໔໘໖. ມຫາອຸກ຺ກຸສຊາຕກໍ (໓)

໔໔. ອຸກ຺ກາ ຈິລາຈາ [ມິລາຈາ (ສີ. ສ຺ຍາ. ປີ.)] ພນ຺ຘນ຺ຕິ ທີເປ [ພນ຺ຘນ຺ຕິ ລຸທ຺ທາ, ທີເປ (ກ.)], ປຊາ ມມໍ ຂາທິຕຸໍ ປຕ຺ຖຍນ຺ຕິ;

ມິຕ຺ຕໍ ສຫາຍຎ຺ຈ ວເທຫິ ເສນກ, ອາຈິກ຺ຂ ຎາຕິພ຺ຍສນໍ ທິຊານໍ.

໔໕. ທິໂຊ ທິຊານໍ ປວໂຣສິ ປກ຺ຂິມ [ປກ຺ຂິ (ສີ. ປີ.), ປກ຺ຂິ ຈ (ສ຺ຍາ.)], ອຸກ຺ກຸສຣາຊ ສຣຓໍ ຕໍ ອຸເປມ [ອຸເປມິ (ສີ. ສ຺ຍາ. ປີ.)];

ປຊາ ມມໍ ຂາທິຕຸໍ ປຕ຺ຖຍນ຺ຕິ, ລຸທ຺ທາ ຈິລາຈາ [ມິລາຈາ (ສີ. ສ຺ຍາ. ປີ.)] ຠວ ເມ ສຸຂາຍ.

໔໖. ມິຕ຺ຕໍ ສຫາຍຎ຺ຈ ກໂຣນ຺ຕິ ປຓ຺ຑິຕາ, ກາເລ ອກາເລ ສຸຂເມສມານາ [ມາສຍານາ (ປີ.)];

ກໂຣມິ ເຕ ເສນກ ເອຕມຕ຺ຖໍ, ອຣິໂຍ ຫິ ອຣິຍສ຺ສ ກໂຣຕິ ກິຈ຺ຈໍ.

໔໗. ຍໍ ໂຫຕິ ກິຈ຺ຈໍ ອນຸກມ຺ປເກນ, ອຣິຍສ຺ສ ອຣິເຍນ ກຕໍ ຕຍີທໍ [ຕວ ຍິທໍ (ສີ. ປີ.)];

ອຕ຺ຕານຸຣກ຺ຂີ ຠວ ມາ ອທຍ຺ຫິ [ອຑຍ຺ຫ (ສີ. ປີ.)], ລຈ຺ຉາມ ປຸຕ຺ເຕ ຕຍິ ຊີວມາເນ.

໔໘. ຕເວວ [ຕເມວ (ສ຺ຍາ. ກ.)] ຣກ຺ຂາວຣຓໍ ກໂຣນ຺ໂຕ, ສຣີຣເຠທາປິ ນ ສນ຺ຕສາມິ;

ກໂຣນ຺ຕິ ເຫເກ [ເຫເຕ (ກ. ສີ. ສ຺ຍາ. ປີ.)] ສຂີນໍ ສຂາໂຣ, ປາຓໍ ຈຊນ຺ຕາ [ຈຊນ຺ຕິ (ສີ. ປີ.)] ສຕເມສ [ສຕາເນສ (ປີ.)] ຘມ຺ໂມ.

໔໙. ສຸທຸກ຺ກຣໍ ກມ຺ມມກາສິ [ມກາ (ສີ. ປີ.)], ອຓ຺ຑຊາຍໍ ວິຫງ຺ຄໂມ;

ອຕ຺ຖາຍ ກຸຣໂຣ ປຸຕ຺ເຕ, ອຑ຺ຒຣຕ຺ເຕ ອນາຄເຕ.

໕໐. ຈຸຕາປິ ເຫເກ [ເອເກ (ສີ. ປີ.)] ຂລິຕາ ສກມ຺ມຸນາ, ມິຕ຺ຕານຸກມ຺ປາຍ ປຕິຏ຺ຐຫນ຺ຕິ;

ປຸຕ຺ຕາ ມມຏ຺ຏາ ຄຕິມາຄໂຕສ຺ມິ, ອຕ຺ຖໍ ຈເຣໂຖ [ຈເຣຖ (ສີ. ສ຺ຍາ. ປີ.)] ມມ ວາຣິຈຣ [ວາຣິຉນ຺ນ (ສີ. ປີ.)].

໕໑. ຘເນນ ຘຎ຺ເຎນ ຈ ອຕ຺ຕນາ ຈ, ມິຕ຺ຕໍ ສຫາຍຎ຺ຈ ກໂຣນ຺ຕິ ປຓ຺ຑິຕາ;

ກໂຣມິ ເຕ ເສນກ ເອຕມຕ຺ຖໍ, ອຣິໂຍ ຫິ ອຣິຍສ຺ສ ກໂຣຕິ ກິຈ຺ຈໍ.

