໔໘໘. ຠິສຊາຕກໍ (໕)

໗໘. ອສ຺ສໍ ຄວໍ ຣຊຕໍ ຊາຕຣູປໍ, ຠຣິຍຎ຺ຈ ໂສ ອິຘ ລຠຕໍ ມນາປໍ;

ປຸຕ຺ເຕຫິ ທາເຣຫິ ສມງ຺ຄິ ໂຫຕຸ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໗໙. ມາລຎ຺ຈ ໂສ ກາສິກຈນ຺ທນຎ຺ຈ, ຘາເຣຕຸ ປຸຕ຺ຕສ຺ສ ພຫູ ຠວນ຺ຕຸ;

ກາເມສຸ ຕິພ຺ພໍ ກຸຣຸຕໍ ອເປກ຺ຂໍ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໘໐. ປຫູຕຘຎ຺ໂຎ ກສິມາ ຍສສ຺ສີ, ປຸຕ຺ເຕ ຄິຫີ ຘນິມາ ສພ຺ພກາເມ;

ວຍໍ ອປສ຺ສໍ ຆຣມາວສາຕຸ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໘໑. ໂສ ຂຕ຺ຕິໂຍ ໂຫຕຸ ປສຍ຺ຫກາຣີ, ຣາຊາຠິຣາຊາ [ຣາຊາຘິຣາຊາ (ສ຺ຍາ. ກ.)] ພລວາ ຍສສ຺ສີ;

ສ ຈາຕຸຣນ຺ຕໍ ມຫິມາວສາຕຸ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໘໒. ໂສ ພ຺ຣາຫ຺ມໂຓ ໂຫຕຸ ອວີຕຣາໂຄ, ມຸຫຸຕ຺ຕນກ຺ຂຕ຺ຕປເຖສຸ ຍຸຕ຺ໂຕ;

ປູເຊຕຸ ນໍ ຣຏ຺ຐປຕີ ຍສສ຺ສີ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໘໓. ອຊ຺ຌາຍກໍ ສພ຺ພສມນ຺ຕເວທໍ [ສພ຺ພສມຕ຺ຕເວທໍ (ສີ.), ສພ຺ພສມຕ຺ຕເວທນໍ (ປີ.)], ຕປສ຺ສີນໍ ມຎ຺ຎຕຸ ສພ຺ພໂລໂກ;

ປູເຊນ຺ຕຸ ນໍ ຊານປທາ ສເມຈ຺ຈ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໘໔. ຈຕຸສ຺ສທໍ ຄາມວຣໍ ສມິທ຺ຘໍ, ທິນ຺ນຎ຺ຫິ ໂສ ຠຸຎ຺ຊຕຸ ວາສເວນ;

ອວີຕຣາໂຄ ມຣຓໍ ອຸເປຕຸ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໘໕. ໂສ ຄາມຓີ ໂຫຕຸ ສຫາຍມຊ຺ເຌ, ນຈ຺ເຈຫິ ຄີເຕຫິ ປໂມທມາໂນ;

ໂສ ຣາຊໂຕ ພ຺ຍສນ ມາລຕ຺ຖ [ມາ ຣາຊໂຕ ວ຺ຍສນ’ມລຕ຺ຖ (ສີ. ສ຺ຍາ. ປີ.)] ກິຎ຺ຈິ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໘໖. ຍໍ ເອກຣາຊາ ປຖວິໍ ວິເຊຕ຺ວາ, ອິຕ຺ຖີສຫສ຺ສານ [ອິຕ຺ຖີສຫສ຺ສສ຺ສ (ສີ. ປີ.)] ຐເປຕຸ ອຄ຺ຄໍ;

ສີມນ຺ຕິນີນໍ ປວຣາ ຠວາຕຸ, ຠິສານິ ເຕ ພ຺ຣາຫ຺ມຓ ຍາ ອຫາສິ.

໘໗. ອິສີນຎ຺ຫິ ສາ ສພ຺ພສມາຄຕານໍ, ຠຸຎ຺ເຊຍ຺ຍ ສາທຸໍ ອວິກມ຺ປມານາ;

ຈຣາຕຸ ລາເຠນ ວິກຕ຺ຖມານາ, ຠິສານິ ເຕ ພ຺ຣາຫ຺ມຓ ຍາ ອຫາສິ.

໘໘. ອາວາສິໂກ ໂຫຕຸ ມຫາວິຫາເຣ, ນວກມ຺ມິໂກ ໂຫຕຸ ຄຊງ຺ຄລາຍໍ [ກຊງ຺ຄລາຍໍ (ສີ. ສ຺ຍາ. ປີ.)];

ອາໂລກສນ຺ຘິໍ ທິວສໍ [ທິວສາ (ສີ. ສ຺ຍາ. ປີ.)] ກໂຣຕຸ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໘໙. ໂສ ພຊ຺ຌຕູ ປາສສເຕຫິ ຉພ຺ຠິ [ຉມ຺ຫິ (ສີ. ປີ.), ຉສ຺ສຸ (?)], ຣມ຺ມາ ວນາ ນິຍ຺ຍຕຸ ຣາຊຘານິໍ [ຣາຊຐານິໍ (ກ.)];

ຕຸຕ຺ເຕຫິ ໂສ ຫຎ຺ຎຕຸ ປາຈເນຫິ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໙໐. ອລກ຺ກມາລີ ຕິປຸກຓ຺ຓວິທ຺ໂຘ, ລຏ຺ຐີຫໂຕ ສປ຺ປມຸຂໍ ອຸເປຕຸ;

ສກຈ຺ຉພນ຺ໂຘ [ສກ຺ກຈ຺ຈພທ຺ໂຘ (ສີ. ປີ.), ສໍກຈ຺ຈພນ຺ໂຘ (ນິຍ຺ຍ)] ວິສິຂໍ ຈຣາຕຸ, ຠິສານິ ເຕ ພ຺ຣາຫ຺ມຓ ໂຍ ອຫາສິ.

