ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ຂຸທ຺ທກນິກາເຍ

ຈຣິຍາປິຏກປາຬິ

໑. ອກິຕ຺ຕິວຄ຺ໂຄ

໑. ອກິຕ຺ຕິຈຣິຍາ

໑. ‘‘ກປ຺ເປ ຈ ສຕສຫສ຺ເສ, ຈຕຸໂຣ ຈ ອສງ຺ຂິເຍ;

ເອຕ຺ຖນ຺ຕເຣ ຍໍ ຈຣິຕໍ, ສພ຺ພໍ ຕໍ ໂພຘິປາຈນໍ.

໒. ‘‘ອຕີຕກປ຺ເປ ຈຣິຕໍ, ຐປຍິຕ຺ວາ ຠວາຠເວ;

ອິມມ຺ຫິ ກປ຺ເປ ຈຣິຕໍ, ປວກ຺ຂິສ຺ສໍ ສຸໂຓຫິ ເມ.

໓. ‘‘ຍທາ ອຫໍ ພ຺ຣຫາຣຎ຺ເຎ, ສຸຎ຺ເຎ ວິປິນການເນ;

ອຊ຺ໂຌຄາເຫຕ຺ວາ [ອຊ຺ໂຌຄເຫຕ຺ວາ (ສີ. ສ຺ຍາ.)] ວິຫຣາມິ, ອກິຕ຺ຕິ ນາມ ຕາປໂສ.

໔. ‘‘ຕທາ ມໍ ຕປເຕເຊນ, ສນ຺ຕຕ຺ໂຕ ຕິທິວາຠິຠູ;

ຘາເຣນ຺ໂຕ ພ຺ຣາຫ຺ມຓວຓ຺ຓໍ, ຠິກ຺ຂາຍ ມໍ ອຸປາຄມິ.

໕. ‘‘ປວນາ ອາຠຕໍ ປຓ຺ຓໍ, ອເຕລຎ຺ຈ ອໂລຓິກໍ;

ມມ ທ຺ວາເຣ ຐິຕໍ ທິສ຺ວາ, ສກຏາເຫນ ອາກິຣິໍ.

໖. ‘‘ຕສ຺ສ ທຕ຺ວານຫໍ ປຓ຺ຓໍ, ນິກ຺ກຸຊ຺ຊິຕ຺ວານ ຠາຊນໍ;

ປຸເນສນໍ ຊຫິຕ຺ວານ, ປາວິສິໍ ປຓ຺ຓສາລກໍ.

໗. ‘‘ທຸຕິຍມ຺ປິ ຕຕິຍມ຺ປິ, ອຸປຄຎ຺ຉິ ມມນ຺ຕິກໍ;

ອກມ຺ປິໂຕ ອໂນລຄ຺ໂຄ, ເອວເມວມທາສຫໍ.

໘. ‘‘ນ ເມ ຕປ຺ປຈ຺ຈຍາ ອຕ຺ຖິ, ສຣີຣສ຺ມິໍ ວິວຓ຺ຓິຍໍ;

ປີຕິສຸເຂນ ຣຕິຍາ, ວີຕິນາເມມິ ຕໍ ທິວໍ.

໙. ‘‘ຍທິ ມາສມ຺ປິ ທ຺ເວມາສໍ, ທກ຺ຂິເຓຍ຺ຍໍ ວຣໍ ລເຠ;

ອກມ຺ປິໂຕ ອໂນລີໂນ, ທເທຍ຺ຍໍ ທານມຸຕ຺ຕມໍ.

໑໐. ‘‘ນ ຕສ຺ສ ທານໍ ທທມາໂນ, ຍສໍ ລາຠຎ຺ຈ ປຕ຺ຖຍິໍ;

ສພ຺ພຎ຺ຎຸຕໍ ປຕ຺ຖຍາໂນ, ຕານິ ກມ຺ມານິ ອາຈຣິ’’ນ຺ຕິ.

ອກິຕ຺ຕິຈຣິຍໍ ປຐມໍ.

໒. ສງ຺ຂຈຣິຍາ

໑໑. ‘‘ປຸນາປຣໍ ຍທາ ໂຫມິ, ພ຺ຣາຫ຺ມໂຓ ສງ຺ຂສວ຺ຫໂຍ;

ມຫາສມຸທ຺ທໍ ຕຣິຕຸກາໂມ, ອຸປຄຈ຺ຉາມິ ປຏ຺ຏນໍ.

