໔໙໖. ຠິກ຺ຂາປຣມ຺ປຣຊາຕກໍ (໑໓)

໒໗໐. ສຸຂຸມາລຣູປໍ ທິສ຺ວາ [ທິສ຺ວານ (ກ. ສີ. ອຏ຺ຐ.)], ຣຏ຺ຐາ ວິວນມາຄຕໍ;

ກູຏາຄາຣວຣູເປຕໍ, ມຫາສຍນມຸປາສິຕໍ [ມຸໂປຈິຕໍ (ພຫູສຸ)].

໒໗໑. ຕສ຺ສ ເຕ ເປມເກນາຫໍ, ອທາສິໍ ວຑ຺ຒໂມທນໍ [ພທ຺ຘໂມທນໍ (ສີ. ປີ.)];

ສາລີນໍ ວິຈິຕໍ ຠຕ຺ຕໍ, ສຸຈິໍ ມໍສູປເສຈນໍ.

໒໗໒. ຕໍ ຕ຺ວໍ ຠຕ຺ຕໍ ປຏິຄ຺ຄຍ຺ຫ, ພ຺ຣາຫ຺ມຓສ຺ສ ອທາສຍິ [ອທາປຍິ (ສີ. ສ຺ຍາ. ປີ.)];

ອຕ຺ຕານໍ [ອຕ຺ຕນາ (ປີ. ອຏ຺ຐ. ປາຐນ຺ຕຣໍ)] ອນສິຕ຺ວານ, ໂກຍໍ ຘມ຺ໂມ ນມຕ຺ຖຸ ເຕ.

໒໗໓. ອາຈຣິໂຍ ພ຺ຣາຫ຺ມໂຓ ມຍ຺ຫໍ, ກິຈ຺ຈາກິຈ຺ເຈສຸ ພ຺ຍາວໂຏ [ວາວໂຏ (ກ.)];

ຄຣຸ ຈ ອາມນ຺ຕນີໂຍ [ອາມນ຺ຕຓີໂຍ (ສີ. ປີ.)] ຈ, ທາຕຸມຣຫາມິ ໂຠຊນໍ.

໒໗໔. ພ຺ຣາຫ຺ມຓໍ ທານິ ປຸຈ຺ຉາມິ, ໂຄຕມໍ ຣາຊປູຊິຕໍ;

ຣາຊາ ເຕ ຠຕ຺ຕໍ ປາທາສິ, ສຸຈິໍ ມໍສູປເສຈນໍ.

໒໗໕. ຕໍ ຕ຺ວໍ ຠຕ຺ຕໍ ປຏິຄ຺ຄຍ຺ຫ, ອິສິສ຺ສ ໂຠຊນໍ ອທາ;

ອເຂຕ຺ຕຎ຺ຎູສິ ທານສ຺ສ, ໂກຍໍ ຘມ຺ໂມ ນມຕ຺ຖຸ ເຕ.

໒໗໖. ຠຣາມິ ປຸຕ຺ຕ [ປຸຕ຺ເຕ (ສີ. ປີ.)] ທາເຣ ຈ, ຆເຣສຸ ຄຘິໂຕ [ຄຖິໂຕ (ສີ. ປີ.)] ອຫໍ;

ຠຸຎ຺ເຊ ມານຸສເກ ກາເມ, ອນຸສາສາມິ ຣາຊິໂນ.

໒໗໗. ອາຣຎ຺ຎິກສ຺ສ [ອາຣຎ຺ຎກສ຺ສ (ສີ. ປີ.)] ອິສິໂນ, ຈິຣຣຕ຺ຕໍ ຕປສ຺ສິໂນ;

ວຸຑ຺ຒສ຺ສ ຠາວິຕຕ຺ຕສ຺ສ, ທາຕຸມຣຫາມິ ໂຠຊນໍ.

໒໗໘. ອິສິຎ຺ຈ ທານິ ປຸຈ຺ຉາມິ, ກິສໍ ຘມນິສນ຺ຖຕໍ;

ປຣູຬ຺ຫກຈ຺ຉນຂໂລມໍ, ປງ຺ກທນ຺ຕໍ ຣຊສ຺ສິຣໍ.

໒໗໙. ເອໂກ ອຣຎ຺ເຎ ວິຫຣສິ [ວິຫາສິ (ກ.)], ນາວກງ຺ຂສິ ຊີວິຕໍ;

ຠິກ຺ຂຸ ເກນ ຕຍາ ເສຍ຺ໂຍ, ຍສ຺ສ ຕ຺ວໍ ໂຠຊນໍ ອທາ.

