໕໐໖. ຈມ຺ເປຍ຺ຍຊາຕກໍ (໑໐)

໒໔໐. ກາ ນຸ ວິຊ຺ຊຸຣິວາຠາສິ, ໂອສຘີ ວິຍ ຕາຣກາ;

ເທວຕາ ນຸສິ ຄນ຺ຘພ຺ພີ, ນ ຕໍ ມຎ຺ຎາມິ ມານຸສິໍ [ມານຸສີ (ສ຺ຍາ. ກ.)].

໒໔໑. ນມ຺ຫິ ເທວີ ນ ຄນ຺ຘພ຺ພີ, ນ ມຫາຣາຊ ມານຸສີ;

ນາຄກຎ຺ຎາສ຺ມິ ຠທ຺ທນ຺ເຕ, ອຕ຺ເຖນມ຺ຫິ ອິຘາຄຕາ.

໒໔໒. ວິພ຺ຠນ຺ຕຈິຕ຺ຕາ ກຸປິຕິນ຺ທ຺ຣິຍາສິ, ເນຕ຺ເຕຫິ ເຕ ວາຣິຄຓາ ສວນ຺ຕິ;

ກິໍ ເຕ ນຏ຺ຐໍ ກິໍ ປນ ປຕ຺ຖຍານາ, ອິຘາຄຕາ ນາຣິ ຕທິງ຺ຆ ພ຺ຣູຫິ.

໒໔໓. ຍມຸຄ຺ຄເຕໂຊ ອຸຣໂຄຕິ ຈາຫຸ, ນາໂຄຕິ ນໍ ອາຫຸ ຊນາ ຊນິນ຺ທ;

ຕມຄ຺ຄຫີ ປຸຣິໂສ ຊີວິກຕ຺ໂຖ, ຕໍ ພນ຺ຘນາ ມຸຎ຺ຈ ປຕີ ມເມໂສ.

໒໔໔. ກຖໍ ນ຺ວຍໍ ພລວິຣິຍູປປນ຺ໂນ, ຫຕ຺ຖຕ຺ຕ [ຫຕ຺ຖຕ຺ຖ (ສີ. ສ຺ຍາ. ປີ.)] ມາຄຈ຺ຉິ ວນິພ຺ພກສ຺ສ;

ອກ຺ຂາຫິ ເມ ນາຄກຎ຺ເຎ ຕມຕ຺ຖໍ, ກຖໍ ວິຊາເນມຸ ຄຫີຕນາຄໍ.

໒໔໕. ນຄຣມ຺ປິ ນາໂຄ ຠສ຺ມໍ ກເຣຍ຺ຍ, ຕຖາ ຫິ ໂສ ພລວິຣິຍູປປນ຺ໂນ;

ຘມ຺ມຎ຺ຈ ນາໂຄ ອປຈາຍມາໂນ, ຕສ຺ມາ ປຣກ຺ກມ຺ມ ຕໂປ ກໂຣຕິ.

໒໔໖. ຈາຕຸທ຺ທສິໍ ປຎ຺ຈທສິໍ [ປນ຺ນຣສິໍ (ສີ. ສ຺ຍາ. ປີ.)] ຈ ຣາຊ, ຈຕຸປ຺ປເຖ ສມ຺ມຕິ ນາຄຣາຊາ;

ຕມຄ຺ຄຫີ ປຸຣິໂສ ຊີວິກຕ຺ໂຖ, ຕໍ ພນ຺ຘນາ ມຸຎ຺ຈ ປຕີ ມເມໂສ.

໒໔໗. ໂສຬສິຕ຺ຖິສຫສ຺ສານິ, ອາມຸຕ຺ຕມຓິກຸຓ຺ຑລາ;

ວາຣິເຄຫສຍາ ນາຣີ [ນາຣິໂຍ (ປີ.)], ຕາປິ ຕໍ ສຣຓໍ ຄຕາ.