໑໒. ‘‘ຕຕ຺ຖທ຺ທສໍ ປຏິປເຖ, ສຍມ຺ຠຸໍ ອປຣາຊິຕໍ;

ກນ຺ຕາຣທ຺ຘານໍ ປຏິປນ຺ນໍ [ກນ຺ຕາຣທ຺ຘານປຏິປນ຺ນໍ (ສີ. ສ຺ຍາ.)], ຕຕ຺ຕາຍ ກຐິນຠູມິຍາ.

໑໓. ‘‘ຕມຫໍ ປຏິປເຖ ທິສ຺ວາ, ອິມມຕ຺ຖໍ ວິຈິນ຺ຕຍິໍ;

‘ອິທໍ ເຂຕ຺ຕໍ ອນຸປ຺ປຕ຺ຕໍ, ປຸຎ຺ຎກາມສ຺ສ ຊນ຺ຕຸໂນ.

໑໔. ‘‘‘ຍຖາ ກສ຺ສໂກ ປຸຣິໂສ, ເຂຕ຺ຕໍ ທິສ຺ວາ ມຫາຄມໍ;

ຕຕ຺ຖ ພີຊໍ ນ ໂຣເປຕິ, ນ ໂສ ຘຎ຺ເຎນ ອຕ຺ຖິໂກ.

໑໕. ‘‘‘ເອວເມວາຫໍ ປຸຎ຺ຎກາໂມ, ທິສ຺ວາ ເຂຕ຺ຕວຣຸຕ຺ຕມໍ;

ຍທິ ຕຕ຺ຖ ກາຣໍ ນ ກໂຣມິ, ນາຫໍ ປຸຎ຺ເຎນ ອຕ຺ຖິໂກ.

໑໖. ‘‘‘ຍຖາ ອມຈ຺ໂຈ ມຸທ຺ທິກາໂມ, ຣຎ຺ໂຎ ອນ຺ເຕປຸເຣ ຊເນ;

ນ ເທຕິ ເຕສໍ ຘນຘຎ຺ຎໍ, ມຸທ຺ທິໂຕ ປຣິຫາຍຕິ.

໑໗. ‘‘‘ເອວເມວາຫໍ ປຸຎ຺ຎກາໂມ, ວິປຸລໍ ທິສ຺ວານ ທກ຺ຂິຓໍ;

ຍທິ ຕສ຺ສ ທານໍ ນ ທທາມິ, ປຣິຫາຍິສ຺ສາມິ ປຸຎ຺ຎໂຕ’.

໑໘. ‘‘ເອວາຫໍ ຈິນ຺ຕຍິຕ຺ວານ, ໂອໂຣຫິຕ຺ວາ ອຸປາຫນາ;

ຕສ຺ສ ປາທານິ ວນ຺ທິຕ຺ວາ, ອທາສິໍ ຉຕ຺ຕຸປາຫນໍ.

໑໙. ‘‘ເຕເນວາຫໍ ສຕຄຸຓໂຕ, ສຸຂຸມາໂລ ສຸເຂຘິໂຕ;

ອປິ ຈ ທານໍ ປຣິປູເຣນ຺ໂຕ, ເອວໍ ຕສ຺ສ ອທາສຫ’’ນ຺ຕິ.

ສງ຺ຂຈຣິຍໍ ທຸຕິຍໍ.

໓. ກຸຣຸຣາຊຈຣິຍາ

໒໐. ‘‘ປຸນາປຣໍ ຍທາ ໂຫມິ, ອິນ຺ທປຕ຺ເຖ [ອິນ຺ທປຕ຺ເຕ (ສີ. ກ.)] ປຸຣຸຕ຺ຕເມ;

ຣາຊາ ຘນຎ຺ຈໂຍ ນາມ, ກຸສເລ ທສຫຸປາຄໂຕ.

໒໑. ‘‘ກລິງ຺ຄຣຏ຺ຐວິສຍາ, ພ຺ຣາຫ຺ມຓາ ອຸປຄຎ຺ຉຸ ມໍ;

ອາຍາຈຸໍ ມໍ ຫຕ຺ຖິນາຄໍ, ຘຎ຺ຎໍ ມງ຺ຄລສມ຺ມຕໍ.

