໑໐. ເທວທຕ຺ຕສຸຕ຺ຕໍ

໘໙. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ຕີຫິ, ຠິກ຺ຂເວ, ອສທ຺ຘມ຺ເມຫິ ອຠິຠູໂຕ ປຣິຍາທິນ຺ນຈິຕ຺ໂຕ ເທວທຕ຺ໂຕ ອາປາຍິໂກ ເນຣຍິໂກ ກປ຺ປຏ຺ໂຐ ອເຕກິຈ຺ໂຉ. ກຕເມຫິ ຕີຫິ? ປາປິຈ຺ຉຕາຍ, ຠິກ຺ຂເວ, ອຠິຠູໂຕ ປຣິຍາທິນ຺ນຈິຕ຺ໂຕ ເທວທຕ຺ໂຕ ອາປາຍິໂກ ເນຣຍິໂກ ກປ຺ປຏ຺ໂຐ ອເຕກິຈ຺ໂຉ. ປາປມິຕ຺ຕຕາຍ, ຠິກ຺ຂເວ, ອຠິຠູໂຕ ປຣິຍາທິນ຺ນຈິຕ຺ໂຕ ເທວທຕ຺ໂຕ ອາປາຍິໂກ ເນຣຍິໂກ ກປ຺ປຏ຺ໂຐ ອເຕກິຈ຺ໂຉ. ສຕິ ໂຂ ປນ ອຸຕ຺ຕຣິກຣຓີເຍ [ອຸຕ຺ຕຣິໍ ກຣຓີເຍ (ສ຺ຍາ.)] ໂອຣມຕ຺ຕເກນ ວິເສສາຘິຄເມນ [ວິເສສາຘິຄເມນ ຈ (ສ຺ຍາ. ປີ.)] ອນ຺ຕຣາ ໂວສານໍ ອາປາທິ. ອິເມຫິ ໂຂ, ຠິກ຺ຂເວ, ຕີຫິ ອສທ຺ຘມ຺ເມຫິ ອຠິຠູໂຕ ປຣິຍາທິນ຺ນຈິຕ຺ໂຕ ເທວທຕ຺ໂຕ ອາປາຍິໂກ ເນຣຍິໂກ ກປ຺ປຏ຺ໂຐ ອເຕກິຈ຺ໂຉ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ມາ ຊາຕຸ ໂກຈິ ໂລກສ຺ມິໍ, ປາປິຈ຺ໂຉ ອຸທປຊ຺ຊຖ;

ຕທມິນາປິ ຊານາຖ, ປາປິຈ຺ຉານໍ ຍຖາ ຄຕິ.

‘‘ປຓ຺ຑິໂຕຕິ ສມຎ຺ຎາໂຕ, ຠາວິຕຕ຺ໂຕຕິ ສມ຺ມໂຕ;

ຊລໍວ ຍສສາ ອຏ຺ຐາ, ເທວທຕ຺ໂຕຕິ ວິສ຺ສຸໂຕ [ເມ ສຸຕໍ (ປາຬິຍໍ)].

‘‘ໂສ ປມາຓມນຸຈິຓ຺ໂຓ [ປມາທມນຸຈິຓ຺ໂຓ (ກ. ສີ. ສ຺ຍາ. ປີ.), ສມານມນຸຈິຓ຺ໂຓ (ອຏ຺ຐ.)], ອາສຊ຺ຊ ນໍ ຕຖາຄຕໍ;

ອວີຈິນິຣຍໍ ປຕ຺ໂຕ, ຈຕຸທ຺ວາຣໍ ຠຍານກໍ.

‘‘ອທຸຏ຺ຐສ຺ສ ຫິ ໂຍ ທຸພ຺ເຠ, ປາປກມ຺ມໍ ອກຸພ຺ພໂຕ;

ຕເມວ ປາປໍ ຜຸສຕິ [ຜຸສ຺ເສຕິ (ສ຺ຍາ.)], ທຸຏ຺ຐຈິຕ຺ຕໍ ອນາທຣໍ.

‘‘ສມຸທ຺ທໍ ວິສກຸມ຺ເຠນ, ໂຍ ມຎ຺ເຎຍ຺ຍ ປທູສິຕຸໍ;

ນ ໂສ ເຕນ ປທູເສຍ຺ຍ, ເຠສ຺ມາ ຫິ ອຸທຘິ ມຫາ.

‘‘ເອວເມວ [ເອວເມຕໍ (ສ຺ຍາ.)] ຕຖາຄຕໍ, ໂຍ ວາເທນ ວິຫິໍສຕິ;

ສມ຺ມຄ຺ຄຕໍ [ສມຄ຺ຄຕໍ (ສີ. ກ.)] ສນ຺ຕຈິຕ຺ຕໍ, ວາໂທ ຕມ຺ຫິ ນ ຣູຫຕິ.

‘‘ຕາທິສໍ ມິຕ຺ຕໍ ກຸພ຺ເພຖ, ຕຎ຺ຈ ເສເວຍ຺ຍ ປຓ຺ຑິໂຕ;

ຍສ຺ສ ມຄ຺ຄານຸໂຄ ຠິກ຺ຂຸ, ຂຍໍ ທຸກ຺ຂສ຺ສ ປາປຸເຓ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ທສມໍ.

ຈຕຸຕ຺ໂຖ ວຄ຺ໂຄ ນິຏ຺ຐິໂຕ.

ຕສ຺ສຸທ຺ທານໍ –

ວິຕກ຺ກາສກ຺ກາຣສທ຺ທ, ຈວນໂລເກ ອສຸຠໍ;

ຘມ຺ມອນ຺ຘກາຣມລໍ, ເທວທຕ຺ເຕນ ເຕ ທສາຕິ.