫິໂຕ ທູໂຕ, ໂກຣພ຺ຍສ຺ສ ຍສສ຺ສິໂນ;

‘‘ອຕ຺ຖໍ ຘມ຺ມຎ຺ຈ ປຸຈ຺ເຉສິ’’, ອິຈ຺ຈພ຺ຣວິ ຍຸຘິຏ຺ຐິໂລ;

ຕໍ ຕ຺ວໍ ອຕ຺ຖຎ຺ຈ ຘມ຺ມຎ຺ຈ, ວິຘຸຣກ຺ຂາຫິ ປຸຈ຺ຉິໂຕ.

໑໔໖. ຄງ຺ຄໍ ເມ ປິທຫິສ຺ສນ຺ຕິ, ນ ຕໍ ສກ຺ໂກມິ ພ຺ຣາຫ຺ມຓ;

ອປິເຘຕຸໍ ມຫາສິນ຺ຘຸໍ, ຕໍ ກຖໍ ໂສ ຠວິສ຺ສຕິ.

໑໔໗. ນ ເຕ ສກ຺ໂກມິ ອກ຺ຂາຕຸໍ, ອຕ຺ຖໍ ຘມ຺ມຎ຺ຈ ປຸຈ຺ຉິໂຕ;

ຠທ຺ຣກາໂຣ ຈ ເມ ປຸຕ຺ໂຕ, ໂອຣໂສ ມມ ອຕ຺ຣໂຊ;

ຕໍ ຕ຺ວໍ ອຕ຺ຖຎ຺ຈ ຘມ຺ມຎ຺ຈ, ຄນ຺ຕ຺ວາ ປຸຈ຺ຉສ຺ສຸ ພ຺ຣາຫ຺ມຓ.

໑໔໘. ສ຺ວາຘິປ຺ປາຄາ ຠາຣທ຺ວາໂຊ, ຠທ຺ຣກາຣສ຺ສຸປນ຺ຕິກໍ [ຠທ຺ຣກາຣສ຺ສ ສນ຺ຕິກໍ (ສີ. ສ຺ຍາ.)];

ຕມທ຺ທສ ມຫາພ຺ຣຫ຺ມາ, ນິສິນ຺ນໍ ສມ຺ຫິ ເວສ຺ມນິ.

໑໔໙. ຣຎ຺ໂຎຫໍ ປຫິໂຕ ທູໂຕ, ໂກຣພ຺ຍສ຺ສ ຍສສ຺ສິໂນ;

‘‘ອຕ຺ຖໍ ຘມ຺ມຎ຺ຈ ປຸຈ຺ເຉສິ’’, ອິຈ຺ຈພ຺ຣວິ ຍຸຘິຏ຺ຐິໂລ;

ຕໍ ຕ຺ວໍ ອຕ຺ຖຎ຺ຈ ຘມ຺ມຎ຺ຈ, ຠທ຺ຣກາຣ ປພ຺ຣູຫິ [ພ຺ຣວີຫິ (ສີ. ປີ.)] ເມ.

໑໕໐. ມໍສກາຊໍ [ມໍສກາຈໍ (ປີ.)] ອວຫາຍ, ໂຄຘໍ ອນຸປຕາມຫໍ;

ນ ເຕ ສກ຺ໂກມິ ອກ຺ຂາຕຸໍ, ອຕ຺ຖໍ ຘມ຺ມຎ຺ຈ ປຸຈ຺ຉິໂຕ.

໑໕໑. ສຎ຺ຈໂຍ [ສຎ຺ຊໂຍ (ສີ. ສ຺ຍາ. ປີ.)] ນາມ ເມ ຠາຕາ, ກນິຏ຺ໂຐ ເມ ສຸຈີຣຕ;

ຕໍ ຕ຺ວໍ ອຕ຺ຖຎ຺ຈ ຘມ຺ມຎ຺ຈ, ຄນ຺ຕ຺ວາ ປຸຈ຺ຉສ຺ສຸ ພ຺ຣາຫ຺ມຓ.

