໕໐໓. ສຕ຺ຕິຄຸມ຺ພຊາຕກໍ (໗)

໑໕໙. ມິຄລຸທ຺ໂທ ມຫາຣາຊາ, ປຎ຺ຈາລານໍ ຣເຖສໂຠ;

ນິກ຺ຂນ຺ໂຕ ສຫ ເສນາຍ, ໂອຄໂຓ ວນມາຄມາ.

໑໖໐. ຕຕ຺ຖທ຺ທສາ ອຣຎ຺ຎສ຺ມິໍ, ຕກ຺ກຣານໍ ກຸຏິໍ ກຕໍ;

ຕສ຺ສາ [ຕສ຺ມາ (ສ຺ຍາ. ປີ. ກ.)] ກຸຏິຍາ ນິກ຺ຂມ຺ມ, ສຸໂວ ລຸທ຺ທານິ ຠາສຕິ.

໑໖໑. ສມ຺ປນ຺ນວາຫໂນ ໂປໂສ, ຍຸວາ ສມ຺ມຏ຺ຐກຸຓ຺ຑໂລ [ກຸຓ຺ຑລີ (ສ຺ຍາ. ກ.)];

ໂສຠຕິ ໂລຫິຕຸຓ຺ຫີໂສ, ທິວາ ສູຣິໂຍວ ຠາສຕິ.

໑໖໒. ມຊ຺ຌນ຺ຫິເກ [ມຊ຺ຌນ຺ຕິເກ (ສພ຺ພຕ຺ຖ)] ສມ຺ປຕິເກ, ສຸຕ຺ໂຕ ຣາຊາ ສສາຣຖິ;

ຫນ຺ທສ຺ສາຠຣຓໍ ສພ຺ພໍ, ຄຓ຺ຫາມ ສາຫສາ [ສຫສາ (ສີ. ສ຺ຍາ. ປີ.)] ມຍໍ.

໑໖໓. ນິສີເຖປິ ຣໂຫ ທານິ, ສຸຕ຺ໂຕ ຣາຊາ ສສາຣຖິ;

ອາທາຍ ວຕ຺ຖໍ ມຓິກຸຓ຺ຑລຎ຺ຈ, ຫນ຺ຕ຺ວານ ສາຂາຫິ ອວຕ຺ຖຣາມ.

໑໖໔. ກິນ຺ນຸ ອຸມ຺ມຕ຺ຕຣູໂປວ, ສຕ຺ຕິຄຸມ຺ພ ປຠາສສິ;

ທຸຣາສທາ ຫິ ຣາຊາໂນ, ອຄ຺ຄິ ປຊ຺ຊລິໂຕ ຍຖາ.

໑໖໕. ອຖ ຕ຺ວໍ ປຕິໂກລມ຺ພ, ມຕ຺ໂຕ ຖຸລ຺ລານິ ຄຊ຺ຊສິ;

ມາຕຣິ ມຍ຺ຫໍ ນຄ຺ຄາຍ, ກິນ຺ນຸ ຕ຺ວໍ ວິຊິຄຸຈ຺ຉເສ.

໑໖໖. ອຸຏ຺ເຐຫິ ສມ຺ມ ຕຣມາໂນ, ຣຖໍ ໂຍເຊຫິ ສາຣຖິ;

ສກຸໂຓ ເມ ນ ຣຸຈ຺ຈຕິ, ອຎ຺ຎໍ ຄຈ຺ຉາມ ອສ຺ສມໍ.

໑໖໗. ຍຸຕ຺ໂຕ ຣໂຖ ມຫາຣາຊ, ຍຸຕ຺ໂຕ ຈ ພລວາຫໂນ;

ອຘິຕິຏ຺ຐ ມຫາຣາຊ, ອຎ຺ຎໍ ຄຈ຺ຉາມ ອສ຺ສມໍ.