໒໔໘. ຘມ຺ເມນ ໂມເຈຫິ ອສາຫເສນ, ຄາເມນ ນິກ຺ເຂນ ຄວໍ ສເຕນ;

ໂອສ຺ສຏ຺ຐກາໂຍ ອຸຣໂຄ ຈຣາຕຸ, ປຸຎ຺ຎຕ຺ຖິໂກ ມຸຎ຺ຈຕຸ ພນ຺ຘນສ຺ມາ.

໒໔໙. ຘມ຺ເມນ ໂມເຈມິ ອສາຫເສນ, ຄາເມນ ນິກ຺ເຂນ ຄວໍ ສເຕນ;

ໂອສ຺ສຏ຺ຐກາໂຍ ອຸຣໂຄ ຈຣາຕຸ, ປຸຎ຺ຎຕ຺ຖິໂກ ມຸຎ຺ຈຕຸ ພນ຺ຘນສ຺ມາ.

໒໕໐. ທມ຺ມິ ນິກ຺ຂສຕໍ ລຸທ຺ທ, ຖູລຎ຺ຈ ມຓິກຸຓ຺ຑລໍ;

ຈຕຸສ຺ສທຎ຺ຈ ປລ຺ລງ຺ກໍ, ອຸມາປຸປ຺ຜສຣິນ຺ນິຠໍ.

໒໕໑. ທ຺ເວ ຈ ສາທິສິໂຍ ຠຣິຍາ, ອຸສຠຎ຺ຈ ຄວໍ ສຕໍ;

ໂອສ຺ສຏ຺ຐກາໂຍ ອຸຣໂຄ ຈຣາຕຸ, ປຸຎ຺ຎຕ຺ຖິໂກ ມຸຎ຺ຈຕຸ ພນ຺ຘນສ຺ມາ.

໒໕໒. ວິນາປິ ທານາ ຕວ ວຈນໍ ຊນິນ຺ທ, ມຸຎ຺ເຈມຸ ນໍ ອຸຣຄໍ ພນ຺ຘນສ຺ມາ;

ໂອສ຺ສຏ຺ຐກາໂຍ ອຸຣໂຄ ຈຣາຕຸ, ປຸຎ຺ຎຕ຺ຖິໂກ ມຸຎ຺ຈຕຸ ພນ຺ຘນສ຺ມາ.

໒໕໓. ມຸຕ຺ໂຕ ຈມ຺ເປຍ຺ຍໂກ ນາໂຄ, ຣາຊານໍ ເອຕທພ຺ຣວິ;

ນໂມ ເຕ ກາສິຣາຊຕ຺ຖຸ, ນໂມ ເຕ ກາສິວຑ຺ຒນ;

ອຎ຺ຊລິໍ ເຕ ປຄ຺ຄຓ຺ຫາມິ, ປສ຺ເສຍ຺ຍໍ ເມ ນິເວສນໍ.

໒໕໔. ອທ຺ຘາ ຫິ ທຸພ຺ພິສ຺ສສເມຕມາຫຸ, ຍໍ ມານຸໂສ ວິສ຺ສເສ ອມານຸສມ຺ຫິ;

ສເຈ ຈ ມໍ ຍາຈສິ ເອຕມຕ຺ຖໍ, ທກ຺ເຂມຸ ເຕ ນາຄ ນິເວສນານິ.

໒໕໕. ສເຈປິ [ສເຈ ຫິ (ສີ. ປີ. ອຏ຺ຐ.)] ວາໂຕ ຄິຣິມາວເຫຍ຺ຍ, ຈນ຺ໂທ ຈ ສຸຣິໂຍ ຈ ຉມາ ປເຕຍ຺ຍຸໍ;

ສພ຺ພາ ຈ ນຊ຺ໂຊ ປຏິໂສຕໍ ວເຊຍ຺ຍຸໍ, ນ ຕ຺ເວວຫໍ ຣາຊ ມຸສາ ຠເຓຍ຺ຍໍ.

