໕໐໙. ຫຕ຺ຖິປາລຊາຕກໍ (໑໓)

໓໓໗. ຈິຣສ຺ສໍ ວຕ ປສ຺ສາມ, ພ຺ຣາຫ຺ມຓໍ ເທວວຓ຺ຓິນໍ;

ມຫາຊຏໍ ຂາຣິຘຣໍ [ຠາຣຘຣໍ (ປີ.)], ປງ຺ກທນ຺ຕໍ ຣຊສ຺ສິຣໍ.

໓໓໘. ຈິຣສ຺ສໍ ວຕ ປສ຺ສາມ, ອິສິໍ ຘມ຺ມຄຸເຓ ຣຕໍ;

ກາສາຍວຕ຺ຖວສນໍ, ວາກຈີຣໍ ປຏິຈ຺ຉທໍ.

໓໓໙. ອາສນໍ ອຸທກໍ ປຊ຺ຊໍ, ປຏິຄຓ຺ຫາຕຸ ໂນ ຠວໍ;

ອຄ຺ເຆ ຠວນ຺ຕໍ ປຸຈ຺ຉາມ, ອຄ຺ຆໍ ກຸຣຸຕຸ ໂນ ຠວໍ.

໓໔໐. ອຘິຈ຺ຈ ເວເທ ປຣິເຍສ ວິຕ຺ຕໍ, ປຸຕ຺ເຕ ຄເຫ [ເຄເຫ (ສີ. ສ຺ຍາ. ປີ.)] ຕາຕ ປຕິຏ຺ຐເປຕ຺ວາ;

ຄນ຺ເຘ ຣເສ ປຈ຺ຈນຸຠຸຍ຺ຍ [ປຈ຺ຈນຸໂຠຕ຺ວ (ສ຺ຍາ.), ປຈ຺ຈນຸຠຸຕ຺ວ (ປີ.)] ສພ຺ພໍ, ອຣຎ຺ຎໍ ສາຘຸ ມຸນິ ໂສ ປສຕ຺ໂຖ.

໓໔໑. ເວທາ ນ ສຈ຺ຈາ ນ ຈ ວິຕ຺ຕລາໂຠ, ນ ປຸຕ຺ຕລາເຠນ ຊຣໍ ວິຫນ຺ຕິ;

ຄນ຺ເຘ ຣເສ ມຸຈ຺ຈນ [ມຸຎ຺ຈນ (ສີ. ກ.)] ມາຫຸ ສນ຺ໂຕ, ສກມ຺ມຸນາ [ສກມ຺ມນາ (ສີ. ປີ.)] ໂຫຕິ ຜລູປປຕ຺ຕິ.

໓໔໒. ອທ຺ຘາ ຫິ ສຈ຺ຈໍ ວຈນໍ ຕເວຕໍ, ສກມ຺ມຸນາ ໂຫຕິ ຜລູປປຕ຺ຕິ;

ຊິຓ຺ຓາ ຈ ມາຕາປິຕໂຣ ຕວີເມ [ຕເວເມ (ສີ.), ຕວ ຍິເມ (ສ຺ຍາ. ປີ.)], ປສ຺ເສຍ຺ຍຸໍ ຕໍ ວສ຺ສສຕໍ ອໂຣຄໍ [ອໂຣຄ຺ຍໍ (ສ຺ຍາ. ກ.)].

໓໔໓. ຍສ຺ສສ຺ສ ສກ຺ຂີ ມຣເຓນ ຣາຊ, ຊຣາຍ ເມຕ຺ຕີ ນຣວີຣເສຏ຺ຐ;

ໂຍ ຈາປິ ຊຎ຺ຎາ ນ ມຣິສ຺ສໍ ກທາຈິ, ປສ຺ເສຍ຺ຍຸໍ ຕໍ ວສ຺ສສຕໍ ອໂຣຄໍ.

໓໔໔. ຍຖາປິ ນາວໍ ປຸຣິໂສ ທກມ຺ຫິ, ເອເຣຕິ ເຈ ນໍ ອຸປເນຕິ ຕີຣໍ;

ເອວມ຺ປິ ພ຺ຍາຘີ ສຕຕໍ ຊຣາ ຈ, ອຸປເນຕິ ມຈ຺ຈໍ [ມຈ຺ຈຸ (ສ຺ຍາ. ປີ.)] ວສມນ຺ຕກສ຺ສ.

