໑໕. ວີສຕິນິປາໂຕ

໔໙໗. ມາຕງ຺ຄຊາຕກໍ (໑)

໑. ກຸໂຕ ນຸ ອາຄຈ຺ຉສິ ທຸມ຺ມວາສີ [ຣຸມ຺ມວາສີ (ສີ. ປີ.)], ໂອຕລ຺ລໂກ ປໍສຸປິສາຈໂກວ;

ສງ຺ກາຣໂຈຬໍ ປຏິມຸຎ຺ຈ [ປຏິມຸຈ຺ຈ (ສີ. ປີ.)] ກຓ຺ເຐ, ໂກ ເຣ ຕຸວໍ ໂຫສິ [ໂຫຫິສິ (ສີ. ປີ.)] ອທກ຺ຂິເຓຍ຺ໂຍ.

໒. ອນ຺ນໍ ຕເວທໍ [ຕວ ອິທໍ (ກ. ສີ. ປີ.), ຕວຍິທໍ (ສ຺ຍາ.)] ປກຕໍ ຍສສ຺ສິ, ຕໍ ຂຊ຺ຊເຣ ຠຸຎ຺ຊເຣ ປິຍ຺ຍເຣ ຈ;

ຊານາສິ ມໍ ຕ຺ວໍ ປຣທຕ຺ຕູປຊີວິໍ, ອຸຕ຺ຕິຏ຺ຐປິຓ຺ຑໍ ລຠຕໍ ສປາໂກ.

໓. ອນ຺ນໍ ມເມທໍ [ມມ ອິທໍ (ກ. ສີ. ປີ.), ມມຍິທໍ (ສ຺ຍາ.)] ປກຕໍ ພ຺ຣາຫ຺ມຓານໍ, ອຕ຺ຕຕ຺ຖາຍ ສທ຺ທຫໂຕ ມເມທໍ [ມມ ອິທໍ (ກ. ສີ. ປີ.), ມມຍິທໍ (ສ຺ຍາ.)];

ອເປຫິ ເອຕ຺ໂຕ ກິມິຘຏ຺ຐິໂຕສິ, ນ ມາທິສາ ຕຸຍ຺ຫໍ ທທນ຺ຕິ ຊມ຺ມ.

໔. ຖເລ ຈ ນິນ຺ເນ ຈ ວປນ຺ຕິ ພີຊໍ, ອນູປເຂຕ຺ເຕ ຜລມາສມານາ [ມາສສານາ (ສີ. ປີ.), ມາສິໍ ສມານາ (ສ຺ຍາ.)];

ເອຕາຍ ສທ຺ຘາຍ ທທາຫິ ທານໍ, ອປ຺ເປວ ອາຣາຘເຍ ທກ຺ຂິເຓຍ຺ເຍ.

໕. ເຂຕ຺ຕານິ ມຍ຺ຫໍ ວິທິຕານິ ໂລເກ, ເຍສາຫໍ ພີຊານິ ປຕິຏ຺ຐເປມິ;

ເຍ ພ຺ຣາຫ຺ມຓາ ຊາຕິມນ຺ຕູປປນ຺ນາ, ຕານີຘ ເຂຕ຺ຕານິ ສຸເປສລານິ.

໖. ຊາຕິມໂທ ຈ ອຕິມານິຕາ ຈ, ໂລໂຠ ຈ ໂທໂສ ຈ ມໂທ ຈ ໂມໂຫ;

ເອເຕ ອຄຸຓາ ເຍສຸ ຈ ສນ຺ຕິ [ເຍສຸ ວສນ຺ຕິ (ສີ. ປີ.)] ສພ຺ເພ, ຕານີຘ ເຂຕ຺ຕານິ ອເປສລານິ.

໗. ຊາຕິມໂທ ຈ ອຕິມານິຕາ ຈ, ໂລໂຠ ຈ ໂທໂສ ຈ ມໂທ ຈ ໂມໂຫ;

ເອເຕ ອຄຸຓາ ເຍສຸ ນ ສນ຺ຕິ ສພ຺ເພ, ຕານີຘ ເຂຕ຺ຕານິ ສຸເປສລານິ.

໘. ກ຺ເວຕ຺ຖ ຄຕາ [ກ຺ວຕ຺ຖ ຄຕາ (ສ຺ຍາ.), ກຕ຺ເຖວ ຠຏ຺ຐາ (ປີ.)] ອຸປໂຊຕິໂຍ ຈ, ອຸປຊ຺ຌາໂຍ ຈ ອຖວາ ຄຓ຺ຑກຸຈ຺ຉິ [ອຓ຺ຑກຸຈ຺ຉິ (ສີ. ສ຺ຍາ. ປີ.)];

ອິມສ຺ສ ທຓ຺ຑຎ຺ຈ ວຘຎ຺ຈ ທຕ຺ວາ, ຄເລ ຄເຫຕ຺ວາ ຂລຍາຖ [ຄລຍາຖ (ກ.)] ຊມ຺ມໍ.

