ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ຂຸທ຺ທກນິກາເຍ

ພຸທ຺ຘວໍສປາຬິ

໑. ຣຕນຈງ຺ກມນກຓ຺ຑໍ

໑. ພ຺ຣຫ຺ມາ ຈ ໂລກາຘິປຕີ ສຫມ຺ປຕີ [ສຫມ຺ປຕິ (ສ຺ຍາ. ກໍ.)], ກຕຎ຺ຊລີ ອນຘິວຣໍ ອຍາຈຖ;

‘‘ສນ຺ຕີຘ ສຕ຺ຕາປ຺ປຣຊກ຺ຂຊາຕິກາ, ເທເສຫິ ຘມ຺ມໍ ອນຸກມ຺ປິມໍ ປຊໍ’’.

໒. ສມ຺ປນ຺ນວິຊ຺ຊາຈຣຓສ຺ສ ຕາທິໂນ, ຊຸຕິນ຺ຘຣສ຺ສນ຺ຕິມເທຫຘາຣິໂນ;

ຕຖາຄຕສ຺ສປ຺ປຏິປຸຄ຺ຄລສ຺ສ, ອຸປ຺ປຊ຺ຊິ ກາຣຸຎ຺ຎຕາ ສພ຺ພສຕ຺ເຕ.

໓. ‘‘ນ ເຫເຕ ຊານນ຺ຕິ ສເທວມານຸສາ, ພຸທ຺ໂຘ ອຍໍ ກີທິສໂກ ນຣຸຕ຺ຕໂມ;

ອິທ຺ຘິພລໍ ປຎ຺ຎາພລຎ຺ຈ ກີທິສໍ, ພຸທ຺ຘພລໍ ໂລກຫິຕສ຺ສ ກີທິສໍ.

໔. ‘‘ນ ເຫເຕ ຊານນ຺ຕິ ສເທວມານຸສາ, ພຸທ຺ໂຘ ອຍໍ ເອທິສໂກ ນຣຸຕ຺ຕໂມ;

ອິທ຺ຘິພລໍ ປຎ຺ຎາພລຎ຺ຈ ເອທິສໍ, ພຸທ຺ຘພລໍ ໂລກຫິຕສ຺ສ ເອທິສໍ.

໕. ‘‘ຫນ຺ທາຫໍ ທສ຺ສຍິສ຺ສາມິ, ພຸທ຺ຘພລມນຸຕ຺ຕຣໍ;

ຈງ຺ກມໍ ມາປຍິສ຺ສາມິ, ນເຠ ຣຕນມຓ຺ຑິຕໍ’’.

໖. ຠຸມ຺ມາ ມຫາຣາຊິກາ ຕາວຕິໍສາ, ຍາມາ ຈ ເທວາ ຕຸສິຕາ ຈ ນິມ຺ມິຕາ;

ປຣນິມ຺ມິຕາ ເຍປິ ຈ ພ຺ຣຫ຺ມກາຍິກາ, ອານນ຺ທິຕາ ວິປຸລມກໍສຸ ໂຆສໍ.

໗. ໂອຠາສິຕາ ຈ ປຖວີ ສເທວກາ, ປຸຖູ ຈ ໂລກນ຺ຕຣິກາ ອສໍວຸຕາ;

ຕໂມ ຈ ຕິພ຺ໂພ ວິຫໂຕ ຕທາ ອຫຸ, ທິສ຺ວານ ອຈ຺ເຉຣກໍ ປາຏິຫີຣໍ.

໘. ສເທວຄນ຺ຘພ຺ພມນຸສ຺ສຣກ຺ຂເສ, ອາຠາ ອຸຬາຣາ ວິປຸລາ ອຊາຍຖ;

ອິມສ຺ມິໍ ໂລເກ ປຣສ຺ມິຎ຺ໂຈຠຍສ຺ມິໍ [ປຣສ຺ມິໍ ຈູຠເຍ (ສ຺ຍາ. ກໍ.)], ອໂຘ ຈ ອຸທ຺ຘໍ ຕິຣິຍຎ຺ຈ ວິຕ຺ຖຕໍ.