໕໒. ອປ຺ໂປສ຺ສຸກ຺ໂກ ຕາຕ ຕຸວໍ ນິສີທ, ປຸຕ຺ໂຕ ປິຕຸ ຈຣຕິ ອຕ຺ຖຈຣິຍໍ;

ອຫໍ ຈຣິສ຺ສາມິ ຕເວຕມຕ຺ຖໍ, ເສນສ຺ສ ປຸຕ຺ເຕ ປຣິຕາຍມາໂນ.

໕໓. ອທ຺ຘາ ຫິ ຕາຕ ສຕເມສ ຘມ຺ໂມ, ປຸຕ຺ໂຕ ປິຕຸ ຍໍ ຈເຣ [ປິຕຸນໍ ຈເຣ (ກ.), ປິຕຸ ຍຎ຺ຈເຣຖ (ສີ. ປີ.)] ອຕ຺ຖຈຣິຍໍ;

ອປ຺ເປວ ມໍ ທິສ຺ວານ ປວຑ຺ຒກາຍໍ, ເສນສ຺ສ ປຸຕ຺ຕາ ນ ວິເຫຐເຍຍ຺ຍຸໍ.

໕໔. ປສູ ມນຸສ຺ສາ ມິຄວີຣເສຏ຺ຐ [ມິຄວິຣິຍເສຏ຺ຐ (ສີ. ປີ.)], ຠຍຏ຺ຏິຕາ [ຠຍທ຺ທິຕາ (ສີ. ປີ.)] ເສຏ຺ຐມຸປພ຺ພຊນ຺ຕິ;

ປຸຕ຺ຕາ ມມຏ຺ຏາ ຄຕິມາຄໂຕສ຺ມິ, ຕ຺ວໍ ໂນສິ ຣາຊາ ຠວ ເມ ສຸຂາຍ.

໕໕. ກໂຣມິ ເຕ ເສນກ ເອຕມຕ຺ຖໍ, ອາຍາມິ ເຕ ຕໍ ທິສຕໍ ວຘາຍ;

ກຖຎ຺ຫິ ວິຎ຺ຎູ ປຫຸ ສມ຺ປຊາໂນ, ນ ວາຍເມ ອຕ຺ຕຊນສ຺ສ ຄຸຕ຺ຕິຍາ.

໕໖. ມິຕ຺ຕຎ຺ຈ ກຍິຣາຖ ສຸຫທຍຎ຺ຈ [ສຸຫທ຺ທຍຎ຺ຈ (ສີ.), ສຂາຆຣຎ຺ຈ (ປີ.)], ອຍິຣຎ຺ຈ ກຍິຣາຖ ສຸຂາຄມາຍ;

ນິວຕ຺ຖໂກໂຈວ [ໂກໂຊວ (ສີ. ປີ.)] ສເຣຠິຫນ຺ຕ຺ວາ, ໂມທາມ ປຸຕ຺ເຕຫິ ສມງ຺ຄິຠູຕາ.

໕໗. ສກມິຕ຺ຕສ຺ສ ກມ຺ເມນ, ສຫາຍສ຺ສາປລາຍິໂນ;

ກູຊນ຺ຕມຸປກູຊນ຺ຕິ, ໂລມສາ ຫທຍງ຺ຄມໍ.

໕໘. ມິຕ຺ຕໍ ສຫາຍໍ ອຘິຄມ຺ມ ປຓ຺ຑິໂຕ, ໂສ ຠຸຎ຺ຊຕີ ປຸຕ຺ຕ ປສຸໍ ຘນໍ ວາ;

ອຫຎ຺ຈ ປຸຕ຺ຕາ ຈ ປຕີ ຈ ມຍ຺ຫໍ, ມິຕ຺ຕານຸກມ຺ປາຍ ສມງ຺ຄິຠູຕາ.

໕໙. ຣາຊວຕາ ສູຣວຕາ ຈ ອຕ຺ໂຖ, ສມ຺ປນ຺ນສຂິສ຺ສ ຠວນ຺ຕິ ເຫເຕ;

ໂສ ມິຕ຺ຕວາ ຍສວາ ອຸຄ຺ຄຕຕ຺ໂຕ, ອສ຺ມິໍຘໂລເກ [ອສ຺ມິຎ຺ຈ ໂລເກ (ສີ. ສ຺ຍາ. ປີ.)] ໂມທຕິ ກາມກາມີ.

໖໐. ກຣຓີຍານິ ມິຕ຺ຕານິ, ທລິທ຺ເທນາປິ ເສນກ;

ປສ຺ສ ມິຕ຺ຕານຸກມ຺ປາຍ, ສມຄ຺ຄມ຺ຫາ ສຎາຕເກ [ສຎາຕກາ (?)].

໖໑. ສູເຣນ ພລວນ຺ເຕນ, ໂຍ ມິຕ຺ເຕ [ເມຕ຺ເຕ (ສີ.), ມິຕ຺ຕໍ (ສ຺ຍາ.)] ກຸຣຸເຕ ທິໂຊ;

ເອວໍ ໂສ ສຸຂິໂຕ ໂຫຕິ, ຍຖາຫໍ ຕ຺ວຎ຺ຈ ເສນກາຕິ.

ມຫາອຸກ຺ກຸສຊາຕກໍ ຕຕິຍໍ.