໑໖໘. ໂກ ນຸເມວ ຄຕາ [ກ຺ວ ນຸ’ເມ’ປຄຕາ (?)] ສພ຺ເພ, ເຍ ອສ຺ມິໍ ປຣິຈາຣກາ;

ເອສ ຄຈ຺ຉຕິ ປຎ຺ຈາໂລ, ມຸຕ຺ໂຕ ເຕສໍ ອທສ຺ສນາ.

໑໖໙. ໂກທຓ຺ຑການິ ຄຓ຺ຫຖ, ສຕ຺ຕິໂຍ ໂຕມຣານິ ຈ;

ເອສ ຄຈ຺ຉຕິ ປຎ຺ຈາໂລ, ມາ ໂວ ມຸຎ຺ຈິຕ຺ຖ ຊີວຕໍ [ຊີວິຕໍ (ພຫູສຸ)].

໑໗໐. ອຖາປໂຣ ປຏິນນ຺ທິຕ຺ຖ, ສຸໂວ ໂລຫິຕຕຸຓ຺ຑໂກ;

ສ຺ວາຄຕໍ ເຕ ມຫາຣາຊ, ອໂຖ ເຕ ອທຸຣາຄຕໍ;

ອິສ຺ສໂຣສິ ອນຸປ຺ປຕ຺ໂຕ, ຍໍ ອິຘຕ຺ຖິ ປເວທຍ.

໑໗໑. ຕິນ຺ທຸການິ ປິຍາລານິ, ມຘຸເກ ກາສຸມາຣິໂຍ;

ຜລານິ ຂຸທ຺ທກປ຺ປານິ, ຠຸຎ຺ຊ ຣາຊ ວຣໍ ວຣໍ.

໑໗໒. ອິທມ຺ປິ ປານີຍໍ ສີຕໍ, ອາຠຕໍ ຄິຣິຄພ຺ຠຣາ;

ຕໂຕ ປິວ ມຫາຣາຊ, ສເຈ ຕ຺ວໍ ອຠິກງ຺ຂສິ.

໑໗໓. ອຣຎ຺ຎໍ ອຸຎ຺ຉາຍ ຄຕາ, ເຍ ອສ຺ມິໍ ປຣິຈາຣກາ;

ສຍໍ ອຸຏ຺ຐາຍ ຄຓ຺ຫວ຺ໂຫ, ຫຕ຺ຖາ ເມ ນຕ຺ຖິ ທາຕເວ.

໑໗໔. ຠທ຺ທໂກ ວຕຍໍ ປກ຺ຂີ, ທິໂຊ ປຣມຘມ຺ມິໂກ;

ອເຖໂສ ອິຕໂຣ ປກ຺ຂີ, ສຸໂວ ລຸທ຺ທານິ ຠາສຕິ.

໑໗໕. ‘‘ເອຕໍ ຫນຖ ພນ຺ຘຖ, ມາ ໂວ ມຸຎ຺ຈິຕ຺ຖ ຊີວຕໍ’’;

ອິຈ຺ເຈວໍ ວິລປນ຺ຕສ຺ສ, ໂສຕ຺ຖິໍ [ໂສຕ຺ຖີ (ສ຺ຍາ.)] ປຕ຺ໂຕສ຺ມິ ອສ຺ສມໍ.

໑໗໖. ຠາຕໂຣສ຺ມ ມຫາຣາຊ, ໂສທຣິຍາ ເອກມາຕຸກາ;

ເອກຣຸກ຺ຂສ຺ມິໍ ສໍວຑ຺ຒາ, ນານາເຂຕ຺ຕຄຕາ ອຸໂຠ.

໑໗໗. ສຕ຺ຕິຄຸມ຺ໂພ ຈ ໂຈຣານໍ, ອຫຎ຺ຈ ອິສີນໍ ອິຘ;

ອສຕໍ ໂສ, ສຕໍ ອຫໍ, ເຕນ ຘມ຺ເມນ ໂນ ວິນາ.

