໔໕໗. ຘມ຺ມເທວປຸຕ຺ຕຊາຕກໍ (໓)

໒໖. ຍໂສກໂຣ ປຸຎ຺ຎກໂຣຫມສ຺ມິ, ສທາຕ຺ຖຸໂຕ ສມຓພ຺ຣາຫ຺ມຓານໍ;

ມຄ຺ຄາຣໂຫ ເທວມນຸສ຺ສປູຊິໂຕ, ຘມ຺ໂມ ອຫໍ ເທຫິ ອຘມ຺ມ ມຄ຺ຄໍ.

໒໗. ອຘມ຺ມຍານໍ ທຬ຺ຫມາຣຸຫິຕ຺ວາ, ອສນ຺ຕສນ຺ໂຕ ພລວາຫມສ຺ມິ;

ສ ກິສ຺ສ ເຫຕຸມ຺ຫິ ຕວຊ຺ຊ ທຊ຺ຊໍ, ມຄ຺ຄໍ ອຫໍ ຘມ຺ມ ອທິນ຺ນປຸພ຺ພໍ.

໒໘. ຘມ຺ໂມ ຫເວ ປາຕຸຣໂຫສິ ປຸພ຺ເພ, ປຈ຺ຉາ ອຘມ຺ໂມ ອຸທປາທິ ໂລເກ;

ເຊຏ຺ໂຐ ຈ ເສຏ຺ໂຐ ຈ ສນນ຺ຕໂນ ຈ, ອຸຍ຺ຍາຫິ ເຊຏ຺ຐສ຺ສ ກນິຏ຺ຐ ມຄ຺ຄາ.

໒໙. ນ ຍາຈນາຍ ນປິ ປາຕິຣູປາ, ນ ອຣຫຕາ [ນ ອຣຫຕິ (ສີ. ປີ.), ອຣຫຕິ (ກ.)] ເຕຫໍ ທເທຍ຺ຍໍ ມຄ຺ຄໍ;

ຍຸທ຺ຘຎ຺ຈ ໂນ ໂຫຕຸ ອຸຠິນ຺ນມຊ຺ຊ, ຍຸທ຺ຘມ຺ຫິ ໂຍ ເຊສ຺ສຕິ ຕສ຺ສ ມຄ຺ໂຄ.

໓໐. ສພ຺ພາ ທິສາ ອນຸວິສໂຏຫມສ຺ມິ, ມຫພ຺ພໂລ ອມິຕຍໂສ ອຕຸລ຺ໂຍ;

ຄຸເຓຫິ ສພ຺ເພຫິ ອຸເປຕຣູໂປ, ຘມ຺ໂມ ອຘມ຺ມ ຕ຺ວໍ ກຖໍ ວິເຊສ຺ສສິ.

໓໑. ໂລເຫນ ເວ ຫຎ຺ຎຕິ ຊາຕຣູປໍ, ນ ຊາຕຣູເປນ ຫນນ຺ຕິ ໂລຫໍ;

ສເຈ ອຘມ຺ໂມ ຫຎ຺ຉຕິ [ຫຎ຺ຎຕິ (ສີ. ສ຺ຍາ.), ຫຎ຺ຎິຕິ (ກຕ຺ຖຈິ)] ຘມ຺ມມຊ຺ຊ, ອໂຍ ສຸວຓ຺ຓໍ ວິຍ ທສ຺ສເນຍ຺ຍໍ.

໓໒. ສເຈ ຕຸວໍ ຍຸທ຺ຘພໂລ ອຘມ຺ມ [ຍຸທ຺ຘພໂລ’ສິ’ຘມ຺ມ (ກ. ສີ.), ຍຸທ຺ຘພໂລ’ສ’ຘມ຺ມ (ປີ.)], ນ ຕຸຍ຺ຫ ວຸຑ຺ຒາ [ວທ຺ຘາ (ສີ. ປີ.)] ຈ ຄຣູ ຈ ອຕ຺ຖິ;

ມຄ຺ຄຎ຺ຈ ເຕ ທມ຺ມິ ປິຍາປ຺ປິເຍນ, ວາຈາທຸຣຸຕ຺ຕານິປິ ເຕ ຂມາມິ.

໓໓. ອິທຎ຺ຈ ສຸຕ຺ວາ ວຈນໍ ອຘມ຺ໂມ, ອວໍສິໂຣ ປຕິໂຕ ອຸທ຺ຘປາໂທ;

‘‘ຍຸທ຺ຘຕ຺ຖິໂກ ເຈ ນ ລຠາມິ ຍຸທ຺ຘໍ’’, ເອຕ຺ຕາວຕາ ໂຫຕິ ຫໂຕ ອຘມ຺ໂມ.

໓໔. ຂນ຺ຕີພໂລ ຍຸທ຺ຘພລໍ ວິເຊຕ຺ວາ, ຫນ຺ຕ຺ວາ ອຘມ຺ມໍ ນິຫນິຕ຺ວ [ວິຫນິຕ຺ວາ (ກ.)] ຠູມ຺ຍາ;

ປາຍາສິ ວິຕ຺ໂຕ [ຈິຕ຺ໂຕ (ສ຺ຍາ.)] ອຠິຣຸຍ຺ຫ ສນ຺ທນໍ, ມຄ຺ເຄເນວ ອຕິພໂລ ສຈ຺ຈນິກ຺ກໂມ.

໓໕. ມາຕາ ປິຕາ ສມຓພ຺ຣາຫ຺ມຓາ ຈ, ອສມ຺ມານິຕາ ຍສ຺ສ ສເກ ອຄາເຣ;

ອິເຘວ ນິກ຺ຂິປ຺ປ ສຣີຣເທຫໍ, ກາຍສ຺ສ ເຠທາ ນິຣຍໍ ວຊນ຺ຕິ ເຕ [ວຊນ຺ຕິ (ສີ. ປີ.)];

ຍຖາ ອຘມ຺ໂມ ປຕິໂຕ ອວໍສິໂຣ.

໓໖. ມາຕາ ປິຕາ ສມຓພ຺ຣາຫ຺ມຓາ ຈ, ສຸສມ຺ມານິຕາ ຍສ຺ສ ສເກ ອຄາເຣ;

ອິເຘວ ນິກ຺ຂິປ຺ປ ສຣີຣເທຫໍ, ກາຍສ຺ສ ເຠທາ ສຸຄຕິໍ ວຊນ຺ຕິ ເຕ;

ຍຖາປິ ຘມ຺ໂມ ອຠິຣຸຍ຺ຫ ສນ຺ທນນ຺ຕິ.

ຘມ຺ມເທວປຸຕ຺ຕຊາຕກໍ [ຘມ຺ມຊາຕກໍ (ສີ. ປີ.)] ຕຕິຍໍ.