໕໐໘. ປຎ຺ຈປຓ຺ຑິຕຊາຕກໍ (໑໒)

໓໑໕. ປຎ຺ຈ ປຓ຺ຑິຕາ ສມາຄຕາຕ຺ຖ, ປຎ຺ຫາ ເມ ປຏິຠາຕິ ຕໍ ສຸຓາຖ;

ນິນ຺ທິຍມຕ຺ຖໍ ປສໍສິຍໍ ວາ, ກສ຺ເສວາວິກເຣຍ຺ຍ [ກສ຺ສ ວາວີກເຣຍ຺ຍ (ກ.)] ຄຸຍ຺ຫມຕ຺ຖໍ.

໓໑໖. ຕ຺ວໍ ອາວິກໂຣຫິ ຠູມິປາລ, ຠຕ຺ຕາ ຠາຣສໂຫ ຕຸວໍ ວເທ ຕໍ;

ຕວ ຉນ຺ທຣຸຈີນິ [ຉນ຺ທຎ຺ຈ ຣຸຈິຎ຺ຈ (ສີ. ປີ.)] ສມ຺ມສິຕ຺ວາ, ອຖ ວກ຺ຂນ຺ຕິ ຊນິນ຺ທ ປຎ຺ຈ ຘີຣາ.

໓໑໗. ຍາ ສີລວຕີ ອນຎ຺ຎເຖຍ຺ຍາ [ອນຎ຺ຎເຘຍ຺ຍາ (ສີ. ປີ.)], ຠຕ຺ຕຸຈ຺ຉນ຺ທວສານຸຄາ (ປິຍາ) [( ) ນຕ຺ຖິ ສີ. ປີ. ໂປຕ຺ຖເກສຸ] ມນາປາ;

ນິນ຺ທິຍມຕ຺ຖໍ ປສໍສິຍໍ ວາ, ຠຣິຍາຍາວິກເຣຍ຺ຍ [ຠຣິຍາຍ ວາວີກເຣຍ຺ຍ (ກ.)] ຄຸຍ຺ຫມຕ຺ຖໍ.

໓໑໘. ໂຍ ກິຈ຺ຉຄຕສ຺ສ ອາຕຸຣສ຺ສ, ສຣຓໍ ໂຫຕິ ຄຕີ ປຣາຍນຎ຺ຈ;

ນິນ຺ທິຍມຕ຺ຖໍ ປສໍສິຍໍ ວາ, ສຂິໂນ ວາວິກເຣຍ຺ຍ ຄຸຍ຺ຫມຕ຺ຖໍ.

໓໑໙. ເຊຏ຺ໂຐ [ໂຍ ເຊຏ຺ໂຐ (ສ຺ຍາ.)] ອຖ ມຊ຺ຌິໂມ ກນິຏ຺ໂຐ, ໂຍ [ໂສ (ສີ. ສ຺ຍາ. ປີ.)] ເຈ ສີລສມາຫິໂຕ ຐິຕຕ຺ໂຕ;

ນິນ຺ທິຍມຕ຺ຖໍ ປສໍສິຍໍ ວາ, ຠາຕຸ ວາວີກເຣຍ຺ຍ ຄຸຍ຺ຫມຕ຺ຖໍ.

໓໒໐. ໂຍ ເວ ປິຕຸຫທຍສ຺ສ ປທ຺ຘຄູ [ປຕ຺ຖຄູ (ສ຺ຍາ.), ປຕ຺ຕຄູ (ກ.)], ອນຸຊາໂຕ ປິຕຣໍ ອໂນມປຎ຺ໂຎ;

ນິນ຺ທິຍມຕ຺ຖໍ ປສໍສິຍໍ ວາ, ປຸຕ຺ຕສ຺ສາວິກເຣຍ຺ຍ [ປຸຕ຺ຕສ຺ສ ວາວີກເຣຍ຺ຍ (ກ.)] ຄຸຍ຺ຫມຕ຺ຖໍ.

໓໒໑. ມາຕາ ທ຺ວິປທາຊນິນ຺ທເສຏ຺ຐ, ຍາ ນໍ [ໂຍ ຕໍ (ສີ. ປີ.)] ໂປເສຕິ ຉນ຺ທສາ ປິເຍນ;

ນິນ຺ທິຍມຕ຺ຖໍ ປສໍສິຍໍ ວາ, ມາຕຸຍາວີກເຣຍ຺ຍ [ມາຕຸຍາ ວາວີກເຣຍ຺ຍ (ກ.)] ຄຸຍ຺ຫມຕ຺ຖໍ.

