໔໖໒. ສໍວຣຊາຕກໍ (໘)

໙໗. ຊານນ຺ໂຕ ໂນ ມຫາຣາຊ, ຕວ ສີລໍ ຊນາຘິໂປ;

ອິເມ ກຸມາເຣ ປູເຊນ຺ໂຕ, ນ ຕໍ ເກນຈິ ມຎ຺ຎຖ.

໙໘. ຕິຏ຺ຐນ຺ເຕ ໂນ ມຫາຣາເຊ, ອທຸ [ອາທຸ (ສີ. ປີ.), ອາທູ (ສ຺ຍາ.)] ເທເວ ທິວງ຺ຄເຕ;

ຎາຕີ ຕໍ ສມນຸຎ຺ຎິໍສຸ, ສມ຺ປສ຺ສໍ ອຕ຺ຖມຕ຺ຕໂນ.

໙໙. ເກນ ສໍວຣວຕ຺ເຕນ, ສຎ຺ຊາເຕ ອຠິຕິຏ຺ຐສິ;

ເກນ ຕໍ ນາຕິວຕ຺ຕນ຺ຕິ, ຎາຕິສງ຺ຆາ ສມາຄຕາ.

໑໐໐. ນ ຣາຊປຸຕ຺ຕ ອຸສູຍາມິ [ຣາຊປຸຕ຺ຕ ນຸສ຺ສຸຍ຺ຍາມິ (ກ.)], ສມຓານໍ ມເຫສິນໍ;

ສກ຺ກຈ຺ຈໍ ເຕ ນມສ຺ສາມິ, ປາເທ ວນ຺ທາມິ ຕາທິນໍ.

໑໐໑. ເຕ ມໍ ຘມ຺ມຄຸເຓ ຍຸຕ຺ຕໍ, ສຸສ຺ສູສມນຸສູຍກໍ;

ສມຓາ ມນຸສາສນ຺ຕິ [ສມນຸສາສນ຺ຕິ (ສີ. ສ຺ຍາ. ປີ.)], ອິສີ ຘມ຺ມຄຸເຓ ຣຕາ.

໑໐໒. ເຕສາຫໍ ວຈນໍ ສຸຕ຺ວາ, ສມຓານໍ ມເຫສິນໍ;

ນ ກິຎ຺ຈິ ອຕິມຎ຺ຎາມິ, ຘມ຺ເມ ເມ ນິຣໂຕ ມໂນ.

໑໐໓. ຫຕ຺ຖາໂຣຫາ ອນີກຏ຺ຐາ, ຣຖິກາ ປຕ຺ຕິກາຣກາ;

ເຕສໍ [ເຕສຸ (ປີ.)] ນປ຺ປຏິພນ຺ຘາມິ, ນິວິຏ຺ຐໍ [ນິພທ຺ຘໍ (ສີ. ປີ.)] ຠຕ຺ຕເວຕນໍ.

໑໐໔. ມຫາມຕ຺ຕາ ຈ ເມ ອຕ຺ຖິ, ມນ຺ຕິໂນ ປຣິຈາຣກາ;

ພາຣາຓສິໍ ໂວຫຣນ຺ຕິ, ພຫຸມໍສສຸໂຣທກໍ.

໑໐໕. ອໂຖປິ ວາຓິຊາ ຜີຕາ, ນານາຣຏ຺ເຐຫິ ອາຄຕາ;

ເຕສຸ ເມ ວິຫິຕາ ຣກ຺ຂາ, ເອວໍ ຊານາຫຸໂປສຖ.

໑໐໖. ຘມ຺ເມນ ກິຣ ຎາຕີນໍ, ຣຊ຺ຊໍ ກາເຣຫິ ສໍວຣ;

ເມຘາວີ ປຓ຺ຑິໂຕ ຈາສິ [ຈາປິ (ສີ. ປີ.)], ອໂຖປິ ຎາຕິນໍ ຫິໂຕ.

໑໐໗. ຕໍ ຕໍ ຎາຕິປຣິພ຺ຍູຬ຺ຫໍ, ນານາຣຕນໂມຈິຕໍ;

ອມິຕ຺ຕາ ນປ຺ປສຫນ຺ຕິ, ອິນ຺ທໍວ ອສຸຣາຘິໂປຕິ.

ສໍວຣຊາຕກໍ ອຏ຺ຐມໍ.