໙. ເວສ຺ສນ຺ຕຣຈຣິຍາ

໖໗. ‘‘ຍາ ເມ ອໂຫສິ ຊນິກາ, ຜຸສ຺ສຕີ [ຜຸສຕີ (ສີ.)] ນາມ ຂຕ຺ຕິຍາ;

ສາ ອຕີຕາສຸ ຊາຕີສຸ, ສກ຺ກສ຺ສ ມເຫສີ ປິຍາ.

໖໘. ‘‘ຕສ຺ສາ ອາຍຸກ຺ຂຍໍ ຎຕ຺ວາ, ເທວິນ຺ໂທ ເອຕທພ຺ຣວິ;

‘ທທາມິ ເຕ ທສ ວເຣ, ວຣຠທ຺ເທ ຍທິຈ຺ຉສິ’.

໖໙. ‘‘ເອວໍ ວຸຕ຺ຕາ ຈ ສາ ເທວີ, ສກ຺ກໍ ປຸນິທມພ຺ຣວິ;

‘ກິໍ ນຸ ເມ ອປຣາຘຕ຺ຖິ, ກິໍ ນຸ ເທສ຺ສາ ອຫໍ ຕວ;

ຣມ຺ມາ ຈາເວສິ ມໍ ຐານາ, ວາໂຕວ ຘຣຓີຣຸຫໍ’.

໗໐. ‘‘ເອວໍ ວຸຕ຺ໂຕ ຈ ໂສ ສກ຺ໂກ, ປຸນ ຕສ຺ສິທມພ຺ຣວິ;

‘ນ ເຈວ ເຕ ກຕໍ ປາປໍ, ນ ຈ ເມ ຕ຺ວໍສິ ອປ຺ປິຍາ.

໗໑. ‘‘‘ເອຕ຺ຕກໍເຍວ ເຕ ອາຍຸ, ຈວນກາໂລ ຠວິສ຺ສຕິ;

ປຏິຄ຺ຄຓ຺ຫ ມຍາ ທິນ຺ເນ, ວເຣ ທສ ວຣຸຕ຺ຕເມ’.

໗໒. ‘‘ສກ຺ເກນ ສາ ທິນ຺ນວຣາ, ຕຸຏ຺ຐຫຏ຺ຐາ ປໂມທິຕາ;

ມມໍ ອພ຺ຠນ຺ຕຣໍ ກຕ຺ວາ, ຜຸສ຺ສຕີ ທສ ວເຣ ວຣີ.

໗໓. ‘‘ຕໂຕ ຈຸຕາ ສາ ຜຸສ຺ສຕີ, ຂຕ຺ຕິເຍ ອຸປປຊ຺ຊຖ;

ເຊຕຸຕ຺ຕຣມ຺ຫິ ນຄເຣ, ສຎ຺ຊເຍນ ສມາຄມິ.

໗໔. ‘‘ຍທາຫໍ ຜຸສ຺ສຕິຍາ ກຸຈ຺ຉິໍ, ໂອກ຺ກນ຺ໂຕ ປິຍມາຕຸຍາ;

ມມ ເຕເຊນ ເມ ມາຕາ, ສທາ ທານຣຕາ ອຫຸ.

໗໕. ‘‘ອຘເນ ອາຕຸເຣ ຊິຓ຺ເຓ, ຍາຈເກ ອທ຺ຘິເກ [ປຖິເກ (ກ.)] ຊເນ;

ສມເຓ ພ຺ຣາຫ຺ມເຓ ຂີເຓ, ເທຕິ ທານໍ ອກິຎ຺ຈເນ.

໗໖. ‘‘ທສ ມາເສ ຘາຣຍິຕ຺ວານ, ກໂຣນ຺ເຕ ປຸຣໍ ປທກ຺ຂິຓໍ;

ເວສ຺ສານໍ ວີຖິຍາ ມຊ຺ເຌ, ຊເນສິ ຜຸສ຺ສຕີ ມມໍ.

໗໗. ‘‘ນ ມຍ຺ຫໍ ມຕ຺ຕິກໍ ນາມໍ, ນປິ ເປຕ຺ຕິກສມ຺ຠວໍ;

ຊາເຕຕ຺ຖ ເວສ຺ສວີຖິຍາ, ຕສ຺ມາ ເວສ຺ສນ຺ຕໂຣ ອຫຸ.