໙. ສຕ຺ຕຸຕ຺ຕໂມ ອນຘິວໂຣ ວິນາຍໂກ, ສຕ຺ຖາ ອຫູ ເທວມນຸສ຺ສປູຊິໂຕ;

ມຫານຸຠາໂວ ສຕປຸຎ຺ຎລກ຺ຂໂຓ, ທສ຺ເສສິ ອຈ຺ເຉຣກໍ ປາຏິຫີຣໍ.

໑໐. ໂສ ຍາຈິໂຕ ເທວວເຣນ ຈກ຺ຂຸມາ, ອຕ຺ຖໍ ສເມກ຺ຂິຕ຺ວາ ຕທາ ນຣຸຕ຺ຕໂມ;

ຈງ຺ກມໍ [ຈງ຺ກມໍ ຕຕ຺ຖ (ສີ.)] ມາປຍິ ໂລກນາຍໂກ, ສຸນິຏ຺ຐິຕໍ ສພ຺ພຣຕນນິມ຺ມິຕໍ.

໑໑. ອິທ຺ຘີ ຈ ອາເທສນານຸສາສນີ, ຕິປາຏິຫີເຣ ຠຄວາ ວສີ ອຫຸ;

ຈງ຺ກມໍ ມາປຍິ ໂລກນາຍໂກ, ສຸນິຏ຺ຐິຕໍ ສພ຺ພຣຕນນິມ຺ມິຕໍ.

໑໒. ທສສຫສ຺ສີໂລກຘາຕຸຍາ, ສິເນຣຸປພ຺ພຕຸຕ຺ຕເມ;

ຖມ຺ເຠວ ທສ຺ເສສິ ປຏິປາຏິຍາ, ຈງ຺ກເມ ຣຕນາມເຍ.

໑໓. ທສສຫສ຺ສີ ອຕິກ຺ກມ຺ມ, ຈງ຺ກມໍ ມາປຍີ ຊິໂນ;

ສພ຺ພໂສຓ຺ຓມຍາ ປສ຺ເສ, ຈງ຺ກເມ ຣຕນາມເຍ.

໑໔. ຕຸລາສງ຺ຆາຏານຸວຄ຺ຄາ, ໂສວຓ຺ຓຜລກຕ຺ຖຕາ;

ເວທິກາ ສພ຺ພໂສວຓ຺ຓາ, ທຸຠໂຕ ປສ຺ເສສຸ ນິມ຺ມິຕາ.

໑໕. ມຓິມຸຕ຺ຕາວາລຸກາກິຓ຺ຓາ, ນິມ຺ມິໂຕ ຣຕນາມໂຍ;

ໂອຠາເສຕິ ທິສາ ສພ຺ພາ, ສຕຣໍສີວ ອຸຄ຺ຄໂຕ.

໑໖. ຕສ຺ມິໍ ຈງ຺ກມເນ ຘີໂຣ, ທ຺ວຕ຺ຕິໍສວຣລກ຺ຂໂຓ;

ວິໂຣຈມາໂນ ສມ຺ພຸທ຺ໂຘ, ຈງ຺ກເມ ຈງ຺ກມີ ຊິໂນ.

໑໗. ທິພ຺ພໍ ມນ຺ທາຣວໍ ປຸປ຺ຜໍ, ປທຸມໍ ປາຣິຉຕ຺ຕກໍ;

ຈງ຺ກມເນ ໂອກິຣນ຺ຕິ, ສພ຺ເພ ເທວາ ສມາຄຕາ.

໑໘. ປສ຺ສນ຺ຕິ ຕໍ ເທວສງ຺ຆາ, ທສສຫສ຺ສີ ປໂມທິຕາ;

ນມສ຺ສມານາ ນິປຕນ຺ຕິ, ຕຸຏ຺ຐຫຏ຺ຐາ ປໂມທິຕາ.

໑໙. ຕາວຕິໍສາ ຈ ຍາມາ ຈ, ຕຸສິຕາ ຈາປິ ເທວຕາ;

ນິມ຺ມານຣຕິໂນ ເທວາ, ເຍ ເທວາ ວສວຕ຺ຕິໂນ;

ອຸທຄ຺ຄຈິຕ຺ຕາ ສຸມນາ, ປສ຺ສນ຺ຕິ ໂລກນາຍກໍ.

