໑໑. ນາຣທພຸທ຺ຘວໍໂສ

໑. ປທຸມສ຺ສ ອປເຣນ, ສມ຺ພຸທ຺ໂຘ ທ຺ວິປທຸຕ຺ຕໂມ;

ນາຣໂທ ນາມ ນາເມນ, ອສໂມ ອປ຺ປຏິປຸຄ຺ຄໂລ.

໒. ໂສ ພຸທ຺ໂຘ ຈກ຺ກວຕ຺ຕິສ຺ສ, ເຊຏ຺ໂຐ ທຍິຕໂອຣໂສ;

ອາມຸກ຺ກມາລາຠຣໂຓ, ອຸຍ຺ຍານໍ ອຸປສງ຺ກມິ.

໓. ຕຕ຺ຖາສິ ຣຸກ຺ໂຂ ຍສວິປຸໂລ, ອຠິຣູໂປ ພ຺ຣຫາ ສຸຈິ;

ຕມຊ຺ຌປຕ຺ວາ ອຸປນິສີທິ, ມຫາໂສຓສ຺ສ ເຫຏ຺ຐໂຕ.

໔. ຕຕ຺ຖ ຎາຓວຣຸປ຺ປຊ຺ຊິ, ອນນ຺ຕໍ ວຊິຣູປມໍ;

ເຕນ ວິຈິນິ ສງ຺ຂາເຣ, ອຸກ຺ກຸຊ຺ຊມວກຸຊ຺ຊກໍ [ກຸຊ຺ຊຕໍ (ສ຺ຍາ. ກໍ.)].

໕. ຕຕ຺ຖ ສພ຺ພກິເລສານິ, ອເສສມຠິວາຫຍິ;

ປາປຸຓີ ເກວລໍ ໂພຘິໍ, ພຸທ຺ຘຎາເຓ ຈ ຈຸທ຺ທສ.

໖. ປາປຸຓິຕ຺ວານ ສມ຺ໂພຘິໍ, ຘມ຺ມຈກ຺ກໍ ປວຕ຺ຕຍິ;

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໗. ມຫາໂທຓໍ ນາຄຣາຊໍ, ວິນຍນ຺ໂຕ ມຫາມຸນິ;

ປາຏິເຫຣໍ ຕທາກາສິ, ທສ຺ສຍນ຺ໂຕ ສເທວເກ.

໘. ຕທາ ເທວມນຸສ຺ສານໍ, ຕມ຺ຫິ ຘມ຺ມປ຺ປກາສເນ;

ນວຸຕິໂກຏິສຫສ຺ສານິ, ຕຣິໍສຸ ສພ຺ພສໍສຍໍ.

໙. ຍມ຺ຫິ ກາເລ ມຫາວີໂຣ, ໂອວທີ ສກມຕ຺ຣຊໍ;

ອສີຕິໂກຏິສຫສ຺ສານໍ, ຕຕິຍາຠິສມໂຍ ອຫຸ.

໑໐. ສນ຺ນິປາຕາ ຕໂຍ ອາສຸໍ, ນາຣທສ຺ສ ມເຫສິໂນ;

ໂກຏິສຕສຫສ຺ສານໍ, ປຐໂມ ອາສິ ສມາຄໂມ.

໑໑. ຍທາ ພຸທ຺ໂຘ ພຸທ຺ຘຄຸຓໍ, ສນິທານໍ ປກາສຍິ;

ນວຸຕິໂກຏິສຫສ຺ສານິ, ສມິໍສຸ ວິມລາ ຕທາ.

໑໒. ຍທາ ເວໂຣຈໂນ ນາໂຄ, ທານໍ ທທາຕິ ສຕ຺ຖຸໂນ;

ຕທາ ສມິໍສຸ ຊິນປຸຕ຺ຕາ, ອສີຕິສຕສຫສ຺ສິໂຍ.

໑໓. ອຫໍ ເຕນ ສມເຍນ, ຊຏິໂລ ອຸຄ຺ຄຕາປໂນ;

ອນ຺ຕລິກ຺ຂຈໂຣ ອາສິໍ, ປຎ຺ຈາຠິຎ຺ຎາສຸ ປາຣຄູ.

໑໔. ຕທາປາຫໍ ອສມສມໍ, ສສງ຺ຆໍ ສປຣິຊ຺ຊນໍ;

ອນ຺ນປາເນນ ຕປ຺ເປຕ຺ວາ, ຈນ຺ທເນນາຠິປູຊຍິໍ.

໑໕. ໂສປິ ມໍ ຕທາ ພ຺ຍາກາສິ, ນາຣໂທ ໂລກນາຍໂກ;

‘‘ອປຣິເມຍ຺ຍິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໖. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໗. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຫາເສຕ຺ວ ມານສໍ;

ອຘິຏ຺ຐຫິໍ ວຕໍ ອຸຄ຺ຄໍ, ທສປາຣມິປູຣິຍາ.

