໕໐໒. ຈູຬຫໍສຊາຕກໍ (໖)

໑໓໓. ເອເຕ ຫໍສາ ປກ຺ກມນ຺ຕິ, ວກ຺ກງ຺ຄາ ຠຍເມຣິຕາ;

ຫຣິຕ຺ຕຈ ເຫມວຓ຺ຓ, ກາມໍ ສຸມຸຂ ປກ຺ກມ.

໑໓໔. ໂອຫາຍ ມໍ ຎາຕິຄຓາ, ເອກໍ ປາສວສໍ ຄຕໍ;

ອນເປກ຺ຂມານາ [ນາເປກ຺ຂມານາ (ກ.)] ຄຈ຺ຉນ຺ຕິ, ກິໍ ເອໂສ ອວຫິຍ຺ຍສິ.

໑໓໕. ປເຕວ ປຕຕໍ ເສຏ຺ຐ, ນຕ຺ຖິ ພທ຺ເຘ ສຫາຍຕາ [ສຫາຍກາ (ສ຺ຍາ.)];

ມາ ອນີຆາຍ ຫາເປສິ, ກາມໍ ສຸມຸຂ ປກ຺ກມ.

໑໓໖. ນາຫໍ ‘‘ທຸກ຺ຂປເຣໂຕ’’ຕິ [ທຸກ຺ຂປເຣໂຕປິ (ກ.)], ຘຕຣຏ຺ຐ ຕຸວໍ [ຕວໍ (ສີ. ປີ.)] ຊເຫ;

ຊີວິຕໍ ມຣຓໍ ວາ ເມ, ຕຍາ ສທ຺ຘິໍ ຠວິສ຺ສຕິ.

໑໓໗. ເອຕທຣິຍສ຺ສ ກລ຺ຍາຓໍ, ຍໍ ຕ຺ວໍ ສຸມຸຂ ຠາສສິ;

ຕຎ຺ຈ ວີມໍສມາໂນຫໍ, ‘‘ປຕເຕຕໍ’’ ອວສ຺ສຊິໍ.

໑໓໘. ອປເທນ ປທໍ ຍາຕິ, ອນ຺ຕລິກ຺ຂຈໂຣ [ອນ຺ຕລິກ຺ເຂ ຈໂຣ (ສີ. ປີ.)] ທິໂຊ;

ອາຣາ ປາສໍ ນ ພຸຊ຺ຌິ ຕ຺ວໍ, ຫໍສານໍ ປວຣຸຕ຺ຕມ [ປວຣຸຕ຺ຕໂມ (ກ. ສີ. ປີ.)].

໑໓໙. ຍທາ ປຣາຠໂວ ໂຫຕິ, ໂປໂສ ຊີວິຕສງ຺ຂເຍ;

ອຖ ຊາລຎ຺ຈ ປາສຎ຺ຈ, ອາສຊ຺ຊາປິ ນ ພຸຊ຺ຌຕິ.

໑໔໐. ເອເຕ ຫໍສາ ປກ຺ກມນ຺ຕິ, ວກ຺ກງ຺ຄາ ຠຍເມຣິຕາ;

ຫຣິຕ຺ຕຈ ເຫມວຓ຺ຓ, ຕ຺ວຎ຺ເຎວ [ຕ຺ວຎ຺ຈ ຕໍ (ສີ.), ຕ຺ວຎ຺ຈ (ປີ.)] ອວຫິຍ຺ຍສິ.

໑໔໑. ເອເຕ ຠຸຕ຺ວາ ຈ ປິຕ຺ວາ ຈ, ປກ຺ກມນ຺ຕິ ວິຫງ຺ຄມາ;

ອນເປກ຺ຂມານາ ວກ຺ກງ຺ຄາ, ຕ຺ວຎ຺ເຎເວໂກ ອຸປາສສິ.

໑໔໒. ກິນ຺ນຸ ຕ຺ຍາຍໍ [ຕາຍໍ (ສີ. ສ຺ຍາ. ປີ.)] ທິໂຊ ໂຫຕິ, ມຸຕ຺ໂຕ ພທ຺ຘໍ ອຸປາສສິ;

ໂອຫາຍ ສກຸຓາ ຍນ຺ຕິ, ກິໍ ເອໂກ ອວຫິຍ຺ຍສິ.

໑໔໓. ຣາຊາ ເມ ໂສ ທິໂຊ ມິຕ຺ໂຕ, ສຂາ ປາຓສໂມ ຈ ເມ;

ເນວ ນໍ ວິຊຫິສ຺ສາມິ, ຍາວ ກາລສ຺ສ ປຣິຍາຍໍ.

໑໔໔. ໂຍ ຈ ຕ຺ວໍ ສຂິໂນ ເຫຕຸ, ປາຓໍ ຈຊິຕຸມິຈ຺ຉສິ;

ໂສ ເຕ ສຫາຍໍ ມຸຎ຺ຈາມິ, ໂຫຕຸ ຣາຊາ ຕວານຸໂຄ.

໑໔໕. ເອວໍ ລຸທ຺ທກ ນນ຺ທສ຺ສຸ, ສຫ ສພ຺ເພຫິ ຎາຕິຠິ;

ຍຖາຫມຊ຺ຊ ນນ຺ທາມິ, ທິສ຺ວາ ມຸຕ຺ຕໍ ທິຊາຘິປໍ.