໙. ຄິຣິໍ ນເຂນ ຂຓສິ, ອໂຍ ທນ຺ເຕຫິ [ທນ຺ເຕນ (ສີ. ປີ.)] ຂາທສິ;

ຊາຕເວທໍ ປທຫສິ, ໂຍ ອິສິໍ ປຣິຠາສສິ.

໑໐. ອິທໍ ວຕ຺ວານ ມາຕງ຺ໂຄ, ອິສິ ສຈ຺ຈປຣກ຺ກໂມ;

ອນ຺ຕລິກ຺ຂສ຺ມິໍ ປກ຺ກາມິ [ປກ຺ກມິ (ກ.)], ພ຺ຣາຫ຺ມຓານໍ ອຸທິກ຺ຂຕໍ.

໑໑. ອາເວລ຺ລິຕໍ [ອເວຐິຕໍ (ສີ. ປີ.)] ປິຏ຺ຐິໂຕ ອຸຕ຺ຕມງ຺ຄໍ, ພາຫຸໍ [ພາຫໍ (ສີ. ປີ.)] ປສາເຣຕິ ອກມ຺ມເນຍ຺ຍໍ [ອກມ຺ປເນຍ຺ຍໍ (ກ.)];

ເສຕານິ ອກ຺ຂີນິ ຍຖາ ມຕສ຺ສ, ໂກ ເມ ອິມໍ ປຸຕ຺ຕມກາສິ ເອວໍ.

໑໒. ອິຘາຄມາ ສມໂຓ ທຸມ຺ມວາສີ, ໂອຕລ຺ລໂກ ປໍສຸປິສາຈໂກວ;

ສງ຺ກາຣໂຈຬໍ ປຏິມຸຎ຺ຈ ກຓ຺ເຐ, ໂສ ເຕ ອິມໍ ປຸຕ຺ຕມກາສິ ເອວໍ.

໑໓. ກຕມໍ ທິສໍ ອຄມາ ຠູຣິປຎ຺ໂຎ, ອກ຺ຂາຖ ເມ ມາຓວາ ເອຕມຕ຺ຖໍ;

ຄນ຺ຕ຺ວານ ຕໍ ປຏິກເຣມຸ ອຈ຺ຈຍໍ, ອປ຺ເປວ ນໍ ປຸຕ຺ຕ ລເຠມຸ ຊີວິຕໍ.

໑໔. ເວຫາຍສໍ ອຄມາ ຠູຣິປຎ຺ໂຎ, ປຖທ຺ຘຸໂນ ປນ຺ນຣເສວ ຈນ຺ໂທ;

ອປິ ຈາປິ ໂສ ປຸຣິມທິສໍ ອຄຈ຺ຉິ, ສຈ຺ຈປ຺ປຏິຎ຺ໂຎ ອິສິ ສາຘຸຣູໂປ.

໑໕. ອາເວລ຺ລິຕໍ ປິຏ຺ຐິໂຕ ອຸຕ຺ຕມງ຺ຄໍ, ພາຫຸໍ ປສາເຣຕິ ອກມ຺ມເນຍ຺ຍໍ;

ເສຕານິ ອກ຺ຂີນິ ຍຖາ ມຕສ຺ສ, ໂກ ເມ ອິມໍ ປຸຕ຺ຕມກາສິ ເອວໍ.

໑໖. ຍກ຺ຂາ ຫເວ ສນ຺ຕິ ມຫານຸຠາວາ, ອນ຺ວາຄຕາ ອິສໂຍ ສາຘຸຣູປາ;

ເຕ ທຸຏ຺ຐຈິຕ຺ຕໍ ກຸປິຕໍ ວິທິຕ຺ວາ, ຍກ຺ຂາ ຫິ ເຕ ປຸຕ຺ຕມກໍສຸ ເອວໍ.

໑໗. ຍກ຺ຂາ ຈ ເມ ປຸຕ຺ຕມກໍສຸ ເອວໍ, ຕ຺ວຎ຺ເຎວ ເມ ມາ ກຸທ຺ໂຘ [ກຸທ຺ຘ (ກ.)] ພ຺ຣຫ຺ມຈາຣິ;

ຕຸມ຺ເຫວ [ຕຸຍ຺ເຫວ (ກ.)] ປາເທ ສຣຓໍ ຄຕາສ຺ມິ, ອນ຺ວາຄຕາ ປຸຕ຺ຕໂສເກນ ຠິກ຺ຂຸ.

