໑໑. ເອກາທສກນິປາໂຕ

໔໕໕. ມາຕຸໂປສກຊາຕກໍ (໑)

໑. ຕສ຺ສ ນາຄສ຺ສ ວິປ຺ປວາເສນ, ວິຣູຬ຺ຫາ ສລ຺ລກີ ຈ ກຸຏຊາ ຈ;

ກຸຣຸວິນ຺ທກຣວີຣາ [ກຣວຣາ (ສີ. ສ຺ຍາ.)] ຕິສສາມາ ຈ, ນິວາເຕ ປຸປ຺ຜິຕາ ຈ ກຓິກາຣາ.

໒. ໂກຈິເທວ ສຸວຓ຺ຓກາຍຸຣາ, ນາຄຣາຊໍ ຠຣນ຺ຕິ ປິຓ຺ເຑນ;

ຍຕ຺ຖ ຣາຊາ ຣາຊກຸມາໂຣ ວາ, ກວຈມຠິເຫສ຺ສຕິ ອຉມ຺ຠິໂຕ [ອສມ຺ຠີໂຕ (ສີ. ສ຺ຍາ. ປີ.)].

໓. ຄຓ຺ຫາຫິ ນາຄ ກພຬໍ, ມາ ນາຄ ກິສໂກ ຠວ;

ພຫູນິ ຣາຊກິຈ຺ຈານິ, ຕານິ [ຍານິ (ສີ. ປີ.)] ນາຄ ກຣິສ຺ສສິ.

໔. ສາ ນູນສາ ກປຓິກາ, ອນ຺ຘາ ອປຣິຓາຍິກາ;

ຂາຓຸໍ ປາເທນ ຆຏ຺ເຏຕິ, ຄິຣິໍ ຈຓ຺ໂຑຣຓໍ ປຕິ.

໕. ກາ ນຸ ເຕ ສາ ມຫານາຄ, ອນ຺ຘາ ອປຣິຓາຍິກາ;

ຂາຓຸໍ ປາເທນ ຆຏ຺ເຏຕິ, ຄິຣິໍ ຈຓ຺ໂຑຣຓໍ ປຕິ.

໖. ມາຕາ ເມ ສາ ມຫາຣາຊ, ອນ຺ຘາ ອປຣິຓາຍິກາ;

ຂາຓຸໍ ປາເທນ ຆຏ຺ເຏຕິ, ຄິຣິໍ ຈຓ຺ໂຑຣຓໍ ປຕິ.

໗. ມຸຎ຺ຈເຖຕໍ ມຫານາຄໍ, ໂຍຍໍ ຠຣຕິ ມາຕຣໍ;

ສເມຕຸ ມາຕຣາ ນາໂຄ, ສຫ ສພ຺ເພຫິ ຎາຕິຠິ.

໘. ມຸຕ຺ໂຕ ຈ ພນ຺ຘນາ ນາໂຄ, ມຸຕ຺ຕມາທາຍ ກຸຎ຺ຊໂຣ [ກາສິຣາເຊນ ເປສິໂຕ (ສີ. ສ຺ຍາ.), ມຸຕ຺ໂຕ ທາມາໂຕ ກຸຎ຺ຊໂຣ (ປີ. ສີ. ນິຍ຺ຍ)];

ມຸຫຸຕ຺ຕໍ ອສ຺ສາສຍິຕ຺ວາ [ວິສ຺ສມິຕ຺ວານ (ສີ.)], ອຄມາ ເຍນ ປພ຺ພໂຕ.

໙. ຕໂຕ ໂສ ນຬິນິໍ [ນິລິນໍ (ສ຺ຍາ.)] ຄນ຺ຕ຺ວາ, ສີຕໍ ກຸຎ຺ຊຣເສວິຕໍ;

ໂສຓ຺ຑາຍູທກມາຫຕ຺ວາ [ມາຫິຕ຺ວາ (ສ຺ຍາ. ກ.)], ມາຕຣໍ ອຠິສິຎ຺ຈຖ.

໑໐. ໂກຍ ອນຣິໂຍ ເທໂວ, ອກາເລນປິ ວສ຺ສຕິ [ອກາເລນ ປວສ຺ສຕິ (ສີ. ສ຺ຍາ.), ອກາເລນ’ຕິວສ຺ສຕິ (ປີ.)];

ຄໂຕ ເມ ອຕ຺ຣໂຊ ປຸຕ຺ໂຕ, ໂຍ ມຍ຺ຫໍ ປຣິຈາຣໂກ.

