໔໘໗. ອຸທ຺ທາລກຊາຕກໍ (໔)

໖໒. ຂຣາຊິນາ ຊຏິລາ ປງ຺ກທນ຺ຕາ, ທຸມ຺ມກ຺ຂຣູປາ [ທຸມ຺ມຸຘຣູປາ (ສີ. ປີ. ກ.)] ເຍ ມນ຺ຕໍ ຊປ຺ປນ຺ຕິ [ເຍເມ ຊປນ຺ຕິ (ສີ. ປີ.), ເຍ’ເມ ຊປ຺ປນ຺ຕິ ມນ຺ເຕ (ຊາ. ໑.໖.໑໐)];

ກຈ຺ຈິນ຺ນຸ ເຕ ມານຸສເກ ປໂຍເຄ, ອິທໍ ວິທູ ປຣິມຸຕ຺ຕາ ອປາຍາ.

໖໓. ປາປານິ ກມ຺ມານິ ກເຣຖ [ກເຣຍ຺ຍ (ສ຺ຍາ.), ກຕ຺ວານ (ຊາ. ໑.໖.໑໑)] ຣາຊ, ພຫຸສ຺ສຸໂຕ ເຈ ນ ຈເຣຍ຺ຍ ຘມ຺ມໍ;

ສຫສ຺ສເວໂທປິ ນ ຕໍ ປຏິຈ຺ຈ, ທຸກ຺ຂາ ປມຸຈ຺ເຈ [ປມຸຎ຺ເຈ (ສ຺ຍາ.)] ຈຣຓໍ ອປຕ຺ວາ.

໖໔. ສຫສ຺ສເວໂທປິ ນ ຕໍ ປຏິຈ຺ຈ, ທຸກ຺ຂາ ປມຸຈ຺ເຈ ຈຣຓໍ ອປຕ຺ວາ;

ມຎ຺ຎາມິ ເວທາ ອຜລາ ຠວນ຺ຕິ, ສສໍຍມໍ ຈຣຓຎ຺ເຎວ ສຈ຺ຈໍ.

໖໕. ນ ເຫວ ເວທາ ອຜລາ ຠວນ຺ຕິ, ສສໍຍມໍ ຈຣຓຎ຺ເຎວ ສຈ຺ຈໍ;

ກິຕ຺ຕິຎ຺ຫິ [ກິຕ຺ຕິຎ຺ຈ (ສ຺ຍາ.)] ປປ຺ໂປຕິ ອຘິຈ຺ຈ ເວເທ, ສນ຺ຕິໍ ປຸຓາຕິ [ປຸໂນຕິ (ສີ. ອຏ຺ຐ.), ປຸເຓຕິ (ສ຺ຍາ. ຊາ. ໑.໖.໑໓), ປຸເນຕິ (ປີ.)] ຈຣເຓນ ທນ຺ໂຕ.

໖໖. ຠຈ຺ຈາ ມາຕາ ປິຕາ ພນ຺ຘູ, ເຍນ ຊາໂຕ ສເຍວ ໂສ;

ອຸທ຺ທາລໂກ ອຫໍ ໂຠໂຕ [ໂຠຕິ (ກ.)], ໂສຕ຺ຕິຍາກຸລວໍສໂກ [ວໍສໂຕ (ກ.)].

໖໗. ກຖໍ ໂຠ ພ຺ຣາຫ຺ມໂຓ ໂຫຕິ, ກຖໍ ຠວຕິ ເກວລີ;

ກຖຎ຺ຈ ປຣິນິພ຺ພານໍ, ຘມ຺ມຏ຺ໂຐ ກິນ຺ຕິ ວຸຈ຺ຈຕິ.

໖໘. ນິຣໍກຕ຺ວາ ອຄ຺ຄິມາທາຍ ພ຺ຣາຫ຺ມໂຓ, ອາໂປ ສິຎ຺ຈໍ ຍຊໍ ອຸສ຺ເສຕິ ຍູປໍ;

ເອວໍກໂຣ ພ຺ຣາຫ຺ມໂຓ ໂຫຕິ ເຂມີ, ຘມ຺ເມ ຐິຕໍ ເຕນ ອມາປຍິໍສຸ.