໑໘. ຕເທວ ຫິ ເອຕຣຫິ ຈ ມຍ຺ຫໍ, ມໂນປໂທໂສ ນ ມມຕ຺ຖິ [ມມ ນຕ຺ຖິ (ປີ.)] ໂກຈິ;

ປຸຕ຺ໂຕ ຈ ເຕ ເວທມເທນ ມຕ຺ໂຕ, ອຕ຺ຖໍ ນ ຊານາຕິ ອຘິຈ຺ຈ ເວເທ.

໑໙. ອທ຺ຘາ ຫເວ ຠິກ຺ຂຸ ມຸຫຸຕ຺ຕເກນ, ສມ຺ມຸຍ຺ຫເຕວ ປຸຣິສສ຺ສ ສຎ຺ຎາ;

ເອກາປຣາຘໍ [ເອຕາປຣາຘໍ (ກ.)] ຂມ ຠູຣິປຎ຺ຎ, ນ ປຓ຺ຑິຕາ ໂກຘພລາ ຠວນ຺ຕິ.

໒໐. ອິທຎ຺ຈ ມຍ຺ຫໍ ອຸຕ຺ຕິຏ຺ຐປິຓ຺ຑໍ, ຕວ [ນຕ຺ຖິ ສີ. ປີ. ໂປຕ຺ຖເກສຸ] ມຓ຺ຑພ຺ໂຍ ຠຸຎ຺ຊຕຸ ອປ຺ປປຎ຺ໂຎ;

ຍກ຺ຂາ ຈ ເຕ ນໍ [ເຕ ປຸຕ຺ຕໍ (ສ຺ຍາ.)] ນ ວິເຫຐເຍຍ຺ຍຸໍ, ປຸຕ຺ໂຕ ຈ ເຕ ເຫສ຺ສຕິ [ໂຫຫິຕິ (ສີ. ປີ.)] ໂສ ອໂຣໂຄ.

໒໑. ມຓ຺ຑພ຺ຍ ພາໂລສິ ປຣິຕ຺ຕປຎ຺ໂຎ, ໂຍ ປຸຎ຺ຎເຂຕ຺ຕານມໂກວິໂທສິ;

ມຫກ຺ກສາເວສຸ ທທາສິ ທານໍ, ກິລິຏ຺ຐກມ຺ເມສຸ ອສຎ຺ຎເຕສຸ.

໒໒. ຊຏາ ຈ ເກສາ ອຊິນາ ນິວຕ຺ຖາ, ຊຣູທປານໍວ ມຸຂໍ ປຣູຬ຺ຫໍ;

ປຊໍ ອິມໍ ປສ຺ສຖ ທຸມ຺ມຣູປໍ [ຣຸມ຺ມຣູປິໍ (ສີ. ປີ.)], ນ ຊຏາຊິນໍ ຕາຍຕິ ອປ຺ປປຎ຺ຎໍ.

໒໓. ເຍສໍ ຣາໂຄ ຈ ໂທໂສ ຈ, ອວິຊ຺ຊາ ຈ ວິຣາຊິຕາ;

ຂີຓາສວາ ອຣຫນ຺ໂຕ, ເຕສຸ ທິນ຺ນໍ ມຫປ຺ຜລນ຺ຕິ.

ມາຕງ຺ຄຊາຕກໍ ປຐມໍ.

໔໙໘. ຈິຕ຺ຕສມ຺ຠູຕຊາຕກໍ (໒)

໒໔. ສພ຺ພໍ ນຣານໍ ສຜລໍ ສຸຈິຓ຺ຓໍ, ນ ກມ຺ມຸນາ ກິຎ຺ຈນ ໂມຆມຕ຺ຖິ;

ປສ຺ສາມິ ສມ຺ຠູຕໍ ມຫານຸຠາວໍ, ສກມ຺ມຸນາ ປຸຎ຺ຎຜລູປປນ຺ນໍ.

໒໕. ສພ຺ພໍ ນຣານໍ ສຜລໍ ສຸຈິຓ຺ຓໍ, ນ ກມ຺ມຸນາ ກິຎ຺ຈນ ໂມຆມຕ຺ຖິ;

ກຈ຺ຈິນ຺ນຸ ຈິຕ຺ຕສ຺ສປິ ເອວເມວໍ, ອິທ຺ໂຘ ມໂນ ຕສ຺ສ ຍຖາປິ ມຍ຺ຫໍ.