໑໑. ອຸຏ຺ເຐຫິ ອມ຺ມ ກິໍ ເສສິ, ອາຄໂຕ ຕ຺ຍາຫມຕ຺ຣໂຊ;

ມຸຕ຺ໂຕມ຺ຫິ ກາສິຣາເຊນ, ເວເທເຫນ ຍສສ຺ສິນາ.

໑໒. ຈິຣໍ ຊີວຕຸ ໂສ ຣາຊາ, ກາສີນໍ ຣຏ຺ຐວຑ຺ຒໂນ;

ໂຍ ເມ ປຸຕ຺ຕໍ ປໂມເຈສິ, ສທາ ວຸທ຺ຘາປຈາຍິກນ຺ຕິ.

ມາຕຸໂປສກຊາຕກໍ ປຐມໍ.

໔໕໖. ຊຸຓ຺ຫຊາຕກໍ (໒)

໑໓. ສຸໂຓຫິ ມຍ຺ຫໍ ວຈນໍ ຊນິນ຺ທ, ອຕ຺ເຖນ ຊຸຓ຺ຫມ຺ຫິ ອິຘານຸປຕ຺ໂຕ;

ນ ພ຺ຣາຫ຺ມເຓ ອທ຺ຘິເກ ຕິຏ຺ຐມາເນ, ຄນ຺ຕພ຺ພ [ຄນ຺ຕພ຺ຍ (ກ.)] ມາຫຸ ທ຺ວິປທິນ຺ທ [ທິປທານ (ສີ. ປີ.), ທ຺ວິປທານ (ສ຺ຍາ.)] ເສຏ຺ຐ.

໑໔. ສຸໂຓມິ ຕິຏ຺ຐາມິ ວເທຫິ ພ຺ຣຫ຺ເມ, ເຍນາສິ [ເຍນາປິ (ສ຺ຍາ. ກ.)] ອຕ຺ເຖນ ອິຘານຸປຕ຺ໂຕ;

ກໍ ວາ ຕ຺ວມຕ຺ຖໍ ມຍິ ປຕ຺ຖຍາໂນ, ອິຘາຄມາ ພ຺ຣຫ຺ເມ ຕທິງ຺ຆ ພ຺ຣູຫິ.

໑໕. ທທາຫິ ເມ ຄາມວຣານິ ປຎ຺ຈ, ທາສີສຕໍ ສຕ຺ຕ ຄວໍສຕານິ;

ປໂຣສຫສ຺ສຎ຺ຈ ສຸວຓ຺ຓນິກ຺ເຂ, ຠຣິຍາ ຈ ເມ ສາທິສີ ທ຺ເວ ທທາຫິ.

໑໖. ຕໂປ ນຸ ເຕ ພ຺ຣາຫ຺ມຓ ຠິໍສຣູໂປ, ມນ຺ຕາ ນຸ ເຕ ພ຺ຣາຫ຺ມຓ ຈິຕ຺ຕຣູປາ;

ຍກ຺ຂາ ນຸ [ຍກ຺ຂາ ວ (ສີ. ປີ.)] ເຕ ອສ຺ສວາ ສນ຺ຕິ ເກຈິ, ອຕ຺ຖໍ ວາ ເມ ອຠິຊານາສິ ກຕ຺ຕໍ.

໑໗. ນ ເມ ຕໂປ ອຕ຺ຖິ ນ ຈາປິ ມນ຺ຕາ, ຍກ຺ຂາປິ ເມ ອສ຺ສວາ ນຕ຺ຖິ ເກຈິ;

ອຕ຺ຖມ຺ປິ ເຕ ນາຠິຊານາມິ ກຕ຺ຕໍ, ປຸພ຺ເພ ຈ ໂຂ [ປຸພ຺ເພວ ໂຂ (ສ຺ຍາ. ກ.)] ສງ຺ຄຕິມຕ຺ຕມາສິ.

໑໘. ປຐມໍ ອິທໍ ທສ຺ສນໍ ຊານໂຕ ເມ, ນ ຕາຠິຊານາມິ ອິໂຕ ປຸຣຕ຺ຖາ;

ອກ຺ຂາຫິ ເມ ປຸຈ຺ຉິໂຕ ເອຕມຕ຺ຖໍ, ກທາ ກຸຫິໍ ວາ ອຫຸ ສງ຺ຄໂມ ໂນ.