໑໕໒. ສ຺ວາຘິປ຺ປາຄາ ຠາຣທ຺ວາໂຊ, ສຎ຺ຈຍສ຺ສ ອຸປນ຺ຕິກໍ;

ຕມທ຺ທສ ມຫາພ຺ຣຫ຺ມາ, ນິສິນ຺ນໍ ສມ຺ຫິ ເວສ຺ມນິ [ປຣິສຕິ (ສ຺ຍາ.), ປຣີສຕິ (ປີ.)].

໑໕໓. ຣຎ຺ໂຎຫໍ ປຫິໂຕ ທູໂຕ, ໂກຣພ຺ຍສ຺ສ ຍສສ຺ສິໂນ;

‘‘ອຕ຺ຖໍ ຘມ຺ມຎ຺ຈ ປຸຈ຺ເຉສິ’’, ອິຈ຺ຈພ຺ຣວິ ຍຸຘິຏ຺ຐິໂລ;

ຕໍ ຕ຺ວໍ ອຕ຺ຖຎ຺ຈ ຘມ຺ມຎ຺ຈ, ສຎ຺ຈຍກ຺ຂາຫິ ປຸຈ຺ຉິໂຕ.

໑໕໔. ສທາ ມໍ ຄິລເຕ [ຄິລຕີ (ສີ.), ຄິລຕິ (ປີ.)] ມຈ຺ຈຸ, ສາຍໍ ປາໂຕ ສຸຈີຣຕ;

ນ ເຕ ສກ຺ໂກມິ ອກ຺ຂາຕຸໍ, ອຕ຺ຖໍ ຘມ຺ມຎ຺ຈ ປຸຈ຺ຉິໂຕ.

໑໕໕. ສມ຺ຠໂວ ນາມ ເມ ຠາຕາ, ກນິຏ຺ໂຐ ເມ ສຸຈີຣຕ;

ຕໍ ຕ຺ວໍ ອຕ຺ຖຎ຺ຈ ຘມ຺ມຎ຺ຈ, ຄນ຺ຕ຺ວາ ປຸຈ຺ຉສ຺ສຸ ພ຺ຣາຫ຺ມຓ.

໑໕໖. ອພ຺ຠຸໂຕ ວຕ ໂຠ ຘມ຺ໂມ, ນາຍໍ ອສ຺ມາກ ຣຸຈ຺ຈຕິ;

ຕໂຍ ຊນາ ປິຕາປຸຕ຺ຕາ, ເຕສຸ ປຎ຺ຎາຍ ໂນ ວິທູ.

໑໕໗. ນ ຕໍ ສກ຺ໂກຖ ອກ຺ຂາຕຸໍ, ອຕ຺ຖໍ ຘມ຺ມຎ຺ຈ ປຸຈ຺ຉິຕາ;

ກຖໍ ນຸ ທຫໂຣ ຊຎ຺ຎາ, ອຕ຺ຖໍ ຘມ຺ມຎ຺ຈ ປຸຈ຺ຉິໂຕ.

໑໕໘. ມາ ນໍ ທຫໂຣຕິ ອຸຎ຺ຎາສິ [ມຎ຺ຎາສິ (ສ຺ຍາ. ກ.)], ອປຸຈ຺ຉິຕ຺ວານ ສມ຺ຠວໍ;

ປຸຈ຺ຉິຕ຺ວາ ສມ຺ຠວໍ ຊຎ຺ຎາ, ອຕ຺ຖໍ ຘມ຺ມຎ຺ຈ ພ຺ຣາຫ຺ມຓ.

໑໕໙. ຍຖາປິ ຈນ຺ໂທ ວິມໂລ, ຄຈ຺ຉໍ ອາກາສຘາຕຸຍາ;

ສພ຺ເພ ຕາຣາຄເຓ ໂລເກ, ອາຠາຍ ອຕິໂຣຈຕິ.

໑໖໐. ເອວມ຺ປິ ທຫຣູເປໂຕ, ປຎ຺ຎາໂຍເຄນ ສມ຺ຠໂວ;

ມາ ນໍ ທຫໂຣຕິ ອຸຎ຺ຎາສິ, ອປຸຈ຺ຉິຕ຺ວານ ສມ຺ຠວໍ;

ປຸຈ຺ຉິຕ຺ວາ ສມ຺ຠວໍ ຊຎ຺ຎາ, ອຕ຺ຖໍ ຘມ຺ມຎ຺ຈ ພ຺ຣາຫ຺ມຓ.