໒໖. ສພ຺ພໍ ນຣານໍ ສຜລໍ ສຸຈິຓ຺ຓໍ, ນ ກມ຺ມຸນາ ກິຎ຺ຈນ ໂມຆມຕ຺ຖິ;

ຈິຕ຺ຕມ຺ປິ ຊານາຫິ [ຈິຕ຺ຕໍ ວິຊານາຫິ (ສີ. ປີ.)] ຕເຖວ ເທວ, ອິທ຺ໂຘ ມໂນ ຕສ຺ສ ຍຖາປິ ຕຸຍ຺ຫໍ.

໒໗. ຠວໍ ນຸ ຈິຕ຺ໂຕ ສຸຕມຎ຺ຎໂຕ ເຕ, ອຸທາຫຸ ເຕ ໂກຈິ ນໍ ເອຕທກ຺ຂາ;

ຄາຖາ ສຸຄີຕາ ນ ມມຕ຺ຖິ ກງ຺ຂາ, ທທາມິ ເຕ ຄາມວຣໍ ສຕຎ຺ຈ.

໒໘. ນ ຈາຫໍ ຈິຕ຺ໂຕ ສຸຕມຎ຺ຎໂຕ ເມ, ອິສີ ຈ ເມ ເອຕມຕ຺ຖໍ ອສໍສິ;

‘‘ຄນ຺ຕ຺ວານ ຣຎ຺ໂຎ ປຏິຄາຫິ [ປຏິຄາຍິ (ສ຺ຍາ. ກ.), ປຏິຄາຍ (?)] ຄາຖໍ, ອປິ ເຕ ວຣໍ ອຕ຺ຕມໂນ ທເທຍ຺ຍ’’ [ອປິ ນຸ ເຕ ວຣໍ ອຕ຺ຕມໂນ ທເທຍ຺ຍ (ສ຺ຍາ.), ອປິ ນຸ ເຕ ອຕ຺ຕມໂນ ວຣໍ ທເທ (ກ.)].

໒໙. ໂຍເຊນ຺ຕຸ ເວ ຣາຊຣເຖ, ສຸກເຕ ຈິຕ຺ຕສິພ຺ພເນ;

ກຈ຺ຉໍ ນາຄານໍ ພນ຺ຘຖ, ຄີເວຍ຺ຍໍ ປຏິມຸຎ຺ຈຖ.

໓໐. ອາຫຎ຺ຎນ຺ຕຸ [ອາຫຎ຺ຎເຣ (ສ຺ຍາ.)] ເຠຣິມຸທິງ຺ຄສງ຺ເຂ [ສງ຺ຂາ (ສ຺ຍາ.)], ສີຆານິ ຍານານິ ຈ ໂຍຊຍນ຺ຕຸ;

ອຊ຺ເຊວຫໍ ອສ຺ສມໍ ຕໍ ຄມິສ຺ສໍ, ຍຕ຺ເຖວ ທກ຺ຂິສ຺ສມິສິໍ ນິສິນ຺ນໍ.

໓໑. ສຸລທ຺ຘລາໂຠ ວຕ ເມ ອໂຫສິ, ຄາຖາ ສຸຄີຕາ ປຣິສາຍ ມຊ຺ເຌ;

ສ຺ວາຫໍ ອິສິໍ ສີລວຕູປປນ຺ນໍ, ທິສ຺ວາ ປຕີໂຕ ສຸມໂນຫມສ຺ມິ.

໓໒. ອາສນໍ ອຸທກໍ ປຊ຺ຊໍ, ປຏິຄ຺ຄຓ຺ຫາຕຸ ໂນ ຠວໍ;

ອຄ຺ເຆ ຠວນ຺ຕໍ ປຸຈ຺ຉາມ, ອຄ຺ຆໍ ກຸຣຸຕຸ ໂນ ຠວໍ.

໓໓. ຣມ຺ມຎ຺ຈ ເຕ ອາວສຖໍ ກໂຣນ຺ຕຸ, ນາຣີຄເຓຫິ ປຣິຈາຣຍສ຺ສຸ;

ກໂຣຫິ ໂອກາສມນຸຄ຺ຄຫາຍ, ອຸໂຠປິ ມໍ ອິສ຺ສຣິຍໍ ກໂຣມ.