໒໕໖. ນຠໍ ຜເລຍ຺ຍ ອຸທຘີປິ ສຸສ຺ເສ, ສໍວຏ຺ຏເຍ [ສໍວຏ຺ເຏຍໍ (ສີ. ປີ.), ສໍວຏ຺ເຏຍ຺ຍ (ສ຺ຍາ. ກ.)] ຠູຕຘຣາ ວສຸນ຺ຘຣາ;

ສິລຸຈ຺ຈໂຍ ເມຣຸ ສມູລມຸປ຺ປເຕ [ມຸພ຺ພເຫ (ສີ. ສ຺ຍາ. ປີ. ກ. ອຏ຺ຐ.), ມຸຏ຺ຐເຫ (ກ.)], ນ ຕ຺ເວວຫໍ ຣາຊ ມຸສາ ຠເຓຍ຺ຍໍ.

໒໕໗. ອທ຺ຘາ ຫິ ທຸພ຺ພິສ຺ສສເມຕມາຫຸ, ຍໍ ມານຸໂສ ວິສ຺ສເສ ອມານຸສມ຺ຫິ;

ສເຈ ຈ ມໍ ຍາຈສິ ເອຕມຕ຺ຖໍ, ທກ຺ເຂມຸ ເຕ ນາຄ ນິເວສນານິ.

໒໕໘. ຕຸມ຺ເຫ ໂຂຕ຺ຖ ໂຆຣວິສາ ອຸຬາຣາ, ມຫາເຕຊາ ຂິປ຺ປໂກປີ ຈ ໂຫຖ;

ມໍກາຣຓາ [ມມ ກາຣຓາ (ສີ. ສ຺ຍາ. ປີ.)] ພນ຺ຘນສ຺ມາ ປມຸຕ຺ໂຕ, ອຣຫສິ ໂນ ຊານິຕຸເຍ [ຊານິຕາເຍ (ສີ.), ຊານິຕເວ (ສ຺ຍາ.), ຊານິຕເຍ (ປີ.)] ກຕານິ.

໒໕໙. ໂສ ປຈ຺ຈຕໍ ນິຣເຍ ໂຆຣຣູເປ, ມາ ກາຍິກໍ ສາຕມລຕ຺ຖ ກິຎ຺ຈິ;

ເປຬາຍ ພທ຺ໂຘ ມຣຓໍ ອຸເປຕຸ, ໂຍ ຕາທິສໍ ກມ຺ມກຕໍ ນ ຊາເນ.

໒໖໐. ສຈ຺ຈປ຺ປຏິຎ຺ຎາ ຕວເມສ ໂຫຕຸ, ອກ຺ໂກຘໂນ ໂຫຫິ ອນຸປນາຫີ;

ສພ຺ພຎ຺ຈ ເຕ ນາຄກຸລໍ ສຸປຓ຺ຓາ, ອຄ຺ຄິໍວ ຄິມ຺ເຫສຸ [ຄິມ຺ຫາສຸ (ສີ. ສ຺ຍາ. ປີ.)] ວິວຊ຺ຊຍນ຺ຕຸ.

໒໖໑. ອນຸກມ຺ປສີ ນາຄກຸລໍ ຊນິນ຺ທ, ມາຕາ ຍຖາ ສຸປ຺ປິຍໍ ເອກປຸຕ຺ຕໍ;

ອຫຎ຺ຈ ເຕ ນາຄກຸເລນ ສທ຺ຘິໍ, ກາຫາມິ ເວຍ຺ຍາວຏິກໍ ອຸຬາຣໍ.

໒໖໒. ໂຍເຊນ຺ຕຸ ເວ ຣາຊຣເຖ ສຸຈິຕ຺ເຕ, ກມ຺ໂພຊເກ ອສ຺ສຕເຣ ສຸທນ຺ເຕ;

ນາເຄ ຈ ໂຍເຊນ຺ຕຸ ສຸວຓ຺ຓກປ຺ປເນ, ທກ຺ເຂມຸ ນາຄສ຺ສ ນິເວສນານິ.