໒໒. ‘‘‘ອວຸຏ຺ຐິໂກ ຊນປໂທ, ທຸພ຺ຠິກ຺ໂຂ ຉາຕໂກ ມຫາ;

ທທາຫິ ປວຣໍ ນາຄໍ, ນີລໍ ອຎ຺ຊນສວ຺ຫຍໍ.

໒໓. ‘‘‘ນ ເມ ຍາຈກມນຸປ຺ປຕ຺ເຕ, ປຏິກ຺ເຂໂປ ອນຸຈ຺ຉໂວ;

ມາ ເມ ຠິຊ຺ຊິ ສມາທານໍ, ທສ຺ສາມິ ວິປຸລໍ ຄຊໍ’.

໒໔. ‘‘ນາຄໍ ຄເຫຕ຺ວາ ໂສຓ຺ຑາຍ, ຠິງ຺ຄາເຣ [ຠິງ຺ກາເຣ (ສີ.)] ຣຕນາມເຍ;

ຊລໍ ຫຕ຺ເຖ ອາກິຣິຕ຺ວາ, ພ຺ຣາຫ຺ມຓານໍ ອທໍ ຄຊໍ.

໒໕. ‘‘ຕສ຺ສ ນາເຄ ປທິນ຺ນມ຺ຫິ, ອມຈ຺ຈາ ເອຕທພ຺ຣວຸໍ;

‘ກິໍ ນຸ ຕຸຍ຺ຫໍ ວຣໍ ນາຄໍ, ຍາຈການໍ ປທສ຺ສສິ.

໒໖. ‘‘‘ຘຎ຺ຎໍ ມງ຺ຄລສມ຺ປນ຺ນໍ, ສງ຺ຄາມວິຊຍຸຕ຺ຕມໍ;

ຕສ຺ມິໍ ນາເຄ ປທິນ຺ນມ຺ຫິ, ກິໍ ເຕ ຣຊ຺ຊໍ ກຣິສ຺ສຕິ.

໒໗. ‘‘‘ຣຊ຺ຊມ຺ປິ ເມ ທເທ ສພ຺ພໍ, ສຣີຣໍ ທຊ຺ຊມຕ຺ຕໂນ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ນາຄໍ ອທາສຫ’’’ນ຺ຕິ.

ກຸຣຸຣາຊຈຣິຍໍ ຕຕິຍໍ.

໔. ມຫາສຸທສ຺ສນຈຣິຍາ

໒໘. ‘‘ກຸສາວຕິມ຺ຫິ ນຄເຣ, ຍທາ ອາສິໍ ມຫີປຕິ;

ມຫາສຸທສ຺ສໂນ ນາມ, ຈກ຺ກວຕ຺ຕີ ມຫພ຺ພໂລ.

໒໙. ‘‘ຕຕ຺ຖາຫໍ ທິວເສ ຕິກ຺ຂຕ຺ຕຸໍ, ໂຆສາເປມິ ຕຫິໍ ຕຫິໍ;

‘ໂກ ກິໍ ອິຈ຺ຉຕິ ປຕ຺ເຖຕິ, ກສ຺ສ ກິໍ ທີຍຕູ ຘນໍ.

໓໐. ‘‘‘ໂກ ຉາຕໂກ ໂກ ຕສິໂຕ, ໂກ ມາລໍ ໂກ ວິເລປນໍ;

ນານາຣຕ຺ຕານິ ວຕ຺ຖານິ, ໂກ ນຄ຺ໂຄ ປຣິທຫິສ຺ສຕິ.

໓໑. ‘‘‘ໂກ ປເຖ ຉຕ຺ຕມາເທຕິ, ໂກປາຫນາ ມຸທູ ສຸຠາ’;

ອິຕິ ສາຍຎ຺ຈ ປາໂຕ ຈ, ໂຆສາເປມິ ຕຫິໍ ຕຫິໍ.

໓໒. ‘‘ນ ຕໍ ທສສຸ ຐາເນສຸ, ນປິ ຐານສເຕສຸ ວາ;

ອເນກສຕຐາເນສຸ, ປຏິຍຕ຺ຕໍ ຍາຈເກ ຘນໍ.