໑໙. ຄນ຺ຘາຣຣາຊສ຺ສ ປຸຣມ຺ຫິ ຣມ຺ເມ, ອວສິມ຺ຫເສ ຕກ຺ກສີລາຍໍ ເທວ;

ຕຕ຺ຖນ຺ຘກາຣມ຺ຫິ ຕິມີສິກາຍໍ [ຕິມິສ຺ສິກາຍໍ (ສີ. ອຏ຺ຐ.), ຕິມິສ຺ສກາຍໍ (ສ຺ຍາ.)], ອໍເສນ ອໍສໍ ສມຆຏ຺ຏຍິມ຺ຫ.

໒໐. ເຕ ຕຕ຺ຖ ຐຕ຺ວານ ອຸໂຠ ຊນິນ຺ທ, ສາຣາຓິຍໍ [ສາຣຓີຍໍ (ກ.)] ວີຕິສາຣຍິມ຺ຫ [ວີຕິສາຣິມ຺ຫ (ສີ. ສ຺ຍາ. ປີ.)] ຕຕ຺ຖ;

ສາເຍວ ໂນ ສງ຺ຄຕິມຕ຺ຕມາສິ, ຕໂຕ ນ ປຈ຺ຉາ ນ ປຸເຣ ອໂຫສິ.

໒໑. ຍທາ ກທາຈິ ມນຸເຊສຸ ພ຺ຣຫ຺ເມ, ສມາຄໂມ ສປ຺ປຸຣິເສນ ໂຫຕິ;

ນ ປຓ຺ຑິຕາ ສງ຺ຄຕິສນ຺ຖວານິ, ປຸພ຺ເພ ກຕໍ ວາປິ ວິນາສຍນ຺ຕິ.

໒໒. ພາລາວ [ພາລາ ຈ (ສີ. ສ຺ຍາ. ປີ.)] ໂຂ ສງ຺ຄຕິສນ຺ຖວານິ, ປຸພ຺ເພ ກຕໍ ວາປິ ວິນາສຍນ຺ຕິ;

ພຫຸມ຺ປິ ພາເລສຸ ກຕໍ ວິນສ຺ສຕິ, ຕຖາ ຫິ ພາລາ ອກຕຎ຺ຎຸຣູປາ.

໒໓. ຘີຣາ ຈ ໂຂ ສງ຺ຄຕິສນ຺ຖວານິ, ປຸພ຺ເພ ກຕໍ ວາປິ ນ ນາສຍນ຺ຕິ;

ອປ຺ປມ຺ປິ ຘີເຣສຸ ກຕໍ ນ ນສ຺ສຕິ, ຕຖາ ຫິ ຘີຣາ ສຸກຕຎ຺ຎຸຣູປາ.

໒໔. ທທາມິ ເຕ ຄາມວຣານິ ປຎ຺ຈ, ທາສີສຕໍ ສຕ຺ຕ ຄວໍສຕານິ;

ປໂຣສຫສ຺ສຎ຺ຈ ສຸວຓ຺ຓນິກ຺ເຂ, ຠຣິຍາ ຈ ເຕ ສາທິສີ ທ຺ເວ ທທາມິ.

໒໕. ເອວໍ ສຕໍ ໂຫຕິ ສເມຈ຺ຈ ຣາຊ, ນກ຺ຂຕ຺ຕຣາຊາຣິວ ຕາຣການໍ;

ອາປູຣຕີ ກາສິປຕີ ຕຖາຫໍ, ຕຍາປິ ເມ ສງ຺ຄໂມ ອຊ຺ຊ ລທ຺ໂຘຕິ.

ຊຸຓ຺ຫຊາຕກໍ ທຸຕິຍໍ.

໔໕໗. ຘມ຺ມເທວປຸຕ຺ຕຊາຕກໍ (໓)

໒໖. ຍໂສກໂຣ ປຸຎ຺ຎກໂຣຫມສ຺ມິ, ສທາຕ຺ຖຸໂຕ ສມຓພ຺ຣາຫ຺ມຓານໍ;

ມຄ຺ຄາຣໂຫ ເທວມນຸສ຺ສປູຊິໂຕ, ຘມ຺ໂມ ອຫໍ ເທຫິ ອຘມ຺ມ ມຄ຺ຄໍ.

