໔໕໙. ປານີຍຊາຕກໍ (໕)

໕໙. ມິຕ຺ໂຕ ມິຕ຺ຕສ຺ສ ປານີຍໍ, ອທິນ຺ນໍ ປຣິຠຸຎ຺ຊິສໍ;

ເຕນ ປຈ຺ຉາ ວິຊິຄຸຈ຺ຉິໍ, ຕໍ ປາປໍ ປກຕໍ ມຍາ;

ມາ ປຸນ ອກຣໍ ປາປໍ, ຕສ຺ມາ ປພ຺ພຊິໂຕ ອຫໍ.

໖໐. ປຣທາຣຎ຺ຈ ທິສ຺ວານ, ຉນ຺ໂທ ເມ ອຸທປຊ຺ຊຖ [ອຸປປຊ຺ຊຖ (ສ຺ຍາ. ກ.)];

ເຕນ ປຈ຺ຉາ ວິຊິຄຸຈ຺ຉິໍ, ຕໍ ປາປໍ ປກຕໍ ມຍາ;

ມາ ປຸນ ອກຣໍ ປາປໍ, ຕສ຺ມາ ປພ຺ພຊິໂຕ ອຫໍ.

໖໑. ປິຕຣໍ ເມ ມຫາຣາຊ, ໂຈຣາ ອຄຓ຺ຫຸ [ອຄຓ຺ຫຸໍ (ສີ. ປີ.), ອຄຓ຺ຫິ (ກ.)] ການເນ;

ເຕສາຫໍ ປຸຈ຺ຉິໂຕ ຊານໍ, ອຎ຺ຎຖາ ນໍ ວິຍາກຣິໍ.

໖໒. ເຕນ ປຈ຺ຉາ ວິຊິຄຸຈ຺ຉິໍ, ຕໍ ປາປໍ ປກຕໍ ມຍາ;

ມາ ປຸນ ອກຣໍ ປາປໍ, ຕສ຺ມາ ປພ຺ພຊິໂຕ ອຫໍ.

໖໓. ປາຓາຕິປາຕມກຣຸໍ, ໂສມຍາເຄ ອຸປຏ຺ຐິເຕ;

ເຕສາຫໍ ສມນຸຎ຺ຎາສິໍ, ເຕນ ປຈ຺ຉາ ວິຊິຄຸຈ຺ຉິໍ.

໖໔. ຕໍ ປາປໍ ປກຕໍ ມຍາ, ມາ ປຸນ ອກຣໍ ປາປໍ;

ຕສ຺ມາ ປພ຺ພຊິໂຕ ອຫໍ.

໖໕. ສຸຣາເມຣຍມາຘຸກາ [ມຘຸກາ (ສີ. ສ຺ຍາ. ປີ.)], ເຍ ຊນາ ປຐມາສຸ ໂນ;

ພຫູນໍ ເຕ ອນຕ຺ຖາຍ, ມຊ຺ຊປານມກປ຺ປຍຸໍ.

໖໖. ເຕສາຫໍ ສມນຸຎ຺ຎາສິໍ, ເຕນ ປຈ຺ຉາ ວິຊິຄຸຈ຺ຉິໍ;

ຕໍ ປາປໍ ປກຕໍ ມຍາ, ມາ ປຸນ ອກຣໍ ປາປໍ;

ຕສ຺ມາ ປພ຺ພຊິໂຕ ອຫໍ.

໖໗. ຘິຣຕ຺ຖຸ ສຸພຫູ ກາເມ, ທຸຄ຺ຄນ຺ເຘ ພຫຸກຓ຺ຏເກ;

ເຍ ອຫໍ ປຏິເສວນ຺ໂຕ, ນາລຠິໍ ຕາທິສໍ ສຸຂໍ.

໖໘. ມຫສ຺ສາທາ ສຸຂາ ກາມາ, ນຕ຺ຖິ ກາມາ ປຣໍ [ກາມປຣໍ (ສີ. ປີ.)] ສຸຂໍ;

ເຍ ກາເມ ປຏິເສວນ຺ຕິ, ສຄ຺ຄໍ ເຕ ອຸປປຊ຺ຊເຣ.

໖໙. ອປ຺ປສ຺ສາທາ ທຸຂາ ກາມາ, ນຕ຺ຖິ ກາມາ ປຣໍ ທຸຂໍ;

ເຍ ກາເມ ປຏິເສວນ຺ຕິ, ນິຣຍໍ ເຕ ອຸປປຊ຺ຊເຣ.

໗໐. ອສີ ຍຖາ ສຸນິສິໂຕ, ເນຕ຺ຕິໍໂສວ ສຸປາຍິໂກ [ສຸປາສິໂຕ (ກ. ສີ. ນິຍ຺ຍ), ສຸປາຍິໂຕ (ກ. ອຏ຺ຐ.)];

ສຕ຺ຕີວ ອຸຣສິ ຂິຕ຺ຕາ, ກາມາ ທຸກ຺ຂຕຣາ ຕໂຕ.

໗໑. ອງ຺ຄາຣານໍວ ຊລິຕໍ, ກາສຸໍ ສາຘິກໂປຣິສໍ;

ຜາລໍວ ທິວສໍຕຕ຺ຕໍ, ກາມາ ທຸກ຺ຂຕຣາ ຕໂຕ.

໗໒. ວິສໍ ຍຖາ ຫລາຫລໍ, ເຕລໍ ປກ຺ກຸຖິຕໍ [ອຸກ຺ກຏ຺ຐິຕໍ (ສີ. ປີ.), ປກ຺ກຸຏ຺ຐິຕໍ (ສ຺ຍາ.)] ຍຖາ;

ຕມ຺ພໂລຫ [ຕມ຺ປໂລຫໍ (ສ຺ຍາ.)] ວິລີນໍວ, ກາມາ ທຸກ຺ຂຕຣາ ຕໂຕຕິ.

ປານີຍຊາຕກໍ ປຎ຺ຈມໍ.