໑໔໖. ກຈ຺ຈິນ຺ນຸ ໂຠໂຕ ກຸສລໍ, ກຈ຺ຈິ ໂຠໂຕ ອນາມຍໍ;

ກຈ຺ຈິ ຣຏ຺ຐມິທໍ ຜີຕໍ, ຘມ຺ເມນ ມນຸສາສສິ.

໑໔໗. ກຸສລຎ຺ເຈວ ເມ ຫໍສ, ອໂຖ ຫໍສ ອນາມຍໍ;

ອໂຖ ຣຏ຺ຐມິທໍ ຜີຕໍ, ຘມ຺ເມນ ມນຸສາສຫໍ.

໑໔໘. ກຈ຺ຈິ ໂຠໂຕ ອມຈ຺ເຈສຸ, ໂທໂສ ໂກຈິ ນ ວິຊ຺ຊຕິ;

ກຈ຺ຈິ ອາຣາ ອມິຕ຺ຕາ ເຕ, ຉາຍາ ທກ຺ຂິຓໂຕຣິວ.

໑໔໙. ອໂຖປິ ເມ ອມຈ຺ເຈສຸ, ໂທໂສ ໂກຈິ ນ ວິຊ຺ຊຕິ;

ອໂຖ ອາຣາ ອມິຕ຺ຕາ ເມ, ຉາຍາ ທກ຺ຂິຓໂຕຣິວ.

໑໕໐. ກຈ຺ຈິ ເຕ ສາທິສີ ຠຣິຍາ, ອສ຺ສວາ ປິຍຠາຓິນີ;

ປຸຕ຺ຕຣູປຍສູເປຕາ, ຕວ ຉນ຺ທວສານຸຄາ.

໑໕໑. ອໂຖ ເມ ສາທິສີ ຠຣິຍາ, ອສ຺ສວາ ປິຍຠາຓິນີ;

ປຸຕ຺ຕຣູປຍສູເປຕາ, ມມ ຉນ຺ທວສານຸຄາ.

໑໕໒. ກຈ຺ຈິ ເຕ ພຫໂວ ປຸຕ຺ຕາ, ສຸຊາຕາ ຣຏ຺ຐວຑ຺ຒນ;

ປຎ຺ຎາຊເວນ ສມ຺ປນ຺ນາ, ສມ຺ໂມທນ຺ຕິ ຕໂຕ ຕໂຕ.

໑໕໓. ສຕເມໂກ ຈ ເມ ປຸຕ຺ຕາ, ຘຕຣຏ຺ຐ ມຍາ ສຸຕາ;

ເຕສໍ ຕ຺ວໍ ກິຈ຺ຈມກ຺ຂາຫິ, ນາວຣຸຊ຺ຌນ຺ຕິ [ນາວຣຊ຺ຌນ຺ຕິ (ກ. ສີ. ປີ.)] ເຕ ວໂຈ.

໑໕໔. ອຸປປນ຺ໂນປິ ເຈ ໂຫຕິ, ຊາຕິຍາ ວິນເຍນ ວາ;

ອຖ ປຈ຺ຉາ ກຸຣຸເຕ ໂຍຄໍ, ກິຈ຺ເຉ [ກິຈ຺ເຈ (ສີ. ສ຺ຍາ. ປີ.)] ອາປາສຸ [ອາວາສຸ (ສ຺ຍາ.), ອາປທາສຸ (ກ.)] ສີທຕິ.

໑໕໕. ຕສ຺ສ ສໍຫີຣປຎ຺ຎສ຺ສ, ວິວໂຣ ຊາຍເຕ ມຫາ;

ຣຕ຺ຕິມນ຺ໂຘວ [ນຕ຺ຕມນ຺ໂຘວ (ສີ. ປີ.)] ຣູປານິ, ຖູລານິ ມນຸປສ຺ສຕິ.

໑໕໖. ອສາເຣ ສາຣໂຍຄຎ຺ຎູ, ມຕິໍ ນ ຕ຺ເວວ ວິນ຺ທຕິ;

ສຣໂຠວ ຄິຣິທຸຄ຺ຄສ຺ມິໍ, ອນ຺ຕຣາເຍວ ສີທຕິ.

໑໕໗. ຫີນຊຈ຺ໂຈປິ ເຈ ໂຫຕິ, ອຸຏ຺ຐາຕາ ຘິຕິມາ ນໂຣ;

ອາຈາຣສີລສມ຺ປນ຺ໂນ, ນິເສ ອຄ຺ຄີວ ຠາສຕິ.

໑໕໘. ເອຕໍ ເມ ອຸປມໍ ກຕ຺ວາ, ປຸຕ຺ເຕ ວິຊ຺ຊາສຸ ວາຈຍ [ຐາປສ (ສ຺ຍາ. ກ.)];

ສໍວິຣູຬ຺ເຫຖ ເມຘາວີ, ເຂຕ຺ເຕ ພີຊໍວ [ເຂຕ຺ຕພີຊໍວ (ສີ. ປີ.)] ວຸຏ຺ຐິຍາຕິ.

ຈູຬຫໍສຊາຕກໍ ຉຏ຺ຐໍ.