໑໗໘. ຕຕ຺ຖ ວໂຘ ຈ ພນ຺ໂຘ ຈ, ນິກຕີ ວຎ຺ຈນານິ ຈ;

ອາໂລປາ ສາຫສາກາຣາ, ຕານິ ໂສ ຕຕ຺ຖ ສິກ຺ຂຕິ.

໑໗໙. ອິຘ ສຈ຺ຈຎ຺ຈ ຘມ຺ໂມ ຈ, ອຫິໍສາ ສໍຍໂມ ທໂມ;

ອາສນູທກທາຍີນໍ, ອງ຺ເກ ວທ຺ໂຘສ຺ມິ ຠາຣຘ [ຠາຣຕ (ສີ. ສ຺ຍາ. ປີ.)].

໑໘໐. ຍໍ ຍຎ຺ຫິ ຣາຊ ຠຊຕິ, ສນ຺ຕໍ ວາ ຍທິ ວາ ອສໍ;

ສີລວນ຺ຕໍ ວິສີລໍ ວາ, ວສໍ ຕສ຺ເສວ ຄຈ຺ຉຕິ.

໑໘໑. ຍາທິສໍ ກຸຣຸເຕ ມິຕ຺ຕໍ, ຍາທິສໍ ຈູປເສວຕິ;

ໂສປິ ຕາທິສໂກ ໂຫຕິ, ສຫວາໂສ ຫິ [ສຫວາໂສປິ (ສ຺ຍາ. ກ.)] ຕາທິໂສ.

໑໘໒. ເສວມາໂນ ເສວມານໍ, ສມ຺ຜຸຏ຺ໂຐ ສມ຺ຜຸສໍ ປຣໍ;

ສໂຣ ທິທ຺ໂຘ ກລາປໍວ, ອລິຕ຺ຕມຸປລິມ຺ປຕິ;

ອຸປເລປຠຍາ [ອຸປລິມ຺ປຠຍາ (ສ຺ຍາ. ກ.)] ຘີໂຣ, ເນວ ປາປສຂາ ສິຍາ.

໑໘໓. ປູຕິມຈ຺ຉໍ ກຸສຄ຺ເຄນ, ໂຍ ນໂຣ ອຸປນຍ຺ຫຕິ;

ກຸສາປິ ປູຕິ [ປູຕີ (ສີ. ປີ.)] ວາຍນ຺ຕິ, ເອວໍ ພາລູປເສວນາ.

໑໘໔. ຕຄຣຎ຺ຈ ປລາເສນ, ໂຍ ນໂຣ ອຸປນຍ຺ຫຕິ;

ປຕ຺ຕາປິ ສຸຣຠິ [ສຸຣຠີ (ສີ. ສ຺ຍາ. ປີ.)] ວາຍນ຺ຕິ, ເອວໍ ຘີຣູປເສວນາ.

໑໘໕. ຕສ຺ມາ ປຕ຺ຕປຸຏສ຺ເສວ [ຜລປຸຏສ຺ເສວ (ສີ. ປີ.), ປລປຸຏສ຺ເສວ (ກ. ອຏ຺ຐ.), ປລາສປຸຏສ຺ເສວ (ສ຺ຍາ. ກ.)], ຎຕ຺ວາ ສມ຺ປາກມຕ຺ຕໂນ;

ອສນ຺ເຕ ໂນປເສເວຍ຺ຍ, ສນ຺ເຕ ເສເວຍ຺ຍ ປຓ຺ຑິໂຕ;

ອສນ຺ໂຕ ນິຣຍໍ ເນນ຺ຕິ, ສນ຺ໂຕ ປາເປນ຺ຕິ ສຸຄ຺ຄຕິນ຺ຕິ.

ສຕ຺ຕິຄຸມ຺ພຊາຕກໍ ສຕ຺ຕມໍ.