໔໘໙. ສຸຣຸຈິຊາຕກໍ (໖)

໑໐໒. ມເຫສີ ສຸຣຸຈິໂນ [ຣຸຈິໂນ (ສີ. ສ຺ຍາ. ປີ.)] ຠຣິຍາ, ອານີຕາ ປຐມໍ ອຫໍ;

ທສ ວສ຺ສສຫສ຺ສານິ, ຍໍ ມໍ ສຸຣຸຈິມານຍິ.

໑໐໓. ສາຫໍ ພ຺ຣາຫ຺ມຓ ຣາຊານໍ, ເວເທຫໍ ມິຖິລຄ຺ຄຫໍ;

ນາຠິຊານາມິ ກາເຍນ, ວາຈາຍ ອຸທ ເຈຕສາ;

ສຸຣຸຈິໍ ອຕິມຎ຺ຎິຕ຺ຖ [ອຕິມຎ຺ຎິຕ຺ໂຖ (ສີ. ປີ.), ອຕິມຎ຺ຎິຕາ (?)], ອາວິ [ອາວິໍ (ສີ. ປີ.)] ວາ ຍທິ ວາ ຣໂຫ.

໑໐໔. ເອເຕນ ສຈ຺ຈວຊ຺ເຊນ, ປຸຕ຺ໂຕ ອຸປ຺ປຊ຺ຊຕໍ ອິເສ;

ມຸສາ ເມ ຠຓມານາຍ, ມຸທ຺ຘາ ຜລຕຸ ສຕ຺ຕຘາ.

໑໐໕. ຠຕ຺ຕຸ ມມ ສສ຺ສຸ ມາຕາ, ປິຕາ ຈາປິ ຈ ສສ຺ສຸໂຣ;

ເຕ ມໍ ພ຺ຣຫ຺ເມ ວິເນຕາໂຣ, ຍາວ ອຏ຺ຐໍສຸ ຊີວິຕໍ.

໑໐໖. ສາຫໍ ອຫິໍສາຣຕິນີ, ກາມສາ [ກາມໂສ (ສີ.)] ຘມ຺ມຈາຣິນີ [ຘມ຺ມຈາຣິຓີ (ສີ.)];

ສກ຺ກຈ຺ຈໍ ເຕ ອຸປຏ຺ຐາສິໍ, ຣຕ຺ຕິນ຺ທິວມຕນ຺ທິຕາ.

໑໐໗. ເອເຕນ ສຈ຺ຈວຊ຺ເຊນ, ປຸຕ຺ໂຕ ອຸປ຺ປຊ຺ຊຕໍ ອິເສ;

ມຸສາ ເມ ຠຓມານາຍ, ມຸທ຺ຘາ ຜລຕຸ ສຕ຺ຕຘາ.

໑໐໘. ໂສຬສິຕ຺ຖິສຫສ຺ສານິ, ສຫຠຣິຍານິ ພ຺ຣາຫ຺ມຓ;

ຕາສຸ ອິສ຺ສາ ວາ ໂກໂຘ ວາ, ນາຫຸ ມຍ຺ຫໍ ກຸທາຈນໍ.

໑໐໙. ຫິເຕນ ຕາສໍ ນນ຺ທາມິ, ນ ຈ ເມ ກາຈິ ອປ຺ປິຍາ;

ອຕ຺ຕານໍວານຸກມ຺ປາມິ, ສທາ ສພ຺ພາ ສປຕ຺ຕິໂຍ.

໑໑໐. ເອເຕນ ສຈ຺ຈວຊ຺ເຊນ, ປຸຕ຺ໂຕ ອຸປ຺ປຊ຺ຊຕໍ ອິເສ;

ມຸສາ ເມ ຠຓມານາຍ, ມຸທ຺ຘາ ຜລຕຸ ສຕ຺ຕຘາ.

໑໑໑. ທາເສ ກມ຺ມກເຣ ເປສ຺ເສ [ໂປເສ (ສ຺ຍາ. ກ.)], ເຍ ຈຎ຺ເຎ ອນຸຊີວິໂນ;

ເປເສມິ [ໂປເສມິ (ສີ. ສ຺ຍາ. ປີ.)] ສຫຘມ຺ເມນ, ສທາ ປມຸທິຕິນ຺ທ຺ຣິຍາ.

໑໑໒. ເອເຕນ ສຈ຺ຈວຊ຺ເຊນ, ປຸຕ຺ໂຕ ອຸປ຺ປຊ຺ຊຕໍ ອິເສ;

ມຸສາ ເມ ຠຓມານາຍ, ມຸທ຺ຘາ ຜລຕຸ ສຕ຺ຕຘາ.

໑໑໓. ສມເຓ ພ຺ຣາຫ຺ມເຓ ຈາປິ, ອຎ຺ເຎ ຈາປິ ວນິພ຺ພເກ;

ຕປ຺ເປມິ ອນ຺ນປາເນນ, ສທາ ປຍຕປາຓິນີ.

໑໑໔. ເອເຕນ ສຈ຺ຈວຊ຺ເຊນ, ປຸຕ຺ໂຕ ອຸປ຺ປຊ຺ຊຕໍ ອິເສ;

ມຸສາ ເມ ຠຓມານາຍ, ມຸທ຺ຘາ ຜລຕຸ ສຕ຺ຕຘາ.