໒໖໓. ເຠຣີ ມຸທິງ຺ຄາ [ມຸຕິງ຺ຄາ (ສີ. ປີ.)] ປຓວາ ຈ ສງ຺ຂາ, ອວຊ຺ຊຍິໍສຸ ອຸຄ຺ຄເສນສ຺ສ ຣຎ຺ໂຎ;

ປາຍາສິ ຣາຊາ ພຫຸໂສຠມາໂນ, ປຸຣກ຺ຂໂຕ ນາຣິຄຓສ຺ສ ມຊ຺ເຌ.

໒໖໔. ສຸວຓ຺ຓຈິຕກໍ ຠູມິໍ, ອທ຺ທກ຺ຂິ ກາສິວຑ຺ຒໂນ;

ໂສວຓ຺ຓມຍປາສາເທ, ເວຬຸຣິຍຜລກຕ຺ຖເຕ.

໒໖໕. ສ ຣາຊາ ປາວິສິ ພ຺ຍມ຺ຫໍ, ຈມ຺ເປຍ຺ຍສ຺ສ ນິເວສນໍ;

ອາທິຈ຺ຈວຓ຺ຓສນ຺ນິຠໍ, ກໍສວິຊ຺ຊຸ ປຠສ຺ສຣໍ.

໒໖໖. ນານາຣຸກ຺ເຂຫິ ສຎ຺ຉນ຺ນໍ, ນານາຄນ຺ຘສມີຣິຕໍ;

ໂສ ປາເວກ຺ຂິ ກາສິຣາຊາ, ຈມ຺ເປຍ຺ຍສ຺ສ ນິເວສນໍ.

໒໖໗. ປວິຏ຺ຐສ຺ມິໍ ກາສິຣຎ຺ເຎ, ຈມ຺ເປຍ຺ຍສ຺ສ ນິເວສນໍ;

ທິພ຺ພາ ຕູຣິຍາ ປວຊ຺ຊິໍສຸ, ນາຄກຎ຺ຎາ ຈ ນຈ຺ຈິສຸໍ [ນຈ຺ຈຍຸໍ (ສີ. ປີ. ກ.)].

໒໖໘. ຕໍ ນາຄກຎ຺ຎາ ຈຣິຕໍ ຄເຓນ, ອນ຺ວາຣຸຫີ ກາສິຣາຊາ ປສນ຺ໂນ;

ນິສີທິ ໂສວຓ຺ຓມຍມ຺ຫິ ປີເຐ, ສາປສ຺ສເຍ [ໂສປສ຺ສເຍ (ກ.)] ຈນ຺ທນສາຣລິຕ຺ເຕ.

໒໖໙. ໂສ ຕຕ຺ຖ ຠຸຕ຺ວາ ຈ ອໂຖ ຣມິຕ຺ວາ, ຈມ຺ເປຍ຺ຍກໍ ກາສິຣາຊາ ອໂວຈ;

ວິມານເສຏ຺ຐານິ ອິມານິ ຕຸຍ຺ຫໍ, ອາທິຈ຺ຈວຓ຺ຓານິ ປຠສ຺ສຣານິ;

ເນຕາທິສໍ ອຕ຺ຖິ ມນຸສ຺ສໂລເກ, ກິໍ ປຕ຺ຖຍໍ [ກິມຕ຺ຖິຍໍ (ສີ. ສ຺ຍາ. ປີ.)] ນາຄ ຕໂປ ກໂຣສິ.

໒໗໐. ຕາ ກມ຺ພຸກາຍູຣຘຣາ ສຸວຕ຺ຖາ, ວຏ຺ຏງ຺ຄຸລີ ຕມ຺ພຕລູປປນ຺ນາ;

ປຄ຺ຄຍ຺ຫ ປາເຍນ຺ຕິ ອໂນມວຓ຺ຓາ, ເນຕາທິສໍ ອຕ຺ຖິ ມນຸສ຺ສໂລເກ;

ກິໍ ປຕ຺ຖຍໍ ນາຄ ຕໂປ ກໂຣສິ.