໑໖໑. ຍຖາປິ ຣມ຺ມໂກ ມາໂສ, ຄິມ຺ຫານໍ ໂຫຕິ ພ຺ຣາຫ຺ມຓ;

ອເຕວຎ຺ເຎຫິ ມາເສຫິ, ທຸມປຸປ຺ເຜຫິ ໂສຠຕິ.

໑໖໒. ເອວມ຺ປິ ທຫຣູເປໂຕ, ປຎ຺ຎາໂຍເຄນ ສມ຺ຠໂວ;

ມາ ນໍ ທຫໂຣຕິ ອຸຎ຺ຎາສິ, ອປຸຈ຺ຉິຕ຺ວານ ສມ຺ຠວໍ;

ປຸຈ຺ຉິຕ຺ວາ ສມ຺ຠວໍ ຊຎ຺ຎາ, ອຕ຺ຖໍ ຘມ຺ມຎ຺ຈ ພ຺ຣາຫ຺ມຓ.

໑໖໓. ຍຖາປິ ຫິມວາ ພ຺ຣຫ຺ເມ, ປພ຺ພໂຕ ຄນ຺ຘມາທໂນ;

ນານາຣຸກ຺ເຂຫິ ສຎ຺ຉນ຺ໂນ, ມຫາຠູຕຄຓາລໂຍ;

ໂອສເຘຫິ ຈ ທິພ຺ເພຫິ, ທິສາ ຠາຕິ ປວາຕິ ຈ.

໑໖໔. ເອວມ຺ປິ ທຫຣູເປໂຕ, ປຎ຺ຎາໂຍເຄນ ສມ຺ຠໂວ;

ມາ ນໍ ທຫໂຣຕິ ອຸຎ຺ຎາສິ, ອປຸຈ຺ຉິຕ຺ວານ ສມ຺ຠວໍ;

ປຸຈ຺ຉິຕ຺ວາ ສມ຺ຠວໍ ຊຎ຺ຎາ, ອຕ຺ຖໍ ຘມ຺ມຎ຺ຈ ພ຺ຣາຫ຺ມຓ.

໑໖໕. ຍຖາປິ ປາວໂກ ພ຺ຣຫ຺ເມ, ອຈ຺ຈິມາລີ ຍສສ຺ສິມາ;

ຊລມາໂນ ວເນ ຄຈ຺ເຉ [ຈຣໍ ກຈ຺ເຉ (ປີ.)], ອນໂລ ກຓ຺ຫວຕ຺ຕນີ.

໑໖໖. ຆຕາສໂນ ຘູມເກຕຸ, ອຸຕ຺ຕມາເຫວນນ຺ທໂຫ;

ນິສີເຖ [ນິສ຺ສີເວ (ສ຺ຍາ.), ນິສິເວ (ກ.)] ປພ຺ພຕຄ຺ຄສ຺ມິໍ, ປຫູເຕໂຘ [ພຫຸເຕໂຊ (ສ຺ຍາ. ກ.)] ວິໂຣຈຕິ.

໑໖໗. ເອວມ຺ປິ ທຫຣູເປໂຕ, ປຎ຺ຎາໂຍເຄນ ສມ຺ຠໂວ;

ມາ ນໍ ທຫໂຣຕິ ອຸຎ຺ຎາສິ, ອປຸຈ຺ຉິຕ຺ວານ ສມ຺ຠວໍ;

ປຸຈ຺ຉິຕ຺ວາ ສມ຺ຠວໍ ຊຎ຺ຎາ, ອຕ຺ຖໍ ຘມ຺ມຎ຺ຈ ພ຺ຣາຫ຺ມຓ.

໑໖໘. ຊເວນ ຠທ຺ຣໍ ຊານນ຺ຕິ, ພລິພທ຺ທຎ຺ຈ [ພລິວທ຺ທຎ຺ຈ (ສີ. ປີ.)] ວາຫິເຍ;

ໂທເຫນ ເຘນຸໍ ຊານນ຺ຕິ, ຠາສມານຎ຺ຈ ປຓ຺ຑິຕໍ.