໒໐. ສເທວຄນ຺ຘພ຺ພມນຸສ຺ສຣກ຺ຂສາ, ນາຄາ ສຸປຓ຺ຓາ ອຖ ວາປິ ກິນ຺ນຣາ;

ປສ຺ສນ຺ຕິ ຕໍ ໂລກຫິຕານຸກມ຺ປກໍ, ນເຠວ ອຈ຺ຈຸຄ຺ຄຕຈນ຺ທມຓ຺ຑລໍ.

໒໑. ອາຠສ຺ສຣາ ສຸຠກິຓ຺ຫາ, ເວຫປ຺ຜລາ ອກນິຏ຺ຐາ ຈ ເທວຕາ;

ສຸສຸທ຺ຘສຸກ຺ກວຕ຺ຖວສນາ, ຕິຏ຺ຐນ຺ຕິ ປຎ຺ຊລີກຕາ.

໒໒. ມຸຎ຺ຈນ຺ຕິ ປຸປ຺ຜໍ ປນ ປຎ຺ຈວຓ຺ຓິກໍ, ມນ຺ທາຣວໍ ຈນ຺ທນຈຸຓ຺ຓມິສ຺ສິຕໍ;

ຠເມນ຺ຕິ ເຈລານິ ຈ ອມ຺ພເຣ ຕທາ, ‘‘ອໂຫ ຊິໂນ ໂລກຫິຕານຸກມ຺ປໂກ.

໒໓. ‘‘ຕຸວໍ ສຕ຺ຖາ ຈ ເກຕູ ຈ, ຘໂຊ ຍູໂປ ຈ ປາຓິນໍ;

ປຣາຍໂນ ປຕິຏ຺ຐາ ຈ, ທີໂປ ຈ ທ຺ວິປທຸຕ຺ຕໂມ [ທິປທຸຕ຺ຕໂມ (ສີ. ສ຺ຍາ.)].

໒໔. ‘‘ທສສຫສ຺ສີໂລກຘາຕຸຍາ, ເທວຕາໂຍ ມຫິທ຺ຘິກາ;

ປຣິວາເຣຕ຺ວາ ນມສ຺ສນ຺ຕິ, ຕຸຏ຺ຐຫຏ຺ຐາ ປໂມທິຕາ.

໒໕. ‘‘ເທວຕາ ເທວກຎ຺ຎາ ຈ, ປສນ຺ນາ ຕຸຏ຺ຐມານສາ;

ປຎ຺ຈວຓ຺ຓິກປຸປ຺ເຜຫິ, ປູຊຍນ຺ຕິ ນຣາສຠໍ.

໒໖. ‘‘ປສ຺ສນ຺ຕິ ຕໍ ເທວສງ຺ຆາ, ປສນ຺ນາ ຕຸຏ຺ຐມານສາ;

ປຎ຺ຈວຓ຺ຓິກປຸປ຺ເຜຫິ, ປູຊຍນ຺ຕິ ນຣາສຠໍ.

໒໗. ‘‘ອໂຫ ອຈ຺ຉຣິຍໍ ໂລເກ, ອພ຺ຠຸຕໍ ໂລມຫໍສນໍ;

ນ ເມທິສໍ ຠູຕປຸພ຺ພໍ, ອຈ຺ເຉຣໍ ໂລມຫໍສນໍ’’.

໒໘. ສກສກມ຺ຫິ ຠວເນ, ນິສີທິຕ຺ວານ ເທວຕາ;

ຫສນ຺ຕິ ຕາ ມຫາຫສິຕໍ, ທິສ຺ວານຈ຺ເຉຣກໍ ນເຠ.

໒໙. ອາກາສຏ຺ຐາ ຈ ຠູມຏ຺ຐາ, ຕິຓປນ຺ຖນິວາສິໂນ;

ກຕຎ຺ຊລີ ນມສ຺ສນ຺ຕິ, ຕຸຏ຺ຐຫຏ຺ຐາ ປໂມທິຕາ.