໖໙. ນ ສຸທ຺ຘິ ເສຈເນນຕ຺ຖິ, ນາປິ ເກວລີ ພ຺ຣາຫ຺ມໂຓ;

ນ ຂນ຺ຕີ ນາປິ ໂສຣຈ຺ຈໍ, ນາປິ ໂສ ປຣິນິພ຺ພຸໂຕ.

໗໐. ກຖໍ ໂສ [ໂຠ (ສ຺ຍາ. ກ.)] ພ຺ຣາຫ຺ມໂຓ ໂຫຕິ, ກຖໍ ຠວຕິ ເກວລີ;

ກຖຎ຺ຈ ປຣິນິພ຺ພານໍ, ຘມ຺ມຏ຺ໂຐ ກິນ຺ຕິ ວຸຈ຺ຈຕິ.

໗໑. ອເຂຕ຺ຕພນ຺ຘູ ອມໂມ ນິຣາໂສ, ນິລ຺ໂລຠປາໂປ ຠວໂລຠຂີໂຓ;

ເອວໍກໂຣ ພ຺ຣາຫ຺ມໂຓ ໂຫຕິ ເຂມີ, ຘມ຺ເມ ຐິຕໍ ເຕນ ອມາປຍິໍສຸ.

໗໒. ຂຕ຺ຕິຍາ ພ຺ຣາຫ຺ມຓາ ເວສ຺ສາ, ສຸທ຺ທາ ຈຓ຺ຑາລປຸກ຺ກຸສາ;

ສພ຺ເພວ ໂສຣຕາ ທນ຺ຕາ, ສພ຺ເພວ ປຣິນິພ຺ພຸຕາ;

ສພ຺ເພສໍ ສີຕິຠູຕານໍ, ອຕ຺ຖິ ເສຍ຺ໂຍຖ [ເສຍ຺ໂຍວ (ສີ. ປີ.)] ປາປິໂຍ.

໗໓. ຂຕ຺ຕິຍາ ພ຺ຣາຫ຺ມຓາ ເວສ຺ສາ, ສຸທ຺ທາ ຈຓ຺ຑາລປຸກ຺ກຸສາ;

ສພ຺ເພວ ໂສຣຕາ ທນ຺ຕາ, ສພ຺ເພວ ປຣິນິພ຺ພຸຕາ;

ສພ຺ເພສໍ ສີຕິຠູຕານໍ, ນຕ຺ຖິ ເສຍ຺ໂຍຖ ປາປິໂຍ.

໗໔. ຂຕ຺ຕິຍາ ພ຺ຣາຫ຺ມຓາ ເວສ຺ສາ, ສຸທ຺ທາ ຈຓ຺ຑາລປຸກ຺ກຸສາ;

ສພ຺ເພວ ໂສຣຕາ ທນ຺ຕາ, ສພ຺ເພວ ປຣິນິພ຺ພຸຕາ.

໗໕. ສພ຺ເພສໍ ສີຕິຠູຕານໍ, ນຕ຺ຖິ ເສຍ຺ໂຍຖ ປາປິໂຍ;

ປນຕ຺ຖໍ [ປສຕ຺ຖໍ (ສ຺ຍາ.), ປສຏ຺ຐໍ (ກ.)] ຈຣສິ ພ຺ຣຫ຺ມຎ຺ຎໍ, ໂສຕ຺ຕິຍາກຸລວໍສຕໍ.

໗໖. ນານາຣຕ຺ເຕຫິ ວຕ຺ເຖຫິ, ວິມານໍ ຠວຕິ ຉາທິຕໍ;

ນ ເຕສໍ ຉາຍາ ວຕ຺ຖານໍ, ໂສ ຣາໂຄ ອນຸປຊ຺ຊຖ.

໗໗. ເອວເມວ [ເອວເມວໍ (ປີ.)] ມນຸສ຺ເສສຸ, ຍທາ ສຸຊ຺ຌນ຺ຕິ ມາຓວາ;

ເຕ ສຊາຕິໍ ປມຸຎ຺ຈນ຺ຕິ [ນ ເຕສໍ ຊາຕິໍ ປຸຈ຺ຉນ຺ຕິ (ສີ. ສ຺ຍາ. ປີ.), ນ ເຕສໍ ຊາຕິ ສຸຊ຺ຌຕິ (ກ.)], ຘມ຺ມມຎ຺ຎາຍ ສຸພ຺ພຕາຕິ.

ອຸທ຺ທາລກຊາຕກໍ ຈຕຸຕ຺ຖໍ.