໔໕໘. ອຸທຍຊາຕກໍ (໔)

໓໗. ເອກາ ນິສິນ຺ນາ ສຸຈິ ສຎ຺ຎຕູຣູ, ປາສາທມາຣຸຍ຺ຫ ອນິນ຺ທິຕງ຺ຄີ;

ຍາຈາມິ ຕໍ ກິນ຺ນຣເນຕ຺ຕຈກ຺ຂຸ, ອິເມກຣຕ຺ຕິໍ ອຸຠໂຍ ວເສມ.

໓໘. ໂອກິຓ຺ຓນ຺ຕຣປຣິຂໍ, ທຬ຺ຫມຏ຺ຏາລໂກຏ຺ຐກໍ;

ຣກ຺ຂິຕໍ ຂຄ຺ຄຫຕ຺ເຖຫິ, ທຸປ຺ປເວສມິທໍ ປຸຣໍ.

໓໙. ທຫຣສ຺ສ ຍຸວິໂນ ຈາປິ, ອາຄໂມ ຈ ນ ວິຊ຺ຊຕິ;

ອຖ ເກນ ນຸ ວຓ຺ເຓນ, ສງ຺ຄມໍ ອິຈ຺ຉເສ ມຍາ.

໔໐. ຍກ຺ໂຂຫມສ຺ມິ ກລ຺ຍາຓິ, ອາຄໂຕສ຺ມິ ຕວນ຺ຕິເກ [ຕວນ຺ຕິກໍ (ສີ. ປີ.)];

ຕ຺ວໍ ມໍ ນນ຺ທຍ [ນນ຺ທສ຺ສຸ (ສ຺ຍາ. ກ.)] ຠທ຺ທນ຺ເຕ, ປຸຓ຺ຓກໍສໍ ທທາມິ ເຕ.

໔໑. ເທວໍ ວ ຍກ຺ຂໍ ອຖ ວາ ມນຸສ຺ສໍ, ນ ປຕ຺ຖເຍ ອຸທຍມຕິຈ຺ຈ ອຎ຺ຎໍ;

ຄຈ຺ເຉວ ຕ຺ວໍ ຍກ຺ຂ ມຫານຸຠາວ, ມາ ຈສ຺ສຸ ຄນ຺ຕ຺ວາ ປຸນຣາວຊິຕ຺ຖ.

໔໒. ຍາ ສາ ຣຕິ ອຸຕ຺ຕມາ ກາມໂຠຄິນໍ, ຍໍ ເຫຕຸ ສຕ຺ຕາ ວິສມໍ ຈຣນ຺ຕິ;

ມາ ຕໍ ຣຕິໍ ຊີຍິ ຕຸວໍ ສຸຈິມ຺ຫິ ເຕ, ທທາມິ ເຕ ຣູປິຍໍ ກໍສປູຣໍ.

໔໓. ນາຣິໍ ນໂຣ ນິຊ຺ຌປຍໍ ຘເນນ, ອຸກ຺ກໍສຕີ ຍຕ຺ຖ ກໂຣຕິ ຉນ຺ທໍ;

ວິປຈ຺ຈນີໂກ ຕວ ເທວຘມ຺ໂມ, ປຈ຺ຈກ຺ຂໂຕ ໂຖກຕເຣນ ເອສິ.

໔໔. ອາຍຸ ຈ ວຓ຺ໂຓ ຈ [ອາຍຸໍ ຈ ວຓ຺ຓໍ ຈ (ກ. ສີ. ປີ.)] ມນຸສ຺ສໂລເກ, ນິຫີຍຕິ ມນຸຊານໍ ສຸຄ຺ຄຕ຺ເຕ;

ເຕເນວ ວຓ຺ເຓນ ຘນມ຺ປິ ຕຸຍ຺ຫໍ, ນິຫີຍຕິ ຊິຓ຺ຓຕຣາສິ ອຊ຺ຊ.