໑໖໙. ເອວມ຺ປິ ທຫຣູເປໂຕ, ປຎ຺ຎາໂຍເຄນ ສມ຺ຠໂວ;

ມາ ນໍ ທຫໂຣຕິ ອຸຎ຺ຎາສິ, ອປຸຈ຺ຉິຕ຺ວານ ສມ຺ຠວໍ;

ປຸຈ຺ຉິຕ຺ວາ ສມ຺ຠວໍ ຊຎ຺ຎາ, ອຕ຺ຖໍ ຘມ຺ມຎ຺ຈ ພ຺ຣາຫ຺ມຓ.

໑໗໐. ສ຺ວາຘິປ຺ປາຄາ ຠາຣທ຺ວາໂຊ, ສມ຺ຠວສ຺ສ ອຸປນ຺ຕິກໍ;

ຕມທ຺ທສ ມຫາພ຺ຣຫ຺ມາ, ກີຬມານໍ ພຫີປຸເຣ.

໑໗໑. ຣຎ຺ໂຎຫໍ ປຫິໂຕ ທູໂຕ, ໂກຣພ຺ຍສ຺ສ ຍສສ຺ສິໂນ;

‘‘ອຕ຺ຖໍ ຘມ຺ມຎ຺ຈ ປຸຈ຺ເຉສິ’’, ອິຈ຺ຈພ຺ຣວິ ຍຸຘິຏ຺ຐິໂລ;

ຕໍ ຕ຺ວໍ ອຕ຺ຖຎ຺ຈ ຘມ຺ມຎ຺ຈ, ສມ຺ຠວກ຺ຂາຫິ ປຸຈ຺ຉິໂຕ.

໑໗໒. ຕຄ຺ຆ ເຕ ອຫມກ຺ຂິສ຺ສໍ, ຍຖາປິ ກຸສໂລ ຕຖາ;

ຣາຊາ ຈ ໂຂ ຕໍ ຊານາຕິ, ຍທິ ກາຫຕິ ວາ ນ ວາ.

໑໗໓. ‘‘ອຊ຺ຊ ສຸເວ’’ຕິ ສໍເສຍ຺ຍ, ຣຎ຺ຎາ ປຸຏ຺ໂຐ ສຸຈີຣຕ;

ມາ ກຕ຺ວາ ອວສີ ຣາຊາ, ອຕ຺ເຖ ຊາເຕ ຍຸຘິຏ຺ຐິໂລ.

໑໗໔. ອຊ຺ຌຕ຺ຕຎ຺ເຎວ ສໍເສຍ຺ຍ, ຣຎ຺ຎາ ປຸຏ຺ໂຐ ສຸຈີຣຕ;

ກຸມ຺ມຄ຺ຄໍ ນ ນິເວເສຍ຺ຍ, ຍຖາ ມູຬ຺ໂຫ ອເຈຕໂສ [ອເຈຕໂນ (ກ.)].

໑໗໕. ອຕ຺ຕານໍ ນາຕິວຕ຺ເຕຍ຺ຍ, ອຘມ຺ມໍ ນ ສມາຈເຣ;

ອຕິຕ຺ເຖ ນປ຺ປຕາເຣຍ຺ຍ, ອນຕ຺ເຖ ນ ຍຸໂຕ ສິຍາ.

໑໗໖. ໂຍ ຈ ເອຕານິ ຐານານິ, ກຕ຺ຕຸໍ ຊານາຕິ ຂຕ຺ຕິໂຍ;

ສທາ ໂສ ວຑ຺ຒເຕ ຣາຊາ, ສຸກ຺ກປກ຺ເຂວ ຈນ຺ທິມາ.

໑໗໗. ຎາຕີນຎ຺ຈ ປິໂຍ ໂຫຕິ, ມິຕ຺ເຕສຸ ຈ ວິໂຣຈຕິ;

ກາຍສ຺ສ ເຠທາ ສປ຺ປຎ຺ໂຎ, ສຄ຺ຄໍ ໂສ ອຸປປຊ຺ຊຕີຕິ.

ສມ຺ຠວຊາຕກໍ ປຎ຺ຈມໍ.