໓໔໕. ປງ຺ໂກ ຈ ກາມາ ປລິໂປ ຈ ກາມາ, ມໂນຫຣາ ທຸຕ຺ຕຣາ ມຈ຺ຈຸເຘຍ຺ຍາ;

ເອຕສ຺ມິໍ ປງ຺ເກ ປລິເປ ພ຺ຍສນ຺ນາ [ວິສນ຺ນາ (ສ຺ຍາ. ກ.)], ຫີນຕ຺ຕຣູປາ ນ ຕຣນ຺ຕິ ປາຣໍ.

໓໔໖. ອຍໍ ປຸເຣ ລຸທ຺ທມກາສິ ກມ຺ມໍ, ສ຺ວາຍໍ ຄຫີໂຕ ນ ຫິ ໂມກ຺ຂິໂຕ ເມ;

ໂອຣຸນ຺ຘິຍາ ນໍ ປຣິຣກ຺ຂິສ຺ສາມິ, ມາຍໍ ປຸນ ລຸທ຺ທມກາສິ ກມ຺ມໍ.

໓໔໗. ຄວໍວ [ຄາວໍວ (ສີ.)] ນຏ຺ຐໍ ປຸຣິໂສ ຍຖາ ວເນ, ອນ຺ເວສຕີ [ປຣິເຍສຕີ (ສີ. ປີ.)] ຣາຊ ອປສ຺ສມາໂນ;

ເອວໍ ນຏ຺ໂຐ ເອສຸກາຣີ ມມຕ຺ໂຖ, ໂສຫໍ ກຖໍ ນ ຄເວເສຍ຺ຍໍ ຣາຊ.

໓໔໘. ຫິຍ຺ໂຍຕິ ຫິຍ຺ຍຕິ [ຫີໂຍຕິ ຫີຍຕິ (ສີ.)] ໂປໂສ, ປເຣຕິ ປຣິຫາຍຕິ;

ອນາຄຕໍ ເນຕມຕ຺ຖີຕິ ຎຕ຺ວາ, ອຸປ຺ປນ຺ນຉນ຺ທໍ ໂກ ປນຸເທຍ຺ຍ ຘີໂຣ.

໓໔໙. ປສ຺ສາມິ ໂວຫໍ ທຫຣໍ [ທຫຣີ (ສ຺ຍາ. ປີ. ກ.)] ກຸມາຣິໍ, ມຕ຺ຕູປມໍ ເກຕກປຸປ຺ຜເນຕ຺ຕໍ;

ອຠຸຕ຺ຕໂຠເຄ [ອຠຸຕ຺ວ ໂຠເຄ (ສ຺ຍາ. ກ. ອຏ຺ຐ.), ອຠຸຕ຺ວ ໂຠເຄ (ປີ.), ໂຠເຄ ອຕຸຕ຺ວາ (ກ.)] ປຐເມ ວຍສ຺ມິໍ, ອາທາຍ ມຈ຺ຈຸ ວຊເຕ ກຸມາຣິໍ.

໓໕໐. ຍຸວາ ສຸຊາໂຕ ສຸມຸໂຂ ສຸທສ຺ສໂນ, ສາໂມ ກຸສຸມ຺ຠປຣິກິຓ຺ຓມສ຺ສຸ;

ຫິຕ຺ວານ ກາເມ ປຏິກຈ຺ຈ [ປຏິຄຈ຺ຈ (ສີ.), ປຏິຄຈ຺ຉ (ສ຺ຍາ. ປີ.)] ເຄຫໍ, ອນຸຊານ ມໍ ປພ຺ພຊິສ຺ສາມິ ເທວ.

໓໕໑. ສາຂາຫິ ຣຸກ຺ໂຂ ລຠເຕ ສມຎ຺ຎໍ, ປຫີນສາຂໍ ປນ ຂາຓຸມາຫຸ;

ປຫີນປຸຕ຺ຕສ຺ສ ມມຊ຺ຊ ໂຠຕິ, ວາເສຏ຺ຐິ ຠິກ຺ຂາຈຣິຍາຍ ກາໂລ.

໓໕໒. ອຆສ຺ມິ ໂກຎ຺ຈາວ ຍຖາ ຫິມຈ຺ຈເຍ, ກຕານິ [ຕນ຺ຕານິ (ສີ. ປີ.)] ຊາລານິ ປທາລິຍ [ປທາເລຍ຺ຍ (ສີ.)] ຫໍສາ;

ຄຈ຺ຉນ຺ຕິ ປຸຕ຺ຕາ ຈ ປຕີ ຈ ມຍ຺ຫໍ, ສາຫໍ ກຖໍ ນານຸວເຊ ປຊານໍ.

