໕໑໐. ອໂຍຆຣຊາຕກໍ (໑໔)

໓໖໓. ຍເມກຣຕ຺ຕິໍ ປຐມໍ, ຄພ຺ເຠ ວສຕິ ມາຓໂວ;

ອພ຺ຠຸຏ຺ຐິໂຕວ ໂສ ຍາຕິ [ສຍຕິ (ສີ. ປີ.), ສ ຍາຕິ (ກຕ຺ຖຈິ)], ສຄຈ຺ຉໍ ນ ນິວຕ຺ຕຕິ.

໓໖໔. ນ ຍຸຊ຺ຌມານາ ນ ພເລນວສ຺ສິຕາ, ນຣາ ນ ຊີຣນ຺ຕິ ນ ຈາປິ ມິຍ຺ຍເຣ;

ສພ຺ພໍ ຫິທໍ [ຫິ ຕໍ (ສີ. ປີ.)] ຊາຕິຊຣາຍຸປທ຺ທຸຕໍ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໖໕. ຈຕຸຣງ຺ຄິນິໍ ເສນໍ ສຸຠິໍສຣູປໍ, ຊຍນ຺ຕິ ຣຏ຺ຐາຘິປຕີ ປສຍ຺ຫ;

ນ ມຈ຺ຈຸໂນ ຊຍິຕຸມຸສ຺ສຫນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໖໖. ຫຕ຺ຖີຫິ ອສ຺ເສຫິ ຣເຖຫິ ປຕ຺ຕິຠິ, ປຣິວາຣິຕາ ມຸຈ຺ຈເຣ ເອກຈ຺ເຈຍ຺ຍາ [ເອກເຈຍ຺ຍາ (ສີ. ປີ.)];

ນ ມຈ຺ຈຸໂນ [ນ ມຈ຺ຈຸໂຕ (ສີ.)] ມຸຈ຺ຈິຕຸມຸສ຺ສຫນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໖໗. ຫຕ຺ຖີຫິ ອສ຺ເສຫິ ຣເຖຫິ ປຕ຺ຕິຠິ, ສູຣາ [ປຸຣາ (ກ.)] ປຠຎ຺ຊນ຺ຕິ ປຘໍສຍນ຺ຕິ;

ນ ມຈ຺ຈຸໂນ ຠຎ຺ຊິຕຸມຸສ຺ສຫນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໖໘. ມຕ຺ຕາ ຄຊາ ຠິນ຺ນຄຬາ [ປຠິນ຺ນຄລາ (ສີ.)] ປຠິນ຺ນາ, ນຄຣານິ ມທ຺ທນ຺ຕິ ຊນໍ ຫນນ຺ຕິ;

ນ ມຈ຺ຈຸໂນ ມທ຺ທິຕຸມຸສ຺ສຫນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໖໙. ອິສ຺ສາສິໂນ ກຕຫຕ຺ຖາປິ ວີຣາ [ວີຣາ (ສີ. ປີ.)], ທູເຣປາຕີ [ປຕີ (ກ.)] ອກ຺ຂຓເວຘິໂນປິ;

ນ ມຈ຺ຈຸໂນ ວິຊ຺ຌິຕຸມຸສ຺ສຫນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໗໐. ສຣານິ ຂີຍນ຺ຕິ ສເສລການນາ, ສພ຺ພໍ ຫິທໍ [ຫິ ຕໍ (ສີ. ປີ.), ປິຕໍ (ສ຺ຍາ.)] ຂີຍຕິ ທີຆມນ຺ຕຣໍ;

ສພ຺ພໍ ຫິທໍ [ຫິ ຕໍ (ສີ. ປີ.), ປິຕໍ (ສ຺ຍາ.)] ຠຎ຺ຊເຣ ກາລປຣິຍາຍໍ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໗໑. ສພ຺ເພ ສເມວໍ ຫິ ນຣານນາຣິນໍ [ນຣານຣີນໍ (ປີ.), ນາຣີ ນຣານໍ (ສ຺ຍາ.), ນຣນາຣີນໍ (ກ.)], ຈລາຈລໍ ປາຓຠຸໂນຘ ຊີວິຕໍ;

ປໂຏວ ຘຸຕ຺ຕສ຺ສ ທຸໂມວ ກູລໂຊ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໗໒. ທຸມປ຺ຜລາເນວ ປຕນ຺ຕິ ມາຓວາ, ທຫຣາ ຈ ວຸທ຺ຘາ ຈ ສຣີຣເຠທາ;

ນາຣິໂຍ ນຣາ ມຊ຺ຌິມໂປຣິສາ ຈ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໗໓. ນາຍໍ ວໂຍ ຕາຣກຣາຊສນ຺ນິໂຠ, ຍທພ຺ຠຕີຕໍ ຄຕເມວ ທານິ ຕໍ;

ຊິຓ຺ຓສ຺ສ ຫີ ນຕ຺ຖິ ຣຕີ ກຸໂຕ ສຸຂໍ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໗໔. ຍກ຺ຂາ ປິສາຈາ ອຖວາປິ ເປຕາ, ກຸປິຕາເຕ [ກຸປິຕາປິ ເຕ (ສີ. ປີ.)] ອສ຺ສສນ຺ຕິ ມນຸສ຺ເສ;

ນ ມຈ຺ຈຸໂນ ອສ຺ສສິຕຸສ຺ສຫນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໗໕. ຍກ຺ເຂ ປິສາເຈ ອຖວາປິ ເປເຕ, ກຸປິເຕປິ ເຕ ນິຊ຺ຌປນໍ ກໂຣນ຺ຕິ;

