໕໐໕. ໂສມນສ຺ສຊາຕກໍ (໙)

໒໑໑. ໂກ ຕໍ ຫິໍສຕິ ເຫເຐຕິ, ກິໍ [ກິນ຺ນຸ (ປີ. ກ.)] ທຸມ຺ມໂນ ໂສຈສິ ອປ຺ປຕີໂຕ;

ກສ຺ສຊ຺ຊ ມາຕາປິຕໂຣ ຣຸທນ຺ຕຸ, ກ຺ວຊ຺ຊ ເສຕຸ [ໂກ ນ຺ເວຊ຺ຊ ເສຕິ (ກ.), ໂກ ອຊ຺ຊ ເສຕຸ (?)] ນິຫໂຕ ປຖພ຺ຍາ.

໒໑໒. ຕຸຏ຺ໂຐສ຺ມິ ເທວ ຕວ ທສ຺ສເນນ, ຈິຣສ຺ສໍ ປສ຺ສາມິ ຕໍ ຠູມິປາລ;

ອຫິໍສໂກ ເຣຓຸມນຸປ຺ປວິສ຺ສ, ປຸຕ຺ເຕນ ເຕ ເຫຐຍິໂຕສ຺ມິ [ໂປຖຍິໂຕສ຺ມິ (ກ.)] ເທວ.

໒໑໓. ອາຍນ຺ຕຸ ໂທວາຣິກາ ຂຄ຺ຄພນ຺ຘາ [ຂຄ຺ຄພທ຺ຘາ (ສີ. ປີ.)], ກາສາວິຍາ ຍນ຺ຕຸ [ຫນ຺ຕຸ (ກ.)] ອນ຺ເຕປຸຣນ຺ຕໍ;

ຫນ຺ຕ຺ວານ ຕໍ ໂສມນສ຺ສໍ ກຸມາຣໍ, ເຉຕ຺ວານ ສີສໍ ວຣມາຫຣນ຺ຕຸ.

໒໑໔. ເປສິຕາ ຣາຊິໂນ ທູຕາ, ກຸມາຣໍ ເອຕທພ຺ຣວຸໍ;

ອິສ຺ສເຣນ ວິຕິຓ຺ໂຓສິ, ວຘໍ ປຕ຺ໂຕສິ ຂຕ຺ຕິຍ.

໒໑໕. ສ ຣາຊປຸຕ຺ໂຕ ປຣິເທວຍນ຺ໂຕ, ທສງ຺ຄຸລິໍ ອຎ຺ຊລິໍ ປຄ຺ຄເຫຕ຺ວາ;

ອຫມ຺ປິ ອິຈ຺ຉາມິ ຊນິນ຺ທ ທຏ຺ຐຸໍ, ຊີວໍ ມໍ ເນຕ຺ວາ [ຊີວໍ ປເນຕ຺ວາ (ສີ. ປີ.)] ປຏິທສ຺ສເຍຖ.

໒໑໖. ຕສ຺ສ ຕໍ ວຈນໍ ສຸຕ຺ວາ, ຣຎ຺ໂຎ ປຸຕ຺ຕໍ ອທສ຺ສຍຸໍ;

ປຸຕ຺ໂຕ ຈ ປິຕຣໍ ທິສ຺ວາ, ທູຣໂຕວຊ຺ຌຠາສຖ.

໒໑໗. ອາຄຈ຺ຉຸໍ [ອາຄຎ຺ຉຸໍ (ສີ.), ອາຄຎ຺ຉຸ (ປີ.)] ໂທວາຣິກາ ຂຄ຺ຄພນ຺ຘາ, ກາສາວິຍາ ຫນ຺ຕຸ ມມໍ ຊນິນ຺ທ;

ອກ຺ຂາຫິ ເມ ປຸຈ຺ຉິໂຕ ເອຕມຕ຺ຖໍ, ອປຣາໂຘ ໂກ ນິຘ ມມຊ຺ຊ ອຕ຺ຖິ.