໒໗. ອຘມ຺ມຍານໍ ທຬ຺ຫມາຣຸຫິຕ຺ວາ, ອສນ຺ຕສນ຺ໂຕ ພລວາຫມສ຺ມິ;

ສ ກິສ຺ສ ເຫຕຸມ຺ຫິ ຕວຊ຺ຊ ທຊ຺ຊໍ, ມຄ຺ຄໍ ອຫໍ ຘມ຺ມ ອທິນ຺ນປຸພ຺ພໍ.

໒໘. ຘມ຺ໂມ ຫເວ ປາຕຸຣໂຫສິ ປຸພ຺ເພ, ປຈ຺ຉາ ອຘມ຺ໂມ ອຸທປາທິ ໂລເກ;

ເຊຏ຺ໂຐ ຈ ເສຏ຺ໂຐ ຈ ສນນ຺ຕໂນ ຈ, ອຸຍ຺ຍາຫິ ເຊຏ຺ຐສ຺ສ ກນິຏ຺ຐ ມຄ຺ຄາ.

໒໙. ນ ຍາຈນາຍ ນປິ ປາຕິຣູປາ, ນ ອຣຫຕາ [ນ ອຣຫຕິ (ສີ. ປີ.), ອຣຫຕິ (ກ.)] ເຕຫໍ ທເທຍ຺ຍໍ ມຄ຺ຄໍ;

ຍຸທ຺ຘຎ຺ຈ ໂນ ໂຫຕຸ ອຸຠິນ຺ນມຊ຺ຊ, ຍຸທ຺ຘມ຺ຫິ ໂຍ ເຊສ຺ສຕິ ຕສ຺ສ ມຄ຺ໂຄ.

໓໐. ສພ຺ພາ ທິສາ ອນຸວິສໂຏຫມສ຺ມິ, ມຫພ຺ພໂລ ອມິຕຍໂສ ອຕຸລ຺ໂຍ;

ຄຸເຓຫິ ສພ຺ເພຫິ ອຸເປຕຣູໂປ, ຘມ຺ໂມ ອຘມ຺ມ ຕ຺ວໍ ກຖໍ ວິເຊສ຺ສສິ.

໓໑. ໂລເຫນ ເວ ຫຎ຺ຎຕິ ຊາຕຣູປໍ, ນ ຊາຕຣູເປນ ຫນນ຺ຕິ ໂລຫໍ;

ສເຈ ອຘມ຺ໂມ ຫຎ຺ຉຕິ [ຫຎ຺ຎຕິ (ສີ. ສ຺ຍາ.), ຫຎ຺ຎິຕິ (ກຕ຺ຖຈິ)] ຘມ຺ມມຊ຺ຊ, ອໂຍ ສຸວຓ຺ຓໍ ວິຍ ທສ຺ສເນຍ຺ຍໍ.

໓໒. ສເຈ ຕຸວໍ ຍຸທ຺ຘພໂລ ອຘມ຺ມ [ຍຸທ຺ຘພໂລ’ສິ’ຘມ຺ມ (ກ. ສີ.), ຍຸທ຺ຘພໂລ’ສ’ຘມ຺ມ (ປີ.)], ນ ຕຸຍ຺ຫ ວຸຑ຺ຒາ [ວທ຺ຘາ (ສີ. ປີ.)] ຈ ຄຣູ ຈ ອຕ຺ຖິ;

ມຄ຺ຄຎ຺ຈ ເຕ ທມ຺ມິ ປິຍາປ຺ປິເຍນ, ວາຈາທຸຣຸຕ຺ຕານິປິ ເຕ ຂມາມິ.

໓໓. ອິທຎ຺ຈ ສຸຕ຺ວາ ວຈນໍ ອຘມ຺ໂມ, ອວໍສິໂຣ ປຕິໂຕ ອຸທ຺ຘປາໂທ;

‘‘ຍຸທ຺ຘຕ຺ຖິໂກ ເຈ ນ ລຠາມິ ຍຸທ຺ຘໍ’’, ເອຕ຺ຕາວຕາ ໂຫຕິ ຫໂຕ ອຘມ຺ໂມ.

