໑໐. ປທຸມພຸທ຺ຘວໍໂສ

໑. ອໂນມທສ຺ສິສ຺ສ ອປເຣນ, ສມ຺ພຸທ຺ໂຘ ທ຺ວິປທຸຕ຺ຕໂມ;

ປທຸໂມ ນາມ ນາເມນ, ອສໂມ ອປ຺ປຏິປຸຄ຺ຄໂລ.

໒. ຕສ຺ສາປິ ອສມໍ ສີລໍ, ສມາຘິປິ ອນນ຺ຕໂກ;

ອສງ຺ເຂຍ຺ຍໍ ຎາຓວຣໍ, ວິມຸຕ຺ຕິປິ ອນູປມາ.

໓. ຕສ຺ສາປິ ອຕຸລເຕຊສ຺ສ, ຘມ຺ມຈກ຺ກປ຺ປວຕ຺ຕເນ;

ອຠິສມຍາ ຕໂຍ ອາສຸໍ, ມຫາຕມປວາຫນາ.

໔. ປຐມາຠິສມເຍ ພຸທ຺ໂຘ, ໂກຏິສຕມໂພຘຍິ;

ທຸຕິຍາຠິສມເຍ ຘີໂຣ, ນວຸຕິໂກຏິມໂພຘຍິ.

໕. ຍທາ ຈ ປທຸໂມ ພຸທ຺ໂຘ, ໂອວທີ ສກມຕ຺ຣຊໍ;

ຕທາ ອສີຕິໂກຏີນໍ, ຕຕິຍາຠິສມໂຍ ອຫຸ.

໖. ສນ຺ນິປາຕາ ຕໂຍ ອາສຸໍ, ປທຸມສ຺ສ ມເຫສິໂນ;

ໂກຏິສຕສຫສ຺ສານໍ, ປຐໂມ ອາສິ ສມາຄໂມ.

໗. ກຖິນຕ຺ຖາຣສມເຍ, ອຸປ຺ປນ຺ເນ ກຖິນຈີວເຣ;

ຘມ຺ມເສນາປຕິຕ຺ຖາຍ, ຠິກ຺ຂູ ສິພ຺ພິໍສຸ [ຍາຈິໍສຸ (ກ.)] ຈີວຣໍ.

໘. ຕທາ ເຕ ວິມລາ ຠິກ຺ຂູ, ຉຬຠິຎ຺ຎາ ມຫິທ຺ຘິກາ;

ຕີຓິ ສຕສຫສ຺ສານິ, ສມິໍສຸ ອປຣາຊິຕາ.

໙. ປຸນາປຣໍ ໂສ ນຣາສໂຠ [ນຣວຸສໂຠ (ສ຺ຍາ. ກໍ.)], ປວເນ ວາສໍ ອຸປາຄມິ;

ຕທາ ສມາຄໂມ ອາສິ, ທ຺ວິນ຺ນໍ ສຕສຫສ຺ສິນໍ.

໑໐. ອຫໍ ເຕນ ສມເຍນ, ສີໂຫ ອາສິໍ ມິຄາຘິຠູ;

ວິເວກມນຸພ຺ຣູຫນ຺ຕໍ, ປວເນ ອທ຺ທສໍ ຊິນໍ.

໑໑. ວນ຺ທິຕ຺ວາ ສິຣສາ ປາເທ, ກຕ຺ວານ ຕໍ ປທກ຺ຂິຓໍ;

ຕິກ຺ຂຕ຺ຕຸໍ ອຠິນາທິຕ຺ວາ, ສຕ຺ຕາຫໍ ຊິນມຸປຏ຺ຐຫໍ.

໑໒. ສຕ຺ຕາຫໍ ວຣສມາປຕ຺ຕິຍາ, ວຸຏ຺ຐຫິຕ຺ວາ ຕຖາຄໂຕ;

ມນສາ ຈິນ຺ຕຍິຕ຺ວານ, ໂກຏິຠິກ຺ຂູ ສມານຍິ.