໓໐. ເຍປິ ທີຆາຍຸກາ ນາຄາ, ປຸຎ຺ຎວນ຺ໂຕ ມຫິທ຺ຘິກາ;

ປໂມທິຕາ ນມສ຺ສນ຺ຕິ, ປູຊຍນ຺ຕິ ນຣຸຕ຺ຕມໍ.

໓໑. ສງ຺ຄີຕິໂຍ ປວຕ຺ເຕນ຺ຕິ, ອມ຺ພເຣ ອນິລຎ຺ຊເສ;

ຈມ຺ມນທ຺ຘານິ ວາເທນ຺ຕິ, ທິສ຺ວານຈ຺ເຉຣກໍ ນເຠ.

໓໒. ສງ຺ຂາ ຈ ປຓວາ ເຈວ, ອໂຖປິ ຑິຓ຺ຑິມາ [ເຑຓ຺ຑິມາ (ສີ.)] ພຫູ;

ອນ຺ຕລິກ຺ຂສ຺ມິໍ ວຊ຺ຊນ຺ຕິ, ທິສ຺ວານຈ຺ເຉຣກໍ ນເຠ.

໓໓. ອພ຺ຠຸໂຕ ວຕ ໂນ ອຊ຺ຊ, ອຸປ຺ປຊ຺ຊິ ໂລມຫໍສໂນ;

ຘຸວມຕ຺ຖສິທ຺ຘິໍ ລຠາມ, ຂໂຓ ໂນ ປຏິປາທິໂຕ.

໓໔. ພຸທ຺ໂຘຕິ ເຕສໍ ສຸຕ຺ວານ, ປີຕິ ອຸປ຺ປຊ຺ຊິ ຕາວເທ;

ພຸທ຺ໂຘ ພຸທ຺ໂຘຕິ ກຖຍນ຺ຕາ, ຕິຏ຺ຐນ຺ຕິ ປຎ຺ຊລີກຕາ.

໓໕. ຫິງ຺ກາຣາ ສາຘຸກາຣາ ຈ [ຫິງ຺ກາຣໍ ສາຘຸກາຣຎ຺ຈ (ສີ. ສ຺ຍາ.)], ອຸກ຺ກຸຏ຺ຐິ ສມ຺ປຫໍສນໍ [ສມ຺ປສາທນໍ (ສີ.), ສມ຺ປນາທນໍ (ສ຺ຍາ.)];

ປຊາ ຈ ວິວິຘາ ຄຄເນ, ວຕ຺ເຕນ຺ຕິ ປຎ຺ຊລີກຕາ.

໓໖. ຄາຍນ຺ຕິ ເສເຬນ຺ຕິ ຈ ວາທຍນ຺ຕິ ຈ, ຠຸຊານິ ໂປເຖນ຺ຕິ ຈ ນຈ຺ຈຍນ຺ຕິ ຈ;

ມຸຎ຺ຈນ຺ຕິ ປຸປ຺ຜໍ ປນ ປຎ຺ຈວຓ຺ຓິກໍ, ມນ຺ທາຣວໍ ຈນ຺ທນຈຸຓ຺ຓມິສ຺ສິຕໍ.

໓໗. ‘‘ຍຖາ ຕຸຍ຺ຫໍ ມຫາວີຣ, ປາເທສຸ ຈກ຺ກລກ຺ຂຓໍ;

ຘຊວຊິຣປຏາກາ, ວຑ຺ຒມານງ຺ກຸສາຈິຕໍ.

໓໘. ‘‘ຣູເປ ສີເລ ສມາຘິມ຺ຫິ, ປຎ຺ຎາຍ ຈ ອສາທິໂສ;

ວິມຸຕ຺ຕິຍາ ອສມສໂມ, ຘມ຺ມຈກ຺ກປ຺ປວຕ຺ຕເນ.

໓໙. ‘‘ທສນາຄພລໍ ກາເຍ, ຕຸຍ຺ຫໍ ປາກຕິກໍ ພລໍ;

ອິທ຺ຘິພເລນ ອສໂມ, ຘມ຺ມຈກ຺ກປ຺ປວຕ຺ຕເນ.