໓໔. ທິສ຺ວາ ຜລໍ ທຸຈ຺ຈຣິຕສ຺ສ ຣາຊ, ອໂຖ ສຸຈິຓ຺ຓສ຺ສ ມຫາວິປາກໍ;

ອຕ຺ຕານເມວ ປຏິສໍຍມິສ຺ສໍ, ນ ປຕ຺ຖເຍ ປຸຕ຺ຕ [ປຸຕ຺ຕໍ (ສີ. ປີ.)] ປສຸໍ ຘນໍ ວາ.

໓໕. ທເສວິມາ ວສ຺ສທສາ, ມຈ຺ຈານໍ ອິຘ ຊີວິຕໍ;

ອປຕ຺ຕຎ຺ເຎວ ຕໍ ໂອຘິໍ, ນໂຬ ຉິນ຺ໂນວ ສຸສ຺ສຕິ.

໓໖. ຕຕ຺ຖ ກາ ນນ຺ທິ ກາ ຂິຑ຺ຑາ, ກາ ຣຕີ ກາ ຘເນສນາ;

ກິໍ ເມ ປຸຕ຺ເຕຫິ ທາເຣຫິ, ຣາຊ ມຸຕ຺ໂຕສ຺ມິ ພນ຺ຘນາ.

໓໗. ໂສຫໍ ເອວໍ ປຊານາມິ [ໂສ ອຫໍ ສຸປ຺ປຊານາມິ (ສີ. ປີ.)], ມຈ຺ຈຸ ເມ ນປ຺ປມຊ຺ຊຕິ;

ອນ຺ຕເກນາຘິປນ຺ນສ຺ສ, ກາ ຣຕີ ກາ ຘເນສນາ.

໓໘. ຊາຕິ ນຣານໍ ອຘມາ ຊນິນ຺ທ, ຈຓ຺ຑາລໂຍນິ ທ຺ວິປທາກນິຏ຺ຐາ [ທິປທາກນິຏ຺ຐາ (ສີ. ປີ.)];

ສເກຫິ ກມ຺ເມຫິ ສຸປາປເກຫິ, ຈຓ຺ຑາລຄພ຺ເຠ [ຈຓ຺ຑາລິຄພ຺ເຠ (ສ຺ຍາ.)] ອວສິມ຺ຫ ປຸພ຺ເພ.

໓໙. ຈຓ຺ຑາລາຫຸມ຺ຫ ອວນ຺ຕີສຸ, ມິຄາ ເນຣຎ຺ຊຣໍ ປຕິ;

ອຸກ຺ກຸສາ ນມ຺ມທາຕີເຣ [ຣມ຺ມທາຕີເຣ (ສ຺ຍາ. ກ.)], ຕ຺ຍຊ຺ຊ ພ຺ຣາຫ຺ມຓຂຕ຺ຕິຍາ.

໔໐. ອຸປນີຍຕິ ຊີວິຕມປ຺ປມາຍຸ, ຊຣູປນີຕສ຺ສ ນ ສນ຺ຕິ ຕາຓາ;

ກໂຣຫິ ປຎ຺ຈາລ ມເມຕ [ມເມວ (ສ຺ຍາ. ກ.)] ວາກ຺ຍໍ, ມາກາສິ ກມ຺ມານິ ທຸກ຺ຂຸທ຺ຣຍານິ.

໔໑. ອຸປນີຍຕິ ຊີວິຕມປ຺ປມາຍຸ, ຊຣູປນີຕສ຺ສ ນ ສນ຺ຕິ ຕາຓາ;

ກໂຣຫິ ປຎ຺ຈາລ ມເມຕ ວາກ຺ຍໍ, ມາກາສິ ກມ຺ມານິ ທຸກ຺ຂປ຺ຜລານິ.

໔໒. ອຸປນີຍຕິ ຊີວິຕມປ຺ປມາຍຸ, ຊຣູປນີຕສ຺ສ ນ ສນ຺ຕິ ຕາຓາ;

ກໂຣຫິ ປຎ຺ຈາລ ມເມຕ ວາກ຺ຍໍ, ມາກາສິ ກມ຺ມານິ ຣຊສ຺ສິຣານິ.

໔໓. ອຸປນີຍຕິ ຊີວິຕມປ຺ປມາຍຸ, ວຓ຺ຓໍ ຊຣາ ຫນ຺ຕິ ນຣສ຺ສ ຊິຍ຺ຍໂຕ;

ກໂຣຫິ ປຎ຺ຈາລ ມເມຕ ວາກ຺ຍໍ, ມາກາສິ ກມ຺ມໍ ນິຣຍູປປຕ຺ຕິຍາ.