໒໑໘. ສາຍຎ຺ຈ ປາໂຕ ອຸທກໍ ສຊາຕິ, ອຄ຺ຄິໍ ສທາ ປາຣິຈຣຕປ຺ປມຕ຺ໂຕ;

ຕໍ ຕາທິສໍ ສໍຍຕໍ ພ຺ຣຫ຺ມຈາຣິໍ, ກສ຺ມາ ຕຸວໍ ພ຺ຣູສິ ຄຫປ຺ປຕີຕິ.

໒໑໙. ຕາລາ ຈ ມູລາ ຈ ຜລາ ຈ ເທວ, ປຣິຄ຺ຄຫາ ວິວິຘາ ສນ຺ຕິມສ຺ສ;

ເຕ ຣກ຺ຂຕິ ໂຄປຍຕປ຺ປມຕ຺ໂຕ, [ພ຺ຣາຫ຺ມໂຓ ຄຫປຕິ ເຕນ ໂຫຕິ (ສີ. ສ຺ຍາ. ປີ.)] ຕສ຺ມາ ອຫໍ ພ຺ຣູມິ ຄຫປ຺ປຕີຕິ [ພ຺ຣາຫ຺ມໂຓ ຄຫປຕິ ເຕນ ໂຫຕິ (ສີ. ສ຺ຍາ. ປີ.)].

໒໒໐. ສຈ຺ຈໍ ໂຂ ເອຕໍ ວທສິ ກຸມາຣ, ປຣິຄ຺ຄຫາ ວິວິຘາ ສນ຺ຕິມສ຺ສ;

ເຕ ຣກ຺ຂຕິ ໂຄປຍຕປ຺ປມຕ຺ໂຕ, ສ [ນຕ຺ຖິ ອິທໍ ສີ. ສ຺ຍາ. ປີ. ໂປຕ຺ຖເກສຸ] ພ຺ຣາຫ຺ມໂຓ ຄຫປຕິ ເຕນ ໂຫຕິ.

໒໒໑. ສຸຓນ຺ຕຸ ມຍ຺ຫໍ ປຣິສາ ສມາຄຕາ, ສເນຄມາ ຊານປທາ ຈ ສພ຺ເພ;

ພາລາຍໍ ພາລສ຺ສ ວໂຈ ນິສມ຺ມ, ອເຫຕຸນາ ຆາຕຍເຕ ມໍ [ຆາຕຍເຕ (ສີ. ປີ.)] ຊນິນ຺ໂທ.

໒໒໒. ທຬ຺ຫສ຺ມິ ມູເລ ວິສເຏ ວິຣູຬ຺ເຫ, ທຸນ຺ນິກ຺ກໂຍ ເວຬຸ ປສາຂຊາໂຕ;

ວນ຺ທາມິ ປາທານິ ຕວ [ຕວໍ (ສີ. ປີ.)] ຊນິນ຺ທ, ອນຸຊານ ມໍ ປພ຺ພຊິສ຺ສາມິ ເທວ.

໒໒໓. ຠຸຎ຺ຊສ຺ສຸ ໂຠເຄ ວິປຸເລ ກຸມາຣ, ສພ຺ພຎ຺ຈ ເຕ ອິສ຺ສຣິຍໍ ທທາມິ;

ອຊ຺ເຊວ ຕ຺ວໍ ກຸຣູນໍ ໂຫຫິ ຣາຊາ, ມາ ປພ຺ພຊີ ປພ຺ພຊ຺ຊາ ຫິ ທຸກ຺ຂາ.

໒໒໔. ກິນ຺ນູຘ ເທວ ຕວມຕ຺ຖິ ໂຠຄາ, ປຸພ຺ເພວຫໍ [ປຸພ຺ເພ ຈຫໍ (ກ.)] ເທວໂລເກ ຣມິສ຺ສໍ;

ຣູເປຫິ ສທ຺ເທຫິ ອໂຖ ຣເສຫິ, ຄນ຺ເຘຫິ ຜສ຺ເສຫິ ມໂນຣເມຫິ.