໔໐. ‘‘ເອວໍ ສພ຺ພຄຸຓູເປຕໍ, ສພ຺ພງ຺ຄສມຸປາຄຕໍ;

ມຫາມຸນິໍ ກາຣຸຓິກໍ, ໂລກນາຖໍ ນມສ຺ສຖ.

໔໑. ‘‘ອຠິວາທນໍ ໂຖມນຎ຺ຈ, ວນ຺ທນຎ຺ຈ ປສໍສນໍ;

ນມສ຺ສນຎ຺ຈ ປູຊຎ຺ຈ, ສພ຺ພໍ ອຣຫສີ ຕຸວໍ.

໔໒. ‘‘ເຍ ເກຈິ ໂລເກ ວນ຺ທເນຍ຺ຍາ, ວນ຺ທນໍ ອຣຫນ຺ຕິ ເຍ;

ສພ຺ພເສຏ຺ໂຐ ມຫາວີຣ, ສທິໂສ ເຕ ນ ວິຊ຺ຊຕິ.

໔໓. ‘‘ສາຣິປຸຕ຺ໂຕ ມຫາປຎ຺ໂຎ, ສມາຘິຊ຺ຌານໂກວິໂທ;

ຄິຊ຺ຌກູເຏ ຐິໂຕເຍວ, ປສ຺ສຕິ ໂລກນາຍກໍ.

໔໔. ‘‘ສຸຜຸລ຺ລໍ ສາລຣາຊໍວ, ຈນ຺ທໍວ ຄຄເນ ຍຖາ;

ມຊ຺ຌນ຺ຫິເກວ [ມຊ຺ຌນ຺ຕິເກວ (ສພ຺ພຕ຺ຖ)] ສູຣິຍໍ, ໂອໂລເກສິ ນຣາສຠໍ.

໔໕. ‘‘ຊລນ຺ຕໍ ທີປຣຸກ຺ຂໍວ, ຕຣຸຓສູຣິຍໍວ ອຸຄ຺ຄຕໍ;

ພ຺ຍາມປ຺ປຠານຸຣຎ຺ຊິຕໍ, ຘີຣໍ ປສ຺ສຕິ ໂລກນາຍກໍ.

໔໖. ‘‘ປຎ຺ຈນ຺ນໍ ຠິກ຺ຂຸສຕານໍ, ກຕກິຈ຺ຈານ ຕາທິນໍ;

ຂີຓາສວານໍ ວິມລານໍ, ຂເຓນ ສນ຺ນິປາຕຍິ.

໔໗. ‘‘ໂລກປ຺ປສາທນໍ ນາມ, ປາຏິຫີຣໍ ນິທສ຺ສຍິ;

ອມ຺ເຫປິ ຕຕ຺ຖ ຄນ຺ຕ຺ວານ, ວນ຺ທິສ຺ສາມ ມຍໍ ຊິນໍ.

໔໘. ‘‘ເອຖ ສພ຺ເພ ຄມິສ຺ສາມ, ປຸຈ຺ຉິສ຺ສາມ ມຍໍ ຊິນໍ;

ກງ຺ຂໍ ວິໂນທຍິສ຺ສາມ, ປສ຺ສິຕ຺ວາ ໂລກນາຍກໍ’’.

໔໙. ສາຘູຕິ ເຕ ປຏິສ຺ສຸຕ຺ວາ, ນິປກາ ສໍວຸຕິນ຺ທ຺ຣິຍາ;

ປຕ຺ຕຈີວຣມາທາຍ, ຕຣມານາ ອຸປາຄມຸໍ.

໕໐. ຂີຓາສເວຫິ ວິມເລຫິ, ທນ຺ເຕຫິ ອຸຕ຺ຕເມ ທເມ;

ສາຣິປຸຕ຺ໂຕ ມຫາປຎ຺ໂຎ, ອິທ຺ຘິຍາ ອຸປສງ຺ກມິ.

໕໑. ເຕຫິ ຠິກ຺ຂູຫິ ປຣິວຸໂຕ, ສາຣິປຸຕ຺ໂຕ ມຫາຄຓີ;

ລຬນ຺ໂຕ ເທໂວວ ຄຄເນ, ອິທ຺ຘິຍາ ອຸປສງ຺ກມິ.

