໗. ເຣວຕພຸທ຺ຘວໍໂສ

໑. ສຸມນສ຺ສ ອປເຣນ, ເຣວໂຕ ນາມ ນາຍໂກ;

ອນູປໂມ ອສທິໂສ, ອຕຸໂລ ອຸຕ຺ຕໂມ ຊິໂນ.

໒. ໂສປິ ຘມ຺ມໍ ປກາເສສິ, ພ຺ຣຫ຺ມຸນາ ອຠິຍາຈິໂຕ;

ຂນ຺ຘຘາຕຸວວຕ຺ຖານໍ, ອປ຺ປວຕ຺ຕໍ ຠວາຠເວ.

໓. ຕສ຺ສາຠິສມຍາ ຕີຓິ, ອເຫສຸໍ ຘມ຺ມເທສເນ;

ຄຓນາຍ ນ ວຕ຺ຕພ຺ໂພ, ປຐມາຠິສມໂຍ ອຫຸ.

໔. ຍທາ ອຣິນ຺ທມໍ ຣາຊໍ [ຣາຊານໍ (ກ.)], ວິເນສິ ເຣວໂຕ ມຸນິ;

ຕທາ ໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໕. ສຕ຺ຕາຫໍ ປຏິສລ຺ລານາ, ວຸຏ຺ຐຫິຕ຺ວາ ນຣາສໂຠ;

ໂກຏິສຕໍ ນຣມຣູນໍ, ວິເນສິ ອຸຕ຺ຕເມ ຜເລ.

໖. ສນ຺ນິປາຕາ ຕໂຍ ອາສຸໍ, ເຣວຕສ຺ສ ມເຫສິໂນ;

ຂີຓາສວານໍ ວິມລານໍ, ສຸວິມຸຕ຺ຕານ ຕາທິນໍ.

໗. ອຕິກ຺ກນ຺ຕາ ຄຓນປຖໍ, ປຐມໍ ເຍ ສມາຄຕາ;

ໂກຏິສຕສຫສ຺ສານໍ, ທຸຕິໂຍ ອາສິ ສມາຄໂມ.

໘. ໂຍປິ [ໂຍ ໂສ (ສ຺ຍາ. ກໍ. ກ.)] ປຎ຺ຎາຍ ອສໂມ, ຕສ຺ສ ຈກ຺ການຸວຕ຺ຕໂກ;

ໂສ ຕທາ ພ຺ຍາຘິໂຕ ອາສິ, ປຕ຺ໂຕ ຊີວິຕສໍສຍໍ.

໙. ຕສ຺ສ ຄິລານປຸຈ຺ຉາຍ, ເຍ ຕທາ ອຸປຄຕາ ມຸນີ;

ໂກຏິສຫສ຺ສາ ອຣຫນ຺ໂຕ, ຕຕິໂຍ ອາສິ ສມາຄໂມ.

໑໐. ອຫໍ ເຕນ ສມເຍນ, ອຕິເທໂວ ນາມ ພ຺ຣາຫ຺ມໂຓ;

ອຸປຄນ຺ຕ຺ວາ ເຣວຕໍ ພຸທ຺ຘໍ, ສຣຓໍ ຕສ຺ສ ຄຎ຺ຉຫໍ.

໑໑. ຕສ຺ສ ສີລໍ ສມາຘິຎ຺ຈ, ປຎ຺ຎາຄຸຓມນຸຕ຺ຕມໍ;

ໂຖມຍິຕ຺ວາ ຍຖາຖາມໍ, ອຸຕ຺ຕຣີຍມທາສຫໍ.

໑໒. ໂສປິ ມໍ ພຸທ຺ໂຘ ພ຺ຍາກາສິ, ເຣວໂຕ ໂລກນາຍໂກ;

‘‘ອປຣິເມຍ຺ຍິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໓. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໔. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໕. ຕທາປິ ຕໍ ພຸທ຺ຘຘມ຺ມໍ, ສຣິຕ຺ວາ ອນຸພ຺ຣູຫຍິໍ;

ອາຫຣິສ຺ສາມິ ຕໍ ຘມ຺ມໍ, ຍໍ ມຍ຺ຫໍ ອຠິປຕ຺ຖິຕໍ.

໑໖. ນຄຣໍ ສຸຘຎ຺ຎວຕີ ນາມ [ສຸຘມ຺ມກໍ ນາມ (ສີ.), ສຸຘຎ຺ຎກໍ ນາມ (ສ຺ຍາ.)], ວິປຸໂລ ນາມ ຂຕ຺ຕິໂຍ;

ວິປຸລາ ນາມ ຊນິກາ, ເຣວຕສ຺ສ ມເຫສິໂນ.

