໕໐໑. ໂຣຫຓມິຄຊາຕກໍ (໕)

໑໐໔. ເອເຕ ຍູຖາ ປຕິຍນ຺ຕິ, ຠີຕາ ມຣຓສ຺ສ [ມຣຓາ (ສ຺ຍາ. ປີ.), ມຣຓ (ກ.)] ຈິຕ຺ຕກ;

ຄຈ຺ຉ ຕຸວມ຺ປິ ມາກງ຺ຂິ, ຊີວິສ຺ສນ຺ຕິ ຕຍາ ສຫ.

໑໐໕. ນາຫໍ ໂຣຫຓ [ໂຣຫນ຺ຕ (ສີ. ປີ.), ໂຣຫນ (ສ຺ຍາ.)] ຄຈ຺ຉາມິ, ຫທຍໍ ເມ ອວກສ຺ສຕິ;

ນ ຕໍ ອຫໍ ຊຫິສ຺ສາມິ, ອິຘ ຫິສ຺ສາມິ ຊີວິຕໍ.

໑໐໖. ເຕ ຫິ ນູນ ມຣິສ຺ສນ຺ຕິ, ອນ຺ຘາ ອປຣິຓາຍກາ;

ຄຈ຺ຉ ຕຸວມ຺ປິ ມາກງ຺ຂິ, ຊີວິສ຺ສນ຺ຕິ ຕຍາ ສຫ.

໑໐໗. ນາຫໍ ໂຣຫຓ ຄຈ຺ຉາມິ, ຫທຍໍ ເມ ອວກສ຺ສຕິ;

ນ ຕໍ ພທ຺ຘໍ [ພນ຺ຘໍ (ກ.)] ຊຫິສ຺ສາມິ, ອິຘ ຫິສ຺ສາມິ ຊີວິຕໍ.

໑໐໘. ຄຈ຺ຉ ຠີຣຸ ປລາຍສ຺ສຸ, ກູເຏ ພທ຺ໂຘສ຺ມິ ອາຍເສ;

ຄຈ຺ຉ ຕຸວມ຺ປິ ມາກງ຺ຂິ, ຊີວິສ຺ສນ຺ຕິ ຕຍາ ສຫ.

໑໐໙. ນາຫໍ ໂຣຫຓ ຄຈ຺ຉາມິ, ຫທຍໍ ເມ ອວກສ຺ສຕິ;

ນ ຕໍ ອຫໍ ຊຫິສ຺ສາມິ, ອິຘ ຫິສ຺ສາມິ ຊີວິຕໍ.

໑໑໐. ເຕ ຫິ ນູນ ມຣິສ຺ສນ຺ຕິ, ອນ຺ຘາ ອປຣິຓາຍກາ;

ຄຈ຺ຉ ຕຸວມ຺ປິ ມາກງ຺ຂິ, ຊີວິສ຺ສນ຺ຕິ ຕຍາ ສຫ.

໑໑໑. ນາຫໍ ໂຣຫຓ ຄຈ຺ຉາມິ, ຫທຍໍ ເມ ອວກສ຺ສຕິ;

ນ ຕໍ ພທ຺ຘໍ ຊຫິສ຺ສາມິ, ອິຘ ຫິສ຺ສາມິ ຊີວິຕໍ.

໑໑໒. ອຍໍ ໂສ ລຸທ຺ທໂກ ເອຕິ, ລຸທ຺ທຣູໂປ [ຣຸທ຺ທຣູໂປ (ສີ. ປີ.)] ສຫາວຸໂຘ;

ໂຍ ໂນ ວຘິສ຺ສຕິ ອຊ຺ຊ, ອຸສຸນາ ສຕ຺ຕິຍາ ອປິ [ມປິ (ສີ. ສ຺ຍາ. ປີ.)].

໑໑໓. ສາ ມຸຫຸຕ຺ຕໍ ປລາຍິຕ຺ວາ, ຠຍຏ຺ຏາ [ຠຍຏ຺ຐາ (ປີ.)] ຠຍຕຊ຺ຊິຕາ;

ສຸທຸກ຺ກຣໍ ອກຣາ ຠີຣຸ, ມຣຓາຍູປນິວຕ຺ຕຖ.