໓໒໒. ຄຸຍ຺ຫສ຺ສ ຫິ ຄຸຍ຺ຫເມວ ສາຘຸ, ນ ຫິ ຄຸຍ຺ຫສ຺ສ ປສຕ຺ຖມາວິກມ຺ມໍ;

ອນິປ຺ຜນ຺ນຕາ [ອນິປ຺ຜາທາຍ (ສີ. ປີ.), ອນິປ຺ຜນ຺ນຕາຍ (ສ຺ຍາ.), ອາ ນິປ຺ຜາທາ (?)] ສເຫຍ຺ຍ ຘີໂຣ, ນິປ຺ຜນ຺ໂນວ [ນິປ຺ຜນ຺ນຕ຺ໂຖ (ສີ. ປີ.), ນິປ຺ຜນ຺ນຕ຺ໂຖວ (ສ຺ຍາ.)] ຍຖາສຸຂໍ ຠເຓຍ຺ຍ.

໓໒໓. ກິໍ ຕ຺ວໍ ວິມໂນສິ ຣາຊເສຏ຺ຐ, ທ຺ວິປທຊນິນ຺ທ [ທິປທິນ຺ທ (ສີ. ສ຺ຍາ. ປີ.)] ວຈນໍ ສຸໂຓມ ເມຕໍ [ເນຕໍ (ສີ. ປີ.), ເຕຕໍ (ສ຺ຍາ.)];

ກິໍ ຈິນ຺ຕຍມາໂນ ທຸມ຺ມໂນສິ, ນູນ ເທວ ອປຣາໂຘ ອຕ຺ຖິ ມຍ຺ຫໍ.

໓໒໔. ‘‘ປຓ຺ເຫ [ປຎ຺ໂຎ (ສີ. ປີ.), ປຎ຺ເຫ (ສ຺ຍາ.), ປນ຺ເຫ (ກ.)] ວຊ຺ໂຌ ມໂຫສໂຘ’’ຕິ, ອາຓຕ຺ໂຕ ເມ ວຘາຍ ຠູຣິປຎ຺ໂຎ;

ຕໍ ຈິນ຺ຕຍມາໂນ ທຸມ຺ມໂນສ຺ມິ, ນ ຫິ ເທວີ ອປຣາໂຘ ອຕ຺ຖິ ຕຸຍ຺ຫໍ.

໓໒໕. ອຠິໂທສຄໂຕ ທານິ ເອຫິສິ, ກິໍ ສຸຕ຺ວາ ກິໍ ສງ຺ກເຕ ມໂນ ເຕ;

ໂກ ເຕ ກິມໂວຈ ຠູຣິປຎ຺ຎ, ອິງ຺ຆ ວຈນໍ ສຸໂຓມ ພ຺ຣູຫິ ເມຕໍ.

໓໒໖. ‘‘ປຓ຺ເຫ ວຊ຺ໂຌ ມໂຫສໂຘ’’ຕິ, ຍທິ ເຕ ມນ຺ຕຍິຕໍ ຊນິນ຺ທ ໂທສໍ;

ຠຣິຍາຍ ຣໂຫຄໂຕ ອສໍສິ, ຄຸຍ຺ຫໍ ປາຕຸກຕໍ ສຸຕໍ ມເມຕໍ.

໓໒໗. ຍໍ ສາລວນສ຺ມິໍ ເສນໂກ, ປາປກມ຺ມໍ ອກາສິ ອສພ຺ຠິຣູປໍ;

ສຂິໂນວ ຣໂຫຄໂຕ ອສໍສິ, ຄຸຍ຺ຫໍ ປາຕຸກຕໍ ສຸຕໍ ມເມຕໍ.

໓໒໘. ປຸກ຺ກຸສ [ປກ຺ກຸສ (ກ.) ຊາ. ໑.໗.໔໑ ປຓ຺ຓຊາຕເກ ປສ຺ສິຕພ຺ພໍ] ປຸຣິສສ຺ສ ເຕ ຊນິນ຺ທ, ອຸປ຺ປນ຺ໂນ ໂຣໂຄ ອຣາຊຍຸຕ຺ໂຕ;

ຠາຕຸຎ຺ຈ [ຠາຕຸຈ຺ຈ (ສີ. ປີ.), ຠາຕຸວ (ສ຺ຍາ.)] ຣໂຫຄໂຕ ອສໍສິ, ຄຸຍ຺ຫໍ ປາຕຸກຕໍ ສຸຕໍ ມເມຕໍ.