໓໔. ຂນ຺ຕີພໂລ ຍຸທ຺ຘພລໍ ວິເຊຕ຺ວາ, ຫນ຺ຕ຺ວາ ອຘມ຺ມໍ ນິຫນິຕ຺ວ [ວິຫນິຕ຺ວາ (ກ.)] ຠູມ຺ຍາ;

ປາຍາສິ ວິຕ຺ໂຕ [ຈິຕ຺ໂຕ (ສ຺ຍາ.)] ອຠິຣຸຍ຺ຫ ສນ຺ທນໍ, ມຄ຺ເຄເນວ ອຕິພໂລ ສຈ຺ຈນິກ຺ກໂມ.

໓໕. ມາຕາ ປິຕາ ສມຓພ຺ຣາຫ຺ມຓາ ຈ, ອສມ຺ມານິຕາ ຍສ຺ສ ສເກ ອຄາເຣ;

ອິເຘວ ນິກ຺ຂິປ຺ປ ສຣີຣເທຫໍ, ກາຍສ຺ສ ເຠທາ ນິຣຍໍ ວຊນ຺ຕິ ເຕ [ວຊນ຺ຕິ (ສີ. ປີ.)];

ຍຖາ ອຘມ຺ໂມ ປຕິໂຕ ອວໍສິໂຣ.

໓໖. ມາຕາ ປິຕາ ສມຓພ຺ຣາຫ຺ມຓາ ຈ, ສຸສມ຺ມານິຕາ ຍສ຺ສ ສເກ ອຄາເຣ;

ອິເຘວ ນິກ຺ຂິປ຺ປ ສຣີຣເທຫໍ, ກາຍສ຺ສ ເຠທາ ສຸຄຕິໍ ວຊນ຺ຕິ ເຕ;

ຍຖາປິ ຘມ຺ໂມ ອຠິຣຸຍ຺ຫ ສນ຺ທນນ຺ຕິ.

ຘມ຺ມເທວປຸຕ຺ຕຊາຕກໍ [ຘມ຺ມຊາຕກໍ (ສີ. ປີ.)] ຕຕິຍໍ.

໔໕໘. ອຸທຍຊາຕກໍ (໔)

໓໗. ເອກາ ນິສິນ຺ນາ ສຸຈິ ສຎ຺ຎຕູຣູ, ປາສາທມາຣຸຍ຺ຫ ອນິນ຺ທິຕງ຺ຄີ;

ຍາຈາມິ ຕໍ ກິນ຺ນຣເນຕ຺ຕຈກ຺ຂຸ, ອິເມກຣຕ຺ຕິໍ ອຸຠໂຍ ວເສມ.

໓໘. ໂອກິຓ຺ຓນ຺ຕຣປຣິຂໍ, ທຬ຺ຫມຏ຺ຏາລໂກຏ຺ຐກໍ;

ຣກ຺ຂິຕໍ ຂຄ຺ຄຫຕ຺ເຖຫິ, ທຸປ຺ປເວສມິທໍ ປຸຣໍ.

໓໙. ທຫຣສ຺ສ ຍຸວິໂນ ຈາປິ, ອາຄໂມ ຈ ນ ວິຊ຺ຊຕິ;

ອຖ ເກນ ນຸ ວຓ຺ເຓນ, ສງ຺ຄມໍ ອິຈ຺ຉເສ ມຍາ.

໔໐. ຍກ຺ໂຂຫມສ຺ມິ ກລ຺ຍາຓິ, ອາຄໂຕສ຺ມິ ຕວນ຺ຕິເກ [ຕວນ຺ຕິກໍ (ສີ. ປີ.)];

ຕ຺ວໍ ມໍ ນນ຺ທຍ [ນນ຺ທສ຺ສຸ (ສ຺ຍາ. ກ.)] ຠທ຺ທນ຺ເຕ, ປຸຓ຺ຓກໍສໍ ທທາມິ ເຕ.

໔໑. ເທວໍ ວ ຍກ຺ຂໍ ອຖ ວາ ມນຸສ຺ສໍ, ນ ປຕ຺ຖເຍ ອຸທຍມຕິຈ຺ຈ ອຎ຺ຎໍ;

ຄຈ຺ເຉວ ຕ຺ວໍ ຍກ຺ຂ ມຫານຸຠາວ, ມາ ຈສ຺ສຸ ຄນ຺ຕ຺ວາ ປຸນຣາວຊິຕ຺ຖ.