໑໓. ຕທາປິ ໂສ ມຫາວີໂຣ, ເຕສໍ ມຊ຺ເຌ ວິຍາກຣິ;

‘‘ອປຣິເມຍ຺ຍິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໔. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໕. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໖. ຈມ຺ປກໍ ນາມ ນຄຣໍ, ອສໂມ ນາມ ຂຕ຺ຕິໂຍ;

ອສມາ ນາມ ຊນິກາ, ປທຸມສ຺ສ ມເຫສິໂນ.

໑໗. ທສວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ນນ຺ທາວສຸຍສຸຕ຺ຕຣາ, ຕໂຍ ປາສາທມຸຕ຺ຕມາ.

໑໘. ເຕຕ຺ຕິໍສ ຈ ສຫສ຺ສານິ, ນາຣິໂຍ ສມລງ຺ກຕາ;

ອຸຕ຺ຕຣາ ນາມ ສາ ນາຣີ, ຣມ຺ໂມ ນາມາສິ ອຕ຺ຣໂຊ.

໑໙. ນິມິຕ຺ເຕ ຈຕຸໂຣ ທິສ຺ວາ, ຣຖຍາເນນ ນິກ຺ຂມິ;

ອນູນອຏ຺ຐມາສານິ, ປຘານໍ ປທຫີ ຊິໂນ.

໒໐. ພ຺ຣຫ຺ມຸນາ ຍາຈິໂຕ ສນ຺ໂຕ, ປທຸໂມ ໂລກນາຍໂກ;

ວຕ຺ຕິ ຈກ຺ກໍ ມຫາວີໂຣ, ຘນຎ຺ຈຸຍ຺ຍານມຸຕ຺ຕເມ.

໒໑. ສາໂລ ຈ ອຸປສາໂລ ຈ, ອເຫສຸໍ ອຄ຺ຄສາວກາ;

ວຣຸໂຓ ນາມຸປຏ຺ຐາໂກ, ປທຸມສ຺ສ ມເຫສິໂນ.

໒໒. ຣາຘາ ເຈວ ສຸຣາຘາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ມຫາໂສໂຓຕິ ວຸຈ຺ຈຕິ.

໒໓. ຠິຍ຺ໂຍ ເຈວ ອສໂມ ຈ, ອເຫສຸໍ ອຄ຺ຄຸປຏ຺ຐກາ;

ຣຸຈີ ຈ ນນ຺ທຣາມາ ຈ, ອເຫສຸໍ ອຄ຺ຄຸປຏ຺ຐິກາ.

໒໔. ອຏ຺ຐປຓ຺ຓາສຣຕນໍ, ອຈ຺ຈຸຄ຺ຄໂຕ ມຫາມຸນິ;

ປຠາ ນິທ຺ຘາວຕີ ຕສ຺ສ, ອສມາ ສພ຺ພໂສ ທິສາ.

໒໕. ຈນ຺ທປ຺ປຠາ ສູຣິຍປ຺ປຠາ, ຣຕນຄ຺ຄິມຓິປ຺ປຠາ;

ສພ຺ພາປິ ຕາ ຫຕາ ໂຫນ຺ຕິ, ປຕ຺ວາ ຊິນປຠຸຕ຺ຕມໍ.

໒໖. ວສ຺ສສຕສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໗. ປຣິປກ຺ກມານເສ ສຕ຺ເຕ, ໂພຘຍິຕ຺ວາ ອເສສໂຕ;

ເສສເກ ອນຸສາສິຕ຺ວາ, ນິພ຺ພຸໂຕ ໂສ ສສາວໂກ.

໒໘. ອຸຣໂຄວ ຕຈໍ ຊິຓ຺ຓໍ, ວທ຺ຘປຕ຺ຕໍວ ປາທໂປ;

ຊຫິຕ຺ວາ ສພ຺ພສງ຺ຂາເຣ, ນິພ຺ພຸໂຕ ໂສ ຍຖາ ສິຂີ.

໒໙. ປທຸໂມ ຊິນວໂຣ ສຕ຺ຖາ, ຘມ຺ມາຣາມມ຺ຫິ ນິພ຺ພຸໂຕ;

ຘາຕຸວິຕ຺ຖາຣິກໍ ອາສິ, ເຕສຸ ເຕສຸ ປເທສໂຕຕິ.

ປທຸມສ຺ສ ຠຄວໂຕ ວໍໂສ ອຏ຺ຐໂມ.