໒໒໕. ຠຸຕ຺ຕາ ຈ ເມ [ຠຸຕ຺ຕາ (ສີ. ປີ.)] ໂຠຄາ ຕິທິວສ຺ມິໍ ເທວ, ປຣິວາຣິຕາ [ປຣິຈາຣິຕາ (ກ.)] ອຈ຺ຉຣານໍ ຄເຓນ [ອຈ຺ຉຣາສໍຄເຓນ (ສ຺ຍາ. ປີ. ກ.)];

ຕຸວຎ຺ຈ [ຕວຎ຺ຈ (ສີ. ປີ.)] ພາລໍ ປຣເນຍ຺ຍໍ ວິທິຕ຺ວາ, ນ ຕາທິເສ ຣາຊກຸເລ ວເສຍ຺ຍໍ.

໒໒໖. ສຈາຫໍ ພາໂລ ປຣເນຍ຺ໂຍ ອສ຺ມິ, ເອກາປຣາຘໍ [ເອຕາປຣາຘໍ (ກ.)] ຂມ ປຸຕ຺ຕ ມຍ຺ຫໍ;

ປຸນປິ ເຈ ເອທິສກໍ ຠເວຍ຺ຍ, ຍຖາມຕິໍ ໂສມນສ຺ສ ກໂຣຫິ.

໒໒໗. ອນິສມ຺ມ ກຕໍ ກມ຺ມໍ, ອນວຕ຺ຖາຍ ຈິນ຺ຕິຕໍ;

ເຠສຊ຺ຊສ຺ເສວ ເວຠງ຺ໂຄ, ວິປາໂກ ໂຫຕິ ປາປໂກ.

໒໒໘. ນິສມ຺ມ ຈ ກຕໍ ກມ຺ມໍ, ສມ຺ມາວຕ຺ຖາຍ ຈິນ຺ຕິຕໍ;

ເຠສຊ຺ຊສ຺ເສວ ສມ຺ປຕ຺ຕິ, ວິປາໂກ ໂຫຕິ ຠທ຺ຣໂກ.

໒໒໙. ອລໂສ ຄິຫີ ກາມໂຠຄີ ນ ສາຘຸ, ອສຎ຺ຎໂຕ ປພ຺ພຊິໂຕ ນ ສາຘຸ;

ຣາຊາ ນ ສາຘຸ ອນິສມ຺ມກາຣີ, ໂຍ ປຓ຺ຑິໂຕ ໂກຘໂນ ຕໍ ນ ສາຘຸ.

໒໓໐. ນິສມ຺ມ ຂຕ຺ຕິໂຍ ກຍິຣາ, ນານິສມ຺ມ ທິສມ຺ປຕິ;

ນິສມ຺ມກາຣິໂນ ຣາຊ, ຍໂສ ກິຕ຺ຕິ ຈ ວຑ຺ຒຕິ.

໒໓໑. ນິສມ຺ມ ທຓ຺ຑໍ ປຓເຍຍ຺ຍ ອິສ຺ສໂຣ, ເວຄາ ກຕໍ ຕປ຺ປຕິ ຠູມິປາລ;

ສມ຺ມາປຓີຘີ ຈ ນຣສ຺ສ ອຕ຺ຖາ, ອນານຸຕປ຺ປາ ເຕ ຠວນ຺ຕິ ປຈ຺ຉາ.

໒໓໒. ອນານຸຕປ຺ປານິ ຫິ ເຍ ກໂຣນ຺ຕິ, ວິຠຊ຺ຊ ກມ຺ມາຍຕນານິ ໂລເກ;

ວິຎ຺ຎຸປ຺ປສຕ຺ຖານິ ສຸຂຸທ຺ຣຍານິ, ຠວນ຺ຕິ ພຸທ຺ຘານຸມຕານິ [ວທ຺ຘານຸມຕານິ (ສີ. ປີ.)] ຕານິ.