໔໒. ຍາ ສາ ຣຕິ ອຸຕ຺ຕມາ ກາມໂຠຄິນໍ, ຍໍ ເຫຕຸ ສຕ຺ຕາ ວິສມໍ ຈຣນ຺ຕິ;

ມາ ຕໍ ຣຕິໍ ຊີຍິ ຕຸວໍ ສຸຈິມ຺ຫິ ເຕ, ທທາມິ ເຕ ຣູປິຍໍ ກໍສປູຣໍ.

໔໓. ນາຣິໍ ນໂຣ ນິຊ຺ຌປຍໍ ຘເນນ, ອຸກ຺ກໍສຕີ ຍຕ຺ຖ ກໂຣຕິ ຉນ຺ທໍ;

ວິປຈ຺ຈນີໂກ ຕວ ເທວຘມ຺ໂມ, ປຈ຺ຈກ຺ຂໂຕ ໂຖກຕເຣນ ເອສິ.

໔໔. ອາຍຸ ຈ ວຓ຺ໂຓ ຈ [ອາຍຸໍ ຈ ວຓ຺ຓໍ ຈ (ກ. ສີ. ປີ.)] ມນຸສ຺ສໂລເກ, ນິຫີຍຕິ ມນຸຊານໍ ສຸຄ຺ຄຕ຺ເຕ;

ເຕເນວ ວຓ຺ເຓນ ຘນມ຺ປິ ຕຸຍ຺ຫໍ, ນິຫີຍຕິ ຊິຓ຺ຓຕຣາສິ ອຊ຺ຊ.

໔໕. ເອວໍ ເມ ເປກ຺ຂມານສ຺ສ, ຣາຊປຸຕ຺ຕິ ຍສສ຺ສິນິ;

ຫາຍເຕວ ຕວ [ຫາຍເຕ ວຕ ເຕ (ສີ. ສ຺ຍາ. ກ.), ຫາຍເຕວ ຕໂຕ (ປີ.)] ວຓ຺ໂຓ, ອໂຫຣຕ຺ຕານມຈ຺ຈເຍ.

໔໖. ອິມິນາວ ຕ຺ວໍ ວຍສາ, ຣາຊປຸຕ຺ຕິ ສຸເມຘເສ;

ພ຺ຣຫ຺ມຈຣິຍໍ ຈເຣຍ຺ຍາສິ, ຠິຍ຺ໂຍ ວຓ຺ຓວຕີ ສິຍາ.

໔໗. ເທວາ ນ ຊີຣນ຺ຕິ ຍຖາ ມນຸສ຺ສາ, ຄຕ຺ເຕສຸ ເຕສໍ ວລິໂຍ ນ ໂຫນ຺ຕິ;

ປຸຈ຺ຉາມິ ຕໍ ຍກ຺ຂ ມຫານຸຠາວ, ກຖໍ ນຸ ເທວານ [ກຖໍ ນ ເທວານໍ (ປີ.)] ສຣີຣເທໂຫ.

໔໘. ເທວາ ນ ຊີຣນ຺ຕິ ຍຖາ ມນຸສ຺ສາ, ຄຕ຺ເຕສຸ ເຕສໍ ວລິໂຍ ນ ໂຫນ຺ຕິ;

ສຸເວ ສຸເວ ຠິຍ຺ຍຕໂຣວ [ຠິຍ຺ຍຕໂຣ ຈ (ກ.)] ເຕສໍ, ທິພ຺ໂພ ຈ ວຓ຺ໂຓ ວິປຸລາ ຈ ໂຠຄາ.

໔໙. ກິໍສູຘ ຠີຕາ ຊນຕາ ອເນກາ, ມຄ຺ໂຄ ຈ ເນກາຍຕນໍ ປວຸຕ຺ໂຕ;

ປຸຈ຺ຉາມິ ຕໍ ຍກ຺ຂ ມຫານຸຠາວ, ກຕ຺ຖຏ຺ຐິໂຕ ປຣໂລກໍ ນ ຠາເຍ.

