໔໖໑. ທສຣຖຊາຕກໍ (໗)

໘໔. ເອຖ ລກ຺ຂຓ ສີຕາ ຈ, ອຸໂຠ ໂອຕຣໂຖທກໍ;

ເອວາຍໍ ຠຣໂຕ ອາຫ, ‘‘ຣາຊາ ທສຣໂຖ ມໂຕ’’.

໘໕. ເກນ ຣາມປ຺ປຠາເວນ, ໂສຈິຕພ຺ພໍ ນ ໂສຈສິ;

ປິຕຣໍ ກາລກຕໍ [ກາລງ຺ກຕໍ (ກ.)] ສຸຕ຺ວາ, ນ ຕໍ ປສຫເຕ ທຸຂໍ.

໘໖. ຍໍ ນ ສກ຺ກາ ນິປາເລຕຸໍ, ໂປເສນ ລປຕໍ ພຫຸໍ;

ສ ກິສ຺ສ ວິຎ຺ຎູ ເມຘາວີ, ອຕ຺ຕານມຸປຕາປເຍ.

໘໗. ທຫຣາ ຈ ຫິ ວຸທ຺ຘາ ຈ [ເຍ ວຸທ຺ຘາ (ສີ. ອຏ຺ຐ.), ເຍ ວຸຑ຺ຒາ (ສ຺ຍາ.)], ເຍ ພາລາ ເຍ ຈ ປຓ຺ຑິຕາ;

ອຑ຺ຒາ ເຈວ ທລິທ຺ທາ ຈ, ສພ຺ເພ ມຈ຺ຈຸປຣາຍຓາ.

໘໘. ຜລານມິວ ປກ຺ການໍ, ນິຈ຺ຈໍ ປຕນໂຕ ຠຍໍ;

ເອວໍ ຊາຕານ ມຈ຺ຈານໍ, ນິຈ຺ຈ ມຣຓໂຕ ຠຍໍ.

໘໙. ສາຍເມເກ ນ ທິສ຺ສນ຺ຕິ, ປາໂຕ ທິຏ຺ຐາ ພຫຸຊ຺ຊນາ;

ປາໂຕ ເອເກ ນ ທິສ຺ສນ຺ຕິ, ສາຍໍ ທິຏ຺ຐາ ພຫຸຊ຺ຊນາ.

໙໐. ປຣິເທວຍມາໂນ ເຈ, ກິຎ຺ຈິທຕ຺ຖໍ ອຸທພ຺ພເຫ;

ສມ຺ມູຬ຺ໂຫ ຫິໍສມຕ຺ຕານໍ, ກຍິຣາ ຕໍ ວິຈກ຺ຂໂຓ.

໙໑. ກິໂສ ວິວຓ຺ໂຓ ຠວຕິ, ຫິໍສມຕ຺ຕານມຕ຺ຕໂນ [ມຕ຺ຕນາ (ສີ. ອຏ຺ຐ. ສຸ. ນິ. ໕໙໐)];

ນ ເຕນ ເປຕາ ປາເລນ຺ຕິ, ນິຣຕ຺ຖາ ປຣິເທວນາ.

໙໒. ຍຖາ ສຣຓມາທິຕ຺ຕໍ, ວາຣິນາ ປຣິນິພ຺ພເຍ [ວາຣິນາວນິພ຺ພາປເຍ (ສ຺ຍາ. ກ.)];

ເອວມ຺ປິ ຘີໂຣ ສຸຕວາ, ເມຘາວີ ປຓ຺ຑິໂຕ ນໂຣ;

ຂິປ຺ປມຸປ຺ປຕິຕໍ ໂສກໍ, ວາໂຕ ຕູລໍວ ຘໍສເຍ.

໙໓. ມຈ຺ໂຈ ເອໂກວ [ເອໂກວ ມຈ຺ໂຈ (ສີ. ສ຺ຍາ. ປີ.)] ອຈ຺ເຈຕິ, ເອໂກວ ຊາຍເຕ ກຸເລ;

ສໍໂຍຄປຣມາຕ຺ເວວ, ສມ຺ໂຠຄາ ສພ຺ພປາຓິນໍ.

໙໔. ຕສ຺ມາ ຫິ ຘີຣສ຺ສ ພຫຸສ຺ສຸຕສ຺ສ, ສມ຺ປສ຺ສໂຕ ໂລກມິມໍ ປຣຎ຺ຈ;

ອຎ຺ຎາຍ ຘມ຺ມໍ ຫທຍໍ ມນຎ຺ຈ, ໂສກາ ມຫນ຺ຕາປິ ນ ຕາປຍນ຺ຕິ.

໙໕. ໂສຫໍ ທສ຺ສຎ຺ຈ ໂຠກ຺ຂຎ຺ຈ, ຠຣິສ຺ສາມິ ຈ [ໂສຫໍ ຍສຎ຺ຈ ໂຠຄຎ຺ຈ, ຠຣິຍາປິ ຈ (ສ຺ຍາ. ກ.)] ຎາຕເກ;

ເສສຎ຺ຈ ປາລຍິສ຺ສາມິ, ກິຈ຺ຈເມຕໍ [ກິຈ຺ຈເມວໍ (ປີ.)] ວິຊານໂຕ.

໙໖. ທສ ວສ຺ສສຫສ຺ສານິ, ສຏ຺ຐິ ວສ຺ສສຕານິ ຈ;

ກມ຺ພຸຄີໂວ ມຫາພາຫຸ, ຣາໂມ ຣຊ຺ຊມກາຣຍີຕິ.

ທສຣຖຊາຕກໍ ສຕ຺ຕມໍ.