໑໑໔. ກິນ຺ນຸ ເຕເມ ມິຄາ ໂຫນ຺ຕິ, ມຸຕ຺ຕາ ພທ຺ຘໍ ອຸປາສເຣ;

ນ ຕໍ ຈຊິຕຸມິຈ຺ຉນ຺ຕິ, ຊີວິຕສ຺ສປິ ກາຣຓາ.

໑໑໕. ຠາຕໂຣ ໂຫນ຺ຕິ ເມ ລຸທ຺ທ, ໂສທຣິຍາ ເອກມາຕຸກາ;

ນ ມໍ ຈຊິຕຸມິຈ຺ຉນ຺ຕິ, ຊີວິຕສ຺ສປິ ກາຣຓາ.

໑໑໖. ເຕ ຫິ ນູນ ມຣິສ຺ສນ຺ຕິ, ອນ຺ຘາ ອປຣິຓາຍກາ;

ປຎ຺ຈນ຺ນໍ ຊີວິຕໍ ເທຫິ, ຠາຕຣໍ ມຸຎ຺ຈ ລຸທ຺ທກ.

໑໑໗. ໂສ ໂວ ອຫໍ ປໂມກ຺ຂາມິ, ມາຕາເປຕ຺ຕິຠຣໍ ມິຄໍ;

ນນ຺ທນ຺ຕຸ ມາຕາປິຕໂຣ, ມຸຕ຺ຕໍ ທິສ຺ວາ ມຫາມິຄໍ.

໑໑໘. ເອວໍ ລຸທ຺ທກ ນນ຺ທສ຺ສຸ, ສຫ ສພ຺ເພຫິ ຎາຕິຠິ;

ຍຖາຫມຊ຺ຊ ນນ຺ທາມິ, ມຸຕ຺ຕໍ ທິສ຺ວາ ມຫາມິຄໍ.

໑໑໙. ກຖໍ ຕ຺ວໍ ປໂມກ຺ໂຂ [ກຖໍ ປໂມກ຺ໂຂ (ສີ. ປີ.), ກຖໍ ເຕ ປໂຣກ຺ໂຂ (?)] ອາສິ, ອຸປນີຕສ຺ມິ ຊີວິເຕ;

ກຖໍ ປຸຕ຺ຕ ອໂມເຈສິ, ກູຏປາສມ຺ຫ ລຸທ຺ທໂກ.

໑໒໐. ຠຓໍ ກຓ຺ຓສຸຂໍ ວາຈໍ, ຫທຍງ຺ຄໍ ຫທຍສ຺ສິຕໍ;

ສຸຠາສິຕາຫິ ວາຈາຫິ, ຈິຕ຺ຕໂກ ມໍ ອໂມຈຍິ.

໑໒໑. ຠຓໍ ກຓ຺ຓສຸຂໍ ວາຈໍ, ຫທຍງ຺ຄໍ ຫທຍສ຺ສິຕໍ;

ສຸຠາສິຕາຫິ ວາຈາຫິ, ສຸຕນາ ມໍ ອໂມຈຍິ.

໑໒໒. ສຸຕ຺ວາ ກຓ຺ຓສຸຂໍ ວາຈໍ, ຫທຍງ຺ຄໍ ຫທຍສ຺ສິຕໍ;

ສຸຠາສິຕານິ ສຸຕ຺ວານ, ລຸທ຺ທໂກ ມໍ ອໂມຈຍິ.

໑໒໓. ເອວໍ ອານນ຺ທິໂຕ ໂຫຕຸ, ສຫ ທາເຣຫິ ລຸທ຺ທໂກ;

ຍຖາ ມຍຊ຺ຊ ນນ຺ທາມ, ທິສ຺ວາ ໂຣຫຓມາຄຕໍ.