໔໕. ເອວໍ ເມ ເປກ຺ຂມານສ຺ສ, ຣາຊປຸຕ຺ຕິ ຍສສ຺ສິນິ;

ຫາຍເຕວ ຕວ [ຫາຍເຕ ວຕ ເຕ (ສີ. ສ຺ຍາ. ກ.), ຫາຍເຕວ ຕໂຕ (ປີ.)] ວຓ຺ໂຓ, ອໂຫຣຕ຺ຕານມຈ຺ຈເຍ.

໔໖. ອິມິນາວ ຕ຺ວໍ ວຍສາ, ຣາຊປຸຕ຺ຕິ ສຸເມຘເສ;

ພ຺ຣຫ຺ມຈຣິຍໍ ຈເຣຍ຺ຍາສິ, ຠິຍ຺ໂຍ ວຓ຺ຓວຕີ ສິຍາ.

໔໗. ເທວາ ນ ຊີຣນ຺ຕິ ຍຖາ ມນຸສ຺ສາ, ຄຕ຺ເຕສຸ ເຕສໍ ວລິໂຍ ນ ໂຫນ຺ຕິ;

ປຸຈ຺ຉາມິ ຕໍ ຍກ຺ຂ ມຫານຸຠາວ, ກຖໍ ນຸ ເທວານ [ກຖໍ ນ ເທວານໍ (ປີ.)] ສຣີຣເທໂຫ.

໔໘. ເທວາ ນ ຊີຣນ຺ຕິ ຍຖາ ມນຸສ຺ສາ, ຄຕ຺ເຕສຸ ເຕສໍ ວລິໂຍ ນ ໂຫນ຺ຕິ;

ສຸເວ ສຸເວ ຠິຍ຺ຍຕໂຣວ [ຠິຍ຺ຍຕໂຣ ຈ (ກ.)] ເຕສໍ, ທິພ຺ໂພ ຈ ວຓ຺ໂຓ ວິປຸລາ ຈ ໂຠຄາ.

໔໙. ກິໍສູຘ ຠີຕາ ຊນຕາ ອເນກາ, ມຄ຺ໂຄ ຈ ເນກາຍຕນໍ ປວຸຕ຺ໂຕ;

ປຸຈ຺ຉາມິ ຕໍ ຍກ຺ຂ ມຫານຸຠາວ, ກຕ຺ຖຏ຺ຐິໂຕ ປຣໂລກໍ ນ ຠາເຍ.

໕໐. ວາຈໍ ມນຎ຺ຈ ປຓິຘາຍ ສມ຺ມາ, ກາເຍນ ປາປານິ ອກຸພ຺ພມາໂນ;

ພຫຸນ຺ນປານໍ ຆຣມາວສນ຺ໂຕ, ສທ຺ໂຘ ມຸທູ ສໍວິຠາຄີ ວທຎ຺ຎູ;

ສງ຺ຄາຫໂກ ສຂິໂລ ສຓ຺ຫວາໂຈ, ເອຕ຺ຖຏ຺ຐິໂຕ ປຣໂລກໍ ນ ຠາເຍ.

໕໑. ອນຸສາສສິ ມໍ ຍກ຺ຂ, ຍຖາ ມາຕາ ຍຖາ ປິຕາ;

ອຸຬາຣວຓ຺ຓໍ ປຸຈ຺ຉາມິ, ໂກ ນຸ ຕ຺ວມສິ ສຸພ຺ຣຫາ.

໕໒. ອຸທໂຍຫມສ຺ມິ ກລ຺ຍາຓິ, ສງ຺ກຣຕ຺ຕາ ອິຘາຄໂຕ [ສງ຺ຄຣຕ຺ຖາ ອິຘາຄໂຕ (ສີ. ປີ.), ສງ຺ຄຣຕ຺ຖາຍິຘາຄໂຕ (ສ຺ຍາ.)];

ອາມນ຺ຕ ໂຂ ຕໍ ຄຈ຺ຉາມິ, ມຸຕ຺ໂຕສ຺ມິ ຕວ ສງ຺ກຣາ [ສງ຺ຄຣາ (ສີ. ສ຺ຍາ. ປີ.)].