໕໒. ອຸກ຺ກາສິຕຎ຺ຈ ຂິປິຕໍ [ອຸກ຺ກາສິຕຎ຺ຈ ຂິປິຕຎ຺ຈ (ສ຺ຍາ. ອຏ຺ຐ.)], ອຊ຺ຌຸເປກ຺ຂິຍ ສຸພ຺ພຕາ;

ສຄາຣວາ ສປ຺ປຕິສ຺ສາ, ສມ຺ພຸທ຺ຘໍ ອຸປສງ຺ກມຸໍ.

໕໓. ອຸປສງ຺ກມິຕ຺ວາ ປສ຺ສນ຺ຕິ, ສຍມ຺ຠຸໍ ໂລກນາຍກໍ;

ນເຠ ອຈ຺ຈຸຄ຺ຄຕໍ ຘີຣໍ, ຈນ຺ທໍວ ຄຄເນ ຍຖາ.

໕໔. ຊລນ຺ຕໍ ທີປຣຸກ຺ຂໍວ, ວິຊ຺ຊຸໍວ ຄຄເນ ຍຖາ;

ມຊ຺ຌນ຺ຫິເກວ ສູຣິຍໍ, ປສ຺ສນ຺ຕິ ໂລກນາຍກໍ.

໕໕. ປຎ຺ຈຠິກ຺ຂຸສຕາ ສພ຺ເພ, ປສ຺ສນ຺ຕິ ໂລກນາຍກໍ;

ຣຫທມິວ ວິປ຺ປສນ຺ນໍ, ສຸຜຸລ຺ລໍ ປທຸມໍ ຍຖາ.

໕໖. ອຎ຺ຊລິໍ ປຄ຺ຄເຫຕ຺ວານ, ຕຸຏ຺ຐຫຏ຺ຐາ ປໂມທິຕາ;

ນມສ຺ສມານາ ນິປຕນ຺ຕິ, ສຕ຺ຖຸໂນ ຈກ຺ກລກ຺ຂເຓ.

໕໗. ສາຣິປຸຕ຺ໂຕ ມຫາປຎ຺ໂຎ, ໂກຣຓ຺ຑສມສາທິໂສ;

ສມາຘິຊ຺ຌານກຸສໂລ, ວນ຺ທເຕ ໂລກນາຍກໍ.

໕໘. ຄຊ຺ຊິຕາ ກາລເມໂຆວ, ນີລຸປ຺ປລສມສາທິໂສ;

ອິທ຺ຘິພເລນ ອສໂມ, ໂມຄ຺ຄລ຺ລາໂນ ມຫິທ຺ຘິໂກ.

໕໙. ມຫາກສ຺ສໂປປິ ຈ ເຖໂຣ, ອຸຕ຺ຕຕ຺ຕກນກສນ຺ນິໂຠ;

ຘຸຕຄຸເຓ ອຄ຺ຄນິກ຺ຂິຕ຺ໂຕ, ໂຖມິໂຕ ສຕ຺ຖຸວຓ຺ຓິໂຕ.

໖໐. ທິພ຺ພຈກ຺ຂູນໍ ໂຍ ອຄ຺ໂຄ, ອນຸຣຸທ຺ໂຘ ມຫາຄຓີ;

ຎາຕິເສຏ຺ໂຐ ຠຄວໂຕ, ອວິທູເຣວ ຕິຏ຺ຐຕິ.

໖໑. ອາປຕ຺ຕິອນາປຕ຺ຕິຍາ, ສເຕກິຈ຺ຉາຍ ໂກວິໂທ;

ວິນເຍ ອຄ຺ຄນິກ຺ຂິຕ຺ໂຕ, ອຸປາລິ ສຕ຺ຖຸວຓ຺ຓິໂຕ.

໖໒. ສຸຂຸມນິປຸຓຕ຺ຖປຏິວິທ຺ໂຘ, ກຖິການໍ ປວໂຣ ຄຓີ;

ອິສິ ມນ຺ຕານິຍາ ປຸຕ຺ໂຕ, ປຸຓ຺ໂຓ ນາມາຕິ ວິສ຺ສຸໂຕ.

