໗. ມາຕງ຺ຄຈຣິຍາ

໖໐. ‘‘ປຸນາປຣໍ ຍທາ ໂຫມິ, ຊຏິໂລ ອຸຄ຺ຄຕາປໂນ;

ມາຕງ຺ໂຄ ນາມ ນາເມນ, ສີລວາ ສຸສມາຫິໂຕ.

໖໑. ‘‘ອຫຎ຺ຈ ພ຺ຣາຫ຺ມໂຓ ເອໂກ, ຄງ຺ຄາກູເລ ວສາມຸໂຠ;

ອຫໍ ວສາມິ ອຸປຣິ, ເຫຏ຺ຐາ ວສຕິ ພ຺ຣາຫ຺ມໂຓ.

໖໒. ‘‘ວິຈຣນ຺ໂຕ ອນຸກູລມ຺ຫິ, ອຸທ຺ຘໍ ເມ ອສ຺ສມທ຺ທສ;

ຕຕ຺ຖ ມໍ ປຣິຠາເສຕ຺ວາ, ອຠິສປິ ມຸທ຺ຘຜາລນໍ.

໖໓. ‘‘ຍທິຫໍ ຕສ຺ສ ປກຸປ຺ເປຍ຺ຍໍ, ຍທິ ສີລໍ ນ ໂຄປເຍ;

ໂອໂລເກຕ຺ວານຫໍ ຕສ຺ສ, ກເຣຍ຺ຍໍ ຉາຣິກໍ ວິຍ.

໖໔. ‘‘ຍໍ ໂສ ຕທາ ມໍ ອຠິສປິ, ກຸປິໂຕ ທຸຏ຺ຐມານໂສ;

ຕສ຺ເສວ ມຕ຺ຖເກ ນິປຕິ, ໂຍເຄນ ຕໍ ປໂມຈຍິໍ.

໖໕. ‘‘ອນຸຣກ຺ຂິໍ ມມ ສີລໍ, ນາຣກ຺ຂິໍ ມມ ຊີວິຕໍ;

ສີລວາ ຫິ ຕທາ ອາສິໍ, ໂພຘິຍາເຍວ ກາຣຓາ’’ຕິ.

ມາຕງ຺ຄຈຣິຍໍ ສຕ຺ຕມໍ.