໑໗. ຉ ຈ ວສ຺ສສຫສ຺ສານິ [ຉພ຺ພສ຺ສສຫສ຺ສານິ (ສີ. ສ຺ຍາ.)], ອຄາຣໍ ອຊ຺ຌ ໂສ ວສິ;

ສຸທສ຺ສໂນ ຣຕນຄ຺ຆິ, ອາເວໂຬ ຈ ວິຠູສິໂຕ;

ປຸຎ຺ຎກມ຺ມາຠິນິພ຺ພຕ຺ຕາ, ຕໂຍ ປາສາທມຸຕ຺ຕມາ.

໑໘. ເຕຕ຺ຕິໍສ ຈ ສຫສ຺ສານິ, ນາຣິໂຍ ສມລງ຺ກຕາ;

ສຸທສ຺ສນາ ນາມ ນາຣີ, ວຣຸໂຓ ນາມ ອຕ຺ຣໂຊ.

໑໙. ນິມິຕ຺ເຕ ຈຕຸໂຣ ທິສ຺ວາ, ຣຖຍາເນນ ນິກ຺ຂມິ;

ອນູນສຕ຺ຕມາສານິ, ປຘານໍ ປທຫີ ຊິໂນ.

໒໐. ພ຺ຣຫ຺ມຸນາ ຍາຈິໂຕ ສນ຺ໂຕ, ເຣວໂຕ ໂລກນາຍໂກ;

ວຕ຺ຕິ ຈກ຺ກໍ ມຫາວີໂຣ, ວຣຸຓາຣາເມ ສິຣີຆເຣ.

໒໑. ວຣຸໂຓ ພ຺ຣຫ຺ມເທໂວ ຈ, ອເຫສຸໍ ອຄ຺ຄສາວກາ;

ສມ຺ຠໂວ ນາມຸປຏ຺ຐາໂກ, ເຣວຕສ຺ສ ມເຫສິໂນ.

໒໒. ຠທ຺ທາ ເຈວ ສຸຠທ຺ທາ ຈ, ອເຫສຸໍ ອຄ຺ຄສາວິກາ;

ໂສປິ ພຸທ຺ໂຘ ອສມສໂມ, ນາຄມູເລ ອພຸຊ຺ຌຖ.

໒໓. ປທຸໂມ ກຸຎ຺ຊໂຣ ເຈວ, ອເຫສຸໍ ອຄ຺ຄຸປຏ຺ຐິກາ;

ສິຣີມາ ເຈວ ຍສວຕີ, ອເຫສຸໍ ອຄ຺ຄຸປຏ຺ຐິກາ.

໒໔. ອຸຈ຺ຈຕ຺ຕເນນ ໂສ ພຸທ຺ໂຘ, ອສີຕິຫຕ຺ຖມຸຄ຺ຄໂຕ;

ໂອຠາເສຕິ ທິສາ ສພ຺ພາ, ອິນ຺ທເກຕຸວ ອຸຄ຺ຄໂຕ.

໒໕. ຕສ຺ສ ສຣີເຣ ນິພ຺ພຕ຺ຕາ, ປຠາມາລາ ອນຸຕ຺ຕຣາ;

ທິວາ ວາ ຍທິ ວາ ຣຕ຺ຕິໍ, ສມນ຺ຕາ ຜຣຕິ ໂຍຊນໍ.

໒໖. ສຏ຺ຐິວສ຺ສສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໗. ທສ຺ສຍິຕ຺ວາ ພຸທ຺ຘພລໍ, ອມຕໍ ໂລເກ ປກາສຍໍ;

ນິພ຺ພາຍິ ອນຸປາທາໂນ, ຍຖຄ຺ຄຸປາທານສງ຺ຂຍາ.

໒໘. ໂສ ຈ ກາໂຍ ຣຕນນິໂຠ, ໂສ ຈ ຘມ຺ໂມ ອສາທິໂສ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໒໙. ເຣວໂຕ ຍສຘໂຣ ພຸທ຺ໂຘ, ນິພ຺ພຸໂຕ ໂສ ມຫາປຸເຣ;

ຘາຕຸວິຕ຺ຖາຣິກໍ ອາສິ, ເຕສຸ ເຕສຸ ປເທສໂຕຕິ.

ເຣວຕສ຺ສ ຠຄວໂຕ ວໍໂສ ປຎ຺ຈໂມ.