໘. ໂສຠິຕພຸທ຺ຘວໍໂສ

໑. ເຣວຕສ຺ສ ອປເຣນ, ໂສຠິໂຕ ນາມ ນາຍໂກ;

ສມາຫິໂຕ ສນ຺ຕຈິຕ຺ໂຕ, ອສໂມ ອປ຺ປຏິປຸຄ຺ຄໂລ.

໒. ໂສ ຊິໂນ ສກເຄຫມ຺ຫິ, ມານສໍ ວິນິວຕ຺ຕຍິ;

ປຕ຺ວານ ເກວລໍ ໂພຘິໍ, ຘມ຺ມຈກ຺ກໍ ປວຕ຺ຕຍິ.

໓. ຍາວ ເຫຏ຺ຐາ ອວີຈິໂຕ, ຠວຄ຺ຄາ ຈາປິ ອຸທ຺ຘໂຕ;

ເອຕ຺ຖນ຺ຕເຣ ເອກປຣິສາ, ອໂຫສິ ຘມ຺ມເທສເນ.

໔. ຕາຍ ປຣິສາຍ ສມ຺ພຸທ຺ໂຘ, ຘມ຺ມຈກ຺ກໍ ປວຕ຺ຕຍິ;

ຄຓນາຍ ນ ວຕ຺ຕພ຺ໂພ, ປຐມາຠິສມໂຍ ອຫຸ.

໕. ຕໂຕ ປຣມ຺ປິ ເທເສນ຺ເຕ, ມຣູນຎ຺ຈ ສມາຄເມ;

ນວຸຕິໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໖. ປຸນາປຣໍ ຣາຊປຸຕ຺ໂຕ, ຊຍເສໂນ ນາມ ຂຕ຺ຕິໂຍ;

ອາຣາມໍ ໂຣປຍິຕ຺ວານ, ພຸທ຺ເຘ ນິຍ຺ຍາທຍີ ຕທາ.

໗. ຕສ຺ສ ຍາຄໍ ປກິຕ຺ເຕນ຺ໂຕ, ຘມ຺ມໍ ເທເສສິ ຈກ຺ຂຸມາ;

ຕທາ ໂກຏິສຫສ຺ສານໍ, ຕຕິຍາຠິສມໂຍ ອຫຸ.

໘. ສນ຺ນິປາຕາ ຕໂຍ ອາສຸໍ, ໂສຠິຕສ຺ສ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໙. ອຸຄ຺ຄໂຕ ນາມ ໂສ ຣາຊາ, ທານໍ ເທຕິ ນຣຸຕ຺ຕເມ;

ຕມ຺ຫິ ທາເນ ສມາຄຎ຺ຉຸໍ, ອຣຫນ຺ຕາ [ອຣຫຕໍ (ກ.)] ສຕໂກຏິໂຍ.

໑໐. ປຸນາປຣໍ ປຸຣຄໂຓ [ປຸຄຄໂຓ (ກ.)], ເທຕິ ທານໍ ນຣຸຕ຺ຕເມ;

ຕທາ ນວຸຕິໂກຏີນໍ, ທຸຕິໂຍ ອາສິ ສມາຄໂມ.

໑໑. ເທວໂລເກ ວສິຕ຺ວານ, ຍທາ ໂອໂຣຫຕີ ຊິໂນ;

ຕທາ ອສີຕິໂກຏີນໍ, ຕຕິໂຍ ອາສິ ສມາຄໂມ.

໑໒. ອຫໍ ເຕນ ສມເຍນ, ສຸຊາໂຕ ນາມ ພ຺ຣາຫ຺ມໂຓ;

ຕທາ ສສາວກໍ ພຸທ຺ຘໍ, ອນ຺ນປາເນນ ຕປ຺ປຍິໍ.

໑໓. ໂສປິ ມໍ ພຸທ຺ໂຘ ພ຺ຍາກາສິ, ໂສຠິໂຕ ໂລກນາຍໂກ;

‘‘ອປຣິເມຍ຺ຍິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໔. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໕. ຕສ຺ສາປິ ວຈນໍ ສຸຕ຺ວາ, ຫຏ຺ໂຐ ສໍວິຄ຺ຄມານໂສ;

ຕເມວຕ຺ຖມນຸປ຺ປຕ຺ຕິຍາ, ອຸຄ຺ຄໍ ຘິຕິມກາສຫໍ.

໑໖. ສຸຘມ຺ມໍ ນາມ ນຄຣໍ, ສຸຘມ຺ໂມ ນາມ ຂຕ຺ຕິໂຍ;

ສຸຘມ຺ມາ ນາມ ຊນິກາ, ໂສຠິຕສ຺ສ ມເຫສິໂນ.