໗໘. ‘‘ຍທາຫໍ ທາຣໂກ ໂຫມິ, ຊາຕິຍາ ອຏ຺ຐວສ຺ສິໂກ;

ຕທາ ນິສຊ຺ຊ ປາສາເທ, ທານໍ ທາຕຸໍ ວິຈິນ຺ຕຍິໍ.

໗໙. ‘‘‘ຫທຍໍ ທເທຍ຺ຍໍ ຈກ຺ຂຸໍ, ມໍສມ຺ປິ ຣຸຘິຣມ຺ປິ ຈ;

ທເທຍ຺ຍໍ ກາຍໍ ສາເວຕ຺ວາ, ຍທິ ໂກຈິ ຍາຈເຍ ມມໍ’.

໘໐. ‘‘ສຠາວໍ ຈິນ຺ຕຍນ຺ຕສ຺ສ, ອກມ຺ປິຕມສຓ຺ຐິຕໍ;

ອກມ຺ປິ ຕຕ຺ຖ ປຖວີ, ສິເນຣຸວນວຏໍສກາ.

໘໑. ‘‘ອນ຺ວທ຺ຘມາເສ ປນ຺ນຣເສ, ປຸຓ຺ຓມາເສ ອຸໂປສເຖ;

ປຈ຺ຈຍໍ ນາຄມາຣຸຍ຺ຫ, ທານໍ ທາຕຸໍ ອຸປາຄມິໍ.

໘໒. ‘‘ກລິງ຺ຄຣຏ຺ຐວິສຍາ, ພ຺ຣາຫ຺ມຓາ ອຸປຄຎ຺ຉຸ ມໍ;

ອຍາຈຸໍ ມໍ ຫຕ຺ຖິນາຄໍ, ຘຎ຺ຎໍ ມງ຺ຄລສມ຺ມຕໍ.

໘໓. ‘‘ອວຸຏ຺ຐິໂກ ຊນປໂທ, ທຸພ຺ຠິກ຺ໂຂ ຉາຕໂກ ມຫາ;

ທທາຫິ ປວຣໍ ນາຄໍ, ສພ຺ພເສຕໍ ຄຊຸຕ຺ຕມໍ.

໘໔. ‘‘ທທາມິ ນ ວິກມ຺ປາມິ, ຍໍ ມໍ ຍາຈນ຺ຕິ ພ຺ຣາຫ຺ມຓາ;

ສນ຺ຕໍ ນປ຺ປຕິຄູຫາມິ [ນປ຺ປຕິຄຸຍ຺ຫາມິ (ສີ. ກ.)], ທາເນ ເມ ຣມເຕ ມໂນ.

໘໕. ‘‘ນ ເມ ຍາຈກມນຸປ຺ປຕ຺ເຕ, ປຏິກ຺ເຂໂປ ອນຸຈ຺ຉໂວ;

‘ມາ ເມ ຠິຊ຺ຊິ ສມາທານໍ, ທສ຺ສາມິ ວິປຸລໍ ຄຊໍ’.

໘໖. ‘‘ນາຄໍ ຄເຫຕ຺ວາ ໂສຓ຺ຑາຍ, ຠິງ຺ຄາເຣ ຣຕນາມເຍ;

ຊລໍ ຫຕ຺ເຖ ອາກິຣິຕ຺ວາ, ພ຺ຣາຫ຺ມຓານໍ ອທໍ ຄຊໍ.

໘໗. ‘‘ປຸນາປຣໍ ທທນ຺ຕສ຺ສ, ສພ຺ພເສຕໍ ຄຊຸຕ຺ຕມໍ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

໘໘. ‘‘ຕສ຺ສ ນາຄສ຺ສ ທາເນນ, ສິວໂຍ ກຸທ຺ຘາ ສມາຄຕາ;

ປພ຺ພາເຊສຸໍ ສກາ ຣຏ຺ຐາ, ‘ວງ຺ກໍ ຄຈ຺ຉຕຸ ປພ຺ພຕໍ’.

໘໙. ‘‘ເຕສໍ ນິຈ຺ຉຸຠມານານໍ, ອກມ຺ປິຕ຺ຖມສຓ຺ຐິຕໍ;

ມຫາທານໍ ປວຕ຺ເຕຕຸໍ, ເອກໍ ວຣມຍາຈິສໍ.

