໔໖໐. ຍຸຘຎ຺ຈຍຊາຕກໍ (໖)

໗໓. ມິຕ຺ຕາມຈ຺ຈປຣິພ຺ຍູຬ຺ຫໍ [ປຣິພ຺ພູຬ຺ຫໍ (ສີ. ປີ.)], ອຫໍ ວນ຺ເທ ຣເຖສຠໍ;

ປພ຺ພຊິສ຺ສາມຫໍ ຣາຊ [ປພ຺ພຊິສ຺ສໍ ມຫາຣາຊ (ສີ. ປີ.)], ຕໍ ເທໂວ ອນຸມຎ຺ຎຕຸ.

໗໔. ສເຈ ເຕ ອູນໍ ກາເມຫິ, ອຫໍ ປຣິປູຣຍາມິ [ອຫໍວ ປູຣຍາມິ (ກ.)] ເຕ;

ໂຍ ຕໍ ຫິໍສຕິ ວາເຣມິ, ມາ ປພ຺ພຊ [ປພ຺ພຊິ (ປີ.)] ຍຸຘຎ຺ຈຍ [ຍຸຘຎ຺ຊຍ (ສີ. ສ຺ຍາ.), ຍຸວຎ຺ຊຍ (ປີ.)].

໗໕. ນ ມຕ຺ຖິ ອູນໍ ກາເມຫິ, ຫິໍສິຕາ ເມ ນ ວິຊ຺ຊຕິ;

ທີປຎ຺ຈ ກາຕຸມິຈ຺ຉາມິ, ຍໍ ຊຣາ ນາຠິກີຣຕິ.

໗໖. ປຸຕ຺ໂຕ ວາ ປິຕຣໍ ຍາເຈ, ປິຕາ ວາ ປຸຕ຺ຕໂມຣສໍ;

ເນຄໂມ ຕໍ ຍາເຈ [ເນຄໂມ ຍາຈເຕ (ສີ. ສ຺ຍາ. ປີ.)] ຕາຕ, ມາ ປພ຺ພຊ ຍຸຘຎ຺ຈຍ.

໗໗. ມາ ມໍ ເທວ ນິວາເຣຫິ, ປພ຺ພຊນ຺ຕໍ ຣເຖສຠ;

ມາຫໍ ກາເມຫິ ສມ຺ມຕ຺ໂຕ, ຊຣາຍ ວສມນ຺ວຄູ.

໗໘. ອຫໍ ຕໍ ຕາຕ ຍາຈາມິ, ອຫໍ ປຸຕ຺ຕ ນິວາຣເຍ;

ຈິຣໍ ຕໍ ທຏ຺ຐຸມິຈ຺ຉາມິ, ມາ ປພ຺ພຊ ຍຸຘຎ຺ຈຍ.

໗໙. ອຸສ຺ສາໂວວ ຕິຓຄ຺ຄມ຺ຫິ, ສູຣິຍຸຄ຺ຄມນໍ ປຕິ;

ເອວມາຍຸ ມນຸສ຺ສານໍ, ມາ ມໍ ອມ຺ມ ນິວາຣຍ.

໘໐. ຕຣມາໂນ ອິມໍ ຍານໍ, ອາໂຣເປຕຸ [ຕຣມານາ ອິມໍ ຍານໍ, ອາໂຣເປນ຺ຕຸ (ສີ. ປີ.)] ຣເຖສຠ;

ມາ ເມ ມາຕາ ຕຣນ຺ຕສ຺ສ, ອນ຺ຕຣາຍກຣາ ອຫຸ.

໘໑. ອຠິຘາວຖ ຠທ຺ທນ຺ເຕ, ສຸຎ຺ຎໍ ເຫສ຺ສຕິ ຣມ຺ມກໍ;

ຍຸຘຎ຺ຈໂຍ ອນຸຎ຺ຎາໂຕ, ສພ຺ພທຕ຺ເຕນ ຣາຊິນາ.

໘໒. ໂຍຫຸ ເສຏ຺ໂຐ ສຫສ຺ສສ຺ສ [ມນຸສ຺ສານໍ (ສ຺ຍາ.), ສຫສ຺ສານໍ (ກ.)], ຍຸວາ ກຎ຺ຈນສນ຺ນິໂຠ;

ໂສຍໍ ກຸມາໂຣ ປພ຺ພຊິໂຕ, ກາສາຍວສໂນ ພລີ.

໘໓. ອຸໂຠ ກຸມາຣາ ປພ຺ພຊິຕາ, ຍຸຘຎ຺ຈໂຍ ຍຸຘິຏ຺ຐິໂລ;

ປຫາຍ ມາຕາປິຕໂຣ, ສງ຺ຄໍ ເຉຕ຺ວານ ມຈ຺ຈຸໂນຕິ.

ຍຸຘຎ຺ຈຍຊາຕກໍ ຉຏ຺ຐໍ.