໒໓໓. ອາຄຈ຺ຉຸໍ ໂທວາຣິກາ ຂຄ຺ຄພນ຺ຘາ, ກາສາວິຍາ ຫນ຺ຕຸ ມມໍ ຊນິນ຺ທ;

ມາຕຸຎ຺ຈ [ມາຕຸຈ຺ຈ (ປີ.)] ອງ຺ກສ຺ມິມຫໍ ນິສິນ຺ໂນ, ອາກຑ຺ຒິໂຕ ສຫສາ ເຕຫິ ເທວ.

໒໓໔. ກຏຸກຎ຺ຫິ ສມ຺ພາຘໍ ສຸກິຈ຺ຉໍ [ສຸກິຈ຺ຉ (ສີ. ປີ.)] ປຕ຺ໂຕ, ມຘຸຣມ຺ປິ ຍໍ ຊີວິຕໍ ລທ຺ຘ ຣາຊ;

ກິຈ຺ເຉນຫໍ ອຊ຺ຊ ວຘາ ປມຸຕ຺ໂຕ, ປພ຺ພຊ຺ຊເມວາຠິມໂນຫມສ຺ມິ.

໒໓໕. ປຸຕ຺ໂຕ ຕວາຍໍ ຕຣຸໂຓ ສຸຘມ຺ເມ, ອນຸກມ຺ປໂກ ໂສມນສ຺ໂສ ກຸມາໂຣ;

ຕໍ ຍາຈມາໂນ ນ ລຠາມິ ສ຺ວຊ຺ຊ [ສຊ຺ຊ (ສີ. ປີ.)], ອຣຫສິ ນໍ ຍາຈິຕເວ [ຍາຈິຕຸເຍ (ກ.)] ຕຸວມ຺ປິ.

໒໓໖. ຣມສ຺ສຸ ຠິກ຺ຂາຈຣິຍາຍ ປຸຕ຺ຕ, ນິສມ຺ມ ຘມ຺ເມສຸ ປຣິພ຺ພຊສ຺ສຸ;

ສພ຺ເພສຸ ຠູເຕສຸ ນິຘາຍ ທຓ຺ຑໍ, ອນິນ຺ທິໂຕ ພ຺ຣຫ຺ມມຸເປຫິ ຐານໍ.

໒໓໗. ອຈ຺ເຉຣ [ອຈ຺ຉຣິຍ (ສີ. ສ຺ຍາ. ປີ.)] ຣູປໍ ວຕ ຍາທິສຎ຺ຈ, ທຸກ຺ຂິຕໍ ມໍ ທຸກ຺ຂາປຍເສ ສຸຘມ຺ເມ;

ຍາຈສ຺ສຸ ປຸຕ຺ຕໍ ອິຕິ ວຸຈ຺ຈມານາ, ຠິຍ຺ໂຍວ ອຸສ຺ສາຫຍເສ ກຸມາຣໍ.

໒໓໘. ເຍ ວິປ຺ປມຸຕ຺ຕາ ອນວຊ຺ຊໂຠຄິໂນ [ໂຠຊິໂນ (ສີ. ສ຺ຍາ. ປີ.)], ປຣິນິພ຺ພຸຕາ ໂລກມິມໍ ຈຣນ຺ຕິ;

ຕມຣິຍມຄ຺ຄໍ ປຏິປຊ຺ຊມານໍ, ນ ອຸສ຺ສເຫ ວາຣຍິຕຸໍ ກຸມາຣໍ.

໒໓໙. ອທ຺ຘາ ຫເວ ເສວິຕພ຺ພາ ສປຎ຺ຎາ, ພຫຸສ຺ສຸຕາ ເຍ ພຫຸຐານຈິນ຺ຕິໂນ;

ເຍສາຍໍ ສຸຕ຺ວານ ສຸຠາສິຕານິ, ອປ຺ໂປສ຺ສຸກ຺ກາ ວີຕໂສກາ ສຸຘມ຺ມາຕິ.

ໂສມນສ຺ສຊາຕກໍ ນວມໍ.