໓໕໓. ເອເຕ ຠຸຕ຺ວາ ວມິຕ຺ວາ ຈ, ປກ຺ກມນ຺ຕິ ວິຫງ຺ຄມາ;

ເຍ ຈ ຠຸຕ຺ວານ ວມິໍສຸ, ເຕ ເມ ຫຕ຺ຖຕ຺ຕ [ຫຕ຺ຖຕ຺ຖ (ສີ. ສ຺ຍາ. ປີ.)] ມາຄຕາ.

໓໕໔. ອວມີ ພ຺ຣາຫ຺ມໂຓ ກາເມ, ໂສ [ເຕ (ສີ. ປີ.)] ຕ຺ວໍ ປຈ຺ຈາວມິສ຺ສສິ;

ວນ຺ຕາໂທ ປຸຣິໂສ ຣາຊ, ນ ໂສ ໂຫຕິ ປສໍສິໂຍ.

໓໕໕. ປງ຺ເກ ຈ [ປງ຺ເກວ (ສີ. ປີ.)] ໂປສໍ ປລິເປ ພ຺ຍສນ຺ນໍ, ພລີ ຍຖາ ທຸພ຺ພລມຸທ຺ຘເຣຍ຺ຍ;

ເອວມ຺ປິ ມໍ ຕ຺ວໍ ອຸທຕາຣິ ໂຠຕິ, ປຎ຺ຈາລິ ຄາຖາຫິ ສຸຠາສິຕາຫິ.

໓໕໖. ອິທໍ ວຕ຺ວາ ມຫາຣາຊາ, ເອສຸກາຣີ ທິສມ຺ປຕິ;

ຣຏ຺ຐໍ ຫິຕ຺ວານ ປພ຺ພຊິ, ນາໂຄ ເຉຕ຺ວາວ ພນ຺ຘນໍ.

໓໕໗. ຣາຊາ ຈ ປພ຺ພຊ຺ຊມໂຣຈຍິຕ຺ຖ, ຣຏ຺ຐໍ ປຫາຍ ນຣວີຣເສຏ຺ໂຐ;

ຕຸວມ຺ປິ ໂນ ໂຫຕິ ຍເຖວ ຣາຊາ, ອມ຺ເຫຫິ ຄຸຕ຺ຕາ ອນຸສາສ ຣຊ຺ຊໍ.

໓໕໘. ຣາຊາ ຈ ປພ຺ພຊ຺ຊມໂຣຈຍິຕ຺ຖ, ຣຏ຺ຐໍ ປຫາຍ ນຣວີຣເສຏ຺ໂຐ;

ອຫມ຺ປິ ເອກາ [ເອກາວ (ສີ.)] ຈຣິສ຺ສາມິ ໂລເກ, ຫິຕ຺ວານ ກາມານິ ມໂນຣມານິ.

໓໕໙. ຣາຊາ ຈ ປພ຺ພຊ຺ຊມໂຣຈຍິຕ຺ຖ, ຣຏ຺ຐໍ ປຫາຍ ນຣວີຣເສຏ຺ໂຐ;

ອຫມ຺ປິ ເອກາ ຈຣິສ຺ສາມິ ໂລເກ, ຫິຕ຺ວານ ກາມານິ ຍໂຖຘິການິ.

໓໖໐. ອຈ຺ເຈນ຺ຕິ ກາລາ ຕຣຍນ຺ຕິ ຣຕ຺ຕິໂຍ, ວໂຍຄຸຓາ ອນຸປຸພ຺ພໍ ຊຫນ຺ຕິ;

ອຫມ຺ປິ ເອກາ ຈຣິສ຺ສາມິ ໂລເກ, ຫິຕ຺ວານ ກາມານິ ມໂນຣມານິ.

໓໖໑. ອຈ຺ເຈນ຺ຕິ ກາລາ ຕຣຍນ຺ຕິ ຣຕ຺ຕິໂຍ, ວໂຍຄຸຓາ ອນຸປຸພ຺ພໍ ຊຫນ຺ຕິ;

ອຫມ຺ປິ ເອກາ ຈຣິສ຺ສາມິ ໂລເກ, ຫິຕ຺ວານ ກາມານິ ຍໂຖຘິການິ.

໓໖໒. ອຈ຺ເຈນ຺ຕິ ກາລາ ຕຣຍນ຺ຕິ ຣຕ຺ຕິໂຍ, ວໂຍຄຸຓາ ອນຸປຸພ຺ພໍ ຊຫນ຺ຕິ;

ອຫມ຺ປິ ເອກາ ຈຣິສ຺ສາມິ ໂລເກ, ສີຕິຠູຕາ [ສີຕີຠູຕາ (ສີ.)] ສພ຺ພມຕິຈ຺ຈ ສງ຺ຄນ຺ຕິ.

ຫຕ຺ຖິປາລຊາຕກໍ ເຕຣສມໍ.