໖໓. ເອເຕສໍ ຈິຕ຺ຕມຎ຺ຎາຍ, ໂອປມ຺ມກຸສໂລ ມຸນິ;

ກງ຺ຂຈ຺ເຉໂທ ມຫາວີໂຣ, ກເຖສິ ອຕ຺ຕໂນ ຄຸຓໍ.

໖໔. ‘‘ຈຕ຺ຕາໂຣ ເຕ ອສງ຺ເຂຍ຺ຍາ, ໂກຏິ ເຍສໍ ນ ນາຍຕິ;

ສຕ຺ຕກາໂຍ ຈ ອາກາໂສ, ຈກ຺ກວາຬາ ຈນນ຺ຕກາ;

ພຸທ຺ຘຎາຓໍ ອປ຺ປເມຍ຺ຍໍ, ນ ສກ຺ກາ ເອເຕ ວິຊານິຕຸໍ.

໖໕. ‘‘ກິເມຕໍ ອຈ຺ຉຣິຍໍ ໂລເກ, ຍໍ ເມ ອິທ຺ຘິວິກຸພ຺ພນໍ;

ອຎ຺ເຎ ພຫູ ອຈ຺ຉຣິຍາ, ອພ຺ຠຸຕາ ໂລມຫໍສນາ.

໖໖. ‘‘ຍທາຫໍ ຕຸສິເຕ ກາເຍ, ສນ຺ຕຸສິໂຕ ນາມຫໍ ຕທາ;

ທສສຫສ຺ສີ ສມາຄມ຺ມ, ຍາຈນ຺ຕິ ປຎ຺ຊລີ ມມໍ.

໖໗. ‘‘‘ກາໂລ ໂຂ ເຕ [ກາໂລ ເທວ (ສີ.), ກາໂລຍໍ ເຕ (ສ຺ຍາ. ກ.)] ມຫາວີຣ, ອຸປ຺ປຊ຺ຊ ມາຕຸກຸຈ຺ຉິຍໍ;

ສເທວກໍ ຕາຣຍນ຺ໂຕ, ພຸຊ຺ຌສ຺ສຸ ອມຕໍ ປທໍ’.

໖໘. ‘‘ຕຸສິຕາ ກາຍາ ຈວິຕ຺ວານ, ຍທາ ໂອກ຺ກມິ ກຸຈ຺ຉິຍໍ;

ທສສຫສ຺ສີໂລກຘາຕຸ, ກມ຺ປິຕ຺ຖ ຘຣຓີ ຕທາ.

໖໙. ‘‘ຍທາຫໍ ມາຕຸກຸຈ຺ຉິໂຕ, ສມ຺ປຊາໂນວ ນິກ຺ຂມິໍ;

ສາຘຸກາຣໍ ປວຕ຺ເຕນ຺ຕິ, ທສສຫສ຺ສີ ປກມ຺ປຖ.

໗໐. ‘‘ໂອກ຺ກນ຺ຕິໍ ເມ ສໂມ ນຕ຺ຖິ, ຊາຕິໂຕ ອຠິນິກ຺ຂເມ;

ສມ຺ໂພຘິຍໍ ອຫໍ ເສຏ຺ໂຐ, ຘມ຺ມຈກ຺ກປ຺ປວຕ຺ຕເນ.

໗໑. ‘‘ອໂຫ ອຈ຺ຉຣິຍໍ ໂລເກ, ພຸທ຺ຘານໍ ຄຸຓມຫນ຺ຕຕາ;

ທສສຫສ຺ສີໂລກຘາຕຸ, ຉປ຺ປກາຣໍ ປກມ຺ປຖ;

ໂອຠາໂສ ຈ ມຫາ ອາສິ, ອຈ຺ເຉຣໍ ໂລມຫໍສນໍ’’.

໗໒. ຠຄວາ ຕມ຺ຫິ [ຠຄວາ ຈ ຕມ຺ຫິ (ສີ. ສ຺ຍາ. ກ.)] ສມເຍ, ໂລກເຊຏ຺ໂຐ ນຣາສໂຠ;