໔. ຠິສຈຣິຍາ

໓໔. ‘‘ປຸນາປຣໍ ຍທາ ໂຫມິ, ກາສີນໍ ປຸຣວຣຸຕ຺ຕເມ;

ຠຄິນີ ຈ ຠາຕໂຣ ສຕ຺ຕ, ນິພ຺ພຕ຺ຕາ ໂສຕ຺ຖິເຍ ກຸເລ.

໓໕. ‘‘ເອເຕສໍ ປຸພ຺ພໂຊ ອາສິໍ, ຫິຣີສຸກ຺ກມຸປາຄໂຕ;

ຠວໍ ທິສ຺ວານ ຠຍໂຕ, ເນກ຺ຂມ຺ມາຠິຣໂຕ ອຫໍ.

໓໖. ‘‘ມາຕາປິຕູຫິ ປຫິຕາ, ສຫາຍາ ເອກມານສາ;

ກາເມຫິ ມໍ ນິມນ຺ເຕນ຺ຕິ, ‘ກຸລວໍສໍ ຘເຣຫິ’ຕິ.

໓໗. ‘‘ຍໍ ເຕສໍ ວຈນໍ ວຸຕ຺ຕໍ, ຄິຫີຘມ຺ເມ ສຸຂາວຫໍ;

ຕໍ ເມ ອໂຫສິ ກຐິນໍ, ຕຕ຺ຕ [ສນ຺ຕຕ຺ຕ (ກ.)] ຜາລສມໍ ວິຍ.

໓໘. ‘‘ເຕ ມໍ ຕທາ ອຸກ຺ຂິປນ຺ຕໍ, ປຸຈ຺ຉິໍສຸ ປຕ຺ຖິຕໍ ມມ;

‘ກິໍ ຕ຺ວໍ ປຕ຺ຖຍເສ ສມ຺ມ, ຍທິ ກາເມ ນ ຠຸຎ຺ຊສິ’.

໓໙. ‘‘ເຕສາຫໍ ເອວມວຈໍ, ອຕ຺ຖກາໂມ ຫິເຕສິນໍ;

‘ນາຫໍ ປຕ຺ເຖມິ ຄິຫີຠາວໍ, ເນກ຺ຂມ຺ມາຠິຣໂຕ ອຫໍ’.

໔໐. ‘‘ເຕ ມຍ຺ຫໍ ວຈນໍ ສຸຕ຺ວາ, ປິຕຸມາຕຸ ຈ ສາວຍຸໍ;

ມາຕາປິຕາ ເອວມາຫຸ, ‘ສພ຺ເພວ ປພ຺ພຊາມ ໂຠ’.

໔໑. ‘‘ອຸໂຠ ມາຕາປິຕາ ມຍ຺ຫໍ, ຠຄິນີ ຈ ສຕ຺ຕ ຠາຕໂຣ;

ອມິຕຘນໍ ຉຑ຺ຑຍິຕ຺ວາ, ປາວິສິມ຺ຫາ ມຫາວນ’’ນ຺ຕິ.

ຠິສຈຣິຍໍ ຈຕຸຕ຺ຖໍ.