໕໐. ວາຈໍ ມນຎ຺ຈ ປຓິຘາຍ ສມ຺ມາ, ກາເຍນ ປາປານິ ອກຸພ຺ພມາໂນ;

ພຫຸນ຺ນປານໍ ຆຣມາວສນ຺ໂຕ, ສທ຺ໂຘ ມຸທູ ສໍວິຠາຄີ ວທຎ຺ຎູ;

ສງ຺ຄາຫໂກ ສຂິໂລ ສຓ຺ຫວາໂຈ, ເອຕ຺ຖຏ຺ຐິໂຕ ປຣໂລກໍ ນ ຠາເຍ.

໕໑. ອນຸສາສສິ ມໍ ຍກ຺ຂ, ຍຖາ ມາຕາ ຍຖາ ປິຕາ;

ອຸຬາຣວຓ຺ຓໍ ປຸຈ຺ຉາມິ, ໂກ ນຸ ຕ຺ວມສິ ສຸພ຺ຣຫາ.

໕໒. ອຸທໂຍຫມສ຺ມິ ກລ຺ຍາຓິ, ສງ຺ກຣຕ຺ຕາ ອິຘາຄໂຕ [ສງ຺ຄຣຕ຺ຖາ ອິຘາຄໂຕ (ສີ. ປີ.), ສງ຺ຄຣຕ຺ຖາຍິຘາຄໂຕ (ສ຺ຍາ.)];

ອາມນ຺ຕ ໂຂ ຕໍ ຄຈ຺ຉາມິ, ມຸຕ຺ໂຕສ຺ມິ ຕວ ສງ຺ກຣາ [ສງ຺ຄຣາ (ສີ. ສ຺ຍາ. ປີ.)].

໕໓. ສເຈ ໂຂ ຕ຺ວໍ ອຸທໂຍສິ, ສງ຺ກຣຕ຺ຕາ ອິຘາຄໂຕ;

ອນຸສາສ ມໍ ຣາຊປຸຕ຺ຕ, ຍຖາສ຺ສ ປຸນ ສງ຺ຄໂມ.

໕໔. ອຕິປຕຕິ [ອຘິປຕຕີ (ສີ. ປີ.)] ວໂຍ ຂໂຓ ຕເຖວ, ຐານໍ ນຕ຺ຖິ ຘຸວໍ ຈວນ຺ຕິ ສຕ຺ຕາ;

ປຣິຊິຍ຺ຍຕິ ອທ຺ຘຸວໍ ສຣີຣໍ, ອຸທເຍ ມາ ປມາທ [ມາ ປມາທໍ (ສີ.)] ຈຣສ຺ສຸ ຘມ຺ມໍ.

໕໕. ກສິຓາ ປຖວີ ຘນສ຺ສ ປູຣາ, ເອກສ຺ເສວ ສິຍາ ອນຎ຺ຎເຘຍ຺ຍາ;

ຕຎ຺ຈາປິ ຊຫຕິ [ຊຫາຕິ (ສີ. ສ຺ຍາ. ປີ.), ຊຫາຕີ (?)] ອວີຕຣາໂຄ, ອຸທເຍ ມາ ປມາທ ຈຣສ຺ສຸ ຘມ຺ມໍ.

໕໖. ມາຕາ ຈ ປິຕາ ຈ ຠາຕໂຣ ຈ, ຠຣິຍາ ຍາປິ ຘເນນ ໂຫຕິ ກີຕາ [ຠຣິຍາປິ ຘເນນ ໂຫນ຺ຕິ ອຕິຕ຺ຕາ (ກ.)];

ເຕ ຈາປິ ຊຫນ຺ຕິ ອຎ຺ຎມຎ຺ຎໍ, ອຸທເຍ ມາ ປມາທ ຈຣສ຺ສຸ ຘມ຺ມໍ.

໕໗. ກາໂຍ ປຣໂຠຊນນ຺ຕິ ຎຕ຺ວາ [ກາໂຍ ຈ ປຣໂຠຊນໍ ວິທິຕ຺ວາ (ກ.)], ສໍສາເຣ ສຸຄຕິຎ຺ຈ ທຸຄ຺ຄຕິຎ຺ຈ [ສຸຄຕີ ຈ ທຸຄ຺ຄຕີ ຈ (ສີ. ສ຺ຍາ. ປີ.), ສຸຄ຺ຄຕິໍ ທຸຄ຺ຄຕິຎ຺ຈ (ກ.)];

ອິຕ຺ຕຣວາໂສຕິ ຊານິຍານ, ອຸທເຍ ມາ ປມາທ ຈຣສ຺ສຸ ຘມ຺ມໍ.

