໑໐. ສສປຓ຺ຑິຕຈຣິຍາ

໑໒໕. ‘‘ປຸນາປຣໍ ຍທາ ໂຫມິ, ສສໂກ ປວນຈາຣໂກ;

ຕິຓປຓ຺ຓສາກຜລຠກ຺ໂຂ, ປຣເຫຐນວິວຊ຺ຊິໂຕ.

໑໒໖. ‘‘ມກ຺ກໂຏ ຈ ສິງ຺ຄາໂລ ຈ, ສຸຕ຺ຕໂປໂຕ ຈຫໍ ຕທາ;

ວສາມ ເອກສາມນ຺ຕາ, ສາຍໍ ປາໂຕ ຈ ທິສ຺ສເຣ [ສາຍໍ ປາໂຕ ປທິສ຺ສເຣ (ກ.)].

໑໒໗. ‘‘ອຫໍ ເຕ ອນຸສາສາມິ, ກິຣິເຍ ກລ຺ຍາຓປາປເກ;

‘ປາປານິ ປຣິວຊ຺ເຊຖ, ກລ຺ຍາເຓ ອຠິນິວິສ຺ສຖ’.

໑໒໘. ‘‘ອຸໂປສຖມ຺ຫິ ທິວເສ, ຈນ຺ທໍ ທິສ຺ວານ ປູຣິຕໍ;

ເອເຕສໍ ຕຕ຺ຖ ອາຈິກ຺ຂິໍ, ທິວໂສ ອຊ຺ຊຸໂປສໂຖ.

໑໒໙. ‘‘ທານານິ ປຏິຍາເທຖ, ທກ຺ຂິເຓຍ຺ຍສ຺ສ ທາຕເວ;

ທຕ຺ວາ ທານໍ ທກ຺ຂິເຓຍ຺ເຍ, ອຸປວສ຺ສຖຸໂປສຖໍ.

໑໓໐. ‘‘ເຕ ເມ ສາຘູຕິ ວຕ຺ວານ, ຍຖາສຕ຺ຕິ ຍຖາພລໍ;

ທານານິ ປຏິຍາເທຕ຺ວາ, ທກ຺ຂິເຓຍ຺ຍໍ ຄເວສິສຸໍ [ຄເວສຍ຺ຍຸໍ (ກ.)].

໑໓໑. ‘‘ອຫໍ ນິສຊ຺ຊ ຈິນ຺ເຕສິໍ, ທານໍ ທກ຺ຂິຓນຸຈ຺ຉວໍ;

‘ຍທິຫໍ ລເຠ ທກ຺ຂິເຓຍ຺ຍໍ, ກິໍ ເມ ທານໍ ຠວິສ຺ສຕິ.

໑໓໒. ‘‘‘ນ ເມ ອຕ຺ຖິ ຕິລາ ມຸຄ຺ຄາ, ມາສາ ວາ ຕຓ຺ຑຸລາ ຆຕໍ;

ອຫໍ ຕິເຓນ ຍາເປມິ, ນ ສກ຺ກາ ຕິຓ ທາຕເວ.

໑໓໓. ‘‘‘ຍທິ ໂກຈິ ເອຕິ ທກ຺ຂິເຓຍ຺ໂຍ, ຠິກ຺ຂາຍ ມມ ສນ຺ຕິເກ;

ທຊ຺ຊາຫໍ ສກມຕ຺ຕານໍ, ນ ໂສ ຕຸຈ຺ໂຉ ຄມິສ຺ສຕິ’.

໑໓໔. ‘‘ມມ ສງ຺ກປ຺ປມຎ຺ຎາຍ, ສກ຺ໂກ ພ຺ຣາຫ຺ມຓວຓ຺ຓິນາ;

ອາສຍໍ ເມ ອຸປາຄຈ຺ຉິ, ທານວີມໍສນາຍ ເມ.

໑໓໕. ‘‘ຕມຫໍ ທິສ຺ວານ ສນ຺ຕຸຏ຺ໂຐ, ອິທໍ ວຈນມພ຺ຣວິໍ;

‘ສາຘຸ ໂຂສິ ອນຸປ຺ປຕ຺ໂຕ, ຆາສເຫຕຸ ມມນ຺ຕິເກ.

໑໓໖. ‘‘‘ອທິນ຺ນປຸພ຺ພໍ ທານວຣໍ, ອຊ຺ຊ ທສ຺ສາມິ ເຕ ອຫໍ;

ຕຸວໍ ສີລຄຸຓູເປໂຕ, ອຍຸຕ຺ຕໍ ເຕ ປຣເຫຐນໍ.