໓໓. ‘‘ທິວາ ວາ ຍທິ ວາ ຣຕ຺ຕິໍ, ຍທິ ເອຕິ ວນິພ຺ພໂກ;

ລທ຺ຘາ ຍທິຈ຺ຉກໍ ໂຠຄໍ, ປູຣຫຕ຺ໂຖວ ຄຈ຺ຉຕິ.

໓໔. ‘‘ເອວຣູປໍ ມຫາທານໍ, ອທາສິໍ ຍາວຊີວິກໍ;

ນປາຫໍ ເທສ຺ສໍ ຘນໍ ທມ຺ມິ, ນປິ ນຕ຺ຖິ ນິຈໂຍ ມຍິ.

໓໕. ‘‘ຍຖາປິ ອາຕຸໂຣ ນາມ, ໂຣຄໂຕ ປຣິມຸຕ຺ຕິຍາ;

ຘເນນ ເວຊ຺ຊໍ ຕປ຺ເປຕ຺ວາ, ໂຣຄໂຕ ປຣິມຸຈ຺ຈຕິ.

໓໖. ‘‘ຕເຖວາຫໍ ຊານມາໂນ, ປຣິປູເຣຕຸມເສສໂຕ;

ອູນມນໍ ປູຣຍິຕຸໍ, ເທມິ ທານໍ ວນິພ຺ພເກ;

ນິຣາລໂຍ ອປຈ຺ຈາໂສ, ສມ຺ໂພຘິມນຸປຕ຺ຕິຍາ’’ຕິ.

ມຫາສຸທສ຺ສນຈຣິຍໍ ຈຕຸຕ຺ຖໍ.

໕. ມຫາໂຄວິນ຺ທຈຣິຍາ

໓໗. ‘‘ປຸນາປຣໍ ຍທາ ໂຫມິ, ສຕ຺ຕຣາຊປຸໂຣຫິໂຕ;

ປູຊິໂຕ ນຣເທເວຫິ, ມຫາໂຄວິນ຺ທພ຺ຣາຫ຺ມໂຓ.

໓໘. ‘‘ຕທາຫໍ ສຕ຺ຕຣຊ຺ເຊສຸ, ຍໍ ເມ ອາສິ ອຸປາຍນໍ;

ເຕນ ເທມິ ມຫາທານໍ, ອກ຺ໂຂພ຺ຠໍ [ອກ຺ໂຂຠໍ (ສ຺ຍາ. ກໍ.)] ສາຄຣູປມໍ.

໓໙. ‘‘ນ ເມ ເທສ຺ສໍ ຘນໍ ຘຎ຺ຎໍ, ນປິ ນຕ຺ຖິ ນິຈໂຍ ມຍິ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ເທມິ ວຣໍ ຘນ’’ນ຺ຕິ.

ມຫາໂຄວິນ຺ທຈຣິຍໍ ປຎ຺ຈມໍ.

໖. ນິມິຣາຊຈຣິຍາ

໔໐. ‘‘ປຸນາປຣໍ ຍທາ ໂຫມິ, ມິຖິລາຍໍ ປຸຣຸຕ຺ຕເມ;

ນິມິ ນາມ ມຫາຣາຊາ, ປຓ຺ຑິໂຕ ກຸສລຕ຺ຖິໂກ.

໔໑. ‘‘ຕທາຫໍ ມາປຍິຕ຺ວານ, ຈຕຸສ຺ສາລໍ ຈຕຸມ຺ມຸຂໍ;

ຕຕ຺ຖ ທານໍ ປວຕ຺ເຕສິໍ, ມິຄປກ຺ຂິນຣາທິນໍ.

໔໒. ‘‘ອຈ຺ຉາທນຎ຺ຈ ສຍນໍ, ອນ຺ນໍ ປານຎ຺ຈ ໂຠຊນໍ;

ອພ຺ໂພຈ຺ຉິນ຺ນໍ ກຣິຕ຺ວານ, ມຫາທານໍ ປວຕ຺ຕຍິໍ.

໔໓. ‘‘ຍຖາປິ ເສວໂກ ສາມິໍ, ຘນເຫຕຸມຸປາຄໂຕ;

ກາເຍນ ວາຈາ ມນສາ, ອາຣາຘນີຍເມສຕິ.