໙໑. ໂຍ ເວ ອນຏ຺ຐໍວ [ອນຏ຺ຐໍ (ສີ. ສ຺ຍາ. ປີ.)] ນຏ຺ຐນ຺ຕິ ຈາຫ, ກາເມວ ໂສ ລຠຕໍ ຠຸຎ຺ຊຕຎ຺ຈ [ລຠຕຸ ຠຸຎ຺ຊຕຸ ຈ (ສ຺ຍາ.)];

ອຄາຣມຊ຺ເຌ ມຣຓໍ ອຸເປຕຸ, ໂຍ ວາ ໂຠນ຺ໂຕ ສງ຺ກຕິ ກຎ຺ຈິເທວ [ກິຎ຺ຈິເທວ (ກ.)].

໙໒. ຍເທສມານາ ວິຈຣນ຺ຕິ ໂລເກ, ອິຏ຺ຐຎ຺ຈ ກນ຺ຕຎ຺ຈ ພຫູນເມຕໍ;

ປິຍໍ ມນຸຎ຺ຎໍ ຈິຘ ຊີວໂລເກ, ກສ຺ມາ ອິສໂຍ ນປ຺ປສໍສນ຺ຕິ ກາເມ.

໙໓. ກາເມສຸ ເວ ຫຎ຺ຎເຣ ພຊ຺ຌເຣ ຈ, ກາເມສຸ ທຸກ຺ຂຎ຺ຈ ຠຍຎ຺ຈ ຊາຕໍ;

ກາເມສຸ ຠູຕາຘິປຕີ ປມຕ຺ຕາ, ປາປານິ ກມ຺ມານິ ກໂຣນ຺ຕິ ໂມຫາ.

໙໔. ເຕ ປາປຘມ຺ມາ ປສເວຕ຺ວ ປາປໍ, ກາຍສ຺ສ ເຠທາ ນິຣຍໍ ວຊນ຺ຕິ;

ອາທີນວໍ ກາມຄຸເຓສຸ ທິສ຺ວາ, ຕສ຺ມາ ອິສໂຍ ນປ຺ປສໍສນ຺ຕິ ກາເມ.

໙໕. ວີມໍສມາໂນ ອິສິໂນ ຠິສານິ, ຕີເຣ ຄເຫຕ຺ວານ ຖເລ ນິເຘສິໍ;

ສຸທ຺ຘາ ອປາປາ ອິສໂຍ ວສນ຺ຕິ, ເອຕານິ ເຕ ພ຺ຣຫ຺ມຈາຣີ ຠິສານິ.

໙໖. ນ ເຕ ນຏາ ໂນ ປນ ກີຬເນຍ຺ຍາ, ນ ພນ຺ຘວາ ໂນ ປນ ເຕ ສຫາຍາ;

ກິສ຺ມິໍ ວຸປຕ຺ຖມ຺ຠ ສຫສ຺ສເນຕ຺ຕ, ອິສີຫິ ຕ຺ວໍ ກີຬສິ ເທວຣາຊ.

໙໗. ອາຈຣິໂຍ ເມສິ ປິຕາ ຈ ມຍ຺ຫໍ, ເອສາ ປຕິຏ຺ຐາ ຂລິຕສ຺ສ ພ຺ຣຫ຺ເມ;

ເອກາປຣາຘໍ ຂມ ຠູຣິປຎ຺ຎ, ນ ປຓ຺ຑິຕາ ໂກຘພລາ ຠວນ຺ຕິ.

໙໘. ສຸວາສິຕໍ ອິສິນໍ ເອກຣຕ຺ຕໍ, ຍໍ ວາສວໍ ຠູຕປຕິທ຺ທສາມ;

ສພ຺ເພວ ໂຠນ຺ໂຕ ສຸມນາ ຠວນ຺ຕຸ, ຍໍ ພ຺ຣາຫ຺ມໂຓ ປຈ຺ຈຸປາທີ ຠິສານິ.

໙໙. ອຫຎ຺ຈ ສາຣິປຸຕ຺ໂຕ ຈ, ໂມຄ຺ຄລ຺ລາໂນ ຈ ກສ຺ສໂປ;

ອນຸຣຸທ຺ໂຘ ປຸຓ຺ໂຓ ອານນ຺ໂທ, ຕທາສຸໍ ສຕ຺ຕ ຠາຕໂຣ.

໑໐໐. ຠຄິນີ ອຸປ຺ປລວຓ຺ຓາ ຈ, ທາສີ ຂຸຊ຺ຊຸຕ຺ຕຣາ ຕທາ;

ຈິຕ຺ໂຕ ຄຫປຕິ ທາໂສ, ຍກ຺ໂຂ ສາຕາຄິໂຣ ຕທາ.

໑໐໑. ປາລິເລຍ຺ໂຍ [ປາຣິເລຍ຺ໂຍ (ສີ. ປີ.)] ຕທາ ນາໂຄ, ມຘຸໂທ [ມຘຸວາ (ສີ. ປີ.)] ເສຏ຺ຐວານໂຣ;

ກາຬຸທາຍີ ຕທາ ສກ຺ໂກ, ເອວໍ ຘາເຣຖ ຊາຕກນ຺ຕິ.

ຠິສຊາຕກໍ ປຎ຺ຈມໍ.