໔໔. ອທ຺ຘາ ຫິ ສຈ຺ຈໍ ວຈນໍ ຕເວຕໍ, ຍຖາ ອິສີ ຠາສສິ ເອວເມຕໍ;

ກາມາ ຈ ເມ ສນ຺ຕິ ອນປ຺ປຣູປາ, ເຕ ທຸຈ຺ຈຊາ ມາທິສເກນ ຠິກ຺ຂຸ.

໔໕. ນາໂຄ ຍຖາ ປງ຺ກມຊ຺ເຌ ພ຺ຍສນ຺ໂນ, ປສ຺ສໍ ຖລໍ ນາຠິສມ຺ໂຠຕິ ຄນ຺ຕຸໍ;

ເອວມ຺ປຫໍ [ເອວມຫໍ (ສ຺ຍາ.)] ກາມປງ຺ເກ ພ຺ຍສນ຺ໂນ, ນ ຠິກ຺ຂຸໂນ ມຄ຺ຄມນຸພ຺ພຊາມິ.

໔໖. ຍຖາປິ ມາຕາ ຈ ປິຕາ ຈ ປຸຕ຺ຕໍ, ອນຸສາສເຣ ກິນ຺ຕິ ສຸຂີ ຠເວຍ຺ຍ;

ເອວມ຺ປິ ມໍ ຕ຺ວໍ ອນຸສາສ ຠນ຺ເຕ, ຍຖາ ຈິຣໍ [ຍມາຈຣໍ (ສີ. ປີ. ກ. ອຏ຺ຐ.)] ເປຈ຺ຈ ສຸຂີ ຠເວຍ຺ຍໍ.

໔໗. ໂນ ເຈ ຕຸວໍ ອຸສ຺ສຫເສ ຊນິນ຺ທ, ກາເມ ອິເມ ມານຸສເກ ປຫາຕຸໍ;

ຘມ຺ມິໍ [ຘມ຺ມໍ (ສີ. ປີ.)] ພລິໍ ປຏ຺ຐປຍສ຺ສຸ ຣາຊ, ອຘມ຺ມກາໂຣ ຕວ [ອຘມ຺ມກາໂຣ ຈ ເຕ (ສີ. ສ຺ຍາ. ປີ.)] ມາຫຸ ຣຏ຺ເຐ.

໔໘. ທູຕາ ວິຘາວນ຺ຕຸ ທິສາ ຈຕສ຺ໂສ, ນິມນ຺ຕກາ ສມຓພ຺ຣາຫ຺ມຓານໍ;

ເຕ ອນ຺ນປາເນນ ອຸປຏ຺ຐຫສ຺ສຸ, ວຕ຺ເຖນ ເສນາສນປຈ຺ຈເຍນ ຈ.

໔໙. ອນ຺ເນນ ປາເນນ ປສນ຺ນຈິຕ຺ໂຕ, ສນ຺ຕປ຺ປຍ ສມຓພ຺ຣາຫ຺ມເຓ ຈ;

ທຕ຺ວາ ຈ ຠຸຕ຺ວາ ຈ ຍຖານຸຠາວໍ, ອນິນ຺ທິໂຕ ສຄ຺ຄມຸເປຫິ [ມຸເປຕິ (ປີ. ກ.)] ຐານໍ.

໕໐. ສເຈ ຈ ຕໍ ຣາຊ ມໂທ ສເຫຍ຺ຍ, ນາຣີຄເຓຫິ ປຣິຈາຣຍນ຺ຕໍ;

ອິມເມວ ຄາຖໍ ມນສີ ກໂຣຫິ, ຠາເສສິ [ຠາເສຫິ (ສ຺ຍາ. ປີ. ກ.)] ເຈນໍ ປຣິສາຍ ມຊ຺ເຌ.

໕໑. ອພ຺ໂຠກາສສໂຍ ຊນ຺ຕຸ, ວຊນ຺ຕ຺ຍາ ຂີຣປາຍິໂຕ;

ປຣິກິຓ຺ໂຓ ສຸວາເນຫິ [ສຸປິເນຫິ (ສີ. ປີ.)], ສ຺ວາຊ຺ຊ ຣາຊາຕິ ວຸຈ຺ຈຕີຕິ.

ຈິຕ຺ຕສມ຺ຠູຕຊາຕກໍ ທຸຕິຍໍ.

໔໙໙. ສິວິຊາຕກໍ (໓)

໕໒. ທູເຣ ອປສ຺ສໍ ເຖໂຣວ, ຈກ຺ຂຸໍ ຍາຈິຕຸມາຄໂຕ;

ເອກເນຕ຺ຕາ ຠວິສ຺ສາມ, ຈກ຺ຂຸໍ ເມ ເທຫິ ຍາຈິໂຕ.