໔໔. ‘‘ຕເຖວາຫໍ ສພ຺ພຠເວ, ປຣິເຍສິສ຺ສາມິ ໂພຘິຊໍ;

ທາເນນ ສຕ຺ເຕ ຕປ຺ເປຕ຺ວາ, ອິຈ຺ຉາມິ ໂພຘິມຸຕ຺ຕມ’’ນ຺ຕິ.

ນິມິຣາຊຈຣິຍໍ ຉຏ຺ຐໍ.

໗. ຈນ຺ທກຸມາຣຈຣິຍາ

໔໕. ‘‘ປຸນາປຣໍ ຍທາ ໂຫມິ, ເອກຣາຊສ຺ສ ອຕ຺ຣໂຊ;

ນຄເຣ ປຸປ຺ຜວຕິຍາ, ກຸມາໂຣ ຈນ຺ທສວ຺ຫໂຍ.

໔໖. ‘‘ຕທາຫໍ ຍຊນາ ມຸຕ຺ໂຕ, ນິກ຺ຂນ຺ໂຕ ຍຎ຺ຎວາຏໂຕ;

ສໍເວຄໍ ຊນຍິຕ຺ວານ, ມຫາທານໍ ປວຕ຺ຕຍິໍ.

໔໗. ‘‘ນາຫໍ ປິວາມິ ຂາທາມິ, ນປິ ຠຸຎ຺ຊາມິ ໂຠຊນໍ;

ທກ຺ຂິເຓຍ຺ເຍ ອທຕ຺ວານ, ອປິ ຉປ຺ປຎ຺ຈຣຕ຺ຕິໂຍ.

໔໘. ‘‘ຍຖາປິ ວາຓິໂຊ ນາມ, ກຕ຺ວານ ຠຓ຺ຑສຎ຺ຈຍໍ;

ຍຕ຺ຖ ລາໂຠ ມຫາ ໂຫຕິ, ຕຕ຺ຖ ຕໍ [ຕຕ຺ຖ ນໍ (ສີ.), ຕຕ຺ຖ (ກ.)] ຫຣຕິ ຠຓ຺ຑກໍ.

໔໙. ‘‘ຕເຖວ ສກຠຸຕ຺ຕາປິ, ປເຣ ທິນ຺ນໍ ມຫປ຺ຜລໍ;

ຕສ຺ມາ ປຣສ຺ສ ທາຕພ຺ພໍ, ສຕຠາໂຄ ຠວິສ຺ສຕິ.

໕໐. ‘‘ເອຕມຕ຺ຖວສໍ ຎຕ຺ວາ, ເທມິ ທານໍ ຠວາຠເວ;

ນ ປຏິກ຺ກມາມິ ທານໂຕ, ສມ຺ໂພຘິມນຸປຕ຺ຕິຍາ’’ຕິ.

ຈນ຺ທກຸມາຣຈຣິຍໍ ສຕ຺ຕມໍ.

໘. ສິວິຣາຊຈຣິຍາ

໕໑. ‘‘ອຣິຏ຺ຐສວ຺ຫເຍ ນຄເຣ, ສິວິນາມາສິ ຂຕ຺ຕິໂຍ;

ນິສຊ຺ຊ ປາສາທວເຣ, ເອວໍ ຈິນ຺ເຕສຫໍ ຕທາ.

໕໒. ‘‘‘ຍໍ ກິຎ຺ຈິ ມານຸສໍ ທານໍ, ອທິນ຺ນໍ ເມ ນ ວິຊ຺ຊຕິ;

ໂຍປິ ຍາເຈຍ຺ຍ ມໍ ຈກ຺ຂຸໍ, ທເທຍ຺ຍໍ ອວິກມ຺ປິໂຕ’.

໕໓. ‘‘ມມ ສງ຺ກປ຺ປມຎ຺ຎາຍ, ສກ຺ໂກ ເທວານມິສ຺ສໂຣ;

ນິສິນ຺ໂນ ເທວປຣິສາຍ, ອິທໍ ວຈນມພ຺ຣວິ.