໑໓໗. ‘‘‘ເອຫິ ອຄ຺ຄິໍ ປທີເປຫິ, ນານາກຏ຺ເຐ ສມານຍ;

ອຫໍ ປຈິສ຺ສມຕ຺ຕານໍ, ປກ຺ກໍ ຕ຺ວໍ ຠກ຺ຂຍິສ຺ສສິ’.

໑໓໘. ‘‘‘ສາຘູ’ຕິ ໂສ ຫຏ຺ຐມໂນ, ນານາກຏ຺ເຐ ສມານຍິ;

ມຫນ຺ຕໍ ອກາສິ ຈິຕກໍ, ກຕ຺ວາ ອງ຺ຄາຣຄພ຺ຠກໍ.

໑໓໙. ‘‘ອຄ຺ຄິໍ ຕຕ຺ຖ ປທີເປສິ, ຍຖາ ໂສ ຂິປ຺ປໍ ມຫາ ຠເວ;

ໂຜເຏຕ຺ວາ ຣຊຄເຕ ຄຕ຺ເຕ, ເອກມນ຺ຕໍ ອຸປາວິສິໍ.

໑໔໐. ‘‘ຍທາ ມຫາກຏ຺ຐປຸຎ຺ໂຊ, ອາທິຕ຺ໂຕ ຘມຘມາຍຕິ [ຘຸມຘຸມາຍຕິ (ສີ.), ຘມມາຍຕິ (ກ.)];

ຕທຸປ຺ປຕິຕ຺ວາ ປປຕິໍ, ມຊ຺ເຌ ຊາລສິຂນ຺ຕເຣ.

໑໔໑. ‘‘ຍຖາ ສີໂຕທກໍ ນາມ, ປວິຏ຺ຐໍ ຍສ຺ສ ກສ຺ສຈິ;

ສເມຕິ ທຣຖປຣິຬາຫໍ, ອສ຺ສາທໍ ເທຕິ ປີຕິ ຈ.

໑໔໒. ‘‘ຕເຖວ ຊລິຕໍ ອຄ຺ຄິໍ, ປວິຏ຺ຐສ຺ສ ມມໍ ຕທາ;

ສພ຺ພໍ ສເມຕິ ທຣຖໍ, ຍຖາ ສີໂຕທກໍ ວິຍ.

໑໔໓. ‘‘ຉວິໍ ຈມ຺ມໍ ມໍສໍ ນ຺ຫາຣຸໍ, ອຏ຺ຐິໍ ຫທຍພນ຺ຘນໍ;

ເກວລໍ ສກລໍ ກາຍໍ, ພ຺ຣາຫ຺ມຓສ຺ສ ອທາສຫ’’ນ຺ຕິ.

ສສປຓ຺ຑິຕຈຣິຍໍ ທສມໍ.

ອກິຕ຺ຕິວຄ຺ໂຄ ປຐໂມ.

ຕສ຺ສຸທ຺ທານໍ –

ອກິຕ຺ຕິພ຺ຣາຫ຺ມໂຓ ສງ຺ໂຂ, ກຸຣຸຣາຊາ ຘນຎ຺ຈໂຍ;

ມຫາສຸທສ຺ສໂນ ຣາຊາ, ມຫາໂຄວິນ຺ທພ຺ຣາຫ຺ມໂຓ.

ນິມິ ຈນ຺ທກຸມາໂຣ ຈ, ສິວິ ເວສ຺ສນ຺ຕໂຣ ສໂສ;

ອຫເມວ ຕທາ ອາສິໍ, ໂຍ ເຕ ທານວເຣ ອທາ.

ເອເຕ ທານປຣິກ຺ຂາຣາ, ເອເຕ ທານສ຺ສ ປາຣມີ;

ຊີວິຕໍ ຍາຈເກ ທຕ຺ວາ, ອິມໍ ປາຣມິ ປູຣຍິໍ.

ຠິກ຺ຂາຍ ອຸປຄຕໍ ທິສ຺ວາ, ສກຕ຺ຕານໍ ປຣິຈ຺ຈຊິໍ;

ທາເນນ ເມ ສໂມ ນຕ຺ຖິ, ເອສາ ເມ ທານປາຣມີຕິ.

ທານປາຣມິນິທ຺ເທໂສ ນິຏ຺ຐິໂຕ.