໕໓. ເກນານຸສິຏ຺ໂຐ ອິຘ ມາຄໂຕສິ, ວນິພ຺ພກ [ວຓິພ຺ພກ (ສີ.)] ຈກ຺ຂຸປຖານິ ຍາຈິຕຸໍ;

ສຸທຸຈ຺ຈຊໍ ຍາຈສິ ອຸຕ຺ຕມງ຺ຄໍ, ຍມາຫຸ ເນຕ຺ຕໍ ປຸຣິເສນ ທຸຈ຺ຈຊໍ.

໕໔. ຍມາຫຸ ເທເວສຸ ສຸຊມ຺ປຕີຕິ, ມຆວາຕິ ນໍ ອາຫຸ ມນຸສ຺ສໂລເກ;

ເຕນານຸສິຏ຺ໂຐ ອິຘ ມາຄໂຕສ຺ມິ, ວນິພ຺ພໂກ ຈກ຺ຂຸປຖານິ ຍາຈິຕຸໍ.

໕໕. ວນິພ຺ພໂຕ [ວນິພ຺ພໂກ (ສ຺ຍາ. ປີ.)] ມຍ຺ຫ ວນິໍ [ວນໍ (ກ.), ວຓິໍ (ສີ. ສ຺ຍາ. ປີ.)] ອນຸຕ຺ຕຣໍ, ທທາຫິ ເຕ ຈກ຺ຂຸປຖານິ ຍາຈິໂຕ;

ທທາຫິ ເມ ຈກ຺ຂຸປຖໍ ອນຸຕ຺ຕຣໍ, ຍມາຫຸ ເນຕ຺ຕໍ ປຸຣິເສນ ທຸຈ຺ຈຊໍ.

໕໖. ເຍນ ອຕ຺ເຖນ ອາຄຈ຺ຉິ [ອາຄຎ຺ຉິ (ສີ. ປີ.)], ຍມຕ຺ຖມຠິປຕ຺ຖຍໍ;

ເຕ ເຕ ອິຊ຺ຌນ຺ຕຸ ສງ຺ກປ຺ປາ, ລຠ ຈກ຺ຂູນິ ພ຺ຣາຫ຺ມຓ.

໕໗. ເອກໍ ເຕ ຍາຈມານສ຺ສ, ອຸຠຍານິ ທທາມຫໍ;

ສ ຈກ຺ຂຸມາ ຄຈ຺ຉ ຊນສ຺ສ ເປກ຺ຂໂຕ, ຍທິຈ຺ຉເສ ຕ຺ວໍ ຕທເຕ ສມິຊ຺ຌຕຸ.

໕໘. ມາ ໂນ ເທວ ອທາ ຈກ຺ຂຸໍ, ມາ ໂນ ສພ຺ເພ ປຣາກຣິ [ປຣກ຺ກຣິ (ສ຺ຍາ. ກ. ອຏ຺ຐ.), ປຣິກ຺ກຣິ (ກ.) ປຣິ + ອາ + ກຣິ = ປຣາກຣິ];

ຘນໍ ເທຫິ ມຫາຣາຊ, ມຸຕ຺ຕາ ເວຬຸຣິຍາ ພຫູ.

໕໙. ຍຸຕ຺ເຕ ເທວ ຣເຖ ເທຫິ, ອາຊານີເຍ ຈລງ຺ກເຕ;

ນາເຄ ເທຫິ ມຫາຣາຊ, ເຫມກປ຺ປນວາສເສ.

໖໐. ຍຖາ ຕໍ ສິວໂຍ [ສີວິໂຍ (ສ຺ຍາ.)] ສພ຺ເພ, ສໂຍຄ຺ຄາ ສຣຖາ ສທາ;

ສມນ຺ຕາ ປຣິກິເຣຍ຺ຍຸໍ [ປຣິກເຣຍ຺ຍຸໍ (ສ຺ຍາ. ປີ.)], ເອວໍ ເທຫິ ຣເຖສຠ.

໖໑. ໂຍ ເວ ທສ຺ສນ຺ຕິ ວຕ຺ວານ, ອທາເນ ກຸຣຸເຕ ມໂນ;

ຠູມ຺ຍໍ [ຠູມ຺ຍາ (ສີ. ປີ.)] ໂສ ປຕິຕໍ ປາສໍ, ຄີວາຍໍ ປຏິມຸຎ຺ຈຕິ.

໖໒. ໂຍ ເວ ທສ຺ສນ຺ຕິ ວຕ຺ວານ, ອທາເນ ກຸຣຸເຕ ມໂນ;

ປາປາ ປາປຕໂຣ ໂຫຕິ, ສມ຺ປຕ຺ໂຕ ຍມສາຘນໍ.

