໙. ອໂນມທສ຺ສີພຸທ຺ຘວໍໂສ

໑. ໂສຠິຕສ຺ສ ອປເຣນ, ສມ຺ພຸທ຺ໂຘ ທ຺ວິປທຸຕ຺ຕໂມ;

ອໂນມທສ຺ສີ ອມິຕຍໂສ, ເຕຊສ຺ສີ ທຸຣຕິກ຺ກໂມ.

໒. ໂສ ເຉຕ຺ວາ ພນ຺ຘນໍ ສພ຺ພໍ, ວິທ຺ຘໍເສຕ຺ວາ ຕໂຍ ຠເວ;

ອນິວຕ຺ຕິຄມນໍ ມຄ຺ຄໍ, ເທເສສິ ເທວມານຸເສ.

໓. ສາຄໂຣວ ອສງ຺ໂຂໂຠ, ປພ຺ພໂຕວ ທຸຣາສໂທ;

ອາກາໂສວ ອນນ຺ໂຕ ໂສ, ສາລຣາຊາວ ຜຸລ຺ລິໂຕ.

໔. ທສ຺ສເນນປິ ຕໍ ພຸທ຺ຘໍ, ໂຕສິຕາ ໂຫນ຺ຕິ ປາຓິໂນ;

ພ຺ຍາຫຣນ຺ຕໍ ຄິຣໍ ສຸຕ຺ວາ, ອມຕໍ ປາປຸຓນ຺ຕິ ເຕ.

໕. ຘມ຺ມາຠິສມໂຍ ຕສ຺ສ, ອິທ຺ໂຘ ຜີໂຕ ຕທາ ອຫຸ;

ໂກຏິສຕານິ ອຠິສມິໍສຸ, ປຐເມ ຘມ຺ມເທສເນ.

໖. ຕໂຕ ປຣໍ ອຠິສມເຍ, ວສ຺ສນ຺ເຕ ຘມ຺ມວຸຏ຺ຐິໂຍ;

ອສີຕິໂກຏິໂຍຠິສມິໍສຸ, ທຸຕິເຍ ຘມ຺ມເທສເນ.

໗. ຕໂຕປຣຎ຺ຫິ ວສ຺ສນ຺ເຕ, ຕປ຺ປຍນ຺ເຕ ຈ ປາຓິນໍ;

ອຏ຺ຐສຕ຺ຕຕິໂກຏີນໍ, ຕຕິຍາຠິສມໂຍ ອຫຸ.

໘. ສນ຺ນິປາຕາ ຕໂຍ ອາສຸໍ, ຕສ຺ສາປິ ຈ ມເຫສິໂນ;

ອຠິຎ຺ຎາພລປ຺ປຕ຺ຕານໍ, ປຸປ຺ຜິຕານໍ ວິມຸຕ຺ຕິຍາ.

໙. ອຏ຺ຐສຕສຫສ຺ສານໍ, ສນ຺ນິປາໂຕ ຕທາ ອຫຸ;

ປຫີນມທໂມຫານໍ, ສນ຺ຕຈິຕ຺ຕານ ຕາທິນໍ.

໑໐. ສຕ຺ຕສຕສຫສ຺ສານໍ, ທຸຕິໂຍ ອາສິ ສມາຄໂມ;

ອນງ຺ຄຓານໍ ວິຣຊານໍ, ອຸປສນ຺ຕານ ຕາທິນໍ.

໑໑. ຉນ຺ນໍ ສຕສຫສ຺ສານໍ, ຕຕິໂຍ ອາສິ ສມາຄໂມ;

ອຠິຎ຺ຎາພລປ຺ປຕ຺ຕານໍ, ນິພ຺ພຸຕານໍ ຕປສ຺ສິນໍ.

໑໒. ອຫໍ ເຕນ ສມເຍນ, ຍກ຺ໂຂ ອາສິໍ ມຫິທ຺ຘິໂກ;

ເນການໍ ຍກ຺ຂໂກຏີນໍ, ວສວຕ຺ຕິມ຺ຫິ ອິສ຺ສໂຣ.

໑໓. ຕທາປິ ຕໍ ພຸທ຺ຘວຣໍ, ອຸປຄນ຺ຕ຺ວາ ມເຫສິນໍ;

ອນ຺ນປາເນນ ຕປ຺ເປສິໍ, ສສງ຺ຆໍ ໂລກນາຍກໍ.