໑໗. ນວວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ກຸມຸໂທ ນາຬິໂນ ປທຸໂມ, ຕໂຍ ປາສາທມຸຕ຺ຕມາ.

໑໘. ສຕ຺ຕຕິໍສສຫສ຺ສານິ, ນາຣິໂຍ ສມລງ຺ກຕາ;

ມຓິລາ [ມຂິລາ (ອຏ຺ຐ.), ສມງ຺ຄີ (ສີ.), ມກິລາ (ສ຺ຍາ. ກໍ.)] ນາມ ສາ ນາຣີ, ສີໂຫ ນາມາສິ ອຕ຺ຣໂຊ.

໑໙. ນິມິຕ຺ເຕ ຈຕຸໂຣ ທິສ຺ວາ, ປາສາເທນາຠິນິກ຺ຂມິ;

ສຕ຺ຕາຫໍ ປຘານຈາຣໍ, ຈຣິຕ຺ວາ ປຸຣິສຸຕ຺ຕໂມ.

໒໐. ພ຺ຣຫ຺ມຸນາ ຍາຈິໂຕ ສນ຺ໂຕ, ໂສຠິໂຕ ໂລກນາຍໂກ;

ວຕ຺ຕິ ຈກ຺ກໍ ມຫາວີໂຣ, ສຸຘມ຺ມຸຍ຺ຍານມຸຕ຺ຕເມ.

໒໑. ອສໂມ ຈ ສຸເນຕ຺ໂຕ ຈ, ອເຫສຸໍ ອຄ຺ຄສາວກາ;

ອໂນໂມ ນາມຸປຏ຺ຐາໂກ, ໂສຠິຕສ຺ສ ມເຫສິໂນ.

໒໒. ນກຸລາ ຈ ສຸຊາຕາ ຈ, ອເຫສຸໍ ອຄ຺ຄສາວິກາ;

ພຸຊ຺ຌມາໂນ ຈ ໂສ ພຸທ຺ໂຘ, ນາຄມູເລ ອພຸຊ຺ຌຖ.

໒໓. ຣມ຺ໂມ ເຈວ ສຸທຕ຺ໂຕ ຈ, ອເຫສຸໍ ອຄ຺ຄຸປຏ຺ຐກາ;

ນກຸລາ ເຈວ ຈິຕ຺ຕາ ຈ, ອເຫສຸໍ ອຄ຺ຄຸປຏ຺ຐິກາ.

໒໔. ອຏ຺ຐປຓ຺ຓາສຣຕນໍ, ອຈ຺ຈຸຄ຺ຄໂຕ ມຫາມຸນິ;

ໂອຠາເສຕິ ທິສາ ສພ຺ພາ, ສຕຣໍສີວ ອຸຄ຺ຄໂຕ.

໒໕. ຍຖາ ສຸຜຸລ຺ລໍ ປວນໍ, ນານາຄນ຺ເຘຫິ ຘູປິຕໍ;

ຕເຖວ ຕສ຺ສ ປາວຈນໍ, ສີລຄນ຺ເຘຫິ ຘູປິຕໍ.

໒໖. ຍຖາປິ ສາຄໂຣ ນາມ, ທສ຺ສເນນ ອຕປ຺ປິໂຍ;

ຕເຖວ ຕສ຺ສ ປາວຈນໍ, ສວເຓນ ອຕປ຺ປິຍໍ.

໒໗. ນວຸຕິວສ຺ສສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໘. ໂອວາທໍ ອນຸສິຏ຺ຐິຎ຺ຈ, ທຕ຺ວານ ເສສເກ ຊເນ;

ຫຸຕາສໂນວ ຕາເປຕ຺ວາ, ນິພ຺ພຸໂຕ ໂສ ສສາວໂກ.

໒໙. ໂສ ຈ ພຸທ຺ໂຘ ອສມສໂມ, ເຕປິ ສາວກາ ພລປ຺ປຕ຺ຕາ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໓໐. ໂສຠິໂຕ ວຣສມ຺ພຸທ຺ໂຘ, ສີຫາຣາມມ຺ຫິ ນິພ຺ພຸໂຕ;

ຘາຕຸວິຕ຺ຖາຣິກໍ ອາສິ, ເຕສຸ ເຕສຸ ປເທສໂຕຕິ.

ໂສຠິຕສ຺ສ ຠຄວໂຕ ວໍໂສ ຉຏ຺ໂຐ.