໒໘໐. ຂຓນ຺ຕາລຸກລມ຺ພານິ [ຂຓມາລຸກລມ຺ພານິ (ສ຺ຍາ. ກ.)], ພິລາລິຕກ຺ກລານິ ຈ [ພິຬາລິຕກ຺ກຬານິ ຈ (ສີ. ປີ.)];

ຘຸນໍ ສາມາກນີວາຣໍ, ສງ຺ຆາຣິຍໍ ປສາຣິຍໍ [ສໍຫາຣິຍໍ ປຫາຣິຍໍ (ສ຺ຍາ.), ສໍສາຣິຍໍ ປສາຣິຍໍ (ກ.)].

໒໘໑. ສາກໍ ຠິສໍ ມຘຸໍ ມໍສໍ, ພທຣາມລການິ ຈ;

ຕານິ ອາຫຣິຕ຺ວາ [ອາຫຕ຺ວ (ສີ. ສ຺ຍາ.)] ຠຸຎ຺ຊາມິ, ອຕ຺ຖິ ເມ ໂສ ປຣິຄ຺ຄໂຫ.

໒໘໒. ປຈນ຺ໂຕ ອປຈນ຺ຕສ຺ສ, ອມມສ຺ສ ສກິຎ຺ຈໂນ [ອກິຎ຺ຈໂນ (ກ.)];

ອນາທານສ຺ສ ສາທາໂນ, ທາຕຸມຣຫາມິ ໂຠຊນໍ.

໒໘໓. ຠິກ຺ຂຸຎ຺ຈ ທານິ ປຸຈ຺ຉາມິ, ຕຸຓ຺ຫີມາສີນ ສຸພ຺ພຕໍ;

ອິສິ ເຕ ຠຕ຺ຕໍ ປາທາສິ, ສຸຈິໍ ມໍສູປເສຈນໍ.

໒໘໔. ຕໍ ຕ຺ວໍ ຠຕ຺ຕໍ ປຏິຄ຺ຄຍ຺ຫ, ຕຸຓ຺ຫີ ຠຸຎ຺ຊສິ ເອກໂກ;

ນາຎ຺ຎໍ ກຎ຺ຈິ [ກິຎ຺ຈິ (ກ.)] ນິມນ຺ເຕສິ, ໂກຍໍ ຘມ຺ໂມ ນມຕ຺ຖຸ ເຕ.

໒໘໕. ນ ປຈາມິ ນ ປາເຈມິ, ນ ຉິນ຺ທາມິ ນ ເຉທເຍ;

ຕໍ ມໍ ອກິຎ຺ຈນໍ ຎຕ຺ວາ, ສພ຺ພປາເປຫິ ອາຣຕໍ.

໒໘໖. ວາເມນ ຠິກ຺ຂມາທາຍ, ທກ຺ຂິເຓນ ກມຓ຺ຑລຸໍ;

ອິສິ ເມ ຠຕ຺ຕໍ ປາທາສິ, ສຸຈິໍ ມໍສູປເສຈນໍ.

໒໘໗. ເອເຕ ຫິ ທາຕຸມຣຫນ຺ຕິ, ສມມາ ສປຣິຄ຺ຄຫາ;

ປຈ຺ຈນີກມຫໍ ມຎ຺ເຎ, ໂຍ ທາຕາຣໍ ນິມນ຺ຕເຍ.

໒໘໘. ອຕ຺ຖາຍ ວຕ ເມ ອຊ຺ຊ, ອິຘາຄຈ຺ຉິ ຣເຖສໂຠ;

ໂສຫໍ ອຊ຺ຊ ປຊານາມິ [ອິໂຕ ປຸພ຺ເພ ນ ຊານາມິ (ສີ. ປີ.)], ຍຕ຺ຖ ທິນ຺ນໍ ມຫປ຺ຜລໍ.

໒໘໙. ຣຏ຺ເຐສຸ ຄິທ຺ຘາ ຣາຊາໂນ, ກິຈ຺ຈາກິຈ຺ເຈສຸ ພ຺ຣາຫ຺ມຓາ;

ອິສີ ມູລຜເລ ຄິທ຺ຘາ, ວິປ຺ປມຸຕ຺ຕາ ຈ ຠິກ຺ຂໂວຕິ.

ຠິກ຺ຂາປຣມ຺ປຣຊາຕກໍ ເຕຣສມໍ.

ຕສ຺ສຸທ຺ທານໍ –

ສຸວ ກິນ຺ນຣ ມຸກ຺ກ ຂຣາຊິນໂສ, ຠິສຊາຕ ມເຫສິ ກໂປຕວໂຣ;

ອຖ ໂມຣ ສຕຈ຺ຉກ ວາຓິຊໂກ, ອຖ ຣາຊ ສພ຺ຣາຫ຺ມຓ ຠິກ຺ຂປຣນ຺ຕິ.

ປກິຓ຺ຓກນິປາຕໍ ນິຏ຺ຐິຕໍ.