໙໐. ‘‘ຍາຈິຕາ ສິວໂຍ ສພ຺ເພ, ເອກໍ ວຣມທໍສຸ ເມ;

ສາວຍິຕ຺ວາ ກຓ຺ຓເຠຣິໍ, ມຫາທານໍ ທທາມຫໍ.

໙໑. ‘‘ອເຖຕ຺ຖ ວຕ຺ຕຕີ ສທ຺ໂທ, ຕຸມຸໂລ ເຠຣໂວ ມຫາ;

ທາເນນິມໍ ນີຫຣນ຺ຕິ, ປຸນ ທານໍ ທທາຕຍໍ.

໙໒. ‘‘ຫຕ຺ຖິໍ ອສ຺ເສ ຣເຖ ທຕ຺ວາ, ທາສິໍ ທາສໍ ຄວໍ ຘນໍ;

ມຫາທານໍ ທທິຕ຺ວານ, ນຄຣາ ນິກ຺ຂມິໍ ຕທາ.

໙໓. ‘‘ນິກ຺ຂມິຕ຺ວານ ນຄຣາ, ນິວຕ຺ຕິຕ຺ວາ ວິໂລກິເຕ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

໙໔. ‘‘ຈຕຸວາຫິໍ ຣຖໍ ທຕ຺ວາ, ຐຕ຺ວາ ຈາຕຸມ຺ມຫາປເຖ;

ເອກາກິໂຍ ອທຸຕິໂຍ, ມທ຺ທິເທວິໍ ອິທມພ຺ຣວິໍ.

໙໕. ‘‘‘ຕ຺ວໍ ມທ຺ທິ ກຓ຺ຫໍ ຄຓ຺ຫາຫິ, ລຫຸກາ ເອສາ ກນິຏ຺ຐິກາ;

ອຫໍ ຊາລິໍ ຄເຫສ຺ສາມິ, ຄຣຸໂກ ຠາຕິໂກ ຫິ ໂສ’.

໙໖. ‘‘ປທຸມໍ ປຸຓ຺ຑຣີກໍວ, ມທ຺ທີ ກຓ຺ຫາຊິນຄ຺ຄຫີ;

ອຫໍ ສຸວຓ຺ຓພິມ຺ພໍວ, ຊາລິໍ ຂຕ຺ຕິຍມຄ຺ຄຫິໍ.

໙໗. ‘‘ອຠິຊາຕາ ສຸຂຸມາລາ, ຂຕ຺ຕິຍາ ຈຕຸໂຣ ຊນາ;

ວິສມໍ ສມໍ ອກ຺ກມນ຺ຕາ, ວງ຺ກໍ ຄຈ຺ຉາມ ປພ຺ພຕໍ.

໙໘. ‘‘ເຍ ເກຈິ ມນຸຊາ ເອນ຺ຕິ, ອນຸມຄ຺ເຄ ປຏິປ຺ປເຖ;

ມຄ຺ຄນ຺ເຕ ປຏິປຸຈ຺ຉາມ, ‘ກຸຫິໍ ວງ຺ກນ຺ຕ [ວງ຺ກຕ (ສີ.)] ປພ຺ພໂຕ’.

໙໙. ‘‘ເຕ ຕຕ຺ຖ ອມ຺ເຫ ປສ຺ສິຕ຺ວາ, ກຣຸຓໍ ຄິຣມຸທີຣຍຸໍ;

ທຸກ຺ຂໍ ເຕ ປຏິເວເທນ຺ຕິ, ທູເຣ ວງ຺ກນ຺ຕປພ຺ພໂຕ.

໑໐໐. ‘‘ຍທິ ປສ຺ສນ຺ຕິ ປວເນ, ທາຣກາ ຜລິເນ ທຸເມ;

ເຕສໍ ຜລານໍ ເຫຕຸມ຺ຫິ, ອຸປໂຣທນ຺ຕິ ທາຣກາ.

໑໐໑. ‘‘ໂຣທນ຺ເຕ ທາຣເກ ທິສ຺ວາ, ອຸພ຺ພິທ຺ຘາ [ອຸພ຺ພິຄ຺ຄາ (ສ຺ຍາ. ກໍ.)] ວິປຸລາ ທຸມາ;

ສຍເມໂວຓມິຕ຺ວານ, ອຸປຄຈ຺ຉນ຺ຕິ ທາຣເກ.