໑໘. ນຄຣໍ ຘຎ຺ຎວຕີ ນາມ, ສຸເທໂວ ນາມ ຂຕ຺ຕິໂຍ;

ອໂນມາ ນາມ ຊນິກາ, ນາຣທສ຺ສ ມເຫສິໂນ.

໑໙. ນວວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ຊິໂຕ ວິຊິຕາຠິຣາໂມ, ຕໂຍ ປາສາທມຸຕ຺ຕມາ.

໒໐. ຕິຈຕ຺ຕາຣີສສຫສ຺ສານິ, ນາຣິໂຍ ສມລງ຺ກຕາ;

ວິຊິຕເສນາ ນາມ ນາຣີ, ນນ຺ທຸຕ຺ຕໂຣ ນາມ ອຕ຺ຣໂຊ.

໒໑. ນິມິຕ຺ເຕ ຈຕຸໂຣ ທິສ຺ວາ, ປທສາ ຄມເນນ ນິກ຺ຂມິ;

ສຕ຺ຕາຫໍ ປຘານຈາຣໍ, ອຈຣີ ປຸຣິສຸຕ຺ຕໂມ [ໂລກນາຍໂກ (ສີ. ກ.)].

໒໒. ພ຺ຣຫ຺ມຸນາ ຍາຈິໂຕ ສນ຺ໂຕ, ນາຣໂທ ໂລກນາຍໂກ;

ວຕ຺ຕິ ຈກ຺ກໍ ມຫາວີໂຣ, ຘນຎ຺ຈຸຍ຺ຍານມຸຕ຺ຕເມ.

໒໓. ຠທ຺ທສາໂລ ຊິຕມິຕ຺ໂຕ, ອເຫສຸໍ ອຄ຺ຄສາວກາ;

ວາເສຏ຺ໂຐ ນາມຸປຏ຺ຐາໂກ, ນາຣທສ຺ສ ມເຫສິໂນ.

໒໔. ອຸຕ຺ຕຣາ ຜຄ຺ຄຸນີ ເຈວ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ມຫາໂສໂຓຕິ ວຸຈ຺ຈຕິ.

໒໕. ອຸຄ຺ຄຣິນ຺ໂທ ວສໂຠ ຈ, ອເຫສຸໍ ອຄ຺ຄຸປຏ຺ຐກາ;

ອິນ຺ທາວຣີ ຈ ວຓ຺ຑີ [ອຸນ຺ທີ (ສີ.), ຄຓ຺ຑີ (ສ຺ຍາ. ກໍ.)] ຈ, ອເຫສຸໍ ອຄ຺ຄຸປຏ຺ຐິກາ.

໒໖. ອຏ຺ຐາສີຕິຣຕນານິ, ອຈ຺ຈຸຄ຺ຄໂຕ ມຫາມຸນິ;

ກຎ຺ຈນຄ຺ຆິຍສງ຺ກາໂສ, ທສສຫສ຺ສີ ວິໂຣຈຕິ.

໒໗. ຕສ຺ສ ພ຺ຍາມປ຺ປຠາ ກາຍາ, ນິທ຺ຘາວຕິ ທິໂສທິສໍ;

ນິຣນ຺ຕຣໍ ທິວາຣຕ຺ຕິໍ, ໂຍຊນໍ ຜຣເຕ ສທາ.

໒໘. ນ ເກຈິ ເຕນ ສມເຍນ, ສມນ຺ຕາ ໂຍຊເນ ຊນາ;

ອຸກ຺ກາປທີເປ ອຸຊ຺ຊາເລນ຺ຕິ, ພຸທ຺ຘຣໍສີຫິ ໂອຕ຺ຖຏາ.

໒໙. ນວຸຕິວສ຺ສສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໓໐. ຍຖາ ອຸຬູຫິ ຄຄນໍ, ວິຈິຕ຺ຕໍ ອຸປໂສຠຕິ;

ຕເຖວ ສາສນໍ ຕສ຺ສ, ອຣຫນ຺ເຕຫິ ໂສຠຕິ.

໓໑. ສໍສາຣໂສຕໍ ຕຣຓາຍ, ເສສເກ ປຏິປນ຺ນເກ;

ຘມ຺ມເສຕຸໍ ທຬ຺ຫໍ ກຕ຺ວາ, ນິພ຺ພຸໂຕ ໂສ ນຣາສໂຠ.

໓໒. ໂສປິ ພຸທ຺ໂຘ ອສມສໂມ, ເຕປິ ຂີຓາສວາ ອຕຸລເຕຊາ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໓໓. ນາຣໂທ ຊິນວສໂຠ, ນິພ຺ພຸໂຕ ສຸທສ຺ສເນ ປຸເຣ;

ຕຕ຺ເຖວສ຺ສ ຖູປວໂຣ, ຈຕຸໂຍຊນມຸຄ຺ຄໂຕຕິ.

ນາຣທສ຺ສ ຠຄວໂຕ ວໍໂສ ນວໂມ.