໑໒໔. ນນຸ ຕ຺ວໍ ອວຈ [ອວຈາ (ສີ. ປີ.)] ລຸທ຺ທ, ‘‘ມິຄຈມ຺ມານິ ອາຫຣິໍ’’;

ອຖ ເກນ ນຸ ວຓ຺ເຓນ, ມິຄຈມ຺ມານິ ນາຫຣິ.

໑໒໕. ອາຄມາ ເຈວ ຫຕ຺ຖຕ຺ຖໍ, ກູຏປາສຎ຺ຈ ໂສ ມິໂຄ;

ອພຊ຺ຌິ ຕໍ [ອພຊ຺ຌິ ຕຎ຺ຈ (ປີ.)] ມິຄຣາຊໍ, ຕຎ຺ຈ ມຸຕ຺ຕາ ອຸປາສເຣ.

໑໒໖. ຕສ຺ສ ເມ ອຫຸ ສໍເວໂຄ, ອພ຺ຠຸໂຕ ໂລມຫໍສໂນ;

ອິມຎ຺ຈາຫໍ ມິຄໍ ຫຎ຺ເຎ, ອຊ຺ຊ ຫິສ຺ສາມິ ຊີວິຕໍ.

໑໒໗. ກີທິສາ ເຕ ມິຄາ ລຸທ຺ທ, ກີທິສາ ຘມ຺ມິກາ ມິຄາ;

ກຖໍວຓ຺ຓາ ກຖໍສີລາ, ພາຬ຺ຫໍ ໂຂ ເນ ປສໍສສິ.

໑໒໘. ໂອທາຕສິງ຺ຄາ ສຸຈິວາຬາ, ຊາຕຣູປຕຈູປມາ;

ປາທາ ໂລຫິຕກາ ເຕສໍ, ອຎ຺ຊິຕກ຺ຂາ ມໂນຣມາ.

໑໒໙. ເອທິສາ ເຕ ມິຄາ ເທວ, ເອທິສາ ຘມ຺ມິກາ ມິຄາ;

ມາຕາເປຕ຺ຕິຠຣາ ເທວ, ນ ເຕ ໂສ ອຠິຫາຣິຕຸໍ [ອຠິຫາຣຍຸໍ (ກ. ສີ.), ອຠິຫາຣຍິໍ (ສ຺ຍາ.), ອຠິຫາຣຍໍ (ປີ.)].

໑໓໐. ທມ຺ມິ ນິກ຺ຂສຕໍ ລຸທ຺ທ, ຖູລຎ຺ຈ ມຓິກຸຓ຺ຑລໍ;

ຈຕຸສ຺ສທຎ຺ຈ [ຈຕຸຣສ຺ສຎ຺ຈ (ສ຺ຍາ. ກ.)] ປລ຺ລງ຺ກໍ, ອຸມາປຸປ຺ຜສຣິນ຺ນິຠໍ [ອຸມ຺ມາປຸປ຺ຜສິຣິນ຺ນິຠໍ (ສີ. ສ຺ຍາ. ປີ. ກ.)].

໑໓໑. ທ຺ເວ ຈ ສາທິສິໂຍ ຠຣິຍາ, ອຸສຠຎ຺ຈ ຄວໍ ສຕໍ;

ຘມ຺ເມນ ຣຊ຺ຊໍ ກາເຣສ຺ສໍ, ພຫຸກາໂຣ ເມສິ ລຸທ຺ທກ.

໑໓໒. ກສິວາຓິຊ຺ຊາ [ກສີ ວຓິຊ຺ຊາ (ສີ. ສ຺ຍາ. ປີ.)] ອິຓທານໍ, ອຸຎ຺ຉາຈຣິຍາ ຈ ລຸທ຺ທກ;

ເອເຕນ ທາຣໍ ໂປເສຫິ, ມາ ປາປໍ ອກຣີ ປຸນາຕິ [ອກຣາ ປຸນນ຺ຕິ (ກ. ສີ. ປີ.)].

ໂຣຫຓມິຄຊາຕກໍ [ໂຣຫນ຺ຕມິຄຊາຕກໍ (ສີ. ປີ.)] ປຎ຺ຈມໍ.