ນ ມຈ຺ຈຸໂນ ນິຊ຺ຌປນໍ ກໂຣນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໗໖. ອປຣາຘເກ ທູສເກ ເຫຐເກ ຈ, ຣາຊາໂນ ທຓ຺ເຑນ຺ຕິ ວິທິຕ຺ວານ ໂທສໍ;

ນ ມຈ຺ຈຸໂນ ທຓ຺ຑຍິຕຸສ຺ສຫນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໗໗. ອປຣາຘກາ ທູສກາ ເຫຏ຺ຐກາ ຈ, ລຠນ຺ຕິ ເຕ ຣາຊິໂນ ນິຊ຺ຌເປຕຸໍ;

ນ ມຈ຺ຈຸໂນ ນິຊ຺ຌປນໍ ກໂຣນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໗໘. ນ ຂຕ຺ຕິໂຍຕິ ນ ຈ ພ຺ຣາຫ຺ມໂຓຕິ, ນ ອຑ຺ຒກາ ພລວາ ເຕຊວາປິ;

ນ ມຈ຺ຈຸຣາຊສ຺ສ ອເປກ຺ຂມຕ຺ຖິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໗໙. ສີຫາ ຈ ພ຺ຍຄ຺ຆາ ຈ ອໂຖປິ ທີປິໂຍ, ປສຍ຺ຫ ຂາທນ຺ຕິ ວິປ຺ຜນ຺ທມານໍ;

ນ ມຈ຺ຈຸໂນ ຂາທິຕຸມຸສ຺ສຫນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໘໐. ມາຍາກາຣາ ຣງ຺ຄມຊ຺ເຌ ກໂຣນ຺ຕາ, ໂມເຫນ຺ຕິ ຈກ຺ຂູນິ ຊນສ຺ສ ຕາວເທ;

ນ ມຈ຺ຈຸໂນ ໂມຫຍິຕຸສ຺ສຫນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໘໑. ອາສີວິສາ ກຸປິຕາ ອຸຄ຺ຄເຕຊາ, ຑໍສນ຺ຕິ ມາເຣນ຺ຕິປິ ເຕ ມນຸສ຺ເສ;

ນ ມຈ຺ຈຸໂນ ຑໍສິຕຸມຸສ຺ສຫນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໘໒. ອາສີວິສາ ກຸປິຕາ ຍໍ ຑໍສນ຺ຕິ, ຕິກິຈ຺ຉກາ ເຕສ ວິສໍ ຫນນ຺ຕິ;

ນ ມຈ຺ຈຸໂນ ທຏ຺ຐວິສໍ [ທຏ຺ຐສ຺ສ ວິສໍ (ກ.)] ຫນນ຺ຕິ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໘໓. ຘມ຺ມນ຺ຕຣີ ເວຕ຺ຕຣຓີ [ເວຕຣຓີ (ສີ. ປີ.)] ຈ ໂຠໂຊ, ວິສານິ ຫນ຺ຕ຺ວານ ຠຸຊງ຺ຄມານໍ;

ສຸຍ຺ຍນ຺ຕິ ເຕ ກາລກຕາ ຕເຖວ, ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໘໔. ວິຊ຺ຊາຘຣາ ໂຆຣມຘີຍມານາ, ອທສ຺ສນໍ ໂອສເຘຫິ ວຊນ຺ຕິ;

ນ ມຈ຺ຈຸຣາຊສ຺ສ ວຊນ຺ຕທສ຺ສນໍ [ວຊນ຺ຕິ ອທສ຺ສນໍ (ສ຺ຍາ. ກ.)], ຕໍ ເມ ມຕີ ໂຫຕິ ຈຣາມິ ຘມ຺ມໍ.

໓໘໕. ຘມ຺ໂມ ຫເວ ຣກ຺ຂຕິ ຘມ຺ມຈາຣິໍ, ຘມ຺ໂມ ສຸຈິຓ຺ໂຓ ສຸຂມາວຫາຕິ;

ເອສານິສໍໂສ ຘມ຺ເມ ສຸຈິຓ຺ເຓ, ນ ທຸຄ຺ຄຕິໍ ຄຈ຺ຉຕິ ຘມ຺ມຈາຣີ.

໓໘໖. ນ ຫິ ຘມ຺ໂມ ອຘມ຺ໂມ ຈ, ອຸໂຠ ສມວິປາກິໂນ;

ອຘມ຺ໂມ ນິຣຍໍ ເນຕິ, ຘມ຺ໂມ ປາເປຕິ ສຸຄ຺ຄຕິນ຺ຕິ.

ອໂຍຆຣຊາຕກໍ ຈຸທ຺ທສມໍ.

ຕສ຺ສຸທ຺ທານໍ –

ມາຕງ຺ຄ ສມ຺ຠູຕ ສິວິ ສິຣິມນ຺ໂຕ, ໂຣຫຓ ຫໍສ ສຕ຺ຕິຄຸມ຺ໂພ ຠລ຺ລາຕິຍ;

ໂສມນສ຺ສ ຈມ຺ເປຍ຺ຍ ພ຺ຣຫ຺ມ ປຎ຺ຈ-ປຓ຺ຑິຕ ຈິຣສ຺ສໍວຕ ອໂຍຆຣາຕິ.

ວີສຕິນິປາຕໍ ນິຏ຺ຐິຕໍ.