໓໒໙. ອາພາໂຘຍໍ ອສພ຺ຠິຣູໂປ, ກາມິນ຺ໂທ [ກາວິນ຺ໂທ (ສີ. ປີ.)] ນຣເທເວນ ຜຸຏ຺ໂຐ;

ປຸຕ຺ຕສ຺ສ ຣໂຫຄໂຕ ອສໍສິ, ຄຸຍ຺ຫໍ ປາຕຸກຕໍ ສຸຕໍ ມເມຕໍ.

໓໓໐. ອຏ຺ຐວງ຺ກໍ ມຓິຣຕນໍ ອຸຬາຣໍ, ສກ຺ໂກ ເຕ ອທທາ ປິຕາມຫສ຺ສ;

ເທວິນ຺ທສ຺ສ ຄຕໍ ຕທຊ຺ຊ ຫຕ຺ຖໍ [ເທວິນ຺ທສ຺ສ ຕທຊ຺ຊ ຫຕ຺ຖຄຕໍ (ກ.)], ມາຕຸຎ຺ຈ ຣໂຫຄໂຕ ອສໍສິ;

ຄຸຍ຺ຫໍ ປາຕຸກຕໍ ສຸຕໍ ມເມຕໍ.

໓໓໑. ຄຸຍ຺ຫສ຺ສ ຫິ ຄຸຍ຺ຫເມວ ສາຘຸ, ນ ຫິ ຄຸຍ຺ຫສ຺ສ ປສຕ຺ຖມາວິກມ຺ມໍ;

ອນິປ຺ຜນ຺ນຕາ ສເຫຍ຺ຍ ຘີໂຣ, ນິປ຺ຜນ຺ໂນວ ຍຖາສຸຂໍ ຠເຓຍ຺ຍ.

໓໓໒. ນ ຄຸຍ຺ຫມຕ຺ຖໍ ວິວເຣຍ຺ຍ, ຣກ຺ເຂຍ຺ຍ ນໍ ຍຖາ ນິຘິໍ;

ນ ຫິ ປາຕຸກໂຕ ສາຘຸ, ຄຸຍ຺ໂຫ ອຕ຺ໂຖ ປຊານຕາ.

໓໓໓. ຖິຍາ ຄຸຍ຺ຫໍ ນ ສໍເສຍ຺ຍ, ອມິຕ຺ຕສ຺ສ ຈ ປຓ຺ຑິໂຕ;

ໂຍ ຈາມິເສນ ສໍຫີໂຣ, ຫທຍຕ຺ເຖໂນ ຈ ໂຍ ນໂຣ.

໓໓໔. ຄຸຍ຺ຫມຕ຺ຖໍ ອສມ຺ພຸທ຺ຘໍ, ສມ຺ໂພຘຍຕິ ໂຍ ນໂຣ;

ມນ຺ຕເຠທຠຍາ ຕສ຺ສ, ທາສຠູໂຕ ຕິຕິກ຺ຂຕິ.

໓໓໕. ຍາວນ຺ໂຕ ປຸຣິສສ຺ສຕ຺ຖໍ, ຄຸຍ຺ຫໍ ຊານນ຺ຕິ ມນ຺ຕິນໍ;

ຕາວນ຺ໂຕ ຕສ຺ສ ອຸພ຺ເພຄາ, ຕສ຺ມາ ຄຸຍ຺ຫໍ ນ ວິສ຺ສເຊ.

໓໓໖. ວິວິຈ຺ຈ ຠາເສຍ຺ຍ ທິວາ ຣຫສ຺ສໍ, ຣຕ຺ຕິໍ ຄິຣໍ ນາຕິເວລໍ ປມຸຎ຺ເຈ;

ອຸປສ຺ສຸຕິກາ ຫິ ສຸຓນ຺ຕິ ມນ຺ຕໍ, ຕສ຺ມາ ມນ຺ໂຕ ຂິປ຺ປມຸເປຕິ ເຠທນ຺ຕິ.

ປຎ຺ຈປຓ຺ຑິຕຊາຕກໍ ທ຺ວາທສມໍ.