໑໑໕. ຈາຕຸທ຺ທສິໍ ປຎ຺ຈທ຺ທສິໍ [ປນ຺ນຣສິໍ (ສີ. ປີ.)], ຍາ ຈ ປກ຺ຂສ຺ສ ອຏ຺ຐມີ [ອຏ຺ຐມິໍ (ສີ. ປີ.)];

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ [ອຏ຺ຐງ຺ຄສຸສມາຫິຕໍ (ສພ຺ພຕ຺ຖ) ວິ. ວ. ໑໒໙ ປາຬິຍາ ອຏ຺ຐກຖາ ປສ຺ສິຕພ຺ພາ];

ອຸໂປສຖໍ ອຸປວສາມິ [ອຸປວສິໍ (ກ.)], ສທາ ສີເລສຸ ສໍວຸຕາ.

໑໑໖. ເອເຕນ ສຈ຺ຈວຊ຺ເຊນ, ປຸຕ຺ໂຕ ອຸປ຺ປຊ຺ຊຕໍ ອິເສ;

ມຸສາ ເມ ຠຓມານາຍ, ມຸທ຺ຘາ ຜລຕຸ ສຕ຺ຕຘາ.

໑໑໗. ສພ຺ເພວ ເຕ ຘມ຺ມຄຸຓາ, ຣາຊປຸຕ຺ຕິ ຍສສ຺ສິນິ;

ສໍວິຊ຺ຊນ຺ຕິ ຕຍິ ຠທ຺ເທ, ເຍ ຕ຺ວໍ ກິຕ຺ເຕສິ ອຕ຺ຕນິ.

໑໑໘. ຂຕ຺ຕິໂຍ ຊາຕິສມ຺ປນ຺ໂນ, ອຠິຊາໂຕ ຍສສ຺ສິມາ;

ຘມ຺ມຣາຊາ ວິເທຫານໍ, ປຸຕ຺ໂຕ ອຸປ຺ປຊ຺ຊເຕ ຕວ [ຕວໍ (ສີ. ປີ.)].

໑໑໙. ທຸມ຺ມີ [ຣຸມ຺ມີ (ສີ. ປີ.)] ຣໂຊຊລ຺ລຘໂຣ, ອເຆ ເວຫາຍສໍ ຐິໂຕ;

ມນຸຎ຺ຎໍ ຠາສເສ ວາຈໍ, ຍໍ ມຍ຺ຫໍ ຫທຍງ຺ຄມໍ.

໑໒໐. ເທວຕານຸສິ ສຄ຺ຄມ຺ຫາ, ອິສິ ວາສິ [ຈາປິ (ກ.)] ມຫິທ຺ຘິໂກ;

ໂກ ວາສິ ຕ຺ວໍ ອນຸປ຺ປຕ຺ໂຕ, ອຕ຺ຕານໍ ເມ ປເວທຍ.

໑໒໑. ຍໍ ເທວສງ຺ຆາ ວນ຺ທນ຺ຕິ, ສຸຘມ຺ມາຍໍ ສມາຄຕາ;

ໂສຫໍ ສກ຺ໂກ ສຫສ຺ສກ຺ໂຂ, ອາຄໂຕສ຺ມິ ຕວນ຺ຕິເກ.

໑໒໒. ອິຕ຺ຖິໂຍ [ອິຕ຺ຖິຍາ (ປີ.)] ຊີວໂລກສ຺ມິໍ, ຍາ ໂຫຕິ [ໂຫນ຺ຕິ (ສີ. ສ຺ຍາ.)] ສມຈາຣິນີ [ສມຈາຣິຓີ (ສີ.)];

ເມຘາວິນີ ສີລວຕີ, ສສ຺ສຸເທວາ ປຕິພ຺ພຕາ.

໑໒໓. ຕາທິສາຍ ສຸເມຘາຍ, ສຸຈິກມ຺ມາຍ ນາຣິຍາ;

ເທວາ ທສ຺ສນມາຍນ຺ຕິ, ມານຸສິຍາ ອມານຸສາ.

໑໒໔. ຕ຺ວຎ຺ຈ ຠທ຺ເທ ສຸຈິຓ຺ເຓນ, ປຸພ຺ເພ ສຸຈຣິເຕນ ຈ;

ອິຘ ຣາຊກຸເລ ຊາຕາ, ສພ຺ພກາມສມິທ຺ຘິນີ.

໑໒໕. ອຍຎ຺ຈ ເຕ ຣາຊປຸຕ຺ຕິ, ອຸຠຍຕ຺ຖ ກຏຄ຺ຄໂຫ;

ເທວໂລກູປປຕ຺ຕີ ຈ, ກິຕ຺ຕີ ຈ ອິຘ ຊີວິເຕ.

໑໒໖. ຈິຣໍ ສຸເມເຘ ສຸຂິນີ, ຘມ຺ມມຕ຺ຕນິ ປາລຍ;

ເອສາຫໍ ຕິທິວໍ ຍາມິ, ປິຍໍ ເມ ຕວ ທສ຺ສນນ຺ຕິ.

ສຸຣຸຈິຊາຕກໍ ຉຏ຺ຐໍ.