໑໐໒. ‘‘ອິທໍ ອຈ຺ຉຣິຍໍ ທິສ຺ວາ, ອພ຺ຠຸຕໍ ໂລມຫໍສນໍ;

ສາຫຸກາຣໍ [ສາຘຸກາຣໍ (ສພ຺ພຕ຺ຖ)] ປວຕ຺ເຕສິ, ມທ຺ທີ ສພ຺ພງ຺ຄໂສຠນາ.

໑໐໓. ‘‘ອຈ຺ເຉຣໍ ວຕ ໂລກສ຺ມິໍ, ອພ຺ຠຸຕໍ ໂລມຫໍສນໍ;

ເວສ຺ສນ຺ຕຣສ຺ສ ເຕເຊນ, ສຍເມໂວຓຕາ ທຸມາ.

໑໐໔. ‘‘ສງ຺ຂິປິໍສຸ ປຖໍ ຍກ຺ຂາ, ອນຸກມ຺ປາຍ ທາຣເກ;

ນິກ຺ຂນ຺ຕທິວເສເນວ [ນິກ຺ຂນ຺ຕທິວເສເຍວ (ສີ.)], ເຈຕຣຏ຺ຐມຸປາຄມຸໍ.

໑໐໕. ‘‘ສຏ຺ຐິຣາຊສຫສ຺ສານິ, ຕທາ ວສນ຺ຕິ ມາຕຸເລ;

ສພ຺ເພ ປຎ຺ຊລິກາ ຫຸຕ຺ວາ, ໂຣທມານາ ອຸປາຄມຸໍ.

໑໐໖. ‘‘ຕຕ຺ຖ ວຕ຺ເຕຕ຺ວາ ສລ຺ລາປໍ, ເຈເຕຫິ ເຈຕປຸຕ຺ເຕຫິ;

ເຕ ຕໂຕ ນິກ຺ຂມິຕ຺ວານ, ວງ຺ກໍ ອຄມຸ ປພ຺ພຕໍ.

໑໐໗. ‘‘ອາມນ຺ຕຍິຕ຺ວາ ເທວິນ຺ໂທ, ວິສ຺ສກມ຺ມໍ [ວິສຸກມ຺ມໍ (ກ.)] ມຫິທ຺ຘິກໍ;

ອສ຺ສມໍ ສຸກຕໍ ຣມ຺ມໍ, ປຓ຺ຓສາລໍ ສຸມາປຍ.

໑໐໘. ‘‘ສກ຺ກສ຺ສ ວຈນໍ ສຸຕ຺ວາ, ວິສ຺ສກມ຺ໂມ ມຫິທ຺ຘິໂກ;

ອສ຺ສມໍ ສຸກຕໍ ຣມ຺ມໍ, ປຓ຺ຓສາລໍ ສຸມາປຍິ.

໑໐໙. ‘‘ອຊ຺ໂຌຄາເຫຕ຺ວາ ປວນໍ, ອປ຺ປສທ຺ທໍ ນິຣາກຸລໍ;

ຈຕຸໂຣ ຊນາ ມຍໍ ຕຕ຺ຖ, ວສາມ ປພ຺ພຕນ຺ຕເຣ.

໑໑໐. ‘‘ອຫຎ຺ຈ ມທ຺ທິເທວີ ຈ, ຊາລີ ກຓ຺ຫາຊິນາ ຈຸໂຠ;

ອຎ຺ຎມຎ຺ຎໍ ໂສກນຸທາ, ວສາມ ອສ຺ສເມ ຕທາ.

໑໑໑. ‘‘ທາຣເກ ອນຸຣກ຺ຂນ຺ໂຕ, ອສຸຎ຺ໂຎ ໂຫມິ ອສ຺ສເມ;

ມທ຺ທີ ຜລໍ ອາຫຣິຕ຺ວາ, ໂປເສຕິ ສາ ຕໂຍ ຊເນ.