໒໗໑. ນຊ຺ໂຊ ຈ ເຕມາ ປຸຖຸໂລມມຈ຺ຉາ, ອາຏາ [ອາທາ (ສ຺ຍາ.), ອທາ (ປີ.)] ສກຸນ຺ຕາຠິຣຸທາ ສຸຕິຕ຺ຖາ;

ເນຕາທິສໍ ອຕ຺ຖິ ມນຸສ຺ສໂລເກ, ກິໍ ປຕ຺ຖຍໍ ນາຄ ຕໂປ ກໂຣສິ.

໒໗໒. ໂກຎ຺ຈາ ມຍູຣາ ທິວິຍາ ຈ ຫໍສາ, ວຄ຺ຄຸສ຺ສຣາ ໂກກິລາ ສມ຺ປຕນ຺ຕິ;

ເນຕາທິສໍ ອຕ຺ຖິ ມນຸສ຺ສໂລເກ, ກິໍ ປຕ຺ຖຍໍ ນາຄ ຕໂປ ກໂຣສິ.

໒໗໓. ອມ຺ພາ ຈ ສາລາ ຕິລກາ ຈ ຊມ຺ພຸໂຍ, ອຸທ຺ທາລກາ ປາຏລິໂຍ ຈ ຜຸລ຺ລາ;

ເນຕາທິສໍ ອຕ຺ຖິ ມນຸສ຺ສໂລເກ, ກິໍ ປຕ຺ຖຍໍ ນາຄ ຕໂປ ກໂຣສິ.

໒໗໔. ອິມາ ຈ ເຕ ໂປກ຺ຂຣຎ຺ໂຎ ສມນ຺ຕໂຕ, ທິພ຺ພາ [ທິພ຺ຍາ (ສ຺ຍາ.), ທິວິຍາ (ປີ.)] ຈ ຄນ຺ຘາ ສຕຕໍ ປວາຍນ຺ຕິ;

ເນຕາທິສໍ ອຕ຺ຖິ ມນຸສ຺ສໂລເກ, ກິໍ ປຕ຺ຖຍໍ ນາຄ ຕໂປ ກໂຣສິ.

໒໗໕. ນ ປຸຕ຺ຕເຫຕຸ ນ ຘນສ຺ສ ເຫຕຸ, ນ ອາຍຸໂນ ຈາປິ [ວາປິ (ສີ. ປີ.)] ຊນິນ຺ທ ເຫຕຸ;

ມນຸສ຺ສໂຍນິໍ ອຠິປຕ຺ຖຍາໂນ, ຕສ຺ມາ ປຣກ຺ກມ຺ມ ຕໂປ ກໂຣມິ.

໒໗໖. ຕ຺ວໍ ໂລຫິຕກ຺ໂຂ ວິຫຕນ຺ຕຣໍໂສ, ອລງ຺ກໂຕ ກປ຺ປິຕເກສມສ຺ສຸ;

ສຸໂຣສິໂຕ ໂລຫິຕຈນ຺ທເນນ, ຄນ຺ຘພ຺ພຣາຊາວ ທິສາ ປຠາສສິ.

໒໗໗. ເທວິທ຺ຘິປຕ຺ໂຕສິ ມຫານຸຠາໂວ, ສພ຺ເພຫິ ກາເມຫິ ສມງ຺ຄິຠູໂຕ;

ປຸຈ຺ຉາມິ ຕໍ ນາຄຣາເຊຕມຕ຺ຖໍ, ເສຍ຺ໂຍ ອິໂຕ ເກນ ມນຸສ຺ສໂລໂກ.