໕໘. ສາຘຸ ຠາສຕິຍໍ [ຠາສຕຍໍ (ສີ. ປີ.)] ຍກ຺ໂຂ, ອປ຺ປໍ ມຈ຺ຈານ ຊີວິຕໍ;

ກສິຣຎ຺ຈ ປຣິຕ຺ຕຎ຺ຈ, ຕຎ຺ຈ ທຸກ຺ເຂນ ສໍຍຸຕໍ;

ສາຫໍ ເອກາ ປພ຺ພຊິສ຺ສາມິ, ຫິຕ຺ວາ ກາສິໍ ສຸຣຸນ຺ຘນນ຺ຕິ.

ອຸທຍຊາຕກໍ ຈຕຸຕ຺ຖໍ.

໔໕໙. ປານີຍຊາຕກໍ (໕)

໕໙. ມິຕ຺ໂຕ ມິຕ຺ຕສ຺ສ ປານີຍໍ, ອທິນ຺ນໍ ປຣິຠຸຎ຺ຊິສໍ;

ເຕນ ປຈ຺ຉາ ວິຊິຄຸຈ຺ຉິໍ, ຕໍ ປາປໍ ປກຕໍ ມຍາ;

ມາ ປຸນ ອກຣໍ ປາປໍ, ຕສ຺ມາ ປພ຺ພຊິໂຕ ອຫໍ.

໖໐. ປຣທາຣຎ຺ຈ ທິສ຺ວານ, ຉນ຺ໂທ ເມ ອຸທປຊ຺ຊຖ [ອຸປປຊ຺ຊຖ (ສ຺ຍາ. ກ.)];

ເຕນ ປຈ຺ຉາ ວິຊິຄຸຈ຺ຉິໍ, ຕໍ ປາປໍ ປກຕໍ ມຍາ;

ມາ ປຸນ ອກຣໍ ປາປໍ, ຕສ຺ມາ ປພ຺ພຊິໂຕ ອຫໍ.

໖໑. ປິຕຣໍ ເມ ມຫາຣາຊ, ໂຈຣາ ອຄຓ຺ຫຸ [ອຄຓ຺ຫຸໍ (ສີ. ປີ.), ອຄຓ຺ຫິ (ກ.)] ການເນ;

ເຕສາຫໍ ປຸຈ຺ຉິໂຕ ຊານໍ, ອຎ຺ຎຖາ ນໍ ວິຍາກຣິໍ.

໖໒. ເຕນ ປຈ຺ຉາ ວິຊິຄຸຈ຺ຉິໍ, ຕໍ ປາປໍ ປກຕໍ ມຍາ;

ມາ ປຸນ ອກຣໍ ປາປໍ, ຕສ຺ມາ ປພ຺ພຊິໂຕ ອຫໍ.

໖໓. ປາຓາຕິປາຕມກຣຸໍ, ໂສມຍາເຄ ອຸປຏ຺ຐິເຕ;

ເຕສາຫໍ ສມນຸຎ຺ຎາສິໍ, ເຕນ ປຈ຺ຉາ ວິຊິຄຸຈ຺ຉິໍ.

໖໔. ຕໍ ປາປໍ ປກຕໍ ມຍາ, ມາ ປຸນ ອກຣໍ ປາປໍ;

ຕສ຺ມາ ປພ຺ພຊິໂຕ ອຫໍ.

໖໕. ສຸຣາເມຣຍມາຘຸກາ [ມຘຸກາ (ສີ. ສ຺ຍາ. ປີ.)], ເຍ ຊນາ ປຐມາສຸ ໂນ;

ພຫູນໍ ເຕ ອນຕ຺ຖາຍ, ມຊ຺ຊປານມກປ຺ປຍຸໍ.

໖໖. ເຕສາຫໍ ສມນຸຎ຺ຎາສິໍ, ເຕນ ປຈ຺ຉາ ວິຊິຄຸຈ຺ຉິໍ;

ຕໍ ປາປໍ ປກຕໍ ມຍາ, ມາ ປຸນ ອກຣໍ ປາປໍ;

ຕສ຺ມາ ປພ຺ພຊິໂຕ ອຫໍ.

໖໗. ຘິຣຕ຺ຖຸ ສຸພຫູ ກາເມ, ທຸຄ຺ຄນ຺ເຘ ພຫຸກຓ຺ຏເກ;