໑໑໒. ‘‘ປວເນ ວສມານສ຺ສ, ອທ຺ຘິໂກ ມໍ ອຸປາຄມິ;

ອາຍາຈິ ປຸຕ຺ຕເກ ມຍ຺ຫໍ, ຊາລິໍ ກຓ຺ຫາຊິນໍ ຈຸໂຠ.

໑໑໓. ‘‘ຍາຈກໍ ອຸປຄຕໍ ທິສ຺ວາ, ຫາໂສ ເມ ອຸປປຊ຺ຊຖ;

ອຸໂຠ ປຸຕ຺ເຕ ຄເຫຕ຺ວານ, ອທາສິໍ ພ຺ຣາຫ຺ມເຓ ຕທາ.

໑໑໔. ‘‘ສເກ ປຸຕ຺ເຕ ຈຊນ຺ຕສ຺ສ, ຊູຊເກ ພ຺ຣາຫ຺ມເຓ ຍທາ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

໑໑໕. ‘‘ປຸນເທວ ສກ຺ໂກ ໂອຣຸຍ຺ຫ, ຫຸຕ຺ວາ ພ຺ຣາຫ຺ມຓສນ຺ນິໂຠ;

ອາຍາຈິ ມໍ ມທ຺ທິເທວິໍ, ສີລວນ຺ຕິໍ ປຕິພ຺ພຕໍ.

໑໑໖. ‘‘ມທ຺ທິໍ ຫຕ຺ເຖ ຄເຫຕ຺ວານ, ອຸທກຎ຺ຊລິ ປູຣິຍ;

ປສນ຺ນມນສງ຺ກປ຺ໂປ, ຕສ຺ສ ມທ຺ທິໍ ອທາສຫໍ.

໑໑໗. ‘‘ມທ຺ທິຍາ ທີຍມານາຍ, ຄຄເນ ເທວາ ປໂມທິຕາ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

໑໑໘. ‘‘ຊາລິໍ ກຓ຺ຫາຊິນໍ ຘີຕໍ, ມທ຺ທິເທວິໍ ປຕິພ຺ພຕໍ;

ຈຊມາໂນ ນ ຈິນ຺ເຕສິໍ, ໂພຘິຍາເຍວ ກາຣຓາ.

໑໑໙. ‘‘ນ ເມ ເທສ຺ສາ ອຸໂຠ ປຸຕ຺ຕາ, ມທ຺ທິເທວີ ນ ເທສ຺ສິຍາ;

ສພ຺ພຎ຺ຎຸຕໍ ປິຍໍ ມຍ຺ຫໍ, ຕສ຺ມາ ປິເຍ ອທາສຫໍ.

໑໒໐. ‘‘ປຸນາປຣໍ ພ຺ຣຫາຣຎ຺ເຎ, ມາຕາປິຕຸສມາຄເມ;

ກຣຸຓໍ ປຣິເທວນ຺ເຕ, ສລ຺ລປນ຺ເຕ ສຸຂໍ ທຸຂໍ.

໑໒໑. ‘‘ຫິໂຣຕ຺ຕປ຺ເປນ ຄຣຸນາ [ຄຣຸນໍ (ສ຺ຍາ. ກ.)], ອຸຠິນ຺ນໍ ອຸປສງ຺ກມິ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

໑໒໒. ‘‘ປຸນາປຣໍ ພ຺ຣຫາຣຎ຺ຎາ, ນິກ຺ຂມິຕ຺ວາ ສຎາຕິຠິ;

ປວິສາມິ ປຸຣໍ ຣມ຺ມໍ, ເຊຕຸຕ຺ຕຣໍ ປຸຣຸຕ຺ຕມໍ.

໑໒໓. ‘‘ຣຕນານິ ສຕ຺ຕ ວສ຺ສິໍສຸ, ມຫາເມໂຆ ປວສ຺ສຖ;

ຕທາປິ ປຖວີ ກມ຺ປິ, ສິເນຣຸວນວຏໍສກາ.

໑໒໔. ‘‘ອເຈຕນາຍໍ ປຖວີ, ອວິຎ຺ຎາຍ ສຸຂໍ ທຸຂໍ;

ສາປິ ທານພລາ ມຍ຺ຫໍ, ສຕ຺ຕກ຺ຂຕ຺ຕຸໍ ປກມ຺ປຖາ’’ຕິ.

ເວສ຺ສນ຺ຕຣຈຣິຍໍ ນວມໍ.