໒໗໘. ຊນິນ຺ທ ນາຎ຺ຎຕ຺ຣ ມນຸສ຺ສໂລກາ, ສຸທ຺ຘີ ວ ສໍວິຊ຺ຊຕິ ສໍຍໂມ ວາ;

ອຫຎ຺ຈ ລທ຺ຘານ ມນຸສ຺ສໂຍນິໍ, ກາຫາມິ ຊາຕິມຣຓສ຺ສ ອນ຺ຕໍ.

໒໗໙. ອທ຺ຘາ ຫເວ ເສວິຕພ຺ພາ ສປຎ຺ຎາ, ພຫຸສ຺ສຸຕາ ເຍ ພຫຸຐານຈິນ຺ຕິໂນ;

ນາຣິໂຍ ຈ ທິສ຺ວານ ຕຸວຎ຺ຈ ນາຄ, ກາຫາມິ ປຸຎ຺ຎານິ ອນປ຺ປການິ.

໒໘໐. ອທ຺ຘາ ຫເວ ເສວິຕພ຺ພາ ສປຎ຺ຎາ, ພຫຸສ຺ສຸຕາ ເຍ ພຫຸຐານຈິນ຺ຕິໂນ;

ນາຣິໂຍ ຈ ທິສ຺ວານ ມມຎ຺ຈ ຣາຊ, ກໂຣຫິ ປຸຎ຺ຎານິ ອນປ຺ປການິ.

໒໘໑. ອິທຎ຺ຈ ເມ ຊາຕຣູປໍ ປຫູຕໍ, ຣາສີ ສຸວຓ຺ຓສ຺ສ ຈ ຕາລມຕ຺ຕາ;

[ອິໂຕ ຫຣິຕ຺ວາ ໂສວຓ຺ຓຆຣານິ ກາຣຍ, ຣູປິຍສ຺ສ ຈ ປາກາຣໍ ກໂຣນ຺ຕຸ (ສີ. ສ຺ຍາ.) ອິໂຕ ຫຣິຕ຺ວາ ໂສວຓ຺ຓຆຣານິ, [ກາຣຍ] ຣູປິຍສ຺ສ ຈ ປາກາຣໍ ກໂຣນ຺ຕຸ (ປີ.)] ອິໂຕ ຫຣິຕ຺ວານ ສຸວຓ຺ຓຆຣານິ, ກຣສ຺ສຸ ຣູປິຍປາກາຣໍ ກໂຣນ຺ຕຸ [ອິໂຕ ຫຣິຕ຺ວາ ໂສວຓ຺ຓຆຣານິ ກາຣຍ, ຣູປິຍສ຺ສ ຈ ປາກາຣໍ ກໂຣນ຺ຕຸ (ສີ. ສ຺ຍາ.) ອິໂຕ ຫຣິຕ຺ວາ ໂສວຓ຺ຓຆຣານິ, [ກາຣຍ] ຣູປິຍສ຺ສ ຈ ປາກາຣໍ ກໂຣນ຺ຕຸ (ປີ.)].

໒໘໒. ມຸຕ຺ຕາ ຈ [ມຸຕ຺ຕານຎ຺ຈ (ສີ. ສ຺ຍາ.)] ວາຫສຫສ຺ສານິ ປຎ຺ຈ, ເວຬຸຣິຍມິສ຺ສານິ ອິໂຕ ຫຣິຕ຺ວາ;

ອນ຺ເຕປຸເຣ ຠູມິຍໍ ສນ຺ຖຣນ຺ຕຸ, ນິກ຺ກທ຺ທມາ ເຫຫິຕິ ນີຣຊາ ຈ.

໒໘໓. ເອຕາທິສໍ ອາວສ ຣາຊເສຏ຺ຐ, ວິມານເສຏ຺ຐໍ ພຫຸ ໂສຠມານໍ;

ພາຣາຓສິໍ ນຄຣໍ ອິທ຺ຘໍ ຜີຕໍ, ຣຊ຺ຊຎ຺ຈ ກາເຣຫິ ອໂນມປຎ຺ຎາຕິ.

ຈມ຺ເປຍ຺ຍຊາຕກໍ ທສມໍ.