໕໔. ‘‘‘ນິສຊ຺ຊ ປາສາທວເຣ, ສິວິຣາຊາ ມຫິທ຺ຘິໂກ;

ຈິນ຺ເຕນ຺ໂຕ ວິວິຘໍ ທານໍ, ອເທຍ຺ຍໍ ໂສ ນ ປສ຺ສຕິ.

໕໕. ‘‘‘ຕຖໍ ນຸ ວິຕຖໍ ເນຕໍ, ຫນ຺ທ ວີມໍສຍາມິ ຕໍ;

ມຸຫຸຕ຺ຕໍ ອາຄເມຍ຺ຍາຖ, ຍາວ ຊານາມິ ຕໍ ມນໍ’.

໕໖. ‘‘ປເວຘມາໂນ ປລິຕສິໂຣ, ວລິຄຕ຺ໂຕ [ວລິຕຄຕ຺ໂຕ (ສີ.)] ຊຣາຕຸໂຣ;

ອນ຺ຘວຓ຺ໂຓວ ຫຸຕ຺ວານ, ຣາຊານໍ ອຸປສງ຺ກມິ.

໕໗. ‘‘ໂສ ຕທາ ປຄ຺ຄເຫຕ຺ວານ, ວາມໍ ທກ຺ຂິຓພາຫຸ ຈ;

ສິຣສ຺ມິໍ ອຎ຺ຊລິໍ ກຕ຺ວາ, ອິທໍ ວຈນມພ຺ຣວິ.

໕໘. ‘‘‘ຍາຈາມິ ຕໍ ມຫາຣາຊ, ຘມ຺ມິກ ຣຏ຺ຐວຑ຺ຒນ;

ຕວ ທານຣຕາ ກິຕ຺ຕິ, ອຸຄ຺ຄຕາ ເທວມານຸເສ.

໕໙. ‘‘‘ອຸໂຠປິ ເນຕ຺ຕາ ນຍນາ, ອນ຺ຘາ ອຸປຫຕາ ມມ;

ເອກໍ ເມ ນຍນໍ ເທຫິ, ຕ຺ວມ຺ປິ ເອເກນ ຍາປຍ’.

໖໐. ‘‘ຕສ຺ສາຫໍ ວຈນໍ ສຸຕ຺ວາ, ຫຏ຺ໂຐ ສໍວິຄ຺ຄມານໂສ;

ກຕຎ຺ຊລີ ເວທຊາໂຕ, ອິທໍ ວຈນມພ຺ຣວິໍ.

໖໑. ‘‘‘ອິທານາຫໍ ຈິນ຺ຕຍິຕ຺ວານ, ປາສາທໂຕ ອິຘາຄໂຕ;

ຕ຺ວໍ ມມ ຈິຕ຺ຕມຎ຺ຎາຍ, ເນຕ຺ຕໍ ຍາຈິຕຸມາຄໂຕ.

໖໒. ‘‘‘ອໂຫ ເມ ມານສໍ ສິທ຺ຘໍ, ສງ຺ກປ຺ໂປ ປຣິປູຣິໂຕ;

ອທິນ຺ນປຸພ຺ພໍ ທານວຣໍ, ອຊ຺ຊ ທສ຺ສາມິ ຍາຈເກ.

໖໓. ‘‘‘ເອຫິ ສິວກ ອຸຏ຺ເຐຫິ, ມາ ທນ຺ຘຍິ ມາ ປເວຘຍິ;

ອຸໂຠປິ ນຍນໍ ເທຫິ, ອຸປ຺ປາເຏຕ຺ວາ ວຓິພ຺ພເກ’.

໖໔. ‘‘ຕໂຕ ໂສ ໂຈທິໂຕ ມຍ຺ຫໍ, ສິວໂກ ວຈນໍ ກໂຣ;

ອຸທ຺ຘຣິຕ຺ວານ ປາທາສິ, ຕາລມິຎ຺ຊໍວ ຍາຈເກ.

໖໕. ‘‘ທທມານສ຺ສ ເທນ຺ຕສ຺ສ, ທິນ຺ນທານສ຺ສ ເມ ສໂຕ;

ຈິຕ຺ຕສ຺ສ ອຎ຺ຎຖາ ນຕ຺ຖິ, ໂພຘິຍາເຍວ ກາຣຓາ.