໕໓. ສເຈ ໂຂ ຕ຺ວໍ ອຸທໂຍສິ, ສງ຺ກຣຕ຺ຕາ ອິຘາຄໂຕ;

ອນຸສາສ ມໍ ຣາຊປຸຕ຺ຕ, ຍຖາສ຺ສ ປຸນ ສງ຺ຄໂມ.

໕໔. ອຕິປຕຕິ [ອຘິປຕຕີ (ສີ. ປີ.)] ວໂຍ ຂໂຓ ຕເຖວ, ຐານໍ ນຕ຺ຖິ ຘຸວໍ ຈວນ຺ຕິ ສຕ຺ຕາ;

ປຣິຊິຍ຺ຍຕິ ອທ຺ຘຸວໍ ສຣີຣໍ, ອຸທເຍ ມາ ປມາທ [ມາ ປມາທໍ (ສີ.)] ຈຣສ຺ສຸ ຘມ຺ມໍ.

໕໕. ກສິຓາ ປຖວີ ຘນສ຺ສ ປູຣາ, ເອກສ຺ເສວ ສິຍາ ອນຎ຺ຎເຘຍ຺ຍາ;

ຕຎ຺ຈາປິ ຊຫຕິ [ຊຫາຕິ (ສີ. ສ຺ຍາ. ປີ.), ຊຫາຕີ (?)] ອວີຕຣາໂຄ, ອຸທເຍ ມາ ປມາທ ຈຣສ຺ສຸ ຘມ຺ມໍ.

໕໖. ມາຕາ ຈ ປິຕາ ຈ ຠາຕໂຣ ຈ, ຠຣິຍາ ຍາປິ ຘເນນ ໂຫຕິ ກີຕາ [ຠຣິຍາປິ ຘເນນ ໂຫນ຺ຕິ ອຕິຕ຺ຕາ (ກ.)];

ເຕ ຈາປິ ຊຫນ຺ຕິ ອຎ຺ຎມຎ຺ຎໍ, ອຸທເຍ ມາ ປມາທ ຈຣສ຺ສຸ ຘມ຺ມໍ.

໕໗. ກາໂຍ ປຣໂຠຊນນ຺ຕິ ຎຕ຺ວາ [ກາໂຍ ຈ ປຣໂຠຊນໍ ວິທິຕ຺ວາ (ກ.)], ສໍສາເຣ ສຸຄຕິຎ຺ຈ ທຸຄ຺ຄຕິຎ຺ຈ [ສຸຄຕີ ຈ ທຸຄ຺ຄຕີ ຈ (ສີ. ສ຺ຍາ. ປີ.), ສຸຄ຺ຄຕິໍ ທຸຄ຺ຄຕິຎ຺ຈ (ກ.)];

ອິຕ຺ຕຣວາໂສຕິ ຊານິຍານ, ອຸທເຍ ມາ ປມາທ ຈຣສ຺ສຸ ຘມ຺ມໍ.

໕໘. ສາຘຸ ຠາສຕິຍໍ [ຠາສຕຍໍ (ສີ. ປີ.)] ຍກ຺ໂຂ, ອປ຺ປໍ ມຈ຺ຈານ ຊີວິຕໍ;

ກສິຣຎ຺ຈ ປຣິຕ຺ຕຎ຺ຈ, ຕຎ຺ຈ ທຸກ຺ເຂນ ສໍຍຸຕໍ;

ສາຫໍ ເອກາ ປພ຺ພຊິສ຺ສາມິ, ຫິຕ຺ວາ ກາສິໍ ສຸຣຸນ຺ຘນນ຺ຕິ.

ອຸທຍຊາຕກໍ ຈຕຸຕ຺ຖໍ.