໑໔. ໂສປິ ມໍ ຕທາ ພ຺ຍາກາສິ, ວິສຸທ຺ຘນຍໂນ ມຸນິ;

‘‘ອປຣິເມຍ຺ຍິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໕. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໖. ຕສ຺ສາປິ ວຈນໍ ສຸຕ຺ວາ, ຫຏ຺ໂຐ ສໍວິຄ຺ຄມານໂສ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໗. ນຄຣໍ ຈນ຺ທວຕີ ນາມ, ຍສວາ ນາມ ຂຕ຺ຕິໂຍ;

ມາຕາ ຍໂສຘຣາ ນາມ, ອໂນມທສ຺ສິສ຺ສ ສຕ຺ຖຸໂນ.

໑໘. ທສວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ສິຣີ ອຸປສິຣີ ວຑ຺ໂຒ, ຕໂຍ ປາສາທມຸຕ຺ຕມາ.

໑໙. ເຕວີສຕິສຫສ຺ສານິ, ນາຣິໂຍ ສມລງ຺ກຕາ;

ສິຣິມາ ນາມ ສາ ນາຣີ, ອຸປວາໂຓ ນາມ ອຕ຺ຣໂຊ.

໒໐. ນິມິຕ຺ເຕ ຈຕຸໂຣ ທິສ຺ວາ, ສິວິກາຍາຠິນິກ຺ຂມິ;

ອນູນທສມາສານິ, ປຘານໍ ປທຫີ ຊິໂນ.

໒໑. ພ຺ຣຫ຺ມຸນາ ຍາຈິໂຕ ສນ຺ໂຕ, ອໂນມທສ຺ສີ ມຫາມຸນິ;

ວຕ຺ຕິ ຈກ຺ກໍ ມຫາວີໂຣ, ອຸຍ຺ຍາເນ ໂສ ສຸທສ຺ສເນ [ສຸທສ຺ສນຸຍ຺ຍານມຸຕ຺ຕເມ (ສ຺ຍາ. ກໍ.)].

໒໒. ນິສໂຠ ຈ ອໂນໂມ ຈ [ອໂສໂກ ຈ (ສີ.)], ອເຫສຸໍ ອຄ຺ຄສາວກາ;

ວຣຸໂຓ ນາມຸປຏ຺ຐາໂກ, ອໂນມທສ຺ສິສ຺ສ ສຕ຺ຖຸໂນ.

໒໓. ສຸນ຺ທຣີ ຈ ສຸມນາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ອຊ຺ຊຸໂນຕິ ປວຸຈ຺ຈຕິ.

໒໔. ນນ຺ທິວຑ຺ໂຒ ສິຣິວຑ຺ໂຒ, ອເຫສຸໍ ອຄ຺ຄຸປຏ຺ຐກາ;

ອຸປ຺ປລາ ເຈວ ປທຸມາ ຈ, ອເຫສຸໍ ອຄ຺ຄຸປຏ຺ຐິກາ.

໒໕. ອຏ຺ຐປຓ຺ຓາສຣຕນໍ, ອຈ຺ຈຸຄ຺ຄໂຕ ມຫາມຸນິ;

ປຠາ ນິທ຺ຘາວຕີ ຕສ຺ສ, ສຕຣໍສີວ ອຸຄ຺ຄໂຕ.

໒໖. ວສ຺ສສຕສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໗. ສຸປຸປ຺ຜິຕໍ ປາວຈນໍ, ອຣຫນ຺ເຕຫິ ຕາທິຫິ;

ວີຕຣາເຄຫິ ວິມເລຫິ, ໂສຠິຕ຺ຖ ຊິນສາສນໍ.

໒໘. ໂສ ຈ ສຕ຺ຖາ ອມິຕຍໂສ, ຍຸຄານິ ຕານິ ອຕຸລິຍານິ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໒໙. ອໂນມທສ຺ສີ ຊິໂນ ສຕ຺ຖາ, ຘມ຺ມາຣາມມ຺ຫິ ນິພ຺ພຸໂຕ;

ຕຕ຺ເຖວສ຺ສ ຊິນຖູໂປ, ອຸພ຺ເພໂຘ ປຎ຺ຈວີສຕີຕິ.

ອໂນມທສ຺ສິສ຺ສ ຠຄວໂຕ ວໍໂສ ສຕ຺ຕໂມ.