໖໓. ຍຎ຺ຫິ ຍາເຈ ຕຎ຺ຫິ ທເທ, ຍໍ ນ ຍາເຈ ນ ຕໍ ທເທ;

ສ຺ວາຫໍ ຕເມວ ທສ຺ສາມິ, ຍໍ ມໍ ຍາຈຕິ ພ຺ຣາຫ຺ມໂຓ.

໖໔. ອາຍຸໍ ນຸ ວຓ຺ຓໍ ນຸ ສຸຂໍ ພລໍ ນຸ, ກິໍ ປຕ຺ຖຍາໂນ ນຸ ຊນິນ຺ທ ເທສິ;

ກຖຎ຺ຫິ ຣາຊາ ສິວິນໍ ອນຸຕ຺ຕໂຣ, ຈກ຺ຂູນິ ທຊ຺ຊາ ປຣໂລກເຫຕຸ.

໖໕. ນ ວາຫເມຕໍ ຍສສາ ທທາມິ, ນ ປຸຕ຺ຕມິຈ຺ເຉ ນ ຘນໍ ນ ຣຏ຺ຐໍ;

ສຕຎ຺ຈ ຘມ຺ໂມ ຈຣິໂຕ ປຸຣາໂຓ, ອິຈ຺ເຈວ ທາເນ ຣມເຕ ມໂນ ມມ [ມມໍ (ສີ. ປີ.)].

໖໖. ສຂາ ຈ ມິຕ຺ໂຕ ຈ ມມາສິ ສີວິກ [ສີວກ (ສີ. ປີ.)], ສຸສິກ຺ຂິໂຕ ສາຘຸ ກໂຣຫິ ເມ ວໂຈ;

ອຸທ຺ຘຣິຕ຺ວາ [ອຸທ຺ຘຕ຺ວ (ສີ.), ລທ຺ຘ ຕ຺ວໍ (ປີ.)] ຈກ຺ຂູນິ ມມໍ ຊິຄີສໂຕ, ຫຕ຺ເຖສຸ ຐເປຫິ [ອາເວສິ (ສີ.)] ວນິພ຺ພກສ຺ສ.

໖໗. ໂຈທິໂຕ ສິວິຣາເຊນ, ສິວິໂກ ວຈນງ຺ກໂຣ;

ຣຎ຺ໂຎ ຈກ຺ຂູນຸທ຺ຘຣິຕ຺ວາ [ຈກ຺ຂູນິ ອຸທ຺ຘຕ຺ວາ (ສີ. ປີ.)], ພ຺ຣາຫ຺ມຓສ຺ສູປນາມຍິ;

ສຈກ຺ຂຸ ພ຺ຣາຫ຺ມໂຓ ອາສິ, ອນ຺ໂຘ ຣາຊາ ອຸປາວິສິ.

໖໘. ຕໂຕ ໂສ ກຕິປາຫສ຺ສ, ອຸປຣູຬ຺ເຫສຸ ຈກ຺ຂຸສຸ;

ສູຕໍ ອາມນ຺ຕຍີ ຣາຊາ, ສິວີນໍ ຣຏ຺ຐວຑ຺ຒໂນ.

໖໙. ໂຍເຊຫິ ສາຣຖິ ຍານໍ, ຍຸຕ຺ຕຎ຺ຈ ປຏິເວທຍ;

ອຸຍ຺ຍານຠູມິໍ ຄຈ຺ຉາມ, ໂປກ຺ຂຣຎ຺ໂຎ ວນານິ ຈ.

໗໐. ໂສ ຈ ໂປກ຺ຂຣຓີຕີເຣ [ໂປກ຺ຂຣຓິຍາ ຕີເຣ (ສີ. ປີ.)], ປລ຺ລງ຺ເກນ ອຸປາວິສິ;

ຕສ຺ສ ສກ຺ໂກ ປາຕຸຣຫຸ, ເທວຣາຊາ ສຸຊມ຺ປຕິ.

໗໑. ສກ຺ໂກຫມສ຺ມິ ເທວິນ຺ໂທ, ອາຄໂຕສ຺ມິ ຕວນ຺ຕິເກ;

ວຣໍ ວຣສ຺ສຸ ຣາຊີສິ, ຍໍ ກິຎ຺ຈິ ມນສິຈ຺ຉສິ.

໗໒. ປຫູຕໍ ເມ ຘນໍ ສກ຺ກ, ພລໍ ໂກໂສ ຈນປ຺ປໂກ;